1. Nitubaasa kukora tuta hamwe na Yehova?

OBU Yehova yaahanga abantu, akaba naayenda ngu bakore hamwe nawe. N’obu turaabe tituhikiriire hati, abantu abeesigwa nibabaasa kukora na Yehova buri izooba. Nk’eky’okureeberaho, nitukora na Ruhanga twaba nitubuurira amakuru marungi g’Obukama turikuhindura n’abantu abeegi. (1 Abakorinso 3:5-9) Ka n’omugisha gw’amaani Omuhangi wa byona okututoorana kukora omurimo mukuru ogu! Kwonka nabwo, titurikukora na Yehova omu kubuurira honka. Omu kicweka eki, nituza kwega n’oku turikukora nawe twahwera ab’omu ka yaitu n’ab’omu kibiina, twaba efura aha bandi, twahwera kukora emirimo y’ekibiina, na twayongyera aha buheereza bwaitu.​—Abakolosai 3:23.

2. Ahabw’enki tutaine kwegyeragyeranisa n’abandi omu kuheereza Yehova?

² Twaba nitwega ekicweka eki, ni kikuru kwijuka ngu titurikwingana, omu myaka, amaani, kandi embeera zaitu n’okubaasa kwaitu nabyo tibirikushushana. N’ahabw’ekyo otakayegyeragyeranisa n’abandi omu kuheereza Yehova. Entumwa  Paulo akagira ati: “Ekirungi nikwo omuntu weena kugyeza omurimo gwe, akaba nigwo yaayehimbisizamu, kutari kwehimbisiza mu gwa mutaahi we.”​—Abagalatia 6:4.

3. Ahabw’enki turikubaasa kugira ngu orikureeberera eka ye naaba naakora na Ruhanga?

³ Yehova naayenda ngu tureeberere ab’omu maka gaitu. Nk’eky’okureeberaho, nooba oine kutunga esente z’okureeberera eka yaawe. Abakazi abaingi baine kuguma omu ka kureeberera abaana baabo. Kandi abaizire baitu baaba batarikubaasa kwebaisaho, naitwe twine kubareeberera. Ebi n’ebintu bikuru. Baibuli neegira eti: ‘Omuntu weena, otarikuhwera banyabuzaare, n’okukira munonga ab’omu ka ye, biri ayehakaine okwikiriza, kandi naaba ari mubi okukira otarikwikiriza.’ (1 Timoseo 5:8) Ku oraabe oine obujunaanizibwa bw’okureebera eka yaawe, noobaasa kuba otarikubaasa kuheereza Yehova nk’oku orikwenda. Kwonka otahwamu amaani! Yehova naashemererwa waareeberera ab’omu ka yaawe.​—1 Abakorinso 10:31.

4. Abazaire nibabaasa kwebembeza bata eby’Obukama, kandi niki ekirikubaho baakora ekyo?

⁴ Abazaire Abakristaayo nibabaasa kukora hamwe na Yehova barikuhwera abaana baabo kutaho ebigyendererwa by’okuheereza Yehova. Kandi abazaire baingi eki bakikozire. Ekirugiremu, abaana baabo baacwiremu kuza omu buheereza obw’obutwire, nangwa na hare n’eka yaabo. Abamwe nibaheereza nk’abamiisani, abandi ni baapayoniya omu bicweka ahari ekyetengo ky’ababuurizi, kandi abandi nibaheereza aha Beseeli. N’amazima abaana baaza hare, abazaire tibarikubaasa kumara obwire bwingi nabo nk’oku kirikubaasika. Kwonka bataine kweyendeza nibahiga abaana baabo kugumizamu nibaheereza Yehova ei barikuba bari hoona. Ahabw’enki? Ahabw’okuba nibashemererwa okureeba abaana baabo nibeebembeza okuheereza Yehova. (3 Yohaana 4) Abazaire nk’abo nibeehurira nka Hanna, owaagizire ngu omutabani Samueli ‘yaamuhongyerera’ Yehova. Nibagureeba nk’omugisha gw’amaani okukora hamwe na Yehova omu muringo ogu.​—1 Samueli 1:28.

