1-3. (a) Ni nyegyesa ki ei tushemereire kubarira aha nyikiriza zaitu enkuru? (b) Ahabw’enki okuzooka kuri kukuru? (Reeba ekishushani aha kutandika.)

OMUNTU yaakubuuza enyegyesa nkuru aha nyikiriza zaanyu, noomugira ngu neeha? Hatariho kubangaanisa noija kumugira ngu noikiriza ngu Yehova niwe Muhangi, kandi ngu niwe yaatuhaire amagara. Kandi noobaasa n’okugira ngu noikiririza omuri Yesu Kristo, owaayehaireyo kufa kuba ekitambo. Kandi buzima noogamba n’aha Paradiso eraabeho omu nsi omu biro by’omumaisho, ahu abaheereza ba Ruhanga baraatuure ebiro byona. Kwonka shi noija kugamba aha kuzooka nk’emwe aha nyikiriza ezi orikutwara nka nkuru?

² Twine enshonga zihikire ahabw’enki nitutwara okuzooka nk’enyikiriza nkuru, n’obu twakuba twine amatsiko g’okuhonokaho aha kubonabona kwingi tukaguma omu nsi ebiro byona. Entumwa Paulo akooreka ahabw’enki okuzooka kuri kukuru munonga. Akagira ati: “Ku haraabe hatariho kuzooka kw’abafu, na Kristo tarazookire.” Ku ogire ngu Yesu tarazookire, akaabaire atarikutegyeka nk’Omugabe omu iguru,  kandi n’okubuurira kwaitu kukaabaire kutaine mugasho. (Shoma 1 Abakorinso 15:12-19.) Kwonka, nitumanya ngu Yesu akazooka. Ahabw’okugira ngu nitwikiriza ngu nihaija kubaho okuzooka, tituri nka Abasadukaayo, abaabaire batarikwikiriza ngu abafu nibabaasa kugaruka kuba abahuriire. Nangwa n’obu abandi baakutushekyerera, nituguma twine okwikiriza kuhami ngu Ruhanga naija kuzoora abafu.​—Mako 12:18; Ebyakozirwe 4:2, 3; 17:32; 23:6-8.

³ Paulo akagira ngu enyegyesa ‘y’okuzooka kw’abafu’ n’emwe aha ‘by’okubandizaho ebirikukwata ahari Kristo.’ (Abaheburaayo 6:1, 2) Akakyoreka gye ngu buzima akaba naikiririza omu kuzooka. (Ebyakozirwe 24:10, 15, 24, 25) N’obu okuzooka eraabe eri emwe aha nyegyesa ez’okubandizaho ezi turikwega omu Kigambo kya Ruhanga, twine kugyegaho n’obwegyendesereza. (Abaheburaayo 5:12) Ahabw’enki?

4. Nitubaasa kwebuuza bibuuzo ki ebirikukwata aha kuzooka?

⁴ Abantu ku barikutandika kwega Baibuli, nibashoma ebyahandiikirwe ebirikugamba aha kuzooka okwabaireho ira, nk’okwa Laazaaro. Kandi nibeega ngu Abrahamu, Yobu, na Danieli bakaba nibahamya ngu omu biro by’omumaisho abafu nibaija kugaruka nibaba abahuriire. Kwonka shi, noobaasa kugarukamu ota omuntu yaakushaba kumworeka obuhame kuruga omu Baibuli ngu okuzooka okwagambirweho emyaka mingi enyima nikwija kubaho? Kandi shi Baibuli neeyoreka obu okuzooka kuraabeho omu biro by’omumaisho? Eby’okugarukamu by’ebibuuzo ebi nibihamya okwikiriza kwaitu.

5. Ni nshonga ki ezirikukwata aha kuzooka ezi turikuza kugambaho?

⁵ Kyorobi kuteekateeka ngu omuntu naabaasa kuzoora yaaheza kufa ahonaaho. (Yohaana 11:11; Ebyakozirwe 20:9, 10) Kwonka shi nitubaasa kwesiga ekiraganiso ekirikugira ngu abantu nibaija kuzooka bwanyima y’okumara emyaka mingi bafiire? Mbwenu shi eki nitubaasa kukiikiriza n’obu omuntu yaakuba yaafiire ira munonga nari nibwo aherize kufa? Amazima gari ngu, nangwa na hati noikiririza omu kuzooka okwabaireho bwanyima y’emyaka mingi kuherize kuraganisibwa. Okuzooka okwo ni kuuha? Kandi nikukwata kuta aha matsiko gaawe g’okuzooka okw’ebiro by’omumaisho?

