1-3. Nabi owaarugire Yuda akakora ki, kandi hakarugamu ki? (Reeba ekishushani aha kutandika.)

OMUGABE YEROBOAMU owa Israeli akaba ataireho eitambiro ry’okuramya kw’ebishuba omu rurembo rwa Beseeli. Yehova akoohereza nabi kuruga Yuda kugambira Yeroboamu obutumwa bw’okucwerwa orubanja. Nabi ogwo omucureezi akoorobera Yehova yaatwara obutumwa obwo. Omugabe akagirira nabi ekiniga, kwonka nabi ogwo Yehova akamurinda.—1 Abagabe 13:1-10.

² Yehova akaba aragiire nabi kutarya nari kunywa ekintu kyona omuri Israeli, kandi akaba aine kuraba ogundi muhanda yaaba naagaruka omuka. Nabi ku yaabaire naagaruka owaabo, omushaija mukuru akamushanga omu muhanda yaamubeiha arikugira ngu nawe aine obutumwa kuruga ahari Yehova. Omushaija mukuru ogwo akeeta nabi kuza owe omuka akarya kandi akanywa. Nabi akagomera Yehova, yaagyenda n’omushaija mukuru. Ekyo tikirashemeize Yehova. Nabi ku yaabaire ari omu muhanda naataaha, ekicuncu kikamwita.—1 Abagabe 13:11-24.

³ Titurikumanya ahabw’enki nabi yaacwiremu kuhurikiza omushaija mukuru omu mwanya gw’okuhurikiza Yehova. Kwonka nitumanya  ngu taragumiizemu “n’obucureezi” arikugyenda na Yehova. (Shoma Miika 6:8.) Omu Baibuli, okugyenda na Yehova nikitwariramu okumwesiga, okumwikiriza kukuhabura, n’okumworobera. Omuntu omucureezi naamanya ngu aine kuguma naashaba. Ku ogire ngu nabi akaba ari omucureezi, akaba naija kubuuza Yehova ku araabe ahindwire obuhabuzi bwe. Obumwe naitwe nituba twine kucwamu aha nshonga ezigumire, kandi nitubaasa kutamanya gye eki Yehova arikwenda ngu tukore. Kwonka twaba turi abacureezi, nitwija kushaba Yehova kutuhabura reero twetantare kukora enshobe z’amaani.

4. Nituza kwega ahari ki omu kicweka eki?

⁴ Omu kicweka ekihwaire, twegire oku omuntu omucureezi arikwetwaza n’enshonga ahabw’enki kiri kikuru kuba abacureezi obunaku obu. Kwonka shi nitubaasa kwongyera tuta kuba abacureezi munonga? Kandi ni mbeera ki ezirikubaasa kugyeza obucureezi bwaitu, ekirikumanyisa embeera ezirikworeka ngu turi abacureezi nari tituri bacureezi? Hati ka tureebe embeera ishatu ahari ezi.—Enfumu 11:2.

5, 6. Baruzilai akooreka ata ngu n’omucureezi?

⁵ Oku turikutwaza embeera zaitu zaahinduka nari obuheereza bwaitu bwahinduka, nikubaasa kworeka yaaba buzima turi abacureezi. Nitubaasa kwegyera ahari Baruzilai, munywani w’Omugabe Daudi owaabaire amuhamiireho. Obu Baruzilai yaabaire aine emyaka 80, Daudi akamweta kwija kutuura omu kikaari kye eky’obugabe. N’obu eki kiraabe kyabaire kiri ekitiinisa ky’amaani, Baruzilai akagira ngu kikaabaire kirungi omugisha ogu kuguha omushaija orikwetwa Kimuhaamu, obundi owaabaire ari omutabani.—2 Samueli 19:31-37.

⁶ Ahabw’enki Baruzilai yaayangire okwetwa okwo? Mbwenu shi akaba naayetantara obujunaanizibwa nari akaba naayenda kuguma naakongora? Ngaaha, n’ahabw’okugira ngu Baruzilai akaba ari omucureezi. Akaba naamanya ngu embeera ze zihindukire, kandi akaba naamanya obugarukiro bwe. (Shoma Abagalatia 6:4, 5.) Nka Baruzilai, twine kuba abacureezi. Omu mwanya gw’okuta omutima aha bi turikwenda nari kwegyeragyeranisa n’abandi, nituta omutima aha kuha Yehova ekirikukirayo oburungi. Eki ni kikuru munonga kukira obuheereza bw’omutaano nari okumanywa munonga. (Abagalatia 5:26) Twaba turi abacureezi, nitwija kukorera hamwe n’ab’eishe-emwe kuhaisa Ruhanga ekitiinisa n’okuhwera abandi.—1 Abakorinso 10:31.

