Yesu akabaasa kubuurira Omusamariakazi kitaraariire ahabw’okuba akatandika kugaaniira nawe. Nitubaasa tuta kutandika kugaaniira n’abantu abu tutarikumanya?

• Yoreka ngu nookunda abantu orikugaaniira nabo. N’obu Yesu yaabaire aruhire, akatandika kugaaniira arikushaba amaizi. Noobaasa kutandika n’endamutsyo, bwanyima ogambe nk’aha mbeera y’obwire nari ebibaireho omu bwire obwo. Ijuka ngu ekigyendererwa ekikuru n’okutandika kugaaniira, n’ahabw’ekyo gamba aha kintu ekirikubaasa kushemeza omuntu ogwo. Yaaba atakuhurikiize otahwamu amaani. Teeraho kugaaniira n’ondiijo. Shaba Yehova kukuha obumanzi.​—Neh 2:4; Byak 4:29.

• Teeraho kumanya obu orikubaasa kugamba aha makuru marungi, kwonka otarahukiiriza. Tandika orikugaaniira omu muringo gwa butoosha. Waagyemesereza omuntu, naabaasa kuteehurira gye kandi ayange kugamba naiwe. Otahwamu amaani waahendera kugaaniira n’omuntu otakamubuurire. Waaba nootiina kubuurira kitaraariire, teeraho kutandika kugaaniira n’abantu otaine kigyendererwa ky’okubabuurira. [Yoreka vidiyo 1 kandi mugigaaniireho.]

• Teeraho kugaaniira n’omuntu aha bi orikwikiriza ebirikubaasa kumuhiga kwenda kumanya ebirikukiraho. Yesu akagamba ebintu ebirikushemeza ebyareeteire omukazi yaamubuuza ebibuuzo. N’ahabw’ekyo obu yaabaire naatandika kumugambira aha makuru marungi, akaba naagarukamu ebibuuzo bye. [Yoreka vidiyo 2 kandi mugigaaniireho, bwanyima oyorekye vidiyo 3 nayo mugigaaniireho.]