Abantu ab’obujunaanizibwa nibeesigwa. Nibakuratiriza emirimo ebahairwe kukora kandi bagiheza omu bwire.

N’abaana bato omu kubaasa kwabo kukye, nibabaasa kutandika kwega kuba ab’obujunaanizibwa. “Okubaasa kw’okukwatanisa n’abandi nikutandikira aha meezi ataano, kandi ekyetengo ky’okwenda kuhwera nikitandikira aha meezi ikumi na munaana,” ekitabo Parenting Without Borders nikwo kirikugira. “Omu mahanga maingi abazaire nibatandika kusiima obuhwezi bw’abaana baabo baahitsya emyaka etaano kuhika ahari mushanju, kandi abaana bato bati nibahwererera kimwe omu mirimo mingi y’aha ka.”

Abaana b’ebiro ebi nibakira kwetwara nk’abantu bakuru reero baruga omu ka kuza kutuura boona, kwonka baaremwa nibagaruka omu maka g’abazaire baabo. Obumwe, eki nikibaho ahabw’okugira ngu omunyeeto takeegyesibwaga enkoresa nungi y’esente, kureeberera eka, nari kuhikiiriza obujunaanizibwa obwa butoosha.

N’ahabw’ekyo, ni kirungi kutendeka abaana baawe kwetebeekanisiza obujunaanizibwa bwa bukuru. “Toine kubareka bakaguma nibakwegamiraho kuhitsya obu baraahitsye emyaka ikumi na munaana, reero bwanyima okabatambika omu nsi,” ekitabo How to Raise an Adult nikwo kyagizire.

Muhe eby’okukora.

OMUSINGYE GWA BAIBULI: ‘Omu kufa kubi okw’emiringo yoona harimu omugasho.’​—Enfumu 14:23.

Abaana nibakunda kukorera hamwe n’abazaire baabo. Noobaasa kukoresa omugisha kuha abaana baawe eby’okukora aha ka.

Abazaire abamwe eki nibatimwimwa kukikora. Nibagira ngu abaana abarikushoma nibaheebwa bingi eby’okukorera omuka buri izooba, n’ahabw’ekyo toine kuboongyeraho omugugu?

Kwonka, abaana abarikukora emirimo, nibaba baine omugisha gw’okuba abasinguzi aha ishomero, obu emirimo erikubahwera kwikiriza obujunaanizibwa n’okuhendera ebi bahairwe. Kandi, yetegyereze oku ekitabo Parenting Without Borders, kirikukira ngu “twahehuzya ekyetengo ky’abaana eky’okwenda kukora baaba bakiri bato, nibabaasa kugira emiteekateekyere ngu okuhwera abandi aha mirimo ti kikuru . . . Nibatandika n’okuteekateeka ngu nibaija kuguma nibabakorera emirimo.”

Nk’oku ebijuriziibwe ebyo birikworeka, okukora emirimo nikitendeka abaana kuba abahwezi omu mwanya gw’okuriira akooya, kandi nibeega kuha abandi omu mwanya gw’okuguma nibaheebwa. Emirimo neehwera abaana kumanya ngu baine omwanya gw’omugasho omuka, kandi ngu baine n’obujunaanizibwa omuka. Hwera abaana baawe kwikiriza obujunaanizibwa bw’enshobe zaabo.

Hwera abaana baawe kwikiriza obujunaanizibwa bwabo.

OMUSINGYE GWA BAIBULI: “Guma ohurire enaama, oikirize okuhaburwa, obone kugira obwengye omu biro by’omumaisho.”​—Enfumu 19:20.

Abaana baawe baakora enshobe, nk’eky’okureeberaho mutabani waawe nari muhara waawe yaashiisha ekintu ky’ondiijo, yetantare kushwekyerera ekyabaho. Abaana nibabaasa kwikiriza ebirikurugamu, kandi bashabe okusaasirwa nangwa n’okushashura ebi baashiisha.

Abaana baawe okwemera enshobe zaabo nikiija kubeegyesa

• kuba ab’amazima n’okwikiriza enshobe zaabo

• kwetantara kuta aha bandi orubanja

• kwetantara kwekwatsakwatsa

• kushaba okusaasirwa, kyaba nikibaasika