1, 2. Ahabw’enki abazaire abamwe barikubaasa kwerarikirira abaana baabo baaba nibenda kwehayo ahari Yehova kandi bakabatizibwa?

ABEEGI ba Baibuli baingi munonga nibeehayo ahari Yehova kandi babatizibwa. Bamwe aharibo n’abaana abakuriire omu mazima kandi abacwiremu omuhanda murungi. (Zaaburi 1:1-3) Ku oraabe ori omuzaire Omukristaayo, noobaasa kuba oine ekihika ky’okureeba mutabani waawe nari muhara waawe naabatizibwa.​—Gyeragyeranisa na 3 Yohaana 4.

² Kwonka nabwo, noobaasa kwerarikirira. Noobaasa kuba oreebire abato abamwe barikubatizibwa, reero bwanyima bakatandika kubangaanisa yaaba okukuratira emitindo ya Ruhanga nikibagasira. Abamwe nangwa barugire n’omu mazima. N’ahabw’ekyo noobaasa kuba nooyerarikirira ngu omwana waawe naija kutandika kuheereza Yehova kwonka bwanyima rukundo ei yaabaire ainiire amazima etuube. Omwana waawe naabaaasa kuba nk’Abakristaayo abamwe ab’omuri Efeso omu  kyasha ky’okubanza. Yesu akabagira ati: ‘Mukareka okukunda kwanyu okw’okubanza.’ (Okushuuruurwa 2:4) Noobaasa kuhwera ota omwana waawe kuguma aine rukundo ehami kandi akahika “aha kujunwa”? (1 Petero 2:2) Nitubaasa kwegyera aha ky’okureeberaho kya Timoseo.

3. (a) Timoseo akahinduka ata Omukristaayo, kandi akakoresa ata ebi yaayegire? (b) Ni bintu ki bishatu ebirikutwarirwa omu kwega ebi Paulo yaagambiire Timoseo?

³ Entumwa Paulo akabanza kutaayaaya omuri Lusitura omuri 47 Y.A.K., kandi obwo Timoseo naabaasa kuba nibwo yaayegire ebirikukwata ahari Yesu akiri omushogoyo. Akagyendera aha bi yaayegire, kandi bwanyima y’emyaka ebiri akatandika kugyenda na Paulo. Bwanyima y’ekyo hakahinguraho emyaka 16 reero Paulo yaahandiikira Timoseo ati: “Ogumizemu omu bi waayegire okamanyira kimwe, ahakuba noomanya abaabikwegyeise, kandi noijuka ngu okuruga omu buto bwawe okamanya Ebyahandiikirwe ebirikwera ebirikubaasa kukuhaisa obwengye bw’okukuhabura omuhanda gw’okujunwa ahabw’okwikiriza Kristo Yesu.” (2 Timoseo 3:14, 15) Yetegyereze ngu Paulo akagira ngu Timoseo (1) akaba naamanya ebyahandiikirwe ebirikwera, (2) akamanyira kimwe nari akaikiriza ebi yaayegire, kandi (3) akatunga obwengye bw’okujunwa ahabw’okwikiririza omuri Kristo Yesu.

4. Iwe okoreise ki kwegyesa abaana baawe? (Reeba ekishushani aha kutandika.)

⁴ Omuzaire Omukristaayo naaba naayenda ngu omwana we amanye ebyahandiikirwe ebirikwera, kandi obunaku obu nibitwariramu Ebyahandiikirwe eby’Oruheburaayo n’eby’Orugriika. Nangwa n’omwana okiri muto naabaasa kwega aha bantu n’ebindi bintu ebirikugambwaho omu Baibuli. Ekibiina kya Yehova kishohoize vidiyo nyingi n’ebitabo bingi, ebi abazaire barikubaasa kukoresa kuhwera abaana. Haine bimwe aharibyo ebiriho omu rurimi rwawe? Omwana waawe aine kumanya ebiri omu Baibuli kubaasa kwombeka omukago guhami na Yehova.

5. (a) Ebigambo “akamanyira kimwe” nibimanyisa ki? (b) Nitumanya tuta ngu Timoseo akamanya gye amakuru marungi agarikukwata ahari Yesu?

