TWINE kugumisiriza okukira ira ahabw’okugira ngu embeera nizeeyongyera kuguma omu ‘biro by’emperu.’ (2 Timoseo 3:1-5) Abantu baingi omu nsi tibarikugumisiriza. Nibeeyendeza, nibakunda empaka, kandi tibaine mutwarize gw’okwezibira. N’ahabw’ekyo twine kwebuuza tuti: ‘Naanye tindikugumisiriza nkabo? Okuba omugumisiriza nikimanyisa ki? Nimbaasa kukora ki okugira omutwarize gw’okugumisiriza?’

Ekigambo “okugumisiriza” ekirikukoresibwa omu Baibuli nikimanyisa ki? Tikirikumanyisa okwemera oburemeezi kyonka. Omuntu orikugumisiriza naagumira oburemeezi aine ekigyendererwa, naaba aine amatsiko ngu ebintu nibiija kutereera. Tarikweteekateekaho wenka, beitu naafayo aha nyehurira z’abandi n’obu baakuba baamugwisize kubi nari baamutwarize kubi. Naaguma aine amatsiko ngu omukago gwabo nigwija kugarukaho. Tikirikututangaaza kureeba ngu Baibuli neeyoreka ngu rukundo neetuhwera kugumisiriza. * (Reeba obugambo obw’ahansi.) (1 Abakorinso 13:4) Okugumisiriza ni gumwe aha mitwarize y’omwoyo gurikwera. (Abagalatia 5:22, 23) Mbwenu shi twine kukora ki kworeka omutwarize gw’okugumisiriza?

Twine kushaba Yehova omwoyo gurikwera kubaasa kugumisiriza, kandi naaguha abo abarikumwesiga. (Luka 11:13) Omwoyo gurikwera gwine amaani, kwonka twine kukora ebirikuhikaana n’okushaba kwaitu. (Zaaburi 86:10, 11) Eki nikimanyisa ngu twine kuteeraho kugira omutwarize gw’okugumisiriza buri izooba. Kwonka obumwe nitubaasa kuremwa. Niki ekirikubaasa kutuhwera?

Twine kwega ebirikukwata ahari Yesu kandi tukamutooreza. Obu entumwa Paulo yaagamba aha kujwara “omuntu omusya,” ekirikutwariramu okugumisiriza, akatuhiga ati: ‘Obusingye bwa Kristo butegyekye omu mitima yaanyu.’ (Abakolosai 3:10, 12, 15) Kubaasa kukora eki, twine kukuratira eky’okureeberaho kya Yesu, kandi twesigire kimwe Yehova ngu omu bwire obuhikire naija kwihaho oburemeezi. Twamwesiga, nitwija kuguma nitugumisiriza n’obu haakubaho ki.​—Yohaana 14:27; 16:33.

Twena nitwenda ngu ensi ensya eije juba. Kwonka twateekateeka aha ku Yehova atugumisiririize nikituhwera kwongyera kugumisiriza. Baibuli neetuhamiza eti: “Mukama tatuuzayo ki yaaraganiise, nk’abamwe oku barikuteekateeka, kureka agumisiriza ahabwanyu, atarikwenda muntu weena kuhwerekyerera, kureka naayenda ngu boona bahikye aha kweteisa.” (2 Petero 3:9) N’ahabw’ekyo twateekateeka aha ku Yehova atugumisiririize, nikituhiga kugumisiririza abandi. (Abarooma 2:4) Ni mbeera ki ezirikutwetengyesa kugumisiriza?

Hariho embeera nyingi ezirikutwetengyesa ngu tube abagumisiriza buri izooba.  Nk’eky’okureeberaho, twine okugumisiriza okutashara abandi ekirimi baaba nibagamba n’obu twakuba twine ekintu kikuru eki turikwenda kugamba. (Yakobo 1:19) Twine n’okugumisiriza omuntu yaatugwisa kubi. Omu mwanya gw’okurahuka kuguubwa kubi, ni kirungi kwijuka oku Yehova na Yesu barikugumisiriza obweremwa bwaitu. Tibarikuta omutima aha bushonga bukye obu tutarikukora gye. Kureka nibareeba emitwarize mirungi ei twine, kandi batugumisiririza kugira ngu tukore empindahinduka.​—1 Timoseo 1:16; 1 Petero 3:12.

Kandi twine kugumisiririza omuntu yaatugambira ngu haine eki tugambire nari eki tukozire ekigwire. Obundi, omu kubanza nitubaasa kwehozaho nari kwekwatsa abandi. Kwonka Ekigambo kya Ruhanga nikituhiga kutwaza gye. Nikigira kiti: “Ow’omutima ogurikugumisiriza akira ow’omutima gw’amaryo. Otarirahuka kugira ekiniga, ahabw’okuba ekiniga kituura omu mutima gw’abashema.” (Omubuurizi 7:8, 9) N’obu baakuba nibatubeiherera, twine kugumisiriza kandi tukateekateeka gye tutakakozire ekintu kyona. Ekyo nikyo Yesu yaakozire ku baamubehereire.​—Matayo 11:19.

