1. Nabi Isaaya akagamba ki ahari Yesu, kandi ahabw’enki eki kirikutugaruramu amaani?

OBUNABI bwa Isaaya oburikukwata ahari Yesu Kristo nibutugaruramu amaani, kandi nibutuha amatsiko. Nabi Isaaya akagira ngu Yesu “taricwa rubanja rw’amaisho, n’obu rwakuba orw’okugambirwa” kandi “aryacwera abooro emanja omu kuhikiirira.” (Isaaya 11:3, 4) Ahabw’enki eki kirikutugaruramu amaani? Ahabw’okuba abantu baingi omu nsi nibashoroora abandi kandi nibabacwera orubanja kurugiirira aha bi barikureeba. Buzima nitwetenga omucwi w’emanja ohikiriire, Yesu, otarikwija kutucwera orubanja arikwihirira aha mireebekyere yaitu!

2. Yesu akaturagiira kukora ki, kandi nituza kushwijuma ki omu kicweka eki?

² Buri izooba, ku turikureeba abandi nitugira eki twabateekateekaho. Kwonka ahabw’okuba itwe tituri nka Yesu owaabaire ahikiriire, emiteekateekyere yaitu neeba etahikire. Nitwihirira aha ki turikureeba. Kwonka Yesu akaragiira ati: “Mutaricwa emanja nimwiha aha mireebekyere y’omuntu, mugume mucwe emanja z’oburyo.” (Yohaana 7:24) N’ahabw’ekyo Yesu naayenda  tumutooreze tutarikucwera abandi emanja turikwihirira aha mireebekyere yaabo. Omu kicweka eki, nitwija kushwijuma ebintu bishatu ebirikubaasa kutureetera kucwera ondiijo emanja turikwihirira aha, ruganda rwe nari eihanga rye, esente ezi aine nari emyaka ei aine. Nitwija kureeba oku turikubaasa kworobera Yesu omu nshonga ezo tutarikucwera abandi emanja turikwihirira aha mireebekyere yaabo.

3, 4. (a) Ahabw’enki Petero yaahindwire emiteekateekyere ye aha banyamahanga? (Reeba ekishushani aha kutandika.) (b) Ni kintu ki ekisya eki Yehova yaayegyeise Petero?

³ Teekateeka aha ku entumwa Petero yaayehuriire obu yaashabwa kuza Kaisarea, ow’omunyamahanga Koruneelio! (Ebyakozirwe 10:17-29) Petero akakura arikwikiriza ngu abanyamahanga n’abantu abatashemeire. Kwonka haine ebyabaireho ebyamureeteire kuhindura aha miteekateekyere ye. Nk’eky’okureeberaho, akaba atungire okworekwa kuruga ahari Ruhanga. (Ebyakozirwe 10:9-16) Omu kworekwa okwo, Petero akareeba ekirikushusha nk’omwenda muhango ogwabaire guriho enyamaishwa ezaabaire nizitwarwa nk’ezitashemeire gurikuruga omu iguru. Reero yaahurira eiraka nirimugira riti: “Petero, imuka, oite orye.” Kwonka emirundi eshatu Petero akanga butunu. Buri murundi, eiraka rikaba rimugira riti: “Eki Ruhanga yaashemeize, otarikihindura ekirikuzira.” Bwanyima y’okworekwa okwo, Petero tarayetegyereize eki eiraka ryabaire niriteeraho kumumanyisa. Ahonaaho, abashaija abaatumirwe Koruneelio bakaija. Petero akahwerwa omwoyo gurikwera kuza omu ka ya Koruneelio, kandi yaagyenda n’abashaija abo.

⁴ Ku ogire ngu Petero akabacwera orubanja arikwihirira “aha mireebekyere yaabo,” akaba atarikwija kuza owa Koruneelio. Abayudaaya bakaba bataza omu maka g’abanyamahanga. Mbwenu shi ahabw’enki Petero yaagiireyo? N’obu araabe yaabaire naashoroora abanyamahanga, okworekwa oku yaatungire n’omwoyo gurikwera bikamuhwera kuhindura aha miteekateekyere ye. Bwanyima y’okuhurikiriza Koruneelio, Petero akagira ati: “Buzimazima naayetegyereza ku Ruhanga atashoroora mu bantu; kureka omu mahanga goona orikumutiina, akakora eby’okuhikiirira, ogwo niwe arikusiimwa.” (Ebyakozirwe 10:34, 35) Enyetegyereza nsya egi ekashemeza Petero, kandi ekaba neija kukwata n’aha Bakristaayo boona. Eta?

5. (a) Niki eki Yehova arikwenda Abakristaayo boona kwetegyereza? (b) N’obu turaabe nitumanya amazima, ni nyehurira ki ezi turikubaasa kuba twine?