⁵ Tikirikumara kwegyesa abaana baawe aha bantu n’ebintu ebiri omu Baibuli. Ijuka ngu Timoseo akamanyira kimwe ebi yaayegire. Ebigambo by’Orugriika ebi Paulo yaakoreise aha nibimanyisa “okuhamiza kimwe” nari “okwikiriza oine obuhame ngu ekintu kihikire.” Timoseo akaba naamanya Ebyahandiikirwe ebirikwera kuruga “omu buto.” Bwanyima, akahamiza kimwe atarikubanganisa ngu Yesu niwe yaabaire ari Mesia. Okwikiriza kwa Timoseo kukahama yaabatizibwa ahonaaho, kandi yaatandika kukuheereza na Paulo nk’omumiisani.

6. Noobaasa kuhwera ota omwana waawe kwongyera kwikiriza ebiri omu Kigambo kya Ruhanga?

⁶ Noobaasa kuhwera ota abaana baawe kuhamya  okwikiriza kwabo nk’oku Timoseo yaakozire, kugira ngu nabo bamanyire kimwe amazima? Okubanza, ba omugumisiriza. Nikitwara obwire kugira okwikiriza kuhami. Ahabw’okugira ngu noikiriza ekintu tikirikumanyisa ngu n’abaana baawe nibaija kufa kukiikiriza. Buri mwana aine kukoresa okubaasa kwe okw’okuteekateeka kwongyera kwikiriza ebiri omu Baibuli. (Shoma Abarooma 12:1.) Omuzaire noobaasa kukora kihango kuhwera omwana waawe kuhamya okwikiriza kwe, na munonga yaabuuza ebibuuzo. Ka tureebe eki turikubaasa kwegyera aha ky’okureeberaho ky’omuzaire omwe omushaija.

7, 8. (a) Omuzaire omwe Omukristaayo naayoreka ata okugumisiriza yaaba naayegyesa omuhara? (b) Ni ryari obu kirakwetengyeise kugumisiriza omwana waawe?

⁷ Thomas, oine omuhara w’emyaka 11, naagira ngu obumwe omuhara naamubuuza ebibuuzo nka: “Mbwenu shi Yehova naabaasa kuba yaahangire ebintu omu nsi arikubiiha omu bindi?” nari “Ahabw’enki tutarikwejumba omu bintu ebi abandi barikukora nk’okuteera akaruuru, kubaasa kureetaho embeera nungi?” Obumwe, Thomas naaba aine kwetantara omuze gw’okugambira omuhara eki araikirize. Naamanya ngu ekirikureetera omuntu kumanyira kimwe amazima tikumuha obuhame buhango omurundi gumwe, kureka n’okuguma noomuha bukye-bukye emirundi mingi.

⁸ Kandi Thomas naamanya ngu aine kugumisiriza kubaasa kwegyesa omuhara. Buzima, Abakristaayo boona baine kuba abagumisiriza. (Abakolosai 3:12) Thomas naamanya ngu nikitwara obwire n’okugaaniira kwingi kubaasa kuhwera omuhara kutunga obuhame aha bi arikwikiriza. Aine kuhikaanisa nawe ebiteekateeko aha bi arikwega omu Baibuli. Thomas naagira ati: “Na munonga aha nshonga eziri nkuru, nyowe n’omukazi wangye nituba nitwenda kumanya yaaba muhara waitu naikiriza ebi arikwega kandi ku biraabe nibikora amakuru. Ku arikuba aine ebibuuzo, eki nikiba kiri kirungi. Okuba ow’amazima, kikaabaire nikindeetera okwerarikirira ku ogire ngu naikiriza buri kimwe atarikubuuza.”

9. Noobaasa kuhwera ota omwana waawe kwikiririza omu Kigambo kya Ruhanga?

⁹ Abazaire baayegyesa abaana baabo baine okugumisiriza, haahinguraho obwire abaana nibaija kutandika kwetegyereza ‘oburaingwa bw’obukiika, n’obw’oburaingwa, n’obwa bwemi’ obw’okwikiriza. (Abaefeso 3:18) Nitubaasa kubeegyesa omu muringo ogurikuhikaana n’emyaka yaabo n’oku barikwetegyereza. Baayeyongyera kuhamya okwikiriza kwabo, nikiija kuboorobera kugambira abandi ebi barikwikiriza otwariiremu n’abu barikushoma nabo. (1 Petero 3:15) Nk’eky’okureeberaho, abaana baawe nibabaasa kukoresa Baibuli kushoboorora ekirikubaho omuntu yaafa? Mbwenu shi nibareeba ngu enshoboorora ya Baibuli neekora amakuru? * (Reeba obugambo obw’ahansi.) Ijuka ngu oine kuba omugumisiriza kubaasa  kuhwera omwana waawe kwongyera kwikiriza ebiri omu Kigambo kya Ruhanga, kwonka ebirikurugamu nibikira okwefeerereza.​—Eky’Ebiragiro 6:6, 7.

