1. (a) Yefusa na Hanna bakaba nibashushanisa ki? (Reeba ekishushani aha kutandika.) (b) Ni bibuuzo ki ebirikuza kugarukwamu omu kicweka eki?

YEFUSA akaba ari omwebembezi emanzi kandi omurwani otarikutiina. Hanna akaba ari omukazi omucureezi owaabaire naareeberera iba n’eka ye. Yefusa na Hanna bombi bakaba nibaramya Yehova. Kwonka haine ekindi eki baabaire nibashushanisa. Bombi bakaraganisa Yehova, kandi bombi bakahikiiriza ebi baaraganiise. Bakateeraho eky’okureeberaho kirungi abantu abarikwenda kuraganisa Yehova. Ka tushwijume eby’okugarukamu by’ebibuuzo ebi bishatu: Okuraganisa niki? Okuraganisa Ruhanga ni kikuru kita? Nitubaasa kwegyera ki ahari Yefusa na Hanna?

2, 3. (a) Okuraganisa niki? (b) Ebyahandiikirwe nibigamba ki aha kuraganisa Ruhanga?

² Omu Baibuli, okuraganisa n’endahiro ezi turikukora omu maisho ga Ruhanga. Nk’eky’okureeberaho, omuntu naabaasa kuraganisa Yehova ngu naija kugira eki yaakora, kuhayo ekiconco, kugira obuheereza obu yaazamu, nari kugira ebintu ebi yaayetantara. Omuntu naayecweramu kuraganisa. Tihaine orikugyemwa kuraganisa. Kwonka omuntu ku  arikucwamu kukikora, Yehova naareeba okuraganisa okwo nka kukuru okwine kuhikiirizibwa. Omu Baibuli, okuraganisa ni kukuru nk’okurahira. Endahiro n’ebigambo ebi omuntu arikukoresa arikurahira kukora ekintu nari kutakikora. (Okutandika 14:22, 23; Abaheburaayo 6:16, 17) Baibuli neeyoreka eta obukuru bw’okuraganisa Ruhanga?

³ Omu biragiro ebyahairwe Musa, nihooreka ngu omuntu ku ariraganisa Yehova “atariita egyo ndahiro ye, kureka ahikiirize ekyamurugire omu kanwa kyona.” (Okubara 30:2) Bwanyima, Sulemaani akahandiika ati: “Ku orirahira nooraganisa ahari Ruhanga, otarikyerererwa kukihikiiriza; ahabw’okuba tashemerererwa bashema. Ogume ohikiirize eki oraganiise.” (Omubuurizi 5:4) Yesu akeegyesa ngu okuraganisa ni kikuru obu yaagira ati: ‘Kikaragiirwa aba ira ngu: Otariirahira ebishuba, kureka oryahikiiriza ahari Mukama ebi waarahiire.’—Matayo 5:33.

4. (a) Okuraganisa Ruhanga ni kikuru kita? (b) Nituza kwega ki ahari Yefusa na Hanna?

⁴ Nikireebwa butunu ngu twine kutwara ebi turikuraganisa Yehova nka bikuru. Oku turikutwara ebi turikuraganisa nikikwata aha mukago gwaitu nawe. Daudi akooreka gye eki, obu yaabuuza ati: “N’oha oritemba aha kibungo kya Mukama? Kandi oryemerera omu mwanya gwe ogurikwera n’oha?” Kandi akagarukamu ngu Yehova naasiima ogwo “otarahira by’obugobya.” (Zaaburi 24:3, 4) Yefusa na Hanna bakarahira kukora ki? Mbwenu shi kikaba kiboorobeire kuhikiiriza okuraganisa kwabo?

5. Yefusa akaraganisa ki, kandi niki ekyarugiremu?

⁵ Yefusa akaraganisa Yehova obu yaabaire naaza kurwanisa Abaamoni. Abaheereza ba Ruhanga bakaba nibatwara Abaamoni nk’abazigu baabo. (Abaramuzi 10:7-9) Yefusa akeeshengyereza Yehova kumubaasisa kusingura Abaamoni kandi akaraganisa ngu “buzimazima ku oraaheyo Abaamoni omu mikono yangye, ku nditabaaruka gye ninduga kurwanisa Abaamoni, ekiribanza kushohora omu muryango gw’enju yangye kumbugana, kiryaba ekya” Yehova. Yehova akagarukamu okushaba kwa Yefusa, kandi yaamuhwera kusingura orutaro. Yefusa ku yaagarukire omuka, muhara we ou yaabaire naakunda munonga niwe yaizire kumubugana. Niwe yaabaire naija kuheebwayo kuba “ekya” Yehova. (Abaramuzi 11:30-34) Eki kikaba nikimanyisa ki ahari muhara wa Yefusa?

