1, 2. Ahabw’enki Ruhanga yaarugire ahari Saulo? (Reeba ekishushani aha kutandika.)

OBU Yehova yaatoorana Saulo kuba omugabe, Saulo akaba ari omucureezi. (1 Samueli 9:1, 2, 21; 10:20-24) Kwonka bwanyima y’okuba omugabe, akagira omweragiiro. Eizooba rimwe, enkumi z’Abafilistia bakaija kurwanisa Abaisraeli. Nabi Samueli akaba agambiire Saulo ngu naija kwija aheyo ekitambo ahari Yehova. Kwonka Samueli atakaizire, Abaisraeli bakatiina, baingi aharibo baahunga ahari Saulo. Saulo omu mwanya gw’okutegyereza Samueli kwija kuhayo ekitambo, akaremwa kugumisiriza yaaba niwe yaakihayo. Saulo akaba ataine bushoboorozi bw’okuhayo ekitambo, kandi eki tikirashemeize Yehova.—1 Samueli 13:5-9.

² Samueli ku yaizire, akahana Saulo ahabw’okugomera Yehova. Saulo akaba atarikuteekateeka ngu yaakora ekintu kigwire. Akateeraho kusherura rwekwatso, kandi akata n’orubanja aha bandi ahabw’enshobe ze. (1 Samueli 13:10-14) Kuruga obwo, Saulo akeeragiira kukora ebindi bintu bingi. N’ahabw’ekyo Yehova akamwangira kuguma ari omugabe. (1 Samueli 15:22, 23) Saulo akatandika gye kwonka akahendera kubi.—1 Samueli 31:1-6.

3. (a) Abantu baingi baine miteekateekyere ki aha bucureezi? (b) Nituza kugarukamu bibuuzo ki?

 ³ Abantu baingi obunaku obu nibateekateeka ngu tibarikubaasa kuba abacureezi reero bakaba abasinguzi, nari bakagira emirimo mirungi. Nibaba nibeehimbisa ngu nibakira abandi. Nk’eky’okureeberaho, omushaija orikuzaana emizaano kandi ow’eby’obutegyeki akagira ati: “Obucureezi ti kigambo ekirikunkwataho omu muringo gwona, kandi ningira ngu tihariho obu kirinkwataho.” Kwonka shi ahabw’enki ni kikuru Omukristaayo kuba omucureezi? Okuba omucureezi nikimanyisa ki, kandi niki eki kitarikumanyisa? Omu kicweka eki, nitwija kugarukamu ebibuuzo ebi. Kandi omu kirikukurataho, nitwija kureeba oku turikubaasa kugumizamu kuba abacureezi n’obu kiraabe kitoorobi kukikora.

4. Omweragiiro niki?

⁴ Baibuli neeyoreka ngu amaryo nari omweragiiro nigutaana n’obucureezi. (Shoma Enfumu 11:2.) Daudi akeeshengyereza Yehova ati: “Ozibire omwiru waawe kukora ebibi [ebikorwa by’omweragiiro] nkana.” (Zaaburi 19:13) Omweragiiro niki? N’okukora ekintu eki tutarikwikirizibwa kukora nari eki tutaine bushoboorozi bw’okukora, obundi ahabw’okuremwa kugumisiriza nari ahabw’amaryo. Obumwe twena nitugira omweragiiro tukora ekintu ahabw’okugira ngu turi abatahikiriire. Kwonka nk’oku kyabaire aha Mugabe Saulo, gwaba omuze, Yehova tarikutusiima. Zaaburi 119:21 nihagira ngu Yehova naija ‘kuhana ab’amaryo [ab’omweragiiro.]’ Ahabw’enki naakikora?

5. Ahabw’enki okugira omweragiiro eri enshobe y’amaani?

⁵ Eky’okubanza kya byona, twakora ekintu ahabw’omweragiiro, nitworeka ngu titurikuha ekitiinisa Yehova Ruhanga kandi Omutegyeki waitu. Enshonga ya kabiri, twakora ebintu ebi tutaine bushoboorozi bw’okubikora, nitubaasa kutongana n’abandi nari tugire obutaikirizana nabo. (Enfumu 13:10) Enshonga ya kashatu, nitubaasa kureebeka nk’abashema, abandi baamanya ngu twakora ekintu ky’omweragiiro. (Luka 14:8, 9) Buzima, hati nitureeba gye ahabw’enki Yehova naayenda ngu tube abacureezi.