10. Niki ekishemereire kuba kikuru omu kwegyesa abaana baawe?

¹⁰ Kandi, eky’okureeberaho kyawe ni kikuru munonga omu kuhwera omwana waawe kugira okwikiriza. Stephanie, oine abahara bashatu, naagira ati: “Kuruga obu abaana bangye baabaire bakiri bato munonga, nkaba nyebuuza nti: ‘Ningambira abaana bangye ahabw’enki nimpamiza kimwe ngu Yehova ariho, aine rukundo, kandi ngu emitindo ye ehikire? Abaana bangye nibareeba butunu ngu ninkunda Yehova?’ Tindikubaasa kureetera abaana bangye kugira obuhame naaba ntabwine.”

11, 12. Obwengye niki, kandi nitumanya tuta ngu tiburikurugiirira aha myaka y’omuntu?

¹¹ Twaheza kwega ngu Timoseo akaba (1) naamanya Ebyahandiikirwe (2) akaba naahamya ebi arikwikiriza. Kwonka shi Paulo akaba naamanyisa ki obu yaagira ngu ebyahandiikirwe ebirikwera bikaba nibiza kuhwera Timoseo kugira ‘obwengye bw’okujunwa’?

¹² Ekitabo Insight on the Scriptures, Ekya 2, nikishoboorora ngu omu Baibuli, obwengye nibutwariramu “okubaasa kukoresa gye okumanya n’okwetegyereza kushoboorora oburemeezi, kwetantara nari kuzibira akabi, kuhika aha bigyendererwa ebimwe, nari kuhabura abandi. Nibutaana aha bushema.” Baibuli neegira ngu “obushema bubohirwe omu mutima gw’omwana.” (Enfumu 22:15) Obu obwengye burikutaana n’obushema, obwengye n’akamanyiso kamwe k’okuba okuzire omu by’omwoyo. Omuntu naaba okuzire omu by’omwoyo ahabw’okutiina Yehova kandi akeenda kumworobera, beitu kutari kugira ngu akuzire omu myaka.​—Shoma Zaaburi 111:10.

13. Abato nibabaasa kworeka bata ngu baine obwengye bw’okujunwa?

¹³ Abato abarikworeka ngu bakuzire omu by’omwoyo tibarikuguma nibatwarwa “oku n’oku” ebyetengo byabo nari barikutwarwatwarwa abato bagyenzi baabo. (Abaefeso 4:14) Omu mwanya gw’ekyo, okubaasa kwabo okw’okwetegyereza nikutendekwa kutaanisa ekirungi n’ekibi. (Abaheburaayo 5:14) N’ahabw’ekyo nibacwamu eby’obwengye, n’obu abazaire baabo nari abakuru abandi baakuba batarikubareeba. (Abafilipi 2:12) Obwengye obw’omuringo ogu nibwetengyesa kubaasa kujunwa. (Shoma Enfumu 24:14.) Noobaasa kuhwera ota abaana baawe kugira obwengye nk’obwo? Oine kuhamya ngu nibamanya emisingye ei orikugyenderaho. Kurugiirira aha bi orikugamba n’ebi orikukora, baine kureeba ngu nooteeraho kugyendera aha misingye ya Baibuli.​—Abarooma 2:21-23.

14, 15. (a) Omunyeeto orikwenda kubatizibwa ashemereire kuteekateeka ahari ki? (b) Noobaasa kuhwera ota omwana waawe kuteekateeka aha migisha erikuruga omu kworobera ebiragiro bya Ruhanga?

¹⁴ Kwonka kubaasa kuhwera omwana waawe kwombeka okwikiriza kwe, tikirikumara kumugambira ekihikire n’ekigwire. Kandi oine kumuhwera kuteekateeka aha bibuuzo nk’ebi: ‘Ahabw’enki Baibuli neezibira ebintu ebirikureebeka  nk’ebirungi? Nimbaasa kuhamya nta ngu emitindo ya Baibuli butoosha neeba eri mirungi ahariinye?’​—Isaaya 48:17, 18.