⁵ Yehova akakoresa Petero kuhwera Abakristaayo boona kumanya ngu tarikushoroora abantu. Yehova tarikuta omutima aha rangi y’omuntu, eihanga rye, oruganda rwe, nari orurimi rwe. Ruhanga naasiima weena orikumutiina kandi orikukora ebihikire. (Abagalatia 3:26-28; Okushuuruurwa 7:9, 10) Obundi eki obaire nookimanya. Kwonka shi ku waakuba waakuriire omu ihanga nari eka ei barikushoroora? N’obu oraabe nooteekateeka  ngu iwe torikushoroora, mbwenu shi okiinemu enyehurira z’okushoroora abandi? N’obu Petero yaahwereire abandi kumanya ngu Ruhanga tarikushoroora, we akaguma naashoroora. (Abagalatia 2:11-14) Mbwenu shi nitubaasa kworobera tuta Yesu tukarekyera aho kucwera abandi orubanja turikwihirira aha mireebekyere yaabo?

6. (a) Niki ekiraatuhwere kweihamu okushoroora? (b) Ripoota y’ow’eishe-emwe owaabaire aine obujunaanizibwa ekooreka ki?

⁶ Okumanya yaaba twine enyehurira z’okushoroora, twine kweshwijuma. Tushemereire kugyeragyeranisa emiteekateekyere yaitu n’ebi turikwega omu Kigambo kya Ruhanga. (Zaaburi 119:105) Nitubaasa n’okubuuza munywani waitu kumanya yaaba twine omutwarize gwona ogw’okushoroora. (Abagalatia 2:11, 14) Nitubaasa kuba tutarikumanya ngu nitushoroora ahabw’okumanyiira enyehurira ezi! Eki nikyo kyabaire aha w’eishe-emwe omwe owaabaire aine obujunaanizibwa. Akahandiika ripoota erikukwata aha w’eishe-emwe n’omukazi we abaabaire bari omu buheereza obw’obutwire. Iba w’omukazi ogwo akaba naaruga omu ruganda oru baingi baabaire nibatwara nk’orw’ahansi. Ow’eishe-emwe ogu akahandiika ahari iba ebirungi bingi kwonka akongyeraho ati: “N’obu araabe naaruga omu [ihanga eri], emitwarize ye n’ebi arikukora byona nibihwera abandi kumanya ngu [okuruga omu ruganda orwo] tikirikumanyisa okuba omurofa, okuba ow’ahansi, nari kutwaza nk’ab’oruganda [orwo].” Eki nitukyegyeraho ki? N’obu twakuba twine bujunaanizibwa ki omu kibiina kya Yehova, twine kweshwijuma kandi tukaikiriza obuhabuzi oburikutuhwera kumanya yaaba nitushoroora. Niki ekindi eki turikubaasa kukora?

7. Nitubaasa kukyoreka tuta ngu ‘emitima yaitu eshashaanukire’?

⁷ ‘Twashashaanura emitima yaitu,’ nitwija kukunda abantu omu mwanya gw’okubashoroora. (2 Abakorinso 6:11-13) Nookira kuba n’abantu abu orikushushanisa nabo oruganda, eihanga nari orurimi bonka? Kyaba nikwo kiri, teeraho kushashaanuka. Noobaasa kukora entebeekanisa kubuurira n’ab’eishe-emwe ab’embeera zitarikushushana. Noobaasa kubataayaayisa nari obeete orye hamwe nabo. (Ebyakozirwe 16:14, 15) Waakora ekyo, noija kwongyera kugira rukundo eraakuhwere kweihamu enyehurira z’okushoroora. Hati ka tureebe omuringo ogundi ogurikubaasa kutureetera kucwa emanja turikwihirira aha “mireebekyere.”

8. Ebiri omu Abaleevi 19:15 nibyoreka bita ngu obugaiga obu omuntu aine nibubaasa kutuhabisa?

⁸ Nitubaasa kutwariza abantu kurugiirira aha bugaiga bwabo nari obworo bwabo. Omu Abaleevi 19:15 nihagira hati: “Otarigwera orubaju rw’omworo, n’obu kwakuba okweta aha kitiinisa ky’omukuru; kureka ocwere mutaahi waawe orubanja rw’oburyo.” Emiteekateekyere yaitu neebaasa kuhabisibwa eta obugaiga obu omuntu aine?

9. Omugabe Sulemaani akahandiika ki aha booro, kandi ekyo nikitwegyesa ki?

 ⁹ Sulemaani akahwerwa Ruhanga kuhandiika ati: “Omworo ayangwa; nangwa na bataahi be tibamwenda; kwonka omutungi agira abanyamikago baingi.” (Enfumu 14:20) Enfumu egi neetwegyesa ki? Twaba tutegyendesereize, nitubaasa kunywana ab’eishe-emwe abagaiga twetantare abooro. Ahabw’enki kiri eky’akabi kushoroora abantu kurugiirira aha bintu ebi baine nari ebi bataine?