6, 7. Omuntu omucureezi naayetwaza ata?

⁶ Omuntu omucureezi naayetwaza ata? Omukristaayo omucureezi naaba ataine mwemanyo nari amaryo kwonka naatwara abandi nk’abarikumukira. (Abafilipi 2:3) Naaba naamanya ngu aine obugarukiro, kandi naacureera aikiriza enshobe ze. Naaba ayeteekateekire kuhurikiza ebiteekateeko by’abandi kandi akagira eki yaabeegyeraho. Omuntu omucureezi naashemeza munonga Yehova.

⁷ Baibuli neeyoreka ngu omuntu omucureezi naamanya obugarukiro bwe, kandi naamanya ngu hariho ebi atarikubaasa kukora nari ebi atarikwikirizibwa kukora. Eki nikimuhwera kuha abandi ekitiinisa, kandi akabatwariza omu muringo gw’embabazi.

8. Kubaasa kuguma turi abacureezi, ni miteekateekyere ki ei twine kwetantara?

⁸ Nitubaasa kutandika kutwaza omu muringo gw’omweragiiro tutakimanyire. Eki nikibaasa kubaho kita? Nitubaasa kutandika  kwetwara nk’ab’omuhendo kukira abandi ahabw’okugira ngu twine obujunaanizibwa omu kibiina nari ahabw’okugira ngu abu turikumanya nibo babwine. (Abarooma 12:16) Nari nitubaasa kutandika kweteekateekaho munonga. (1 Timoseo 2:9, 10) Nitubaasa n’okutandika kugambira abandi eki baine kukora nari eki bataine kukora.—1 Abakorinso 4:6.

9. Ahabw’enki abamwe nibagira omweragiiro? Ha eky’okureeberaho ky’omu Baibuli.

⁹ Nitubaasa kutandika kutwaza omu muringo gw’okweragiira twaba tuteerinzire ebyetengo bitahikire. Abamwe bagizire omweragiiro ahabw’okwenda kuheebwa ekitiinisa, ahabw’okugirira abandi eihari, nari ahabw’okutarinda kiniga kyabo. Eki nikyo kyahikire ahari bamwe abarikugambwaho omu Baibuli, nka Abusalomu, Uziya, na Nebukadeneeza. Yehova akabooreka butunu ngu bakaba baine kuba abacureezi.—2 Samueli 15:1-6; 18:9-17; 2 Obusingye 26:16-21; Danieli 5:18-21.

10. Ahabw’enki tushemereire kwegyendesereza kubanganisa aha bigyendererwa by’abandi? Ha eky’okureeberaho ky’omu Baibuli.

¹⁰ Nihabaasa kuba hariho enshonga ezindi ahabw’enki abantu obumwe batarikuba bacureezi. Teekateeka ahari Abimeleki na Petero. (Okutandika 20:2-7; Matayo 26:31-35) Mbwenu shi abashaija aba bakaba baine omweragiiro? Nari bakaba batarikumanya amazima goona, nari bakakora ebintu batabandize kuteekateeka? Obu tutarikubaasa kucaaka emitima, titushemereire kubanganisa aha bigyendererwa by’abandi.—Shoma Yakobo 4:12.

11. Niki eki twine kwetegyereza?

¹¹ Omuntu omucureezi naamanya obujunaanizibwa bwe omu ntebeekanisa ya Ruhanga. Yehova ni Ruhanga w’obuteeka. Ahaire buri omwe omu kibiina obujunaanizibwa. Twena nitwetengwa omu kibiina. Yehova atuhaire ebiconco bitarikushushana, emyoga, etalanta, n’okubaasa, kandi naatwikiriza kwecweramu oku turaabikorese. Twaba turi abacureezi, nitwija kukoresa ebiconco byaitu omu muringo ogu Yehova arikwenda ngu tubikorese. (Abarooma 12:4-8) Nitumanya ngu Yehova naayenda ngu tubikorese kumuhaisa ekitiinisa n’okuhwera abandi.—Shoma 1 Petero 4:10.

