Baibuli neeyoreka ngu Sitaane akaba naija kutuhiiganisa arikuteeraho kuturemesa kubuurira. (Yoh 15:20; Kush 12:17) Nitubaasa kuhwera tuta Abakristaayo bagyenzi baitu abarikuhiiganisibwa omu mahanga agandi? Nitubaasa kubashabira. “Okushaba kw’ohikiriire kugira amaani maingi omu kukora kwakwo.”—Yak 5:16.

Nitubaasa kushaba ki? Nitubaasa kushaba Yehova kuha ab’eishe-emwe obumanzi kandi akabahwera kutatiina. (Isa 41:10-13) Nitubaasa kushaba ngu abategyeki batateganisa omurimo gw’okubuurira, kugira ngu “tubone kugira obusingye tutebeekane.”—1 Tim 2:1, 2.

Paulo na Petero bakahiiganisibwa, Abakristaayo ab’omu kyasha ky’okubanza bakaba babashabira barikugamba n’amaziina gʼabo. (Byak 12:5; Rom 15:30, 31) N’obu twakuba tutarikumanya maziina gaabo boona abariyo nibahiiganisibwa, nitubaasa kugamba ekibiina, nari ihanga ryabo.