1. Ahabw’enki okubatizibwa riri eidaara rikuru? (Reeba ekishushani aha kutandika.)

BURI mwaka abeegi ba Baibuli baingi nibabatizibwa. Baingi ahari abo nibaba bari emishogoyo nari bakiri bato. Nibabaasa kuba baakuriire omu mazima. Ori omwe aharibo? Kyaba nikwo kiri, okakora ekintu kirungi munonga. Buri Mukristaayo aine kubatizibwa. Omuntu kubaasa kujunwa akatuuraho ebiro byona aine kubatizibwa.​—Matayo 28:19, 20; 1 Petero 3:21.

2. Ahabw’enki otashemereire kutiina kwehayo ahari Yehova?

² Ku waaherize kubatizibwa, Yehova akatandika kukuha emigisha omu miringo mingi. Kwonka nabwo okagira obujunaanizibwa bwingi. Mu muringo ki? Obu waabatizibwa, ow’eishe-emwe owaahaire orubazo rw’okubatizibwa akabuuza ati: “Orikwihirira aha kitambo kya Yesu Kristo, oyeteisize ebibi byawe kandi waayehayo ahari Yehova kukora ebi arikukunda?” Okagarukamu ngu eego. Okaraganisa kukunda Yehova  kandi okatwara okumuheereza nk’ekintu kikuru. Mbwenu shi oshemereire kwefuuza ahabw’okuraganisa otyo? Ngaaha buzima! Torikubaasa kwefuuza ahabw’okwikiriza Yehova kukuhabura. Abo abatarikumanya Yehova nibaba bari ekicweka ky’ensi ya Sitaane. Kandi Sitaane tarikubafaho kandi naiwe tarikukufaho na kakye. Nangwa naashemererwa waaba otakiine matsiko g’okutuuraho ebiro byona ahabw’okuza aha rubaju rwe okanga orwa Yehova.

3. Yehova akuhaire migisha ki ahabw’okwehayo ahariwe?

³ Teekateeka aha migisha ei Yehova akuhaire ahabw’okwehayo ahariwe kandi okabatizibwa. Amagara gaawe okagahayo ahari Yehova, n’ahabw’ekyo noobaasa kugambisa obuhame ngu Yehova “ari aha rubaju rwangye, tinditiina; omuntu naabaasa kungira ata?” (Zaaburi 118:6) Tihariho kitiinisa ekirikukira okuba aha rubaju rwa Ruhanga n’okumanya ngu naakwesiimisa.

4, 5. (a) Ahabw’enki turikugira ngu okwehayo ahari Yehova n’obujunaanizibwa bwa buri muntu? (b) Ni bintu ki ebirikubaasa kuteganisa Abakristaayo ab’emyaka yoona?

⁴ Toshemereire kureeba omukago gwawe na Yehova nk’ekibanja ky’eka eki orikuhungura. N’obu oraabe nookituura n’abazaire baawe, omukago gwawe na Yehova n’obujunaanizibwa bwawe wenka. Ahabw’enki eki ni kikuru kukiijuka? Tihaine n’omwe omuriitwe orikumanya oku okwikiriza kwe kuraagyezibwe omu biro by’omumaisho. Nk’eky’okureeberaho, noobaasa kuba waabatiziibwe otakabaire mushogoyo. Kwonka hati obu ori omushogoyo, oine enyehurira nsya n’oburemeezi busya. Omwishiki omwe omushogoyo akagira ati: “Omwana butoosha tarikubaasa kwehurira kubi yaaba atariire aha keeki y’okukuza okuzaarwa aha ishomero ahabw’okugira ngu n’Omujurizi wa Yehova. Kwonka haahinguraho emyaka mikye ekyetengo ky’okuteerana kikatandika kuba eky’amaani, aine kuba naahamiza kimwe ngu okworobera ebiragiro bya Yehova butoosha ni kirungi.”

⁵ Abato bonka tibo barikugira ebirikubateganisa ebisya. Nangwa n’abo abarikubatizibwa baakuzire okwikiriza kwabo nikugyezibwa omu miringo ei batarikuteekateeka. Okugyezibwa kwabo nikubaasa kuruga omu bushwere bwabo, amagara gaabo, nari emirimo yaabo. Yaaba turi bakuru nari bato, buri omwe ahariitwe aine kuba omwesigwa ahari Yehova omu mbeera zoona.​—Yakobo 1:12-14.