¹⁵ Omwana waawe yaaba naayenda kubatizibwa, muhwere n’okuteekateeka aha bujunaanizibwa oburikutwarirwamu. Naatwara ata obujunaanizibwa obu? Harimu birungi ki? Harimu kwefeerereza ki? Ahabw’enki ebirungi birikukira okwefeerereza? (Mako 10:29, 30) Ni kikuru munonga kuteekateeka aha bintu ebi n’obwegyendesereza atakabatiziibwe. Hwera omwana waawe kuteekateeka munonga aha migisha erikuruga omu kworobera ebiragiro bya Ruhanga n’ebibi ebirikuruga omu kugoma. Reero naabaasa kwikiriza ngu okugyendera aha mitindo ya Baibuli butoosha n’eky’oburungi bwe.​—Eky’Ebiragiro 30:19, 20.

16. Omuzaire aine kukora ki okwikiriza kw’omwana we obatiziibwe kwatandika kutuuba?

¹⁶ Noobaasa kukora ki omwana waawe obatiziibwe yaatandika kubangaanisa aha mazima? Nk’eky’okureeberaho, mutabani waawe nari muhara waawe naabaasa kutandika kukunda ebintu by’ensi. Nari omwana waawe naabaasa kutandika kubangaanisa yaaba emisingye ya Baibuli buzima n’ey’oburungi bwe. (Zaaburi 73:1-3, 12, 13) Oku iwe oraatwaze nikibaasa kumureetera kugumizamu  naaheereza Yehova nari kwanga kumuheereza. Otateeraho kuhakana n’omwana waawe aha nshonga egi, n’obu yaakuba akiri muto nari ari omushogoyo. Omu mwanya gw’ekyo, mworekye ngu buzima noomukunda kandi ngu nooyenda kumuhwera.

17, 18. Omwana yaaba aine okubangaanisa, abazaire be nibabaasa kumuhwera bata?

¹⁷ Omwana orikuba abatiziibwe naaba ayehaireyo ahari Yehova. Naaba araganiise kumukunda n’okuheereza n’omutima gwe gwona kukira ekintu ekindi kyona. (Shoma Mako 12:30.) Yehova naareeba okwehayo nk’okuraganisa kukuru munonga, naitwe nikwo tushemereire kukureeba. (Omubuurizi 5:4, 5) Yijutsya omwana waawe enshonga egi. Kwonka okubanza, shoma kandi oyegye ebi ekibiina kya Yehova kihaire abazaire. Bwanyima, omu muringo gw’embabazi kandi omu bwire obuhikire, hamiza omwana waawe ngu okucwamu kwe kwehayo ahari Yehova n’okubatizibwa ekaba eri enshonga nkuru munonga, kwonka ngu naija kutunga emigisha mingi.

¹⁸ Nk’eky’okureeberaho, noobaasa kushanga obuhabuzi burungi omu katabo Questions Young People Ask​—Answers That Work, ak’Okubanza aha muheru omu byongyeirweho ebiine omutwe “Ebibuuzo Ebi Abazaire Barikubuuza.” Nibiha abazaire obuhabuzi ngu tibaine kurahuka kuteekateeka ngu abaana baabo bangire amazima, kureka baine kumanya oburemeezi bwenyini. Noobaasa kushanga ngu nibagyemeserezibwa nari baine eihamba. Nari omwana naabaasa kuteekateeka ngu abato abandi nibakora bingi omu kuheereza Yehova kumukira. Ebyongyeirweho ebyo kandi nibishoboorora ngu enshonga ezi tizirikworeka ngu omwana naahakanisa enyikiriza zaawe. Obumwe noobaasa kushanga ngu aine obundi buremeezi obu arikurwana nabwo. Ebyongyeirweho ebyo bwanyima nibiha obuhabuzi aha ku omuzaire arikubaasa kuhwera omwana we orikubangaanisa aha mazima.

19. Abazaire nibabaasa kuhwera bata abaana baabo kugira ‘obwengye bw’okujunwa’?

¹⁹ Abazaire, mwine obujunaanizibwa bukuru n’omugisha gw’okworora abaana baanyu “nimubeegyeseza omuri” Yehova. (Abaefeso 6:4) Nk’oku twareeba, eki nikimanyisa ngu mwine kwegyesa abaana baanyu eki Baibuli erikwegyesa, kandi mubahwere kuhamya ngu ebi barikwega n’amazima. Baaba baine okwikiriza kuhami, nikiija kubahiga kwehayo ahari Yehova, kandi bamuhe ekirikukirayo oburungi. Nitushaba ngu Ekigambo kya Ruhanga, omwoyo gwe ogurikwera, n’okuteeraho kwanyu kuhwere abaana baanyu kugira ‘obwengye bw’okujunwa.’