1. Niki ekirikworeka ngu Yehova n’efura?

HAINE obu Yehova yaabaire ari wenka. Reero akacwamu kubagana ekiconco ky’amagara arikuhanga baamaraika omu iguru n’abantu omu nsi. Yehova, Ruhanga ow’okushemererwa, naakunda kuha abandi ebirungi. (1 Timoseo 1:11; Yakobo 1:17) Ahakuba Yehova naayenda ngu naitwe tushemererwe, naatwegyesa okuba efura, turikugira eki twaha abandi.​—Abarooma 1:20.

2, 3. (a) Ahabw’enki nitushemererwa twaba efura? (b) Nituza kwega ki omu kicweka eki?

² Ruhanga akahanga abantu omu kishushani kye. (Okutandika 1:27) Eki nikimanyisa ngu twine emitwarize nk’ei aine. Okubaasa kutunga emigisha ye n’okushemererwa okwabuzima twine kumutooreza. Twine kworeka ngu buzima nitufayo aha bandi, kandi tukaba efura. (Abafilipi 2:3, 4; Yakobo 1:5) Ahabw’enki? Ahakuba nikwo Yehova yaatuhangire.  N’obu turaabe tutahikiriire, nitubaasa kumutooreza, kandi tube efura.

³ Hati nituza kureeba eki Baibuli erikwegyesa aha kuba efura. Nituza n’okwega ahabw’enki nikishemeza Yehova ku turikuba efura. Kandi tureebe oku obufura burikutubaasisa kukora omurimo ogu Yehova yaatuhaire n’ahabw’enki nitutunga okushemererwa twaba efura. Kandi nituza kureeba ahabw’enki twine kugumizamu kuba efura.

4, 5. Ni mu muringo ki ogu Yehova na Yesu bari efura, kandi ahabw’enki twine kubatooreza?

⁴ Yehova naayenda ngu tumutooreze, n’ahabw’ekyo naashemererwa twaba efura. (Abaefeso 5:1) Naayenda ngu naitwe tushemererwe. Eki nitukimanya twareeba omuringo ogu yaatuhangiremu ogurikutangaaza, oku ensi eboneire n’ebigirimu ebirikutushemeza. (Zaaburi 104:24; 139:13-16) N’ahabw’ekyo nituha Yehova ekitiinisa twareetera abandi kushemererwa.

⁵ Kandi nitutooreza Yesu, owaatuteereireho eky’okureeberaho kirungi eky’okuba efura. Akagira ati: ‘Omwana w’omuntu taraizire kuheerezibwa, kureka okuheereza abandi, n’okuhayo amagara ge okucungura baingi.’ (Matayo 20:28) Kandi entumwa Paulo akahiga Abakristaayo ati: “Mugire omutima guri ogwabaire guri omuri Kristo Yesu . . . Akeeyihaho ekitiinisa, yaikiriza kuhinduka nk’omuhuuku.” (Abafilipi 2:5, 7) N’ahabw’ekyo noobaasa kwebuuza oti: ‘Nimbaasa kwongyera nta kutooreza Yesu?’​—Shoma 1 Petero 2:21.

6. Ekitebyo ky’Omusamaria eki Yesu yaatebize nitukyegyeraho ki? (Reeba ekishushani aha kutandika.)

⁶ Yehova naashemererwa twamutooreza hamwe n’Omwana we. Eki nitukikora turikufayo aha bantu kandi tukataho oburyo bw’okubahwera. Yesu akooreka ngu eki ni kikuru omu kitebyo ky’Omusamaria omurungi. (Shoma Luka 10:29-37.) Akeegyesa abakuratsi be ngu baine kuhwera abantu b’emiringo yoona. Noijuka ahabw’enki Yesu yaatebize ekitebyo ekyo? N’ahabw’okuba omushaija Omuyudaaya akamubuuza ati: “Mutaahi wangye n’oha?” Eki Yesu yaagarukiremu nikitwegyesa ngu twine kuba efura nk’Omusamaria twaba nitwenda kushemeza Yehova.

