Ahabw’enki hataine n’omwe orikwikirizibwa kuta ebitabo by’Abajurizi ba Yehova aha mikura endiijo?

Abantu abamwe nibateekateeka ngu ti kibi kuta ebitabo byaitu aha mikura endiijo ahakuba titurikubiguza. Kwonka ekyo nikibaasa kureetaho oburemeezi bw’amaani, kandi nikihenda ebiragiro Ebiine Kukuratirwa * (Reeba obugambo obw’ahansi) eby’omukura gwaitu. Ebiine Kukuratirwa ebi, nibigira ngu tihaine orikwikirizibwa “kuta aha mukura ogu, ebishushani, ebitambo, obumanyiso, ebyeshongoro, ebishushani by’abantu, vidiyo, nari kwihaho eby’okushoma reero akabita ahandi, (nk’aha mikura y’okwohererezana ebintu nka vidiyo, nari aha mikura y’okuhurizana).” Ahabw’enki kiri kikuru kukuratira ebiragiro ebi?

Byona ebiri aha mukura ogu biri ahansi y’obushoboorozi bw’abakama babyo, ekirikumanyisa ngu nibirindwa ebiragiro. Eki ni kikuru ahakuba nikizibira abarikwenda kukoresa kubi ebiri aha mukura. Abeehagwire aha mazima n’abandi abarikwenda kushiisha omurimo gwaitu nibata ebitabo byaitu aha mikura yaabo kureetera abandi nari Abajurizi ba Yehova kuzayo. Kwonka aha mikura egyo nibongyeraho ebindi ebirikureetera abantu kubanganisa. (Zaaburi 26:4; Enfumu 22:5) Abandi baakoreise ebiri aha mukura nari akamanyiso kaitu aka Jw.org omu kuranga, omu puroguraamu zaabo, n’omu bindi ebi barikuguza. Kwonka ahabw’okugira ngu ebintu byaitu n’obumanyiso bwaitu nibirindwa ebiragiro, nitubaasa kubatabariza omu icwero ry’emanja kandi tubazibire kubikoresa. (Enfumu 27:12) Kwonka amacwero g’emanja nigabaasa kutatushagika twaba nitwikiriza abandi nari ab’eishe-emwe kuta ebitabo byaitu aha mikura endiijo nari kukoresa akamanyiso ka jw.org kuguza ebintu byabo.

N’eky’akabi okwiha ebitabo byaitu aha mikura endiijo okwihaho jw.org. Yehova naakoresa ‘omwambari omwesigwa kandi ow’obwengye’ wenka kutuha eby’okurya by’omwoyo. (Matayo 24:45) “Omwambari” ogu naakoresa emikura eikiriziibwe yonka nka www.pr418.com, tv.pr418.com, na wol.pr418.com, kutuha eby’okurya eby’omwoyo. Twine puroguraamu ishatu zonka ezi turikubaasa kukoresa. Twine JW Language^®, JW Library^® app, na JW Library Sign Language^®. Emikura egi na puroguraamu ezi ez’okukoresa tiziriho burango nari ekintu kyona kuruga omu nsi ya Sitaane. Kwonka ku turikwiha ebitabo aha mikura endiijo nari twakoresa puroguraamu ezindi kubitunga, nibibaasa kuba bihindwirwemu.​—Zaaburi 18:26; 19:8.

Okwongyera ahari ekyo, okuta ebintu byaitu aha mikura endiijo erikwikiriza abantu kuhandiikaho ebiteekateeko byabo, nikireetera abeehagwire aha mazima n’abandi kugamba kubi aha kibiina kya Yehova. Ab’eishe-emwe abamwe nibateera empaka nabo, kandi eki kyongyera kujumisa Yehova. Okugaaniira omu muringo ogu aha Intaneeti, tikirikuhwera omuntu kumanya amazima n’okuhindura emiteekateekyere ye. (1 Timoseo 6:3-5; 2 Timoseo 2:23-25) Kandi abandi bo nibakora emikura bagyeterera ekibiina kyaitu nari ab’eishe-emwe abari aha Kakiiko Akareeberezi. Kwonka neeba eri ey’ekikwangara. Tihariho n’omwe ori aha Kakiiko Akareeberezi oine omukura ogwe ahabwe nari orikukoresa omukura gwona ogw’empurizana ogw’ensi.

Twagambira abandi kuza aha jw.org, nituba nitushagika omurimo gw’okubuurira amakuru marungi. (Matayo 24:14) Emikura yaitu na puroguraamu ezi turikukoresa nibyeyongyera kubonera. Nitwenda buri omwe abigasirwemu. N’ahabw’ekyo nitwikirizibwa kwoherereza abandi ebitabo by’aha mukura gwaitu nari ekirikubahwera kuza aha mukura gwaitu. Twakora tuti, nituhwera abandi kumanya ‘omwambari omwesigwa kandi ow’obwengye,’ omuhanda gwonka ogu Yehova arikukoresa kutuha eby’okurya by’omwoyo.