5. Noobaasa kuhwera ota ab’eishe-emwe omu kibiina kyanyu? (Reeba ekishushani aha kutandika.)

⁵ Waaba otaine bujunaanizibwa bw’amaani, noobaasa kuhwera ab’eishe-emwe abarwaire, abakuzire omu myaka nari abandi abarikwetenga obuhwezi? Nari noobaasa kuhwera abo abarikubareeberera? Teekateeka ahari abo abari omu kibiina abarikwetenga obuhwezi nk’obwo. Nk’eky’okureeberaho, obundi haine munyaanyazi-itwe orikureeberera omuzaire we okuzire omu myaka. Noobaasa kumuhwera kureeberera omuzaire we kugira ngu agire ebindi ebi yaakora? Nari noobaasa kuhwera omuntu orikwehayo kumutwara omu nteerane, okugura ebintu, nari kumutaayaayira omu irwariro. Ku orikukora ekyo, nooba oriyo nookora hamwe na Yehova omu kugarukamu okushaba kw’ow’eishe-emwe ogwo.​—Shoma 1 Abakorinso 10:24.

6. Nitubaasa kuba tuta efura?

⁶ Abarikukora hamwe na Yehova nibooreka obufura. Omu Baibuli, ekigambo ky’Orugriika ekirikuvunuurwa “nk’obufura”  nikimanyisa “okugirira embabazi abu otarikumanya.” (Abaheburaayo 13:2) Omu Kigambo kya Ruhanga, nitushomamu eby’okureeberaho ebirikutuhwera kugirira abandi embabazi. (Okutandika 18:1-5) Nitubaasa kuhwera abandi twatunga omugisha gw’okukikora, kandi nituhwera boona yaaba bari naitwe ‘omu kwikiriza’ nari ngaaha.​—Abagalatia 6:10.

7. Ni birungi ki ebirikubaasa kuruga omu kworeka obufura abari omu buheereza obw’obutwire?

⁷ Noobaasa kukora hamwe na Yehova orikuraaza ab’eishe-emwe abari omu buheereza obw’obutwire? (Shoma 3 Yohaana 5, 8.) Twakora ekyo, nibagasirwa kandi naitwe nitugasirwa. Baibuli ekyo neekyeta ‘okugumyana.’ (Abarooma 1:11, 12) Teekateeka aha ky’okureeberaho kya Olaf. Obu yaabaire ari muto, omureeberezi orikutaayaayira ebibiina otari mu bushwere akataayaayira ekibiina kyabo, kwonka taratungire buraaro omu b’eishe-emwe. Olaf akashaba abazaire be abaabaire batari Bajurizi ba Yehova kumuraaza. Bakaikiriza kwonka baagambira Olaf ngu omugyenyi naija kuraara omu ntebe. Ekyo nikyo Olaf yaakozire, kandi tarabaasize kwefuuza na kakye. Esaabiiti egyo ekamubeera nungi ari n’omureeberezi ogwo! Buri kasheeshe bakaba bagaaniira aha nshonga nyingi barikurya kyantsya. Omureeberezi akagumya Olaf munonga eki kikamuhiga kuza omu buheereza obw’obutwire. Kumara emyaka 40, Olaf aheereize k’omumiisani omu mahanga maingi.

8. Ahabw’enki tushemereire kugirira abandi embabazi n’obu baakuba batasiimire omu kubanza? Ha eky’okureeberaho.

⁸ Hariho emiringo mingi ei turikubaasa kugirira embabazi abu tutarikumanya, n’obu baakuba batasiimire omu kubanza. Nk’eky’okureeberaho, munyaanyazi-itwe omuri Spain akaba naayegyesa Yesica Baibuli, ow’omuri Ecuador. Eizooba rimwe ku baabaire nibeega Baibuli, Yesica akatandika kurira. Munyaanyazi-itwe yaamubuuza ekirikumuriza. Yesica akamugarukamu ngu atakaizire omuri Spain, akaba ari omworo. Eizooba rimwe akaba ataine by’okurya by’okuha muhara we kureka amaizi. Yesica akashaba reero yaabyamisa omwana we. Bwanyima hakaija Abajurizi ba Yehova babiri baamuha magaziini. Kwonka akabatwariza kubi kandi yaataagura magaziini ei baamuhaire, reero yaabagira ati: “Ebi nibyo by’okurya ebi murikwenda mpe muhara wangye?” Banyaanyazi-itwe bakateeraho kumuhuumuriza kwonka Yesica akanga kubahurikiza. Bwanyima, banyaanyazi-itwe bakamureetera ekiibo ky’eby’okurya baakitsiga aha rwigi rwe. Hati omu kwega Baibuli, Yesica akaba naarira ahakuba akeetegyereza ngu akanga omuringo ogu Ruhanga yaagarukiremu okushaba kwe obwire obwo. Kwonka hati Yesica akaba amaririire kuheereza Yehova. Buzima, obufura obu banyaanyazi-itwe baayorekire bukarugamu ebirungi.​—Omubuurizi 11:1, 6.

