Ahabw’enki nitushemererwa kuza omu nteerane zaitu empango ezirikubaho buri mwaka? Nk’oku kyabaire kiri omuri Israeli eya ira, enteerane empango obunaku obu nizituha omugisha gw’okuramya Yehova turi hamwe n’ab’eishe-emwe baingi. Nitukunda eby’okurya by’omwoyo ebi turikutunga ebirikutuhwera kuguma turi haihi na Yehova. Kandi nitushemererwa ahabw’obwire obu turikumara na banywani baitu n’ab’omu ka yaitu. Nitworeka okusiima turikubaho ebiro byona bishatu eby’oruteerane oruhango.

Haaba hariho omugisha gw’okuba hamwe, titushemereire kuteekateeka aha ku turikugasirwamu kyonka kureka n’aha ku turikubaasa kworeka ngu nitukunda abandi. (Gal 6:10; Heb 10:24, 25) Twakwata emyanya ei turikwetenga yonka, nitworeka ngu nitufayo n’aha bandi. (Fil 2:3, 4) Enteerane ezi nizitubaasisa kutunga abanywani basya. Oruteerane rutakatandikire na rwahwa, nari omu bwire bwa kyamushana, nitubaasa kuteeraho kugaaniira n’ou tutarikumanya. (2Kor 6:13) Abanywani abu turikutunga omu bwire obwo nibabaasa kuba banywani baitu ebiro byona! Okukira munonga, abarikutureeba nitugirirana rukundo, nibabaasa kucwamu kutwegaitaho kuheereza Yehova.—Yoh 13:35.

MUREEBE VIDIYO ENTEERANE EMPANGO EZIRIKUBAMU N’AB’AMAHANGA AGANDI EZAABAIRE ZIINE OMUTWE ‘RUKUNDO TERIKUHWAHO’!, REERO MUGARUKYEMU EBIBUUZO EBI:

• Aha nteerane empango ezirikubamu ab’amahanga agandi eze 2019 ab’eishe-emwe bakooreka bata ngu nibakunda abagyenyi abaabaire nibaruga omu mahanga agandi?

• Ahabw’enki obumwe na rukundo ebi abaheereza ba Yehova baine biri eby’omutaano?

• Abari aha Kakiiko Akareeberezi bakagamba ki ahari rukundo y’Ekikristaayo?

• Rukundo ekabaasisa eta ab’eishe-emwe b’omuri Germany na South Korea kugira obumwe?

• Twine kumariirira kukora ki?