1. Mariza akaba aine buhame ki aha bikwatiraine na munyaanya? (Reeba ekishushani aha kutandika.)

MARIZA, munywani wa Yesu ow’aha mara kandi omwegi we, akaba aine obusaasi bwingi. Munyaanya, Laazaaro akaba yaaheza kufa. Haine ekyabaire nikibaasa kumuhuumuriza? Eego. Yesu akamuraganisa ati: “Munyaanyoko naija kuzooka.” Buzima, ebigambo ebyo bikaba bitarikubaasa kwihaho obusaasi obu yaabaire aine. Kwonka, Mariza akeesiga eki Yesu yaamuraganiise, yaamugarukamu ati: ‘Nimmanya ku arizooka aha kuzooka okw’aha mperu.’ (Yohaana 11:20-24) Akaba naahamiza kimwe ngu nihaija kubaho okuzooka omu biro by’omumaisho. Kwonka, Yesu akakora eky’okutangaara, yaazoora Laazaaro eizooba eryo ryenyini.

2. Ahabw’enki oine kugira obuhame nk’obu Mariza yaabaire aine?

² Titushemereire kuteekateeka ngu Yesu nari Ishe nibaija kuzoora abakundwa baitu ahonaaho baaheza kufa. Kwonka shi noohamiza kimwe nka Mariza ngu abakundwa baitu nibaija okuzooka omu biro by’omumaisho? Obundi ofeereirwe  baro nari omukazi, nyoko, sho, shwenkuru nari omwana waawe omukundwa. Oine ekihika ky’okumugwa omu kifuba, okagaaniira nawe, kandi okasheka nawe. Kwonka hariho ekishemereire kukureetera kwikiriza nka Mariza oti: ‘Nimmanya ngu omuntu wangye omukundwa naija kuzooka.’ Nabwo, ni kirungi buri Mukristaayo kuteekateeka aha nshonga ezirikuhamya amatsiko aga.

3, 4. Yesu akaba aherize kukora ki, kandi ekyo kikahamya kita okwikiriza kwa Mariza?

³ Mariza akaba naatuura haihi na Yerusaalemu, n’ahabw’ekyo naabaasa kuba atarareebire Yesu naazoora mutabani w’efaakazi owaabaire naatuura omuri Naini haihi na Galilaaya. Kwonka, ashemereire kuba yaakihuriire. Kandi ashemereire kuba yaahuriire ngu Yesu akazoora muhara wa Yairo. Buri omwe omu ka y’omwishiki ogwo ‘akaba naamanya ku afiire.’ Beitu Yesu akamukwata omukono yaagira ati: “Mwishiki ’we, imuka.” Kandi ahonaaho yaimuka. (Luka 7:11-17; 8:41, 42, 49-55) Mariza na Mariamu, bakaba nibamanya ngu Yesu naabaasa kukiza abarwaire. Bakaba nibaikiriza ngu Yesu ku yaabaire ariho, Laazaaro tiyaakufiire. Mbwenu shi hati obu yaabaire afiire, Mariza akaba aine matsiko ki? Yetegyereze oku yaagarukiremu ngu Laazaaro naija kuzooka, aha kiro ky’emperu. Ahabw’enki yaabaire naahamya? Kandi ahabw’enki orikubaasa kuhamya ngu omu biro by’omumaisho abakundwa baitu nibaija kuzooka?

⁴ Twine obuhame ki oburikutureetera kwikiririza omu kuzooka. Nituza kushwijuma zimwe aharibwo. Nangwa noobaasa kushanga hariho ebyahandiikirwe ebi otarikukira kuteekateekaho, kwonka ebirikubaasa kuhamya okwikiriza kwawe ngu noija kureeba abakundwa baawe abaafiire.

5. Ahabw’enki Mariza yaabaire naahamya ngu Laazaaro naija kuzooka?

⁵ Yetegyereze ngu Mariza taragizire ati: ‘Ningira ngu munyaanyazi naija kuzooka.’ Kwonka akagira ati: ‘Nimmanya ngu naija kuzooka.’ Ahabw’enki Mariza yaabaire naahamya? N’ahabw’okuba akaba naamanya aha kuzooka okwabaireho enyima. Obundi akari muto akeega aha kuzooka okwo ari omuka nari aha sinagogi. Nituza kushwijuma okuzooka kw’emiringo eshatu okurikugambwaho omu Baibuli.

6. Ni ky’okutangaaza ki eki Mariza aine kuba yaabaire naamanya?

⁶ Okuzooka okwabandize kukabaho n’obu Ruhanga yaabaire naakoresa nabi Eliya kukora eby’okutangaaza. Omuri Israeli, omu rurembo Zarefaasi omu kicweka kya Foiniike, hakaba hariyo omufaakazi omworo owaayorekire nabi Eliya obufura. Yehova akakora eky’okutangaaza. Akahamya ngu esaano n’amajuta tibyahwaho kugira ngu we n’omutabani bagumeho baahuriire. (1 Abagabe 17:8-16) Bwanyima, omutabani akarwara yaafa. Kwonka Eliya akamuhwera. Eliya akakwata aha mwojo ogwo yaashaba Yehova ati: “Ninkweshengyereza, ikiriza amagara g’ogu mwana gamugarukyemu.” Kandi nikwo kyabaire! Ruhanga akahurira okushaba kwe, omwana yaaba ohuriire. Oku n’okuzooka okwabandize okurikugambwaho omu Baibuli. (Shoma 1 Abagabe 17:17-24.) Hatariho kubanganisa, Mariza aine kuba yaabaire naamanya aha kuzooka oku.