6. (a) Mbwenu shi kikaba kyorobeire Yefusa n’omuhara kuhikiiriza okuraganisa kwabo ahari Ruhanga? (b) Ebiri omu Eky’Ebiragiro 23:21, 23 na Zaaburi 15:4 nibitwegyesa ki aha kuraganisa?

⁶ Muhara wa Yefusa kubaasa kuhikiiriza okuraganisa kwa ishe, akacwamu kugyenda kuza kuheereza aha ihema obwire bwona. Mbwenu shi Yefusa akaraganisa atabandize kuteekateeka? Ngaaha. Nangwa, Yefusa naabaasa kuba yaateekateekire ngu omuhara niwe araabanze kwija kumubugana. Kwonka  yaaba Yefusa yaabaire naakimanya nari ngaaha, okuhikiiriza eki yaaraganiise Yehova kikaba kitoorobi ahariwe n’omuhara. Yefusa ku yaareebire omuhara, akagira ngu akamugwisiza akagwe. Omuhara akagyenda “yaacurira obuhangare bwe” nari shi okushugaana kwe. Ahabw’enki? Yefusa akaba ataine mutabani, kandi omuhara wenka ou yaabaire aine akaba atarikwija kushwerwa akazaara abaana. Eiziina rya Yefusa rikaba niriija kuhwaho yaaheza kufa. Kwonka Yefusa n’omuhara bakareeba ngu hariho ekintu kikuru ekirikukira enyehurira zaabo. Yefusa akagira ati: “Nkaashamya akanwa kangye ahari Mukama, tinkibaasa kukireka.” Omuhara akagira ati: “Ongire nk’ekyarugire omu kanwa kaawe oku kiri.” (Abaramuzi 11:35-39) Yefusa n’omuhara bakaba bari abeesigwa abaabaire batarikubaasa kuhenda eki baraganiise Ruhanga, n’obu kiraabe kyabaire kibagumiire kukihikiiriza.—Shoma Eky’Ebiragiro 23:21, 23; Zaaburi 15:4.

7. (a) Hanna akaraganisa ki, kandi hakarugamu ki? (b) Okuraganisa kwa Hanna kukaba nikwija kukwata kuta ahari Samueli? (Reeba obugambo obw’ahansi.)

⁷ Hanna obu yaabaire aine amaganya maingi nibwo yaaraganisa Yehova. Akaba aine obusaasi ahakuba akaba atarikuzaara, kandi akaba naarahurwa ahabw’enshonga egyo. (1 Samueli 1:4-7, 10, 16) Akagambira Yehova oku yaabaire naayehurira, reero yaaraganisa arikugira ngu ai Yehova “ow’amahe, ku oraareebe okubonabona kw’omuzaana waawe, waanyijuka, otaanyebwa, waampa omwana w’omwojo, ndyamukuhongyera, abe owaawe ebiro byona ebi arimara omu nsi, kandi orumweiso tirurimuraba ha mutwe.” * (Reeba obugambo obw’ahansi.) (1 Samueli 1:11) Yehova akahurikiza okushaba kwa Hanna, kandi omwaka ogwakuratsireho, akazaara omwana w’omwojo, orikwetwa Samueli. Hanna akashemererwa munonga! Kwonka tarayebirwe eki yaaraganiise Yehova. Ku yaaherize kuzaara omwana w’omwojo, akagira ati: “Nkamushaba” Yehova.—1 Samueli 1:20.

8. (a) Mbwenu shi kikaba kyorobeire Hanna kuhikiiriza okuraganisa kwe? (b) Ebiri omu Zaaburi 61 nibikwijutsya bita eky’okureeberaho kirungi kya Hanna?

⁸ Samueli ku yaabaire aine emyaka nk’eshatu, Hanna akakora nk’oku yaabaire araganiise Yehova. Akakwata Samueli yaamutwarira Eli Omunyamurwa Omukuru aha ihema omuri Shiilo reero yaagira ati: “Omwana ogu nkamushaba Mukama; kandi agarukiremu okushaba kwangye; nikyo naamuhongyerera Mukama; ebiro byona ebi arimara omu nsi, aryaguma ahongyeirwe Mukama.” (1 Samueli 1:24-28) Kuruga obwo, Samueli akaguma naatuura aha ihema. Baibuli neegira ngu ‘omwana ogwo Samueli akakurira omu maisho ga’ Yehova. (1 Samueli 2: 21) Nikibaasa kuba kyabaire kitoorobeire Hanna kuhikiiriza eki yaaraganiise. Kikaba nikimanyisa ngu akaba atarikwija kuguma naasiiba n’omutabani ogwo ou yaabaire naakunda munonga. Akaba naija kufeerwa kuguma naamureeba arikukura. Kwonka Hanna akatwara eki yaaraganiise Yehova nka kikuru. Akaba ayeteekateekire kwefeerereza ebintu bikuru kubaasa kuhikiiriza eki yaaraganiise Yehova.—1 Samueli 2:1, 2; shoma Zaaburi 61:1, 5, 8.