10. Entumwa Yakobo akarabura Abakristaayo ahari ki?

¹⁰ Twashoroora ab’eishe-emwe kurugiirira aha sente ezi baine, nitubaasa kubaganisamu ekibiina. Eki kikabaho omu bibiina bimwe omu kyasha eky’okubanza, kandi niyo nshonga ahabw’enki Yakobo yaarabwire Abakristaayo abo. (Shoma Yakobo 2:1-4.) Titurikwenda ekibiina kyaitu kwebaganisamu. Mbwenu shi, nitubaasa kwetantara tuta kushoroora abandi kurugiirira aha bi baine?

11. Okugira omukago na Yehova nikurugiirira aha bi omuntu aine? Shoboorora.

¹¹ Twine kureeba ab’eishe-emwe bagyenzi baitu nk’oku Yehova arikubareeba. Omuntu tarikuba ow’omuhendo ahari Yehova ahabw’okuba omugaiga nari omworo. Omukago gwaitu na Yehova tigwine kakwate n’esente ezi twine nari ebintu ebi twine. N’eky’amazima Yesu akagira ngu “kigumire omutungi okutaaha omu bukama bw’omu iguru,” kwonka taragizire ngu tikirikubaasika. (Matayo  19:23) Kandi Yesu akagira ati: “Mwine omugisha, imwe abooro, ahabw’okuba obukama bwa Ruhanga n’obwanyu.” (Luka 6:20) Kwonka eki tikirikumanyisa ngu abooro boona bakaba nibaija kuhurikiza Yesu batungye emigisha y’omutaano. Haine abooro baingi abaayangire kukuratira Yesu. Amazima gari ngu, titurikubaasa kumanya omukago ogu omuntu aine na Yehova kurugiirira aha bintu ebi aine.

12. Ebyahandiikirwe nibyegyesa ki abatungi n’abooro?

¹² Omu baheereza ba Yehova harimu ab’eishe-emwe abagaiga n’abooro. Kwonka boona nibakunda Yehova, kandi nibamuheereza n’omutima gwabo gwona. Ebyahandiikirwe nibihiga abatungi kureka “kwegamiza amatsiko gaabo aha butungi obutarikwesigwa, kureka bagagire ahari Ruhanga.” (Shoma 1 Timoseo 6:17-19.) Ekigambo kya Ruhanga nikirabura abaheereza ba Yehova abatungi n’abooro, ngu n’eky’akabi okukunda esente. (1 Timoseo 6:9, 10) Twaba nitureeba ab’eishe-emwe nk’oku Yehova arikubareeba, titurikwija kubashoroora ahabw’ebi baine nari ebi bataine. Kwonka shi kihikire kucwera omuntu orubanja kurugiirira aha myaka ye?

13. Baibuli neetwegyesa ki aha kuha abakuzire ekitiinisa?

¹³ Baibuli butoosha neetuhiga kuha abakuzire ekitiinisa. Abaleevi 19:32 nihagira hati: “Ogume oimukire ow’enju, n’omugurusi omuhe ekitiinisa, kandi otiine Ruhanga waawe.” Enfumu 16:31 nihagira ngu “omutwe gujwengize enju n’ekirunga ky’ekitiinisa” omuntu yaaba naagyendera omu muhanda gw’okuhikiirira. Paulo akagambira Timoseo ati: “Otariteisa omushaija mukuru n’amaani, kureka omuhuguure nka sho.” (1 Timoseo 5:1, 2) N’obu Timoseo yaabaire aine obushoboorozi kukira ab’eishe-emwe abakuzire, akaba aine kubatwariza gye kandi omu muringo gw’ekitiinisa.

14. Ni ryari obu kirikubaasa kukwetengyesa kuhabura omuntu orikukukira obukuru?

¹⁴ Kandi shi omuntu okuzire ku yaakukora ekibi akigyendereire nari yaaguma naashagika ekintu eki Yehova arikwanga? Yehova tarikusaasira omuntu orikushiisha nkana, n’obu yaakuba akuzire kandi arikuheebwa ekitiinisa. Yetegyereze omusingye oguri omuri Isaaya 65:20 aharikugira ngu n’obu omusiisi yaakuba aine emyaka igana naija kukyeenwa. Nitureeba omusingye nk’ogu omu kworekwa kwa Ezekieli. (Ezekieli 9:5-7) Ekirikukirayo obukuru n’okuha Yehova ekitiinisa Omukuru owa iranaira. (Danieli 7:9, 10, 13, 14) Ekitiinisa eki turikuha Yehova nikituha obumanzi bw’okuhabura omuntu weena orikwetenga obuhwezi, n’obu yaakuba akuzire omu myaka.​—Abagalatia 6:1.

