N’obu Abakristaayo baraabe batari hansi y’Ebiragiro bya Musa, ebiragiro bibiri ebikuru​—okukunda Ruhanga n’abataahi—​nibyoreka eki Yehova arikwenda ngu tukore. (Mat 22:37-39) Rukundo egi titurikuzaarwa nayo. Twine kuteeraho kugira rukundo egi. Tuta shi? Omuringo gumwe omukuru n’okushoma Baibuli buri izooba. Twamanya emitwarize ya Yehova etari emwe nk’oku erikworekwa omu Byahandiikirwe, nitureeba “oburungi bwa” Yehova. (Zab 27:4) Ekirikurugamu, nitwongyera kumukunda kandi nitugira emiteekateekyere nk’eye. Eki nikituhiga kworobera ebiragiro bya Ruhanga, otwariiremu n’ekiragiro ky’okugirira abandi rukundo y’okwefeerereza. (Yoh 13:34, 35; 1Yoh 5:3) Hariho ebintu bishatu ebiraatuhwere kukunda kushoma Baibuli:

• Teera akashushani, kandi oteho omutima. Teera akashushani ngu oriyo. Okaareebire ki, okaahurire ki, kandi okaakagire ki? Abarikugambwaho baine nyehurira ki?

• Koresa emiringo etari emwe. Noobaasa kukora kimwe ahari ebi: Shoma omu iraka eririkuhurirwa, nari kuratira ebikwatsirwe omu maraka waaba nooshoma. Shoma ebirikukwata aha muntu orikugambwaho omu Baibuli nari eshuura zimwe omu mwanya gw’okuzikuratanisa. Nk’eky’okureeberaho, waaba nooshoma ebirikukwata ahari Yesu, koresa Ebyongyeirweho A7 nari B12 ebiri omu New World Translation of the Holy Scriptures. Shoma eshuura yoona ahu ekyahandiikirwe ky’eizooba kiihirwe. Shoma ebitabo by’omu Baibuli nk’oku birikukuratana.

• Shoma Kwetegyereza. Okushoma eshuura emwe buri izooba kwetegyereza kandi okateekateeka aha bi waashoma nikikira okushoma eshuura nyingi otarikwetegyereza. Yetegyereze oku bitebeekanisiibwe. Yetegyereze oku bishobooroirwe. Koresa maapu n’ebijuriziibwe. Condooza aha bi otayetegyereza. Kyabaasika, koresa obwire nk’obu orikukoresa kushoma, kuteekateeka aha bi waashoma.