7. Nitubaasa kworeka tuta ngu omuringo ogu Yehova arikukoramu ebintu nigwo gurikukirayo oburungi? Shoboorora.

⁷ Enshonga endiijo erikutureetera kuba efura eine akakwate n’ebyabaireho omu musiri Eden. Sitaane akagira ngu Adamu na Haawa nibaija kutunga okushemererwa baagomera Yehova bakeebembeza ebyabo. Haawa akeeyendeza arikwenda kuba nka Ruhanga. Adamu nawe akeeyendeza yaakunda okushemeza omukazi we okukira Ruhanga. (Okutandika 3:4-6) Eki kikarugamu oburemeezi bw’amaani. Buzima, okweyendeza tikurikubaasa kureetera omuntu okushemererwa. Kwonka twayefeerereza kandi tukaba efura, eki nikyoreka ngu omuringo ogu Yehova arikukoramu ebintu nigwo turikutwara nk’ogurikukirayo oburungi.

8. Ahabw’enki Adamu na Haawa baabaire bashemereire kuteekateeka aha bandi?

⁸ N’obu Adamu na Haawa baabaire bari bonka omu musiri Edeni, bakaba baine kuteekateeka aha bandi. Ahabw’enki? Yehova  akaba abahaire omurimo gw’okukora. Akabagambira kuzaara bakaijuza ensi kandi bakagihindura paradiso. (Okutandika 1:28) Adamu na Haawa bakaba bashemereire kwendeza abaana baabo okushemererwa, nk’oku Yehova yaabaire naayendeza abantu boona omu nsi. Kandi Yehova akaba naayenda ngu eka ya Adamu yoona ekorere hamwe kuhindura ensi paradiso. Buzima ogwo gukaba guri omurimo gw’amaani!

9. Ahabw’enki abantu baabaire nibaija kutunga okushemererwa baaba nibahindura ensi paradiso?

⁹ Abantu abahikiriire bakaba baine kukorera hamwe na Yehova kuhindura ensi paradiso n’okuhikiiriza ekigyendererwa kye. Omu muringo ogu, bakaba nibaija kutaaha omu buruhuukiro bwe. (Abaheburaayo 4:11) Teekateeka aha kumarwa n’okushemererwa oku baabaire nibaija kutunga omu kukora omurimo ogu! Yehova akaba naija kubaha emigisha ahabw’okuteyendeza, n’ahabw’okworeka ngu nibafayo aha bandi.

10, 11. Ahabw’enki guri omugisha gw’amaani kubuurira n’okuhindura abantu abeegi?

¹⁰ Obunaku obu, Yehova atuhaire omurimo gw’omutaano ogw’okukora. Naayenda ngu tubuurire kandi tuhindure abantu abeegi. Kubaasa kukora omurimo ogu, buzima twine kufayo aha bandi. Nitubaasa kugumizamu nitukora omurimo ogu, twagira ekigyendererwa kirungi eky’okukunda Yehova n’abantu.

¹¹ Paulo akagira ngu we n’Abakristaayo  abandi bakaba ‘nibakora na Ruhanga’ kurabira omu kubuurira n’okwegyesa abandi amazima. (1 Abakorinso 3:6, 9) Obunaku obu, ‘nitukora na Ruhanga’ turikuhayo obwire bwaitu, amaani gaitu n’esente zaitu kushagika omurimo ogu atuhaire. Buzima ogu ka n’omugisha gw’amaani!

12, 13. Ni birungi ki ebirikuruga omu kuhindura abantu abeegi?