6. Yesu akaba naatwarirwa ata omu kuhikiirira kwa Zaaburi 118?

⁶ Turikukoresa ebiri omu Zaaburi 118, erikubaasa kuba yaahandiikirwe Daudi, ka tushwijume okuzooka okwagambirweho emyaka mingi ira. Zaaburi egi erimu ebigambo ebirikugira ngu ai Yehova “nitukweshengyereza, otujune” kandi “orikwija omu iziina rya Mukama,” Yehova aine omugisha. Abantu bakajuriza ebigambo ebi ebirikukwata ahari Mesia, obu Yesu yaabaire atembire aha mbaraasi arikuza Yerusaalemu ahari Nisani 9, harikuburayo ebiro bikye akaitwa. (Zaaburi 118:25, 26; Matayo 21:7-9) Kwonka shi Zaaburi 118 neegamba eta aha kuzooka okwabaire nikwija kubaho bwanyima y’emyaka mingi omumaisho? Yetegyereze ekindi ekirikugambwaho omu Zaaburi egi ngu “eibaare eri abombeki baayangire, niryo ryahindukire erikuru ery’obuhamizo bw’enju.”​—Zaaburi 118:22.

7. Abayudaaya bakanga bata Yesu?

 ⁷ “Abombeki” abaayangire Mesia bakaba bari abeebembezi b’Abayudaaya. Bakakora ekirikukira aha kwanga kwikiriza Yesu ngu niwe Kristo. Abayudaaya baingi bakamwanga barikushaba Pilaato ngu amwite. (Luka 23:18-23) Buzima ni bamwe aha baareeteire Yesu kufa.

8. Niki ekyabaire kiine kubaho kubaasisa Yesu kuba eibaare “erikuru ery’obuhamizo bw’enju”?

⁸ Mbwenu shi Yesu ku araabe yaayangirwe kandi akaitwa, akaba naija kuba ata eibaare “erikuru ery’obuhamizo bw’enju”? Eki kikaba nikibaasa kuba kityo yaaheza kuzooka. Yesu akooreka gye eki obu yaatebya ekitebyo ekirikukwata ahari mukama w’eitaka owaatumire entumwa aha bahingi be. Abahingi abo bakatwariza kubi entumwa ezo. Bwanyima, mukama w’eitaka akatuma mutabani we, arikuteekateeka ngu abahingi nibaija kumuhurikiza. Kwonka omutabani ogwo bakamwita. Yesu bwanyima y’okutebya ekitebyo eki, akajuriza ebiri omu Zaaburi 118:22. (Luka 20:9-17) Entumwa Petero nawe akakoresa omushororongo nigwo gumwe obu yaabaire naagambira abategyeki b’Abayudaaya “n’abakuru b’abantu n’abahandiiki” abaabaire bateeraniire Yerusaalemu. Akagamba ahari “Yesu Kristo owa Nazareesi,” ou baahanikire aha muti ‘kandi ou Ruhanga yaazoire omu bafu.’ Reero bwanyima akagira ati: “Yesu ogwo niwe eibaare imwe abombeki eri mwayangire, eyahindukire obuhamizo bw’enju.”—Ebyakozirwe 3:15; 4:5-11; 1 Petero 2:5-7.

9. Ni kintu ki ekikuru ekyagambirweho omuri Zaaburi 118:22?

⁹ Buzima, obunabi oburi omu Zaaburi 118:22 bukagamba aha kuzooka okwabaire nikwija kubaho bwanyima y’emyaka mingi. Mesia akaba naija kwangwa kandi aitwe. Kwonka akaba naija kuzooka agarukye abe ohuriire reero abe eibaare rikuru ery’obuhamizo bw’enju. Bwanyima ya Yesu kuzooka, niwe wenka ou abantu baabaire nibabaasa kurabira omu iziina rye kujunwa.​—Ebyakozirwe 4:12; Abaefeso 1:20.