15. Entumwa Paulo nitumwegyeraho ki aha bikwatiraine n’okuha ekitiinisa ab’eishe-emwe abato?

¹⁵ Kandi shi ow’eishe-emwe ku yaakuba ari muto? Nikimanyisa ngu titwine kumuha ekitiinisa? Ngaaha. Paulo akahandiikira Timoseo ati: “Hatagira owaagaya obutsigazi bwawe kureka obe eky’okureeberaho aha barikwikiriza omu kugamba n’omu mitwarize, omu kukunda, omu kwikiriza n’omu kugira omutima ogushemeire.” (1 Timoseo 4:12) Obu Paulo yaahandiika ebi, Timoseo naabaasa kuba yaabaire aine emyaka nka 30 y’obukuru. Kwonka Paulo akaba amuhaire obujunaanizibwa bukuru. Eki nikitwegyesa ki? Titushemereire kucwera ab’eishe-emwe abato emanja turikwihirira aha myaka yaabo.  Teekateeka ahari byona ebi Yesu yaakozire omu myaka 33!

16, 17. (a) Abareeberezi nibacwamu bata ngu ow’eishe-emwe ahikire kuba omuheereza nari omureeberezi? (b) Emiteekateekyere yaitu nari emigyenzo y’ekicweka neebaasa kuhakanisa eta emisingye y’Ebyahandiikirwe?

¹⁶ Omu bicweka ebimwe, abantu tibarikuha eminyeeto ekitiinisa. N’ekirugiremu, abareeberezi abamwe tibarikwikiriza eminyeeto kuba abaheereza nari abareeberezi, n’obu baakuba baine ebirikwetengyesa. Kwonka tihaine ahu kirikworekwa omu Baibuli ngu ow’eishe-emwe aine kuhitsya emyaka eti n’eti kubaasa kuheereza nk’omuheereza nari omureeberezi. (1 Timoseo 3:1-10, 12, 13; Tito 1:5-9) Omureeberezi yaagyendera aha ku barikutwaza omu kicweka kyabo, naaba atarikworobera Ekigambo kya Ruhanga. Abareeberezi baaba nibashwijuma ebirikukwata aha minyeeto, tibaine kukuratira emiteekateekyere yaabo nari emigyenzo, beitu Ekigambo kya Ruhanga.​—2 Timoseo 3:16, 17.

¹⁷ Abareeberezi baayehuzya emitindo ya Baibuli erikukwata aha kutoorana abaheereza n’abareeberezi, nibabaasa kuremesa ab’eishe-emwe abarikuhikiiriza ebirikwetengyesa kutooranwa. Omu ihanga rimwe, omuheereza omu kibiina akaba naahikiiriza gye obujunaanizibwa, kandi abareeberezi baikirizana ngu naahikiiriza byona ebiri omu Baibuli ebirikwetengyesa kuba omureeberezi. Kwonka, abareeberezi bamwe abakuzire bakagira ngu akaba naareebeka nka muto munonga kuba omureeberezi, n’ahabw’ekyo tibaramuhamize ngu otooranwe. Eky’obusaasi, ow’eishe-emwe ogu taratoorainwe kuba omureeberezi, ahabw’emireebekyere ye. Nikireebeka emiteekateekyere nk’egi ekanyire omu bicweka bingi. Ni kikuru munonga kwesiga Baibuli okukira emiteekateekyere yaitu nari emigyenzo y’ekicweka. Obu nibwo turaayorobere Yesu tukarekyera aho kucwera abantu orubanja kurugiirira aha mireebekyere yaabo.

18, 19. Niki ekiraatuhwere kureeba ab’eishe-emwe nk’oku Yehova arikubareeba?

¹⁸ Tituhikiriire, kwonka nabwo nitubaasa kwega okutashoroora abandi kureka tubareebe nk’oku Yehova arikubareeba. (Ebyakozirwe 10:34, 35) Twine kuta omutima aha bi Ruhanga arikutwijutsya ebiri omu Kigambo kye. Twabigyenderaho, nitwija kworobera ekiragiro eki Yesu yaagambire ngu “mutaricwa emanja nimwiha aha mireebekyere y’omuntu.”​—Yohaana 7:24.

¹⁹ Juba Omugabe, Yesu Kristo naija kucwera abantu boona emanja. Naija kucwa emanja z’okuhikiirira arikugyendera aha mitindo ya Ruhanga, tarikwija kucwa orubanja rw’amaisho, n’obu rwakuba orw’okugambirwa. (Isaaya 11:3, 4) Twine ekihika kureeba eki nikihikiirira!