¹² Ku turikuhayo obwire bwaitu n’amaani gaitu kubuurira n’okwegyesa abantu nitutunga okushemererwa. Eki nikyo ab’eishe-emwe na banyaanyazi-itwe abaine abeegi ba Baibuli barikugamba. Nikitushemeza munonga kureeba nibeetegyereza eki Baibuli buzima erikwegyesa, barikweyongyera kugira okwikiriza, barikukora empindahinduka, kandi barikugambira abandi ebi barikwega. Yesu nawe akashemererwa munonga obu yaayohereza ababuurizi 70, ‘abaagarukire n’okushemererwa’ ahabw’ebirungi ebi baatungire omu kubuurira.​—Luka 10:17-21.

¹³ Ab’eishe-emwe omu nsi yoona nibashemererwa ku barikureeba oku obutumwa bw’omu Baibuli burikuhwera abantu. Nk’eky’okureeberaho, munyaanyazi-itwe Anna * otari mu bushwere akaba naayenda kwongyera kuheereza Yehova. (Reeba obugambo obw’ahansi.) N’ahabw’ekyo akacwamu kuza kuheereza omuri Eastern Europe ahu ababuurizi barikwetengwa. Akahandiika naagira ati: “Omu kicweka ekyo kyorobi kutunga abantu b’okwegyesa Baibuli, kandi nikinshemeza munonga. Obuheereza bwangye nibundeetera okushemererwa kwingi. Ku ndikuhika omuka, tinyine bwire bw’okwetaho omutima. Kureka ninteekateeka aha beegi bangye, oburemeezi bwabo n’ebirikubeerarikiriza. Ninsherura emiringo y’okubagaruramu amaani n’oku ndikubaasa kubaha obuhwezi. Nimpamiza kimwe ngu ‘okugaba nikuhaisa omugisha okukira okuheebwa.’​—Ebyakozirwe 20:35.

14. Noobaasa kutunga ota okushemererwa omu kubuurira n’obu abantu baakwanga kuhurikiza?

¹⁴ Kwonka shi ekicweka eki orikubuuriramu kyaba kitari nk’ekya Anna? Naiwe noobaasa kushemererwa n’obu abantu baakwanga kuhurikiza. Mu muringo ki? Teeraho kubuurira buri omwe omu kicweka kyawe. Ha boona omugisha gw’okuhurikiza amakuru marungi, n’obu bakwanga. Yehova naayenda ngu tukore nk’eki yaashabire nabi Ezekieli kukora, obu yaamugira ati: “Obagambire ebigambo byangye, yaaba bahurira, yaaba banga kuhurira.” (Ezekieli 2:7; Isaaya 43:10) N’obu abandi baakwanga kuhurikiza, okubuurira amakuru marungi nikitureetera okushemererwa. Nitumanya ngu Yehova naatusiima. (Shoma Abaheburaayo 6:10.) Ow’eishe-emwe omwe akagamba aha bikwatiraine n’obuheereza bwe arikugira ati: “Nitubyara, twitirira amaizi kandi tushaba twine amatsiko ngu Yehova naija kubikuza.”​—1 Abakorinso 3:6.

15. Mbwenu shi tushemereire kworeka obufura abarikusiima bonka? Shoboorora.

¹⁵ Nka Yehova, Yesu nawe naayenda ngu tushemererwe. Egi niyo nshonga ahabw’enki naatuhiga ati: ‘Muhe, naimwe nimwija kuheebwa endengo enungi, eigatiirwe, ecugutsiibwe erikusheesheka, niyo murikwija kurengyerwa omu bifuba byanyu, ahabw’okuba endengo ei murikurengamu, naimwe niyo murikwija kurengyerwamu.’ (Luka 6:38) Waaba ori efura, tikugira ngu boona nibaija kusiima. Kwonka obufura bwawe nibubaasa kuhiga bamwe aharibo kuba efura. N’ahabw’ekyo n’obu abantu bakwanga kusiima, gumizamu ori efura. Torikubaasa kumanya ebirungi ebirikubaasa kuruga omu kikorwa kimwe ky’obufura.

