Juba Yehova naaza kurekyera aho kugumisiririza ensi egi embi. Ediini y’ebishuba neeza kucwekyerezibwa, amahanga agaraabe gakwataniise hamwe nigaza kutaahirira abaheereza ba Yehova, kandi Yehova naaza kucwekyereza abantu ababi ahari Haramagedoni. Abakristaayo baine ekihika ky’okureeba ebintu ebyo ebikuru kandi ebirikushemeza birikubaho.

Kwonka, titurikumanya byona ebirikukwata aha kubonabona kwingi. Nk’eky’okureeberaho, titurikumanya obunaku bwenyini obu kuraatandikye. Titurikumanya enshonga ezi ab’obutegyeki baraayihirireho kutaahirira ediini. Titurikumanya obwire obu amahanga garaamare garikutaahirira abaheereza ba Ruhanga nari ebiraabe nibitwarirwamu. Titurikumanya kyenyini eki Yehova araakorese kucwekyereza abantu ababi ahari Haramagedoni.

Kwonka, Ebyahandiikirwe nibitworeka obutumwa bwona oburikwetengyesa kubaasa kugira obwesigye n’obumanzi aha biraabeho omu biro by’omumaisho. Nk’eky’okureeberaho, nitumanya ngu turi omu biro ebirikuhererukayo ‘eby’emperu.’ (2Tim 3:1) Nitumanya ngu okutaahirira nikwija ‘kucuubwa’ bugufu kugira ngu ediini ey’amazima etacwekyerezibwa. (Mat 24:22) Nitumanya ngu Yehova naaza kujuna abaheereza be. (2Pet 2:9) Kandi nitumanya ngu Ou Yehova yaatooraine kucwekyereza ababi n’okurinda ab’omutwe omuhango ahari Haramagedoni ahikiriire kandi aine amaani.—Kush 19:11, 15, 16.

Ebiraabeho omu bwire bw’omumaisho nibiija kureetera ‘abantu kuhahaaza emitima ahabw’obwoba.’ Kwonka, twashoma kandi tukateekateeka aha bikorwa bya Yehova eby’okujuna ebya ira n’ebi arikutumanyisa aha biro by’omumaisho, nitubaasa ‘kureeba ahaiguru twimutsye emitwe yaitu,’ twine obwesigye ngu okucungurwa kwaitu kuri haihi.—Luk 21:26, 28.