10. (a) Zaaburi 16:10 ekagamba aha kintu ki kikuru? (b) Ahabw’enki turikubaasa kuhamya ngu ebiri omu Zaaburi 16:10 tibirikukwata ahari Daudi?

¹⁰ Ka tushwijume omushororongo ogundi ogwagambire aha kuzooka. Ebirimu bikaija kuhikiirira bwanyima emyaka erengire rukumi. Eki kishemereire kutuha obuhame ngu okuzooka nikubaasa kubaho bwanyima y’emyaka mingi omuntu aherize kufa. Omuri Zaaburi 16, nitushomamu ebigambo bya Daudi ebi: “Toritsiga magara gangye kuzimu, n’obu kwakuba okureka Orikwera  waawe kujunda.” (Zaaburi 16:10) Daudi akaba atariyo naayegambaho ngu tarifa reero akaguma omu kituuro. Ekigambo kya Ruhanga nikigamba gye butunu ngu Daudi akakura yaafa “baamuziika omu rurembo rwa Daudi.” (1 Abagabe 2:1, 10) Mbwenu shi ebiri omu Zaaburi 16:10 nibigamba ahari oha?

11. Petero akagamba ryari aha biri omu Zaaburi 16:10?

¹¹ Bwanyima y’emyaka erengire rukumi Daudi aherize kuhandiika ebigambo ebiri omu Zaaburi 16:10, Petero akashoboorora ou byabaire nibikwataho. Ku haahingwireho saabiiti nkye Yesu aherize kufa kandi akazooka, Petero akagamba n’Abayudaaya baingi n’abaabaire bahindukire. (Shoma Ebyakozirwe 2:29-32.) Akabaijutsya ngu Daudi akafa kandi yaaziikwa. Petero akoongyeraho ngu Daudi akamanya kare “yaagamba aha kuzooka” kwa Mesia, kandi Baibuli terikugira ngu haine n’omwe owaahakaniise.

12. Zaaburi 16:10 ekahikiirizibwa eta, kandi ekyo nikihamya kita ngu nihaija kubaho okuzooka?

¹² Petero akahamiiriza enshonga ye arikujuriza ebigambo bya Daudi ebiri omu Zaaburi 110:1. (Shoma Ebyakozirwe 2:33-36.) Enshoboorora ya Petero erikwegamira aha Byahandiikirwe ekahwera abantu baingi kwikiriza ngu Yesu akaba ari “Omukama kandi Kristo.” Abantu bakamanya ngu ebiri omu Zaaburi 16:10 bikahikiirizibwa obu Yesu yaazooka kuruga omu bafu. Bwanyima, entumwa Paulo akakoresa obuhame nibwo bumwe obu yaagamba n’Abayudaaya omu rurembo rwa Antiokia omuri Pisidia. Obuhame obu buzima bukabashemeza, kandi bakaba nibenda kuhurira ebindi. (Shoma Ebyakozirwe 13:32-37, 42.) Kandi naitwe tushemereire kuhamya ngu obunabi bwa Baibuli oburikukwata aha kuzooka okw’ebiro by’omumaisho nibwesigwa, n’obu buraabe bwahikiriziibwe bwanyima y’okuhinguraho emyaka mingi.

13. Ni bibuuzo ki ebirikukwata aha kuzooka ebi turikubaasa kwebuuza?

¹³ Nikigaruramu amaani kumanya ngu okuzooka nikubaasa kubaho bwanyima y’emyaka mingi kuherize kuraganisibwa. Kwonka nabwo, omuntu naabaasa kwebuuza ati: ‘Mbwenu shi eki nikimanyisa ngu nyine kutegyereza emyaka mingi kureeba omuntu wangye naazooka? Abantu nibaija kuzooka ryari?’ Yesu akagambira entumwa ze ngu hakaba hariho ebintu ebi baabaire batarikumanya, kandi ebi baabaire batarikubaasa kumanya obwire obwo. Hariho bingi ebirikukwata aha ‘biro nari obunaku ebi Isheboona yaataireho kuba omu bushoboorozi bwe wenka.’ (Ebyakozirwe 1:6, 7; Yohaana 16:12) Kwonka, eki tikirikumanyisa ngu tihaine eki turikumanya aha bikwatiraine n’obu okuzooka kuraabeho.