9, 10. (a) Abaisraeli bakaba baine migisha ki y’okuhwera beekundiire? (b) Ab’eishe-emwe nibabaasa kuhwera bata omu kibiina obunaku obu?

⁹ Ira Abaisraeli bakaba beehayo kuhwera omu miringo etari emwe n’emwe. (Okuruga 36:2; 1 Obusingye 29:5; Nehemia 11:2) Obunaku obu, naiwe oine emigisha mingi y’okwehayo kuhwera ab’eishe-emwe orikukoresa ebintu byawe, obwire bwawe, n’emyoga ei oine. Waakora otyo, noija kushemererwa, kandi Yehova naija kukuha emigisha.

¹⁰ Ekigambo kya Ruhanga nikihiga abashaija abaabatiziibwe omu kibiina kukora na Yehova barikuheereza nk’abaheereza nari abareeberezi. (1 Timoseo 3:1, 8, 9; 1 Petero 5:2, 3) Abarikukora eki nibaba nibooreka ngu nibenda kuhwera abandi omu by’omubiri n’omu by’omwoyo. (Ebyakozirwe 6:1-4) Abareeberezi bakushabire kwakiira abantu nari kuha ab’eishe-emwe ebitabo, kutebeekanisa ebicweka by’okubuuriramu, kuhunduuza, nari kukora ekindi kintu? Ab’eishe-emwe abarikuhwera omu miringo egi nibagira ngu nikibashemeza munonga.

11. Munyaanyazi-itwe omwe agasiirwe ata ahabw’okwejumba omu kwombeka ebyombeko by’ekibiina?

¹¹ Abo abarikuhwera beekundiire kwombeka Ebyombeko by’ekibiina nibakira kutunga abanywani basya. Munyaanyazi-itwe Margie atwire naahwera omu kwombeka Ebyombeko by’ekibiina kumara emyaka 18. Omu kwombeka oku, ahwereire banyaanyazi-itwe abato kandi yaayehayo kubatendeka. Naagira ngu ogu n’omuringo murungi gw’okugumyana ogw’abarikwehayo beekundiire kuhwera. (Abarooma 1:12) Kandi ku yaatungire oburemeezi, abanywani  abu yaatungiire omu buheereza obu bakamugumya. Orahwereireho omu kwombeka ebyombeko by’ekibiina? Noobaasa kuhwera omu kwombeka n’obu waakuba otaine mwoga.

12. Noobaasa kuhwera ota abahikirweho ekihikiirizi?

¹² Nitubaasa kukora hamwe na Yehova turikuhwera ab’eishe-emwe abahikirweho ekihikiirizi. Nk’eky’okureeberaho nitubaasa kuhayo esente. (Yohaana 13:34, 35; Ebyakozirwe 11:27-30) Omuringo ogundi ogw’okuhwera nookwejumba omu kuboneza n’okuhunduuza bwanyima y’ekihikiirizi. Munyaanyazi-itwe Gabriela, owa Poland ou enju ye yaasiisirwe munonga omwegyemure, akashemererwa munonga kureeba ab’eishe-emwe b’ebibiina ebiri haihi nibaija kumuhwera. Ku arikuteekateeka aha ku baamuhwereire, tarikuta omutima munonga aha bi yaafeereirwe, kureka aha ku yaagasiirwe. Naagira ati: “Obuhwezi obu naatungire nibumpamiza ngu okuba omwe aha kibiina Ekikristaayo n’omugisha gw’omutaano ogurikureeta okushemererwa.” Baingi abaatungire obuhwezi bwanyima y’okuhikwaho ekihikiirizi nabo nibeehurira batyo. Kandi abo abarikukora hamwe na Yehova kuhwera ab’eishe-emwe nibatunga okushemererwa n’okumarwa.​—Shoma Ebyakozirwe 20:35; 2 Abakorinso 9:6, 7.

