Omu bibiina byaitu harimu ab’eishe-emwe na banyaanyazi-itwe abaheereize Yehova kumara emyaka mingi. Nitubaasa kubeegyeraho oku babaasize kuguma bahamiire ahari Yehova. Nitubaasa kubabuuza aha byafaayo by’ekibiina kya Yehova, oburemeezi obu batungire n’oku Yehova abahwereire kusingura. Nitubaasa n’okubeeta omu Kuramya kwaitu okw’Eka kutugambira ebi barikumanya.

Waaba ori Omukristaayo oheereize Yehova kumara emyaka mingi, ba oyeteekateekire kugambira abandi oku Yehova akuhwereire. Yakobo na Yosefu bakagambira ab’eka yaabo ebi Yehova yaabakoreire. (Kut 48:21, 22; 50:24, 25) Bwanyima Yehova akaragiira emitwe y’amaka kwegyesa abaana baabo eby’okutaagaanza ebi yaakozire. (Bir 4:9, 10; Zab 78:4-7) Omu bunaku obu, abazaire n’abandi omu kibiina nibabaasa kugambira abato ebintu ebirungi ebi bareebire Yehova naakora kurabira omu kibiina kye.

MUREEBE VIDIYO OKUGUMA TWINE OBUMWE OMURIMO GWAITU GWAZIBIRWA, REERO MUGARUKYEMU EBIBUUZO EBI:

• Ofiisi y’eitaagi eya Austria ekahwera eta ab’eishe-emwe omu mahanga agamwe ahu omurimo gwaitu gwabaire guzibiirwe?

• Ab’eishe-emwe omu mahanga ago bakarinda bata okwikiriza kwabo kuhami?

• Ahabw’enki ab’eishe-emwe baingi omuri Romania baayetaaniise aha kibiina kya Yehova, kandi bakagaruka bata?

• Ebi byona nibihamya bita okwikiriza kwawe?