12, 13. Tushemereire kwijuka ki haabaho empindahinduka omu buheereza bwaitu?

¹² Eki turikukora omu buheereza bwa Yehova haahinguraho obwire nikibaasa kuhinduka. Nk’eky’okureeberaho, teekateeka aha mpindahinduka nyingi ezi Yesu yaarabiremu omu buheereza bwe. Akabanza kutuura na Ishe omu iguru bari bombi. (Enfumu 8:22) Bwanyima akahwera Yehova kuhanga baamaraika, eby’omu mwanya, ensi, n’abantu. (Abakolosai 1:16) Ku haahingwireho obwire, akooherezibwa omu nsi. Akazaarwa ari omwereere, reero yaakura yaaba omuntu mukuru. (Abafilipi 2:7) Bwanyima Yesu ku yaafiire, akazoorwa yaagaruka omu iguru, kandi omuri 1914 akaba Omugabe w’Obukama bwa Ruhanga. (Abaheburaayo 2:9) Kuruga obwo, akaheebwa obushoboorozi omu iguru n’omu nsi. (Matayo 28:18) Kandi omu biro by’omumaisho, Yesu ku araaheze kutegyeka nk’Omugabe kumara emyaka rukumi, naija kugarurira Ruhanga Obukama, “Ruhanga abone kuba byona ahari boona.”—1 Abakorinso 15:28.

¹³ Naitwe nitubaasa kuhikwaho empindahinduka nyingi. Obumwe obujunaanizibwa bwaitu nibubaasa kuhinduka ahabw’okucwamu kwaitu. Nk’eky’okureeberaho,  noobaasa kuba waabaire ori wenka reero ocwemu kutaaha omu bushwere. Nari noobaasa kuzaara abaana. Bwanyima, noobaasa kucwamu kukora empindahinduka kugira ngu oheereza Yehova omu buheereza obw’obutwire. Obundi, obujunaanizibwa bwaitu nibubaasa kuhinduka ahabw’embeera zaawe. Nitubaasa kuba twine amaani g’okukora bingi, nari turikubaasa kukora bikye. Kwonka yaaba turi bato nari bakuru, twine amagara marungi nari mabi, Yehova naamanya gye oku buri omwe arikubaasa kumuheereza gye. Tarikuteekateeka ngu twine kukora eki tutarikubaasa kukora. Naasiima kyona eki turikukora kumuheereza.—Abaheburaayo 6:10.

14. Okuba abacureezi nikibaasa kutuhwera kita kumarwa n’okushemererwa omu mbeera zoona?

¹⁴ Yesu akaba naasiima buri murimo gwona ogu Yehova yaabaire amuha, naitwe nitubaasa kusiima emirimo ei turikuheebwa. (Enfumu 8:30, 31) Omuntu omucureezi naamarwa obuheereza n’obujunaanizibwa obu aine omu kibiina. Tarikwegyeragyeranisa n’abandi. Omu mwanya gw’ekyo, naamarwa n’obujunaanizibwa bwe omu kibiina kya Yehova. Naareeba obujunaanizibwa obu aine nk’oburikuruga ahari Ruhanga. Omuntu omucureezi naaha abandi ekitiinisa, kandi naashemererwa kubashagika. Naamanya ngu Yehova nabo abahaire obujunaanizibwa.—Abarooma 12:10.

15. Nitubaasa kwegyera ki ahari Gideoni?

¹⁵ Gideoni n’eky’okureeberaho kirungi ky’obucureezi. Yehova ku yaahaire Gideoni obujunaanizibwa bw’okurwanisa Abamidiani abaabaire nibateganisa Abaisraeli, Gideoni akagira ati: “Ab’omuryango gwaitu n’abooro  okukira boona ab’omu ruganda rwa Manaase, kandi omu nju ya tata niinye muto.” (Abaramuzi 6:15) Kwonka Gideoni akeesiga Yehova yaikiriza obujunaanizibwa obwo. Bwanyima Gideoni akabanza yaahamya ngu yaayetegyereza gye ebi Yehova yaabaire naayenda ngu akore, kandi yaamushaba kumuhabura. (Abaramuzi 6:36-40) Gideoni akaba ari omushaija w’amaani kandi emanzi, kwonka nabwo akaba ari omunyabwengye kandi omwegyendesereza. (Abaramuzi 6:11, 27) Bwanyima abantu ku baayenzire ngu abeebembere, akanga. Bwanyima y’okukora ebi Yehova yaabaire amushabire kukora, akagaruka omuka.—Abaramuzi 8:22, 23, 29.