16. Tushemereire kuba efura ahari baahi, kandi ahabw’enki?

¹⁶ Buzima, abantu efura tibarikuha abandi ahabw’okwenda ngu baabagarurire. Yesu akagira ati: “Ku oriba waateekire eby’okurya, oyete abooro, ebimuga, ebirema, n’empumi; kandi oryaheebwa omugisha; ahabw’okuba bo tibaine ky’okukwihura.” (Luka 14:13, 14) Baibuli neegira eti: “Oine eriisho ry’obufura aryaheebwa omugisha.” Kandi neegaruka egira eti: “Osaasibwa abooro aine omugisha” nari okushemererwa. (Enfumu 22:9; Zaaburi 41:1) Buzima nitwija kushemererwa twahwera abandi.

17. Ni bintu ki ebi turikubaasa kuha abandi tukatunga okushemererwa?

¹⁷ Paulo akajuriza ebigambo bya Yesu obu yaagira ngu ‘okugaba nikuhaisa omugisha okukira okuheebwa,’ kandi akaba  atarikugamba aha kugaba ebintu byonka. Noobaasa n’okugaruramu abantu amaani, kubaha obuhabuzi kuruga omu Baibuli, nari kubahwera. (Ebyakozirwe 20:31-35) Ebi Paulo yaagambire n’ebi yaakozire, nibitwegyesa oku kiri kikuru okuba efura tukakoresa obwire bwaitu, n’amaani gaitu, kufayo aha bandi n’okubooreka rukundo.

18. Abarikucondooza nibagamba ki aha kuba efura?

¹⁸ Abarikucondooza aha ku abantu barikutwaza nabo baashangire ngu okugaba nikureeta okushemererwa. Kurugiirira aha kihandiiko kimwe, abantu nibagira ngu nibashemererwa ku barikukorera abandi ebirungi. Abarikucondooza nibagira ngu ku turikuhwera abandi, nikitureetera kugira okumarwa. Abahangu abamwe nibahiga abantu kukora emirimo ey’okuhwera abandi kubaasa kugira amagara marungi n’okushemererwa. Buzima, ekyo tikirikututangaaza, ahakuba Omuhangi waitu Yehova, atwire naatugambira ngu okuha abandi nikutureetera okushemererwa.​—2 Timoseo 3:16, 17.

19, 20. Ahabw’enki orikwenda kuba efura?

¹⁹ Nikitugumira kuba efura, baingi abatwetooroire baaba nibeeyendeza. Kwonka Yesu akatwijutsya ngu ebiragiro bibiri ebikuru n’okukunda Yehova n’omutima gwaitu gwona, n’obwengye bwaitu bwona, n’amaani gaitu goona, kandi tukakunda n’abataahi nk’oku turikwekunda. (Mako 12:28-31) Twayega omu kicweka eki ngu abo abarikukunda Yehova nibateeraho kumutooreza. Yehova na Yesu bombi n’efura, kandi nibatuhiga kubatooreza, ahakuba nikiija kutureetera okushemererwa okwabuzima. Twateeraho kuba efura omu bi turikukorera Yehova n’abantu, nitwija kumuha ekitiinisa, tugasirwe, kandi tukore n’ebirikugasira abandi.

²⁰ Buzima na hati nooteeraho kuba efura orikuhwera abandi, okukira munonga ab’eishe-emwe. (Abagalatia 6:10) Waagumizamu nookora ekyo, abantu nibaija kukusiima, bakukunde, kandi naiwe noija kushemererwa. Baibuli neegira eti: “Omuntu efura aryatunga, kandi orikuha abandi amaizi, nawe aryagaheebwa.” (Enfumu 11:25) Omu bi turikukora n’omu kubuurira hariho emiringo mingi y’okuha abandi tukooreka ngu turi efura. Nitwija kushwijuma emwe aha miringo egi omu kicweka ekirikukurataho.