Nitukoresa gye amaani gaitu twataho ebigyendererwa by’omwoyo. (1Kor 9:26) Ebigyendererwa nibituhwera kukoresa gye obwire bukye obusigaireyo emperu y’ensi egi etakahikire. (Efe 5:15, 16) Omu kuramya kwanyu kw’eka, nimubaasa kugamba aha bigyendererwa ebi murikwenda kutaho omu mwaka gw’obuheereza omusya. Kubaasa kubahwera, akatabo k’enteerane aka karimu ebicweka ebirikugamba aha bigyendererwa ebimwe ebi murikubaasa kuteekateekaho mukashaba Yehova kubahwera.—Yak 1:5.

Nk’eky’okureeberaho, eka neebaasa kukwatanisa kuhwera omwe aha b’omu ka kuba payoniya ow’obutwire. Waaba otarikuhamya yaaba noobaasa kuhitsya eshaaha ezirikwetengyesa, gamba na baapayoniya abamwe abari omu mbeera nk’eyaawe. (Enf 15:22) Noobaasa kubuuza payoniya omu kuramya kwanyu kw’eka. Reero ohandiikye entebeekanisa erikukubaasikira. Ku oraabe waabaire ori payoniya enyima, noobaasa kuteekateeka aha kugaruka kuba payoniya hati embeera yaawe yaaba neekubaasisa.

Bamwe aha b’omu ka yaawe nibabaasa kuba baapayoniya abahwezi kumara okwezi kumwe nari n’okurengamu. Waaba oine amagara mabi, noobaasa kuba payoniya omuhwezi orikumara obwire bukye omu kubuurira buri izooba. Waaba otarikutunga obwire burikumara kubuurira ahagati ya saabiiti ahabw’okugira ngu noomara obwire bwingi aha murimo nari aha ishomero, noobaasa kutoorana okwezi okwine ebiro bikuru nari wiikenda itaano. Handiika aha karenda obu orikwenda kuba payoniya omuhwezi kandi ohandiikye n’entebeekanisa yaawe.—Enf 21:5.

MUREEBE VIDIYO BA PAYONIYA EMANZI, REERO MUGARUKYEMU EKIBUUZO EKI:

• Eky’okureeberaho kya munyaanyazi-itwe Aamand nikitwegyesa ki aha ku Yehova arikukunda kandi akareeberera abarikwefeerereza kuba baapayoniya?