Teekateeka, nootuura omuri Galilaaya omu bwire bwa Yesu. Waaza Yerusaalemu aha Bugyenyi bw’Ensiisira. Orurembo rwijwiremu ab’eishe-emwe bagyenzi baawe abaija kutaayaaya barikuruga hare munonga. Nooyenda kuhayo ekitambo kyawe ahari Yehova. Otwara embuzi, otandika orugyendo kuza aha hekalu obwo orikuraba omu tuhanda tufunzire oturi omu rurembo orurimu abantu baingi. Ku waahika aha hekalu, waashangayo abandi abaija kutamba ebitambo byabo. Hati, n’obwire bwawe bw’okuhayo embuzi yaawe aha munyamurwa. Omu kaanya ako, oijuka ngu ow’eishe-emwe mugyenzi waawe, orikubaasa kuba ari aho omu bantu baingi nari omu rurembo orwo, aine eki arikufa naiwe. Yesu naashoborora eki oshemereire kukora. (Shoma Matayo 5:24.) Iwe n’ow’eishe-emwe ou otwariize kubi nimubaasa kurinda muta obusingye nk’oku Yesu yaagambire? Omu biri ahaifo, ta akamanyiso aha ky’okugarukamu ekihikire.

OSHEMEREIRE . . .

• kugamba n’ow’eishe-emwe mugyenzi waawe waaba nooteekateeka ngu aine enshonga ehikire emureetaire kuguubwa kubi

• kuteeraho kuhindura aha emiteekateekyere y’ow’eishe-emwe mugyenzi waawe waaba nooteekateeka ngu naarahuka kuguubwa kubi nari naata orubanja aha bandi

• kuhurikiza ow’eishe-emwe yaaba naakugambira oku arikwehurira, n’obu waakuba otarikwetegyereza byona, mushabe okusaasirwa oyihire aha mutima ahabw’okumugwisa kubi nari ahabw’ebirugire omu kumushobeza otakigyendereire

OW’EISHE-EMWE OGWO ASHEMEREIRE . . .

• kusherura obuhabuzi ah’ab’omu kibiina arikubagambira oku omushobiize

• kukugambira byona ebi omushobiize, kandi oikirize ngu okozire enshobe

• kwetegyereza obucureezi n’obumanzi ebi ogizire kubaasa kumugambira, kandi akusaasire aihire aha mutima

N’obu okuramya kwaitu obunaku obu kutarikutwariramu okutamba enyamaishwa, Yesu akaba naayegyesa ki aha kakwate akari ahagati y’okurinda obusingye n’ab’eishe-emwe n’okuramya okurikusiimwa Ruhanga?