7, 8. Obucureezi nibubaasa kutuhwera buta kuteeyesiga?

⁷ Nikibaasa kuguma munonga kuguma ori omucureezi waayongyerwa obujunaanizibwa nari obushoboorozi. Nitubaasa kwegyera ahari Nehemia. Nehemia ku yaahuriire ngu abantu omuri Yerusaalemu baine oburemeezi bwingi, akeeshengyereza Yehova kubahwera. (Nehemia 1:4, 11) Yehova akagarukamu okushaba kwa Nehemia. Omugabe Arutagizakiseesi akahindura Nehemia omukungu omuri Buperesi. N’obu Nehemia araabe yaabaire aine obushoboorozi kandi ari omugaiga, akaba atarikweyesiga ekirenga. Akashaba Yehova kumuhabura kandi yaaguma naashoma Ebiragiro bya Yehova. (Nehemia 8:1, 8, 9) Nehemia akaba aine obushoboorozi aha bantu baingi. Kwonka akaba atarikukoresa obushoboorozi bwe kwegasira nari kutwariza kubi abandi.—Nehemia 5:14-19.

⁸ Nka Nehemia, twatunga obushoboorozi bwingi nari obuheereza bwaitu bwahinduka, twine kuhamya ngu twaguma turi abacureezi. Titurikwenda kwesiga okubaasa kwaitu  kwonka, nari okumanya kwaitu. Omuntu naabaasa kutandika ata kweyesiga? Nk’eky’okureeberaho, omureeberezi naabaasa kukora ebintu ebirikukwata aha kibiina atabandize kushaba. Nari Omukristaayo omushaija nari omukazi naabaasa kubanza yaacwamu, reero ashabe Yehova kuha omugisha okucwamu kwe. Kwonka omuntu omucureezi, tarikweyesiga n’obu yaakuba naakora ekintu eki atwire naakora emirundi mingi. Butoosha naijuka ngu okubaasa kwe tikurikubaasa kugyeragyeranisibwa n’okwa Yehova. (Shoma Enfumu 3:5, 6.) Omu nsi obunaku obu, abantu baingi nibeeyendeza, kandi nibenda kwetunguurira aha bandi. Kwonka abaheereza ba Yehova tikwo bari batyo. Titurikuteekateeka ngu okugira obujunaanizibwa nikitureetera kukira abandi omu ka nari omu kibiina. Omu mwanya gw’ekyo, nitwijuka omwanya gwaitu omu ntebeekanisa ya Ruhanga kandi tukora hamwe n’ab’eishe-emwe bagyenzi baitu.—1 Timoseo 3:15.

9, 10. Obucureezi nibubaasa kutuhwera buta abandi baatucwera orubanja omu muringo gutahikire?

⁹ Nikibaasa kutukora kubi omuntu yaatucwera orubanja omu muringo gutahikire. Eki kikahika ahari Hanna. N’obu iba araabe yaabaire naamukunda munonga, akaba ataine kushemererwa. Penina Muka iba, akaba naamujuma obwire bwona. Hanna akaba naayenda kuzaara abaana kwonka akaba ari engumba. Eizooba rimwe Hanna akaba aine enaku  nyingi, yaacwamu kuza omu ihema ry’okuramizamu kushaba. Omunyamurwa Omukuru Eli akamureeba naarira yaamucwera orubanja ngu asinzire! Hanna akaba naabaasa kugirira Eli ekiniga. Kwonka omu mwanya gw’ekyo, akagarukamu Eli omu muringo ogurikworeka ngu naamuha ekitiinisa. Bwanyima, Hanna akashaba Yehova kworeka ngu naamwikiriza kandi naamukunda.—1 Samueli 1:5-7, 12-16; 2:1-10.

¹⁰ Obucureezi nibubaasa kutuhwera kusingura ekibi turikukora ekirungi. (Abarooma 12:21) Ensi ya Sitaane eijwiremu ebintu bibi. N’ahabw’ekyo titushemereire kutangaara abantu baatutwariza kubi. N’obu eki kiraabe nikibaasa kutugwisa kubi, twine kurwanisa enyehurira egyo. (Zaaburi 37:1) Kandi nikibaasa kureeta obusaasi bwingi na munonga twaba twine oburemeezi n’ab’eishe-emwe omu kibiina. Ekyo kyabaho, twine kutooreza Yesu. Baibuli neegira eti: “Ku yaajumirwe, tiyaabagaruriza.” Omu mwanya gw’ekyo, “akeehayo ahari ogwo ocwa emanja z’amazima.” (1 Petero 2:23) Yesu akaba ari omucureezi kandi akaba naamanya ngu Yehova naija kwihaho obutari buringaaniza. (Abarooma 12:19) Kandi nitwenda kuba abacureezi turekye “kwihurana ebibi.”—1 Petero 3:8, 9.