16, 17. Omuntu omucureezi naabaasa kutunguuka ata?

¹⁶ Omuntu yaikiriza obuheereza busya nari yaaba naayenda kwongyera aha bi arikukora omu kibiina, ekyo tikirikumanyisa ngu ti mucureezi. Baibuli neegira ngu ni kirungi omuheereza wa Yehova kwenda kwongyera kuheereza ab’eishe-emwe bagyenzi be kandi akatunguuka. (1 Timoseo 4:13-15) Kwonka shi nikyetengyesa okugira obuheereza busya omuntu kubaasa kutunguuka? Ngaaha. Twena nitubaasa kugumizamu nitushemeza emitwarize yaitu kandi twongyere kukora ebi turikubaasa, kugira ngu tuheereze gye Yehova tuhwere n’abandi.

¹⁷ Omuntu omucureezi atakaikiriize obujunaanizibwa, naabanza kumanya ekirikutwarirwamu. Naashaba aha bikwatiraine n’obuheereza obwo, kandi areeba yaaba naija kubaasa kukora eki ashemereire kukora. Yaikiriza obuheereza busya naija kuguma aine obwire n’amaani g’okukora ebintu ebikuru? Emwe aha mirimo ei arikuba naakora neebaasa kukorwa abandi? Omuntu omucureezi bwanyima y’okuteekateeka ahari eki, naabaasa kucwamu ngu tarikubaasa kuhikiiriza gye obuheereza obu obusya. Twaba turi abacureezi, obumwe nituba twine kugira ngu ngaaha.

18. (a) Omuntu omucureezi naija kukora ki yaaheebwa obujunaanizibwa busya? (b) Abarooma 12:3 nihatuhwera hata kuba abacureezi?

¹⁸ Yehova naayenda ngu ‘tugyende nawe omu bucureezi.’ (Miika 6:8) N’ahabw’ekyo twaheebwa obuheereza busya, nitumushaba kutuhabura n’okutuhwera, nk’oku Gideoni yaakozire. Twine kuteekateeka munonga aha bi Yehova arikutugambira kurabira omu Baibuli n’ekibiina kye. Ka tugume nitwijuka ngu eki turikukora kyona omu buheereza bwe, ti ahabw’okubaasa kwaitu beitu n’ahabw’okugira ngu Yehova n’omucureezi, kandi ayeteekateekire kutuhwera. (Zaaburi 18:35) Omuntu omucureezi tarikwija “kweteekateekaho okukira oku ari.”—Shoma Abarooma 12:3.

19. Ahabw’enki tushemereire kuba abacureezi?

¹⁹ Omuntu omucureezi naamanya ngu Yehova wenka niwe aine kuhimbisibwa, ahakuba niwe Muhangi kandi Orikukirayo omu nsi n’omu iguru. (Okushuuruurwa 4:11) Twaba turi abacureezi, nitwija kushemererwa ahabwa kyona eki turikubaasa kukora omu kuheereza Yehova. Nitwija kuha ekitiinisa ebiteekateeko by’ab’eishe-emwe abandi, n’ekiraarugyemu nitwija kugira obumwe. Omuntu omucureezi naabanza yaateekateeka atakagizire eki yaakora, omu muringo ogu naayetantara okukora enshobe z’amaani. Yehova naasiima munonga abantu abacureezi. Ahabw’enshonga ezi, obucureezi n’obw’omuhendo munonga aha baheereza ba Yehova. Omu kicweka ekirikukurataho, nituza kureeba oku turikubaasa kuguma turi abacureezi kyaba kigumire kukikora.