Omazire obwire burikwingana ki otegyereize Obukama bwa Ruhanga? Otwire ogumisiriize n’obu haraabe hariho oburemeezi? (Rom 8:25) Ab’eishe-emwe abamwe nibangwa, nibatwarizibwa kubi, nibateebwa omu bihome, nari nibabatiinatiinisa kubaita. Abandi baingi nibagumisiririza okugyezibwa endwara ezitarikurahuka kukira nari emyaka ya bukuru.

Niki ekiraatuhwere kuguma tugumisirize n’obu turaabe nituhikwaho oburemeezi? Twine kuhamya okwikiriza kwaitu turikushoma Baibuli buri izooba kandi tukateekateeka aha bi turikushoma. Twine kuta omutima aha matsiko agu twine. (2Kor 4:16-18; Heb 12:2) Twine kweshengyereza Yehova kutuha omwoyo gwe ogurikwera kurabira omu kushaba. (Luk 11:10, 13; Heb 5:7) Tataitwe orikutukunda naabaasa kutuhwera “kugumisiriza omuri byona twine okushemererwa.”​—Kol 1:11.

MUREEBE VIDIYO TWINE KWIRUKA N’OKUGUMISIRIZA​—GIRA OBUHAME NGU NOIJA KUTUNGA EKICONCO, REERO MUGARUKYEMU EBIBUUZO EBI:

• Ni ‘bihikiirizi’ ki ebirikubaasa kubaho? (Mub 9:11)

• Okushaba nikutuhwera kuta twaba twine oburemeezi?

• Twaba tutakibaasa kukora bingi omu kuheereza Yehova, ahabw’enki twine kuta omutima aha ki turikubaasa kukora?

• Niki ekirikukuhwera kuguma noomanya ngu nooza kutunga ekiconco?