11, 12. (a) Nitubaasa kuguma tuta turi abacureezi abandi baatuhimbisa nari baatukiniika? (b) Nitubaasa kworeka tuta ngu turi abacureezi kurugiirira aha ku turikujwara n’oku turikutwaza?

¹¹ Kandi obucureezi bwaitu nibubaasa kugyezibwa munonga abantu baatuhimbisa nari  baatukiniika. Esteeri akahimbisibwa munonga. Akaba ari omwe aha bakazi barungi munonga omuri Buperesi. Kumara omwaka gumwe bakaba nibamutetsa barikumuboneza hamwe n’abandi baishiki abaabaire nibaija kweyoreka omu maisho g’omugabe. Bwanyima omugabe akatoorana Esteeri kuba omugabekazi. Kwonka okumufaho oku kwona tikuramuhindwire. Esteeri akanga kwetaho munonga omutima. Akaguma ari omucureezi, omunyambabazi, kandi arikuha abandi ekitiinisa.—Esteeri 2:9, 12, 15, 17.

¹² Twaba turi abacureezi, nitwija kujwara kandi tutwaze omu muringo ogurikworeka ngu nitweha ekitiinisa kandi ngu nitukiha n’abandi. Omu mwanya gw’okwetunguura nari kuteeraho kushemeza abantu, nituteeraho kugira ‘omwoyo [omutima] omucureezi ogutuurize.’ (Shoma 1 Petero 3:3, 4; Yeremia 9:23, 24) Oku turikweteekateekaho nikwija kurugaho nikureebwa omu ku turikugamba n’ebikorwa byaitu. Nk’eky’okureeberaho, nitubaasa kuteeraho kureetera abandi kuteekateeka ngu turi ab’omutaano ahabw’ebi turikukora, ebi turikumanya, nari abantu abu turikumanya. Nari nitubaasa kureetera abandi kuteekateeka ngu tukozire ekintu kikuru munonga omu maani gaitu, n’obu abandi baakuba batuhwereire. Kwonka teekateeka ahari Yesu. Akaba naabaasa kushemeza abantu ahabw’obwengye obu yaabaire aine. Omu mwanya gw’ekyo, Yesu akaba ajuriza omu Kigambo kya Ruhanga. Akaba atarikwenda ngu abantu babe niwe baahimbisa. Butoosha akaba naayenda ngu abantu bahimbise Yehova.—Yohaana 8:28.

13, 14. Obucureezi nibubaasa kutuhwera buta kucwamu gye?

¹³ Twine kuba abacureezi twaba nitucwamu, nari abandi baacwamu ebirikutukwataho. Obu entumwa Paulo yaabaire naatuura omuri Kaisarea, akaba naayenda kuza Yerusaalemu kuheza omurimo ogu Yehova yaabaire amuhaire. Kwonka nabi Agabo akagambira Paulo ngu ku araagyende nibaija kumukwata. Kandi ngu akaba naabaasa n’okwitwa. Ab’eishe-emwe bakeshengyereza Paulo kutagyenda. Kwonka Paulo akacwamu kuza Yerusaalemu. Mbwenu shi n’ahabw’okugira ngu akaba naayeyesiga? Ngaaha, Paulo akaba ari omucureezi, kandi akaba naayesigira kimwe Yehova. Ab’eishe-emwe abo nabo bakaba bari abacureezi. N’ahabw’ekyo bakashagika eki Paulo yaacwiremu baamwikiriza kugyenda.—Ebyakozirwe 21:10-14.

¹⁴ Okuba abacureezi nikiija kutuhwera kucwamu gye nangwa n’obu turikuba tutarikubaasa kumanya nari kuzibira ebiraarugyemu. Nk’eky’okureeberaho, nitubaasa kuba nituteekateeka aha kuza omu buheereza obw’obutwire. Kwonka shi niki ekirikwija kubaho twarwara? Kandi abazaire baitu baarwara bakenda obuhwezi? Nitwija kukora ki twahika omu myaka ya bukuru? Titurikubaasa kutunga eby’okugarukamu byona eby’ebibuuzo ebi n’obu twakushaba kandi tukabiteekateekaho. (Omubuurizi 8:16, 17) Kwonka twaba nitwesiga Yehova, nitwija kumanya obugarukiro bwaitu kandi tubwikirize. Nitwija kushwijuma ebihikire, tugambire abandi kutuhabura, kandi okukira munonga, tushabe Yehova atuhe obuhabuzi oburikukirayo. Reero bwanyima nituba twine kukuratira obuhabuzi bw’omwoyo gwa Yehova ogurikwera. (Shoma Omubuurizi 11:4-6.) Yehova naabaasa kuha omugisha ebi turikucwamu, nari naabaasa kutuhwera kuhindura ebigyendererwa byaitu.—Enfumu 16:3, 9.