6. (a) Niki eki oshemereire kuguma noijuka aha kwehayo kwawe? (b) Nooyega ki omu Abafilipi 4:11, 12 na Isaaya 12:2?

⁶ Kubaasa kukuhwera kuguma ori omwesigwa, butoosha guma noijuka ngu okaraganisa Yehova ngu nooza kumuheereza n’obu haakubaho ki, nangwa n’obu banywani baawe nari abazaire baawe baakurekyera aho kumuheereza. (Zaaburi 27:10) Omu mbeera zoona, shaba Yehova kukuhwera kuhikiiriza eki waamuraganiise.​—Shoma Abafilipi 4:11, 12; Isaaya 12:2.

7. Nikimanyisa ki okukoreerera okujunwa kwawe oine “obwoba n’okutetema”?

⁷ Yehova naayenda ngu obe munywani we. Kwonka nikyetengyesa okutamu amaani kubaasa kuhamya omukago ogwo n’okukoreerera okujunwa kwawe. Abafilipi 2:12 nihagira ngu mwine kukoreerera “okujunwa kwanyu mwine obwoba n’okutetema.” Eki  nikimanyisa ngu twine kuteekateeka n’obwegyendesereza aha ku twine kuguma haihi na Yehova, kandi tukaguma turi abeesigwa n’obu haakubaho ki. Titurikubaasa kuteebereza ngu nitwija kukikora. Ijuka ngu bamwe abaamazire emyaka nibaheereza Yehova omu bwesigwa, bakahika baaremwa kuguma bari abeesigwa. Ni bintu ki ebirikubaasa kukuhwera kukoreerera okujunwa kwawe?

8. Okweyegyesa nikutwariramu ki, kandi ahabw’enki ni kukuru?

⁸ Kubaasa kuba munywani wa Ruhanga, twine kumuhurikiza kandi tukagamba nawe. Omuringo mukuru ogw’okuhurikiza Ruhanga n’okushoma Baibuli. Eki nikitwariramu okushoma n’okuteekateeka aha biri omu Kigambo kya Ruhanga n’ebitabo ebirikwegamira ahari Baibuli. Kwonka okweyegyesa Baibuli tikirikushushana n’okukwata ebintu omu mutwe nk’orikuza kukora ebigyezo aha ishomero. Kureka, ni nk’orugyendo rurikushemeza ahu orikujumbura ebintu bisya ebirikukwata ahari Yehova. Waakora otyo, noija kwirira haihi Ruhanga nawe akwirire haihi.​—Yakobo 4:8.

9. Ni bikoreso ki ebikuhwereire omu kweshomesa?

⁹ Ekibiina kya Yehova nikishohoza ebintu bingi ebirikubaasa kukuhwera omu kweyegyesa. Nk’eky’okureeberaho, hariho ebicweka “Eby’okukora omu Kwega Baibuli” ahansi y’omutwe “Eminyeeto” aha jw.org, kukuhwera kuta omu nkora ebi orikwega  omu Baibuli. Kandi aha jw.org, noobaasa kushangaho ebirikuhwera omu kwega “What Does the Bible Really Teach?” Ebi nibibaasa kukuhwera kwombeka okwikiriza kwawe n’okushoboororera abandi enyikiriza zaawe. Noobaasa kushanga obuhabuzi obundi omu kweyegyesa omu kicweka “Eminyeeto Nibabuuza . . . Nimbaasa Kureetera nta Okushoma Baibuli Kuba Okurikushemeza?” omuri Awake! ey’Okwakana 2009. Okushoma n’okuteekateeka ni bikuru kubaasa kukoreerera okujunwa kwawe.​—Shoma Zaaburi 119:105.

10. Ahabw’enki Omukristaayo obatiziibwe aine kushaba?

¹⁰ Twaba nitwega Baibuli, nituba nituhurikiza Yehova, kandi twaba nitushaba, nituba nitugamba nawe. Titurikubaasa kutwara okushaba nk’omuze buze, nari nk’orugisha rw’okutureetera obusinguzi. Okushaba n’okuhurizana n’Omuhangi omu muringo ogwabuzima. Teekateeka ahari eki: Yehova naayenda kuhurira eki orikwenda kumugambira! (Shoma Abafilipi 4:6.) N’ahabw’ekyo haagira ekyakwerarikiriza, Baibuli neegira ngu “yegyekyera” Yehova “omutwaro gwawe.” (Zaaburi 55:22) Ab’eishe-emwe baingi munonga nibagira ngu obuhabuzi obu bubahwereire munonga. Naiwe nibubaasa kukuhwera!