9. Nituza kwongyera kugaaniira ahari ki?

⁹ Hati obu turikumanya oku kiri kikuru okuraganisa Yehova, ka tushwijume ebibuuzo ebi: Nitubaasa kuraganisa ki ebiro ebi? Tushemereire kumariirira tuta kuhikiiriza ebi turikuraganisa?

10. Ni kuraganisa ki okukuru oku Omukristaayo arikubaasa kukora, kandi nikutwariramu ki?

¹⁰ Okuraganisa kukuru kw’Omukristaayo n’okw’okuhayo amagara ge ahari Yehova. Omuntu arikushaba kandi ari wenka naaraganisa Ruhanga kumuheereza ebiro byona n’obu haakubaho ki. Yesu akagira ngu ‘tweyangise’ nari tube tutakyeyineho obushoboorozi, ekirikumanyisa okuraganisa kwebembeza okukora ebi Yehova arikukunda  omu mwanya gw’ebyaitu. (Matayo 16:24) Kuruga aha izooba eryo, nituba “turi aba” Yehova. (Abarooma 14:8) Okwehayo kwaitu nitukutwara nka kukuru. Nitwehurira nk’omuhandiiki wa Zaaburi owaagizire ati: “N’enki eki ndizimuurira Mukama, ahabw’ebirungi bye byona ebi yaankoreire? Ndyahikiiriza ebi naahigire ahari Mukama, ndi omu maisho g’abantu be boona.”—Zaaburi 116:12, 14.

11. Niki ekyabaireho aha eizooba eri waabatiziibweho?

¹¹ Waayehaireyo ahari Yehova kandi okakyoreka orikubatizibwa omu maizi? Ku oraabe waakikozire, ekyo ni kikuru munonga! Noijuka ow’eishe-emwe obu yaaha orubazo rw’abarikuza kubatizibwa, reero akabuuza yaaba waayehaireyo ahari Yehova, kandi yaaba nooyetegyereza ngu “okwehayo n’okubatizibwa kwawe nibyoreka ngu ori Omujurizi wa Yehova”? Ku waagarukiremu ngu eego, buri omwe owaabaire ariho akamanya ngu oyehaireyo, kandi ngu ohikire kubatizibwa okaba omuheereza wa Yehova. Oshemereire kuba waareeteire Yehova okushemererwa!

12. (a) Ni bibuuzo ki ebi tushemereire kwebuuza? (b) Entumwa Petero akatuhiga kugira mitwarize ki?

¹² Ku waabatiziibwe, okaraganisa Yehova ngu noija kumuheereza n’amagara gaawe goona, kandi ngu noija kukora kyona eki orikubaasa kugyendera aha mitindo ye. Kwonka okubatizibwa n’entandikwa. Haahinguraho obwire, twena twine kugumizamu nitweshwijuma. Nitubaasa kubuuza tuti: ‘Omukago gwangye na Yehova gutwire nigweyongyera kwiha naabatizibwa? Ninkimuheereza n’omutima gwangye gwona? (Abakolosai 3:23) Ninshaba obutoosha? Ninshoma Baibuli buri izooba? Ninza omu nteerane ntarikwosha? Ninkira kwejumba omu kubuurira? Nari ebi byona tinkibiniire muhimbo?’ Entumwa Petero akaturabura ngu nitubaasa kuhwamu amaani omu kuheereza Yehova. Nitubaasa kwetantara eki kubaho twateeraho munonga kugira okwikiriza kuhami, okumanya, okugumisiriza, n’okworobera Ruhanga.—Shoma 2 Petero 1:5-8.

