Omu Kwamwenda, nituza kuteeraho munonga kutandika kwegyesa buri muntu Baibuli, turikukoresa akatabo Yesiimire Amagara Ebiro Byona! Ababuurizi nibabaasa kucwamu kuba baapayoniya abahwezi barikubuurira eshaaha 30. Nituza kukora tuta kampeyini y’omutaano egi?

• Twaba Nitubuurira ogw’Okubanza: Koresa ebiri enyima y’akatabo kureetera omuntu kugira ekihika ky’okwega, reero omworekye oku turikwegyesa Baibuli. Ijuka n’abaabaire baayorekire ngu nibenda kwega, otwariiremu abu waabaire noogarukira. N’obu baraabe bayangire kwega omu kubanza, nibabaasa kukunda akatabo kaitu akasya n’omuringo musya ogu turikwegyesamu hati. Akatabo aka titwine kukatsiga omu maka ahu tutarashange abantu nari kukoheerereza abantu abaabaire bangire kwega. Akakiiko k’Obuheereza ak’Ekibiina nikabaasa kutebeekanisa kwongyera aha nteerane z’okubuurira omu kwezi okwo.

• Emiringo Endiijo: Ekibiina kyanyu kyaba nikikoresa akagaari, muteho akatabo Yesiimire Amagara Ebiro Byona! Manyisa abaraatware akatabo ako ngu nitukakoresa kwegyesa abantu Baibuli hatariho kushashura. Boorekye omu bugufu oku turikwegyesa abantu Baibuli omu katabo ako, nari tebeekanisa kukikora obundi. Orikukora aha by’obuheereza naabaasa kutebeekanisa ababuurizi abarikubaasa, kubuurira omu myanya y’eby’obushuubuzi kutandika kwegyesa abantu Baibuli. Noobaasa kutandika kwegyesa Baibuli abu orikukora nabo nari abu orikubuurira kitaraariire.

Yesu akaturagiira ‘kuhindura abantu abeegi,’ kandi ‘tukabegyesa.’ (Mat 28:19, 20) Nitushaba ngu kampeyini y’omutaano egi etuhwere kuhikiiriza ekigyendererwa eki, turikukoresa Yesiimire Amagara Ebiro Byona!