14. Okuzooka kwa Yesu nikutaana kuta aha kw’abandi?

¹⁴ Okuzooka kukuru okurikugambwaho omu Baibuli n’okwa Yesu. Ku ogire ngu tarazookire kuruga omu bafu, tihaine n’omwe ahariitwe owaakubaire aine amatsiko g’okugaruka kureeba abantu be abaafiire. Abantu nk’abu Eliya na Elisa baazoire Yesu atakaizire omu nsi, tibaragumireho ebiro byona. Bakagaruka baafa baahinduka omucucu. Kwonka Yesu ‘akazooka omu bafu.’ Tarikwija kugaruka “kufa; okufa tikwakimutegyeka.” Naija kuguma naatuura omu iguru “ebiro byona.”​—Abarooma 6:9; Okushuuruurwa 1:5, 18; Abakolosai 1:18; 1 Petero 3:18.

15. Ahabw’enki Yesu naayetwa ‘omuganuro’?

 ¹⁵ Yesu niwe yaabandize kuzooka aine omubiri gw’omwoyo kandi akaza omu iguru. Oku nikwo kuzooka kukuru kandi okw’omutaano. (Ebyakozirwe 26:23) Kwonka tiwe wenka owaaraganisiibwe kuzooka kuza omu iguru. Yesu akaraganisa entumwa ze abeesigwa ngu bakaba nibaija kutegyeka nawe omu iguru. (Luka 22:28-30) Kwonka kubaasa kutunga omugabo ogu baine kubanza baafa. Kandi nk’oku Yesu yaazookire, nabo nikibeetengyesa kuzooka baine omubiri gw’omwoyo. Paulo akahandiika ngu ‘Kristo akazoorwa omu bafu, niwe muganuro gw’abaagwejegyeire.’ Paulo bwanyima akagira ngu hakaba nihaija kubaho abandi abaraazoorwe kuza omu iguru. Akagira ati: “Buri muntu omu rubu rwe, Kristo niwe muganuro; bwanyima hakurateho abe” omu bwire bw’okubaho kwe.​—1 Abakorinso 15:20, 23.

16. Niki ekirikutuhwera kumanya obu okuzooka kw’abaraaze omu iguru kwabaire nikwija kubaho?

¹⁶ Ebigambo bya Paulo nibituhwera kumanya obu okuzooka kw’abarikuza omu iguru kwabaire nikwija kubaho. Kukaabaireho omu bunaku bw’okubaho kwa Kristo. Kumara emyaka mingi, Abajurizi ba Yehova batwire nibooreka ngu okubaho kwa Kristo kukatandika omuri 1914. Na hati tukiri omu bunaku bw’okubaho kwa Kristo, kandi emperu y’ensi egi embi eri haihi.

17, 18. Niki ekiraahikye aha bashukirweho amajuta abamwe omu bunaku bw’okubaho kwa Kristo?

¹⁷ Baibuli neeshoboorora bingi aha kuzooka kw’abaraaze omu iguru eti: ‘Titwakwenzire ngu mutamanya eby’abo abagwejegyeire [omu kufa.] Ahakuba ku turaabe nitwikiriza ngu Yesu akafa yaazooka, n’abaagwejegyereire [omu kufa] omuri Yesu nikwo Ruhanga aribareeta atyo hamwe nawe. Itwe abahuriire abarishangwa bakiriho aha kiro ky’okubaho kwa Mukama, tituribandiza abo abagwejegyeire [omu kufa]. Ahakuba Mukama aryayeimukira ashuume naaruga omu iguru agambe munonga n’eiraka, kandi abaafeereire omuri Kristo nibo baribanza kuzooka; bwanyima naitwe abahuriire abariba bakiriho turyatwarwa nabo omu bicu kubugana Mukama waitu omu kaabunga; tutyo tugume na Mukama ebiro byona.’​—1 Abatesalonika 4:13-17.