11. Ahabw’enki oshemereire kwebaza Yehova butoosha?

¹¹ Kwonka titushemereire kushaba obu turikwenda ngu Yehova atuhwere bwonka. Baibuli neetwijutsya eti: “Mube abarikusiima.” (Abakolosai 3:15) Obumwe nitwerarikirira munonga aha buremeezi bwaitu twebwa ebirungi byona ebi twine. Ekyo kyabaho teeraho kukora eki: Buri izooba, teekateeka haakiri aha bintu bishatu ebi orikusiima, reero oyebaze Yehova ahabw’ebintu ebyo. Omushogoyo orikwetwa Abigail, owaabatiziibwe aine emyaka 12 y’obukuru, naagira ati: “Ninteekateeka ngu twine kwebaza Yehova okukira omuntu ondiijo weena. Tushemereire kuba nitwebaza Yehova ahabw’ebiconco ebi atuhaire.” Obumwe Abigail naayebuuza ekibuuzo eki, eki yaabaire yaahuriireho: “Ku naakwimuka nyenkyakare nyine ebintu byonka ebi naayebariza Yehova eri izooba, bikaabaire biri bintu ki byenyini?” * (Reeba obugambo obw’ahansi.)

12, 13. Iwe waareebire oburungi bwa Yehova, kandi ahabw’enki ni kikuru kuteekateeka aha ku akuhwereire?

¹² Yehova akahwera Daudi kwemera embeera zigumire. N’ahabw’ekyo Daudi akaba naagamba kurugiirira aha bi yaarabiremu obu yaagira ati: “Nimuroze, mureebe” Yehova “ku ari murungi! Orikumwesiga weena aine omugisha.” (Zaaburi 34:8) Omushororongo ogu nigutworeka ngu nitubaasa kureeba oburungi bwa Yehova. Waashoma Baibuli n’ebitabo byaitu kandi okaza  omu nteerane, nooreeba oku Ruhanga ahwereire abandi kuguma bari abeesigwa. Kwonka omukago gwawe na Yehova gwaguma nigweyongyera kuhama, oine kureeba oku Yehova arikukuhwera. Iwe nk’omuntu waareebire oburungi bwa Yehova?

¹³ Buri Mukristaayo areebire oburungi bwa Yehova omu muringo gw’omutaano. Naayeta buri omwe ahariitwe kumwirira haihi hamwe n’Omwana we. Yesu akagira ati: “Tihariho orikubaasa kwija ahariinye, Tata owaantumire yaaba atamwiriize haihi.” (Yohaana 6:44) Nooreeba ngu Yehova akweyiriize haihi? Nari nooteekateeka oti: ‘Yehova akeeyiriza haihi abazaire bangye kandi nyowe nimbakuratira bukuratira’? Ijuka ngu waayehayo ahari Yehova kandi okabatizibwa, nooba waayekorera omukago gw’omutaano nawe. Baibuli neetugira eti: “Omuntu ku akunda Ruhanga, niwe amanywa Ruhanga.” (1 Abakorinso 8:3) Butoosha siima omwanya ogu Yehova akuhaire omu kibiina kye.

14, 15. Okubuurira nikubaasa kukuhwera kuta kugira okwikiriza kuhami?

¹⁴ Kandi nooreeba oburungi bwa Yehova yaakuha obumanzi bw’okugambira abandi ebi orikwikiriza, waaba ori omu kubuurira nari aha ishomero. Nikibaasa kukugumira kubuurira abu orikushoma nabo. Noobaasa kutiina oku baraatwaze. Okukira munonga nikibaasa kukutiinisa kushoboororera abantu abari hamwe ebi orikwikiriza. Niki ekirikubaasa kukuhwera?

¹⁵ Teekateeka aha nshonga ahabw’enki noikiriza ebi orikwikiriza. Ebirikuhwera omu kweshomesa ebiri aha jw.org byaba biriho omu rurimi rwawe, teeraho kubikoresa. Nibibaasa kukuhwera kuteekateeka aha bi orikwikiriza, enshonga ahabw’enki noobiikiriza, n’oku orikubaasa kushoboororera abandi enyikiriza zaawe. Buzima waaba noohamiza kimwe kandi otebeekaniise gye, noija kwenda kugambira abandi ebirikukwata ahari Yehova.​—Yeremia 20:8, 9.

