OMU Okutandika 22, Baibuli neegira ngu Ruhanga akagambira Abrahamu kuza omu mwanya gwa hare n’eka ye kuhayo ekitambo. Nihagira hati: “Abrahamu yaakwata enku z’okwotsya ekitambo, yaazikorera Isaaka omwana we; we yaatwara omuriro n’omusyo gw’endiga; baagyenda hamwe bombi.”—Okutandika 22:6.

Baibuli terikushoboorora oku abantu baabaire nibakora omuriro ira. Mbwenu shi Abrahamu na Isaaka bakaheemba omuriro reero baagugyendana? Omwe orikucondooza ahari Baibuli akagira ngu obundi omuriro gukaba “nigubaasa kutaguma guheembirwe omu rugyendo rwona.” Omu mwanya gw’ekyo, Abrahamu n’omutabani nibabaasa kuba baagyenzire na buri kimwe eki baabaire nibenda kuheemba omuriro.

Kwonka abandi nibagira ngu kikaba kitoorobi kukora omuriro obunaku obwo. Ku kyabaire kibaasika, abantu bakaba bakora omuriro barikukoresa amakara kuruga aha muriro ogwaheembirwe, obundi barikuguha omuriro ahari bataahi baabo. Abacondooza baingi nibaikiriza ngu Abrahamu akagyenda n’amakara gariho omuriro omu rugyendo rwe. Naabaasa kuba yaagataire omu kintu, obundi orwabya, reero bakaguma nibagyenda nako omu rugyendo rwabo rwona. (Isaaya 30:14) Bwanyima naabaasa kuba yaakoreise amakara garikwotsya kuheemba omuriro arikukoresa enku ku kyabaire kyetengyesa.