Ni kikuru abazaire kugira okugumisiriza baaba nibahwera abaana baabo kuhindura aha mitwarize yaabo nari kwetantara ebyetengo bibi. Teekateeka ahari Mattias, orikuheereza aha Beseeli omuri Scandinavia. Obu yaabaire akiri omunyeeto, bagyenzi be ah’eishomero bakaguma nibamushekyerera ahabw’ebi yaabaire naikiriza. Omu kubanza abazaire be tibaramanyire oburemeezi obu. Kwonka, bakareeba Mattias yaatandika kubangaanisa ebi arikwikiriza. Ishe, Gillis naagira ngu we n’omukazi we bakaba baine kugira okugumisiriza omu mbeera egi. Mattias akaba ayebuuza ebibuuzo nk’ebi: “Ruhanga n’oha? Kandi shi Baibuli ku yaakuba etari Kigambo kya Ruhanga? Nitumanya tuta ngu buzima Ruhanga niwe arikwenda tukore eki, nari niwe arikutushaba kukora ekintu nanka?” Kandi Mattias akaba abuuza ishe ati: “Ahabw’enki ndikucwerwa orubanja naaba ntarikwenda kugira okwikiriza nk’oku mwine?”

Gillis naashoboorora ati: “Obumwe mutabani waitu akaba abuuza ebibuuzo aine ekiniga, atagwereirwe kubi nyina nari nyowe, beitu arikuhakanisa amazima agu arikureeba ngu nikigumisa embeera ye.” Gillis akahwera ata mutabani  we? “Nkaba nshutama nawe tugaaniira kumara eshaaha nyingi.” Kaingi, Gillis akaba ahurikiza kyonka, Mattias yaaba naamubuuza ebibuuzo kubaasa kumanya oku arikwehurira n’oku arikuteekateeka. Obumwe Gillis akaba agira eki yaashoboororera omutabani, reero amushaba kukiteekateekaho eizooba ryona, nari n’okurengamu batakagarukire kukigaaniiraho. Gillis naagira ngu obumwe nawe akaba aine kumara ebiro bikye arikuteekateeka aha ki omutabani yaamugambira. Kurabira omu kugaaniira, Mattias akatandika kwetegyereza amakuru g’ekitambo, yaamanya ngu Yehova naatukunda, kandi ngu niwe ahikire kututegyeka. Ishe naagira ati: “Kikatwara obwire buraingwa, kandi kikaba kitoorobi, kwonka mporampora, rukundo ei ainiire Yehova ekaguma neeyeyongyera. Nyowe n’omukazi wangye tushemereirwe munonga ahabw’okugumisiririza mutabani waitu obu yaabaire ari omunyeeto, okuteeraho kwaitu kukarugamu ebirungi twabaasa kumuhika aha mutima.”

Omu kuhwera mutabani waabo, Gillis n’omukazi we bakaba nibeesiga Yehova ngu naija kubahwera. Gillis naagira ati: “Nkaba nkira kugambira Mattias ngu rukundo ei tumwiniire nk’abazaire ekaba etuhiga kumushabira butoosha kugira ngu Yehova amuhwere kwetegyereza.” Abazaire aba bashemereirwe ahabw’okugira ngu bakagumisiriza, kandi tibaaruha!

Kandi nitwetenga okugumisiriza twaba twine ou turikureeberera omu ka yaitu nari munywani waitu oine endwara etarikurahuka kukira. Twine eky’okureeberaho kya Ellen * (Reeba obugambo obw’ahansi), orikutuura Scandinavia.

Emyaka munaana enyima, iba Ellen akatunga endwara y’okusharara kandi obwongo bwe bwakwatwaho. Ahabw’enshonga egyo taine nyehurira, z’okusaasibwa abandi, okugira obusaasi nari okushemererwa. Ellen ari omu mbeera egumire munonga. Naagira ati: “Eki kindeeteire kugira okugumisiriza n’okushaba emirundi mingi.” Naayongyeraho ati: “Ekyahandiikirwe eki ndikukunda ekirikungumya n’Abafilipi 4:13, ekirikugira ngu ‘nimbaasa kukora byona omuri ogwo ompa amaani.’” Ahabw’amaani n’obuhwezi bwa Yehova, Ellen abaasize kugumisiriza embeera egi.​—Zaaburi 2:5, 6.

Yehova niwe arikukirayo kutaho eky’okureeberaho ky’okugumisiriza. (2 Petero 3:15) Nitukira kushoma omu Baibuli aha kugumisiriza kwe. (Nehemia 9:30; Isaaya 30:18) Noijuka oku Yehova yaatwarize Abrahamu obu yaabuuza bingi aha kikwatiraine n’okucwekyereza Sodoma? Yehova taramucwire kirimi. Kureka akagumisiriza, yaahurikiza ebibuuzo byona ebyabaire bimwerarikiriize. Bwanyima, Yehova akooreka ngu akahurira ebibuuzo bya Abrahamu, kandi yaamuhamiza ngu tarikwija kucwekyereza Sodoma n’obu hakuba harimu abashaija ikumi abeesigwa. (Okutandika 18:22-33) Butoosha Yehova naahurikiza n’obugumisiriza, kandi tarikurahuka kuguubwa kubi!

Okugumisiriza ni gumwe aha mitwarize mikuru ei Abakristaayo boona bashemereire kugira. Twateeraho kuba abagumisiriza, nitwija kuhaisa ekitiinisa Tataitwe Yehova ow’okugumisiriza, kandi nitwija kuba bamwe ahari “abo abahungura ebyaraganisiibwe ahabw’okwikiriza n’okugumisiriza.”​—Abaheburaayo 6:10-12.