13. Nituhamya tuta omukago gwaitu na Yehova ku turikuhwera twekundiire? Ha eky’okureeberaho.

¹³ Munyaanyazi-itwe Stephanie n’ababuurizi abandi omu kicweka kye bakakora hamwe na Ruhanga kuhwera ab’eishe-emwe abaagiire omuri United States barikuhunga orutaro omu ihanga ryabo. Bakahwera empungi ezi kutunga oburaaro n’ebintu by’omu nju. Naagira ati: “Tukagira okushemererwa ahabw’okusiima kwabo, kandi nabo bakashemererwa ahabwa rukundo ei ab’eishe-emwe baaborekire. Ab’eka ezi nibateekateeka ngu tubahwereire, kwonka buzima nibo batuhwereire munonga. Okukundana, obumwe, okwikiriza, n’okwesiga Yehova ebi tureebire baine, buzima bihamize omukago gwaitu na Yehova, kandi eki kitureeteire kusiimira kimwe byona ebi turikutunga omu kibiina kye.”

14, 15. (a) Nabi Isaaya akaba aine miteekateekyere ki? (b) Abakristaayo nibabaasa kutooreza bata nabi Isaaya?

¹⁴ Nooyenda kwongyera kukora hamwe nawe Yehova? Oyeteekateekire kuza kuheereza ahu ababuurizi baingi barikwetengwa? N’amazima, tikirikwetengyesa kuza hare kubaasa kuba efura. Kwonka hariho  ab’eishe-emwe abarikubaasa kukikora. Baine emiteekateekyere nk’eya nabi Isaaya. Obu Yehova yaabuuza ati: “Ntume oha, kandi n’oha oraatugyendere?” Akagarukamu ati: “Ndi aha; ba niinye waatuma!” (Isaaya 6:8) Oyeteekateekire kandi oine ebirikukubaasisa kuhwera ekibiina kya Yehova? Noobaasa kuhwera mu miringo ki?

¹⁵ Yesu akagamba aha kubuurira n’okuhindura abantu abeegi ati: “Eby’okugyesha ni bingi munonga, kwonka abagyesi ni bakye. N’ahabw’ekyo mushabe Mukama w’eigyesha ayohereze abagyesi omu by’okugyesha bye.” (Matayo 9:37, 38) Noobaasa kuheereza nka payoniya ahu ababuurizi baingi barikwetengwa? Nari noobaasa kuhwera ondiijo kukikora? Ab’eishe-emwe baingi nibareeba ngu okuba payoniya ahu ababuurizi barikwetengwa, nigwo muringo ogurikukirayo ogw’okworeka ngu nibakunda Ruhanga n’abataahi. Noobaasa kuteekateeka aha miringo endiijo ei orikubaasa kwongyeramu aha buheereza bwawe? Waakikora noija kutunga okushemererwa.

16, 17. Noobaasa kwongyera ota aha buheereza bwawe?

¹⁶ Noobaasa kuheereza aha Beseeli, kuhwera kwombeka, kumara obwire bukye nari eizooba rimwe nari maingi omu saabiiti? Ekibiina kya Yehova nikyetenga ab’eishe-emwe abeeteekateekire kuheereza ahu barikwetengwa hoona, kandi bakakora eki barikushabwa kukora n’obu baakuba baine emyoga y’omutaano. Yehova naasiima buri omwe weena orikuba ayeteekateekire kwefeerereza kuheereza ahari ekyetengo.​—Zaaburi 110:3.

¹⁷ Okaayenzire kutendekwa kubaasa kwongyera kuheereza gye Yehova? Noobaasa kushaba kuza omu Ishomero ry’Ababuurizi b’Obukama. Eishomero eri niritendeka ab’eishe-emwe na banyaanyazi-itwe abari omu buheereza obw’obutwire, kugira ngu boongyere kuheereza omu kibiina kya Yehova. Abo abarikushaba kuza omu ishomero eri baine kuba beeteekateekire kuheereza buri hamwe. Noija kuba oyeteekateekire kwongyera kuheereza Yehova omu muringo ogu?​—1 Abakorinso 9:23.

18. Ni migisha ki ei orikutunga waakora na Yehova buri izooba?

¹⁸ Ahabw’okugira ngu turi abaheereza ba Yehova, turi efura, nitutwaza gye, kandi twine rukundo. Nitufayo aha bandi buri izooba. Eki nikitureetera okushemererwa n’obusingye. (Abagalatia 5:22, 23) Omu mbeera yoona ei orimu, waaguma nookora hamwe na Yehova, kandi okaba efura, noija kushemererwa!​—Enfumu 3:9, 10.