EBI ABAKRISTAAYO TWINE KUKORA
Okwongyera Kubuurira Gye—Okureka Kwegyesa Abeegi ba Baibuli Abatarikutunguuka
AHABW’ENKI KIRI KIKURU: Kubaasa kujunwa, abantu baine kutakira eiziina rya Ruhanga. (Rom 10:13, 14) Kwonka, ti buri omwe orikwikiriza kwega Baibuli ngu naija kugyendera aha mitindo ya Yehova. Nitukoresa gye obwire bwaitu omu kubuurira turikuhwera abo abarikwenda kukora empindahinduka omu mitwarize yaabo kubaasa kushemeza Yehova. Omwegi wa Baibuli yaaba atarikutunguuka bwanyima y’obwire buringaniire, n’eky’obwengye kurekyera aho kumwegyesa reero tukakoresa obwire bwaitu kuhwera abu Ruhanga arikweyiriza haihi hamwe n’ekibiina kye. (Yoh 6:44) Bwanyima omuntu yaakora empindahinduka kandi akooreka ngu aine ekyetengo ky’okutunga “amagara agatahwaho,” nitugaruka nitutandika kumwegyesa Baibuli.—Byak 13:48.
OKU ORIKUBAASA KUKIKORA:
-
Siima ou orikwegyesa Baibuli ahabw’okwenda kumanya amazima.—1Tim 2:4
-
Mworekye obukuru bw’okugyendera aha bi arikwega.—Luk 6:46-49
-
Omu muringo gw’embabazi mugaaniire aha ky’okureeberaho kya Yesu eky’omubibi, kandi noobaasa kumuhwera kuteekateeka aha kirikumuremesa kukora empindahinduka.—Mat 13:18-23
-
Omu muringo gw’obwengye shoboorora ahabw’eki nooza kurekyera aho kumwegyesa Baibuli
-
Noobaasa kumumanyisa ngu nooza kuguma n’omutaayaayira kumugumya kandi ngu nimubaasa kugaruka kwega yaakora empindahinduka
MUREEBE VIDIYO, REERO MUGARUKEMU EBIBUUZO EBI:
-
Waareeba ki omu vidiyo ekyayorekire ngu omwegi akaba atarikutunguuka omu by’omwoyo?
-
Omubuurizi akahwera ata omwegi kwetegyereza ngu akaba aine kukora empindahinduka?
-
Omubuurizi akooreka ata ngu omu biro by’omumaisho omwegi yaaba naayenda, nibabaasa kugaruka kwega?