16. Niki ekirikubaasa kukuhwera kugira obumanzi bw’okugamba aha nyikiriza zaawe?

¹⁶ Waaba otebeekaniise gye, nabwo noobaasa kutiina kushoboorora ebi orikwikiriza. Munyaanyazi-itwe ow’emyaka 18, owaabatiziibwe aine emyaka 13, naagira ati: “Nimmanya ebi ndikwikiriza, kwonka obumwe nikiingumira kuta ebiteekateeko byangye omu bigambo.” N’ahabw’ekyo naateeraho kugamba aha mazima omu muringo gwa butoosha kandi aikaikaine. Naagira ati: “Abu ndikushoma nabo tibarikutiina kugamba aha bi barikukora. Naanye nshemereire kukora nikyo kimwe ntarikutiina. N’ahabw’ekyo nimbaasa kugamba ebintu nka, ‘nyomwabazyo mbaire ninyegyesa omuntu Baibuli, kandi . . .’ Reero ningumizamu n’ebi ndikwenda kubatebeza. N’obu eki ndikubatebeza kyakuba kitarikukwata aha Baibuli, obwire obwingi abamwe nibaba nibenda kumanya eki ndikukora naaba ninyegyesa omuntu Baibuli. Obumwe nibabuuza ebibuuzo ebirikukwata aha kwegyesa Baibuli. Oku ndikweyongyera kukoresa omuringo ogu, nikwo kirikweyongyera  kworoba. Kandi bwanyima, ninyehurira gye!”

17. Niki ekindi ekirikubaasa kukuhwera kugambira abandi ebi orikwikiriza?

¹⁷ Abandi baamanya ngu noobafaho kandi ngu noobaha ekitiinisa, nikiboorobera kukuha ekitiinisa n’ebi orikwikiriza. Olivia, oine emyaka 17 kandi owaabatiziibwe akiri muto, naagira ati: “Butoosha nkaba nintiina ngu naareeta Baibuli omu kugaaniira, abantu nibaija kundeeba nk’omuntu orikurengyesereza okuhikiirira.” Kwonka akatandika kureeba ebintu omu muringo gw’omutaano. Omu mwanya gw’okuta omutima munonga aha kutiina kwe, akateekateeka ati: “Eminyeeto abaingi tibarikumanya kintu kyona aha Bajurizi ba Yehova. Naitwe Bajurizi ba Yehova twenka abu barikumanya. N’ahabw’ekyo abantu nibabaasa kwikiriza amazima nari kuganga kurugiirira aha ku turikutwaza. Mbwenu shi ku twakugira enshoni nari tukatiina kugamba aha kwikiriza kwaitu, nari tukagamba turikwetiina? Obwo nibabaasa kutureeba nk’abatarikukunda ebi turikwikiriza. Nibabaasa n’okutasiima amazima ahabw’okugira ngu titurikweyikiririzamu. Kwonka, twaba nitworoberwa kugamba, kandi turikuhamya ebi turikwikiriza, turikubigambaho omu kugaaniira kwaitu, obundi nibabaasa kutuha ekitiinisa.”

18. Niki eki oine kukora kubaasa kukoreerera okwikiriza kwawe?

¹⁸ Twareeba ngu n’obujunaanizibwa bukuru kukoreerera okujunwa kwawe. Kubaasa kukora eki, oine kushoma kandi okateekateeka aha Kigambo kya Ruhanga, okashaba Yehova, kandi okateekateeka munonga aha miringo yoona ei akuhwereiremu nk’omuntu. Okukora ebintu ebi nikiija kukuhwera kwongyera kuhamya ngu Yehova ni Munywani waawe. Eki nikiija kukureetera kwenda kugambira abandi ebi orikwikiriza.​—Shoma Zaaburi 73:28.

19. Ahabw’enki okwefeerereza kukoreerera okujunwa kwawe kutari kwa busha?

¹⁹ Yesu akagira ngu “omuntu weena ku araayende kunkuratira, ayeyangise, ayekorere” omuti gwe ankuratire. (Matayo 16:24) Buzima, buri Mukristaayo kubaasa kukuratira Yesu, aine kwehayo ahari Yehova kandi akabatizibwa. Kwonka egi n’entandikiro y’ebirungi ebi oraatungye hati, kandi nibiija kukuhitsya aha magara agatahwaho omu nsi ensya. N’ahabw’ekyo kora kyona ekirikubaasika kukoreerera okujunwa kwawe!