13. Omukristaayo oyehaireyo kandi obatiziibwe aine kumanya ki?

¹³ Twaheza kuraganisa kuheereza Yehova, nituba tutakibaasa kukigarura enyima. Omuntu orikuruha kuheereza Yehova nari kuba Omukristaayo, bwanyima tarikubaasa kugira ngu buzima akaba ateehaireyo ahari Yehova, kandi ngu n’okubatizibwa kwe kukaba kutahikire. * (Reeba obugambo obw’ahansi.) Omuntu oyehaireyo ahari Yehova yaakora ekibi ky’amaani, naaba naajunaanizibwa ahari Yehova n’ekibiina. (Abarooma 14:12) Titurikwenda kuba nk’abo abu Yesu yaagambireho ngu ‘bakareka okukunda kwabo okw’okubanza.’ Omu mwanya gw’ekyo, nitwenda ngu atugambeho ati: ‘Nimmanya emirimo yaanyu, n’okukunda kwanyu n’okwikiriza n’okuheereza n’okugumisiriza kwanyu, kandi nimmanya ngu emirimo yaanyu eya bwanyima neekira eby’okubanza.’ (Okushuuruurwa 2:4, 19) Nitwenda kushemeza Yehova turikuba abeeziriki tukahikiiriza okwehayo kwaitu.

14. Okuraganisa kwa kabiri oku omuntu arikubaasa kukora ni kuuha kandi ahabw’enki?

¹⁴ Okuraganisa kwa kabiri okw’omuntu  arikubaasa kukora, n’okw’obushwere. Obushwere n’oburikwera. Yehova naareeba okuraganisa kw’obushwere nk’enshonga nkuru. Abagore ku barikurahira, nibaba nibaragaana omu maisho ga Yehova n’abo abarikuba bariho. Nk’eky’okureeberaho, Abajurizi ba Yehova ku barikutaaha omu bushwere, nibaraganisa kukundana, kufaanaho, n’okuhaana ekitiinisa ebiro byona ebi barikuba bakiri abahuriire ahabw’entebeekanisa ya Ruhanga ey’obushwere. Abamwe nibabaasa kutakoresa ebigambo ebi byenyine, kwonka nabwo nibaraganisa omu maisho ga Ruhanga. Ku barikuheza kuteera ebiragaano ebi, nibaba omushaija n’omukazi. Obushwere bushemereire kuba obw’ebiro byona. (Okutandika 2:24; 1 Abakorinso 7:39) Yesu akagira ati: “Eki Ruhanga yaateeraine hamwe, omuntu atarikitaanisa.” Omushaija n’omukazi baataaha omu bushwere, tibashemereire kuteekateeka ngu obushwere bwabo bwaba butarikugyenda gye omu kubanza, ngu bashemereire kugaitururwa.—Mako 10:9.

15. Ahabw’enki Abakristaayo batashemereire kureeba obushwere nk’oku ab’ensi barikubureeba?

¹⁵ Kwonka nk’oku hatariho abantu abahikiriire, tihariho obushwere obuhikiriire. Niyo nshonga ahabw’enki Baibuli neegira ngu abantu abarikutaaha omu bushwere nibaija kugira “obusaasi” obumwe n’obumwe. (1 Abakorinso 7:28) Omu nsi obunaku obu, abantu baingi baine emiteekateekyere egwire aha bushwere. Nibateekateeka ngu ebintu byaba bitagyenzire gye, nibabaasa kuburugamu. Kwonka Abakristaayo tikwo barikureeba batyo obushwere. Nibaijuka ngu bakaragaana omu maisho ga Ruhanga. Baahenda endagaano egyo, nibaba bari nk’abarikubeiha Ruhanga, kandi Ruhanga naayanga ababeihi. (Abaleevi 19:12; Enfumu 6:16-19) Abakristaayo abari omu bushwere bashemereire kwijuka ebigambo by’entumwa Paulo: “Okateeranwa n’omukazi? Oteetenga kutaanisibwa.” (1 Abakorinso 7:27) Paulo akabaasa kugamba atyo ahakuba akaba naamanya ngu Yehova naayanga okugaitururwa kw’oburyarya.—Malaki 2:13-16.

16. Baibuli neegamba ki aha kugaitururwa n’okwangana?

¹⁶ Yesu akeegyesa ngu enshonga emwe yonka y’okugaitururwa kurugiirira aha Byahandiikirwe, n’obushambani bw’omwe aha bari omu bushwere, obwo otashambaine yaaba atacwiremu kusaasira oshambaine. (Matayo 19:9; Abaheburaayo 13:4) Kandi shi omuntu kwangana akaruga omu bushwere? Nabwo Baibuli neeyoreka gye enshonga egi. (Shoma 1 Abakorinso 7:10, 11.) Omu Byahandiikirwe tiharimu enshonga eshemereire kureetera omuntu kwangana. Kwonka, obumwe nihabaasa kubaho embeera Omukristaayo areebe ngu buzima aine kwangana akaba atsigireho ou ari nawe omu bushwere. Nk’eky’okureeberaho, abamwe nibabaasa kuba nibahamya ngu amagara gaabo, nari omukago gwabo na Yehova guri omu kabi k’amaani baaguma omu bushwere n’omuntu orikubatwariza kubi nari oyehagwire aha mazima. * (Reeba obugambo obw’ahansi.)