¹⁸ Okuzooka okw’okubanza, kukaabaireho obunaku bw’okubaho kwa Kristo buherize kutandika. Abashukirweho amajuta abaraabe bakiriho omu bwire bw’okubonabona kwingi nibaija kutwarwa “omu bicu.” Eki nikimanyisa ki? Abo abaraatwarwe omu bicu tibarikwija kugwejegyerera omu kufa, ekirikumanyisa ngu tibarikwija kuguma bafiire kumara obwire bwingi. Omu mwanya gw’ekyo, ku baraafe, nibahindurwa boona “omu kaanya kakye, nk’ak’okuhumbya eriisho, aha nzamba ey’aha mperu.”​—1 Abakorinso 15:51, 52; Matayo 24:31.

19. “Okuzooka okurikukira oburungi” ni kuuha?

¹⁹ Obunaku obu, baingi aha Bakristaayo abeesigwa tibashukirweho amajuta n’ahabw’ekyo tibatoorainwe kuza kutegyeka na Kristo omu iguru. Kureka bainiire ekihika eizooba rya Yehova, obu araahezeho ensi egi embi. Tihariho orikumanya eizooba ryenyini obu emperu eraabeho, kwonka obuhame nibworeka ngu eri haihi kuhika. (1 Abatesalonika 5:1-3) Omu nsi ya Ruhanga ensya, nihaija kubamu okuzooka okw’omutaano. Obwo, abantu nibaija  kuzooka kutunga amagara omu nsi, kandi nibaija kutunga amatsiko g’okuba abahikiriire hatariho kugaruka kufa bundi. Oku nikwija kuba “okuzooka okurikukira oburungi” ahakuba abaazoirwe ira bakagaruka baafa.​—Abaheburaayo 11:35.

20. Ahabw’enki turikubaasa kuhamya ngu okuzooka nikwija kuba kutebeekanisiibwe gye?

²⁰ Baibuli neegira ngu abo abarikuza omu iguru nibazooka “buri muntu omu rubu rwe” orw’obuteeka. (1 Abakorinso 15:23) N’ahabw’ekyo nitubaasa kuhamya ngu okuzooka okuraabe omu nsi nakwo nikwija kubaho omu buteeka, nari kutebeekanisiibwe gye. Eki nikibaasa kutureetera kubuuza: Mbwenu shi abo abaraabe bahererukire kufa nibo baraabanze kuzooka kugira ngu aha kutandika kw’Obutegyeki bwa Kristo obw’emyaka rukumi baakiirwe abanyabuzaare baabo abarikubamanya abaahonokireho batafiire? Mbwenu shi abashaija abeesigwa aba ira abaabaire nibamanya kwebembera gye nibaija kurahuka kuzooka kugira ngu batebeekanise abantu ba Ruhanga omu nsi ensya? Niki ekirikwija kuhika aha abantu abatarabaasize kuheereza Yehova? Nibaija kuzooka ryari kandi batuure mu mwanya ki? Hariho ebibuuzo bingi ebi turikubaasa kwebuuza. Kwonka titwine kwerarikirira aha bintu ebi hati. Nikiba kiri kirungi kutegyereza tukareeba. Nitubaasa kugira obwesigye ngu nikiija kuba nikishemeza kureeba omuringo ogu Yehova araatwazemu enshonga ezi.

21. Iwe oine matsiko ki?

²¹ Ebyo bitakabaireho, tushemereire kwongyera kwikiririza omuri Yehova. Akaraganisa Yesu ngu abafu bari omu biteekateeko bye naabaijuka, kandi ngu nibaija kugaruka babe abahuriire. (Yohaana 5:28, 29; 11:23) Yesu akooreka obuhame obundi ngu Yehova naija kuzoora abafu, obu yaagira ngu Abrahamu, Isaaka, na Yakobo “omu maisho ge boona baba abahuriire.” (Luka 20:37, 38) Buzima, twine enshonga nyingi ezirikutureetera kugira nk’oku entumwa Paulo yaagizire ngu, ‘nyine amatsiko ahari Ruhanga ngu nihaija kubaho okuzooka.’​—Ebyakozirwe 24:15.