15. Okuteekateeka ahari Yehova nikituhwera kita kuguma turi abacureezi?

¹⁵ Nitubaasa kwongyera tuta kuba abacureezi? Nituza kushwijuma emiringo ena. Ogw’okubanza, twine kuteekateeka ahari Yehova, turikwijuka ngu ni Ruhanga ow’omuringo gw’ahaiguru. Twayegyeragyeranisa na Yehova, nitumanya ngu naatukirira kimwe, kandi ngu buzima nitumanya ebintu bikye munonga. (Isaaya 8:13) Ijuka ngu nituheereza Ruhanga ow’Obushoboorozi Bwona, beitu atari muntu nari maraika. Okuteekateeka ahari eki nikiija kutuhwera kwecureeza “ahansi y’omukono gwa Ruhanga ogw’amaani.”—1 Petero 5:6.

16. Okuteekateeka aha ku Ruhanga arikutukunda nikituhwera kita kweyongyera kuba abacureezi?

¹⁶ Omuringo gwa kabiri oku turikubaasa kweyongyera kuba abacureezi n’okuteekateeka munonga aha ku Yehova arikutukunda munonga. Paulo akagyeragyeranisa ekibiina aha mubiri gw’omuntu. Yehova akakora ebicweka by’omubiri byona biri eby’omuhendo. (1 Abakorinso 12:23, 24) Nikyo kimwe naitwe, buri omwe ahariitwe n’ow’omuhendo ahari Yehova. Tarikutugyeragyeranisa n’abandi, kandi tarikurekyera aho kutukunda twakora enshobe. Nitubaasa kuhurira twine oburinzi twamanya ngu Yehova naatukunda.

17. Nitwija kugasirwa tuta twaba nitureeba ebirungi omu bandi?

¹⁷ Omuringo gwa kashatu, nituba abacureezi munonga twareeba ebirungi omu bandi nk’oku Yehova arikubibareebamu. Omu mwanya gw’okuteeraho kwetaho omutima nari kugambira abandi eky’okukora, nitwija kubagambira kutuhabura, kandi twikirize ebiteekateeko byabo. (Enfumu 13:10) Nitushemererwa Abakristaayo abashaija n’abakazi bagyenzi baitu baaheebwa obuheereza bw’omutaano. Kandi nitusiima Yehova ahabw’okutwikiriza twena kumuheereza.—1 Petero 5:9.

18. Okutendeka omuntu waitu w’omunda nikiija kutuhwera kita kweyongyera kuba abacureezi?

¹⁸ Omuringo gwa kana, nitwija kweyongyera kuba abacureezi twakoresa emisingye ya Baibuli kutendeka omuntu waitu w’omunda. Emisingye egi neetwegyesa oku Yehova arikwehurira n’oku arikuteekateeka. Twayega kureeba ebintu nk’oku Yehova arikubireeba, nitubaasa kucwamu ebirikumushemeza. Twayega, tukashaba, kandi tukagyendera aha bi turikwega, omuntu waitu w’omunda naija kweyongyera kuhama. (1 Timoseo 1:5) Nitwega kwebembeza eby’abandi. Twakora ebintu ebi, Yehova naaraganisa ngu naija kumariiriza okutendekwa kwaitu, otwariiremu n’okutuhwera kwongyera kuba abacureezi.—1 Petero 5:10.

19. Niki ekirikwija kutuhwera kuguma turi abacureezi ebiro byona?

¹⁹ Noijuka nabi kuruga Yuda ou twagambaho aha kutandika kw’ekicweka eki? Akafeerwa amagara ge n’omukago gwe na Yehova ahabw’okugira ngu taragumire ari omucureezi. Kwonka nitubaasa kuguma turi abacureezi n’obu kyakuba kigumire kukikora. Eby’okureeberaho by’abaheereza ba Yehova baingi abeesigwa, nibyoreka gye ngu nikibaasika. Oku turikweyongyera kumara obwire bwingi nituheereza Yehova, nikwo tushemereire kweyongyera kumwesiga. (Enfumu 8:13) N’obu twakuba turi mu mbeera ki, nitubaasa kugyenda na Ruhanga. Eki nikyo kitiinisa ekirikukirayo eki turikubaasa kutunga. N’ahabw’ekyo ka tukore buri kimwe ekirikubaasika kuguma turi abacureezi, kandi tugyende na Yehova ebiro byona.