17. Omushaija n’omukazi Abakristaayo nibabaasa kukora ki kuhamya obushwere bwabo?

¹⁷ Omushaija n’omukazi we baashaba abareeberezi  obuhabuzi oku barikubaasa kushemeza obushwere, abareeberezi nibabaasa kubabuuza yaaba baareebire vidiyo What Is True Love? kandi ku baraabe baayegire akatabo Eka Yaanyu Neebaasa Kubamu Okushemererwa. Ebi birimu emisingye erikubaasa kuhwera obushwere kuhama. Omushaija n’omukazi we bakagira bati: “Kuruga tutandika kwega akatabo aka, obushwere bwaitu bubairemu okushemererwa kukira enyima.” Munyaanyazi-itwe owaabaire amazire emyaka 22 ashweirwe obushwere bwe bukaba buri haihi kushenyuka. Akacwamu kureeba vidiyo What Is True Love? Naagira ati: “Twembi tubatiziibwe, kwonka tukaba tutarikushushanisa enyehurira. Vidiyo egi ekaija omu bwire buhikire! Hati twembi nitukora gye.” N’ahabw’ekyo omushaija n’omukazi we baagyendera aha misingye ya Yehova omu bushwere bwabo, nibagira omukago murungi, kandi nibashemererwa.

18, 19. (a) Abazaire baingi Abakristaayo bakozire ki? (b) Abari omu buheereza bw’obutwire obw’omutaano nibahamira bata aha kuraganisa kwabo?

¹⁸ Twaheza kugamba aha kuraganisa kwa Yefusa na Hanna. Ahabw’okuraganisa oku, bombi muhara wa Yefusa na mutabani wa Hanna bakaheereza omu buheereza bw’omutaano obw’obutwire amagara gaabo goona. Abazaire Abakristaayo abaingi nibahiga abaana baabo kuza omu buheereza obw’obutwire kugira ngu bate omutima gwabo aha kuheereza Yehova. Kandi naitwe nitubaasa kuhiga eminyeeto egi kugumizamu n’obuheereza obu.—Abaramuzi 11:40; Zaaburi 110:3.

¹⁹ Obunaku obu, hariho Abajurizi ba Yehova nka 69,000 abari omu Buheereza bw’omutaano obw’obutwire. Abamwe nibaheereza aha Beseeli, nari omu murimo gw’okwombeka nari okutaayaayira ebibiina. Abamwe nibeegyesa omu mashomero g’obuheereza, ni baapayoniya ab’omutaano, abamiisani, nibaheereza omu kwombeka Ebyombeko by’enteerane empango n’ahandi. Buri omwe aharibo naarahira “Endahiro y’Okworoba n’Okutasherura by’Obutungi.” Omu kuraganisa kwabo, nibarahira kukora n’amaani emirimo erikubaheebwa omu kuheereza Yehova, kumarwa n’ebintu biringaniire, n’okutakora emirimo y’okwebaisaho okwihaho baaheebwa orusa. Abantu aba tibo barikutwarwa nk’ab’omuhendo kureka obuheereza bwabo. Nibamariirira kuhikiiriza okuraganisa kwabo baaba bakiri omu buheereza obu.

20. Tushemereire kutwara tuta ebi turikuraganisa Ruhanga, kandi n’ahabw’enki?

²⁰ Omu kicweka eki, twagamba aha miringo eshatu ei turikubaasa kuraganisamu Ruhanga. Obundi noobaasa kuba naiwe waaraganiise Ruhanga. Nitumanya ngu tushemereire kutwara okuraganisa kwaitu nka kukuru, kandi tushemereire kukora ekirikubaasika kyona kukuhikiiriza. (Enfumu 20:25) Twaba tutahikiriize ebi turaganiise Yehova, nihabaasa kurugamu ebibi bingi. (Omubuurizi 5:6) N’ahabw’ekyo ka tube nk’omuhandiiki wa zaaburi owaagizire ati: ‘Ndyayeshongora eby’okuhimbisa eiziina ryawe ebiro byona, nkahikiiriza obutoosha ebi naaraganiise nimpiga.’—Zaaburi 61:8.