Omwana yaija aha rwigi, tushemereire kumugambira kweta abazaire be. Eki nikyoreka ngu nituha omutwe gw’eka ekitiinisa. (Enf 6:20) Omwana yaagira ngu tutaahemu, titushemereire kutahamu. Abazaire baaba batarimu, tushemereire kugaruka omu shaaha ezindi nari eizooba erindi.

Omwana yaaba ari mukuru, aine emyaka eri ahagati ya ikumi n’etaano na ikumi na mwenda, nabwo nikiba kiri eky’oburyo kubanza kugamba n’abazaire be. Abazaire baaba batarimu, nitubaasa kumubuuza yaaba abazaire be nibamwikiriza kushoma kyona eki arikwenda. Baaba nibamwikiriza, nitubaasa kumuha eky’okushoma nangwa n’okumworeka oku arikubaasa kukoresa jw.org.

Twaba nitugarukayo aha munyeeto oyorekire ngu naayenda kumanya ebirikukiraho, tushemereire kuteeraho kugamba n’abazaire be. Eki nikiija kutuhwera kubagambira ekigyendererwa kyaitu n’okubooreka obuhabuzi burungi oburi omu Baibuli oburikukwata aha maka. (Zab 119:86, 138) Twaha abazaire ekitiinisa kandi tukooreka ngu nitubafaho nikiija kutubaasisa kutunga emigisha endiijo y’okugambira ab’omu ka egyo amakuru marungi.—1Pet 2:12.