7, 8. (a) Elisa akahuumuriza ata omukazi owaabaire aine obusaasi bwingi? (b) Eky’okutangaaza eki Elisa yaakozire nikituhamiza ki ahari Yehova?

 ⁷ Okuzooka okwa kabiri okurikugambwaho omu Baibuli n’obu nabi Elisa yaazoora omwojo. Omu rurembo Shuneemu, hakaba hariho Omwisraelikazi owaabaire ataine baana. Ahabw’okworeka Elisa obufura, we na iba omugurusi Yehova akabaha omugisha baazaara omwojo. Bwanyima y’emyaka mikye, omwojo ogu yaafa. Teekateeka aha busaasi obu nyina yaagizire. Akagira obusaasi bwingi kandi yaacwamu kugyenda mahiro 19 kubugana Elisa aha rushozi Karumeeli. Elisa akoohereza omuheereza we Gehazi kuza Shuneemu ababandizeyo azoore omwojo ogwo. Kwonka Gehazi tarabaasize kumuzoora. Bwanyima Elisa na nyina w’omwojo bakahikayo.​—2 Abagabe 4:8-31.

⁸ Elisa akataaha omu nju ahu omwojo ofiire yaabaire ari, reero yaashaba. Yehova akagarukamu okushaba kwa Elisa, kandi omu muringo gw’eky’okutangaaza yaazoora omwojo. Nyina w’omwojo akashemererwa munonga kureeba omutabani ahuriire! (Shoma 2 Abagabe 4:32-37.) Naabaasa kuba yaijukire ebigambo ebi Hanna yaakoreise omu kushaba. Hanna akaba ataine mwana okuhitsya obu Yehova yaamuhaire omugisha gw’okuzaara omwojo, Samueli. Hanna akahimbisa Yehova ahakuba niwe ‘ashuumya okuzimu, kandi akaihayo.’ (1 Samueli 2:6) Ruhanga ahabw’okuzoora omwojo omuri Shuneemu, akooreka ngu aine obushoboorozi bw’okuzoora abafu.

9. Shoboorora okuzooka okwa kashatu okurikugambwaho omu Baibuli.

⁹ Eky’okutangaaza ekindi kikabaho bwanyima y’okufa kwa Elisa. Akaba aheereize nka nabi kumara emyaka nka 50, bwanyima “yaakwatwa endwara eyaamwitsire.” Obwire ku bwahingwire, amagufa ga Elisa nigo gonka agaatsigaireho. Eizooba rimwe, Abaisraeli bakaba nibaziika omushaija. Ahonaaho, baareeba abazigu nibaija. Abaisraeli aba bakateeraho kuhunga ahonaaho, reero baatambika omutumbi gw’omushaija omu kituuro kya Elisa. Baibuli neegira ngu “omutumbi ku gwahikire guti aha magufa ga Elisa, ogwo muntu yaahimbuuka, yaimuka, yaayemerera.” (2 Abagabe 13:14, 20, 21) Ebi bikahamiza Mariza ngu Ruhanga aine amaani g’okwihaho okufa. Naiwe bishemereire kukuhamiza ngu Ruhanga aine amaani maingi agataine bugarukiro.

10. Petero akakora ki obu omukazi omwe Omukristaayo yaafa?

¹⁰ Ebyahandiikirwe eby’Orugriika nibigamba aha baheereza ba Ruhanga abeesigwa abaazoire abantu. Twaba twagambire ngu Yesu akazoora omwana haihi n’orurembo Naini na muhara ya Yairo. Bwanyima, entumwa Petero akazoora Doruka, nari orikwetwa Tabisa. Petero akataaha omu nju ahu omutumbi gwabaire guri, yaashaba, reero yaagira ati: “Tabisa, imuka!” Ahonaaho  akahimbuuka, kandi Petero yaamworeka Abakristaayo abaabaire bariho “ahuriire.” Eky’okutangaaza eki kikareetera ‘baingi kwikiririza omuri Mukama’ omu rurembo orwo. Abeegi basya aba bakaba nibabaasa kugambira abandi amakuru marungi agarikukwata ahari Yesu, n’okubamanyisa ngu Yehova aine obushoboorozi bw’okuzoora abafu.​—Ebyakozirwe 9:36-42.

11. Omushaho Luka akagira ngu niki ekyahikire aha mutsigazi owaagwire, kandi kikakwata kita aha bandi?

¹¹ Hariho n’abandi abaareebire abantu nibazoorwa. Eizooba rimwe, entumwa Paulo akaba ari omu kishengye ky’ahaiguru omuri Troa, orurembo orwabaire nirushangwa omu bukiizi-bwa-bumosho bwa Turkey. Paulo akeegyesa kuhitsya omu kiro. Omutsigazi orikweta Yutuko akaba ahurikiize, ashutami aha dirisa. Akagwejegyera kandi yaahanantuka omuri kanyinaishatu yaagwa ahansi. Obundi entumwa Luka niwe yaabandize kuhika ahu Yutuko yaagwire. Obu yaabaire ari omushaho, akeetegyereza ngu omutsigazi ogu tiyahuutara kwonka kandi akagwa kihuumura. Beitu akaba afiire! Na Paulo akashuuma ahu omwojo yaagwa. Akabumbatira Yutuko reero bwanyima yaatangaaza boona abaabaire bariho arikugira ati: ‘Ahuriire.’ Boona abaareebire eky’okutangaaza eki bakakwatwaho munonga. Ku baamanyire ngu omutsigazi owaaba afiire yaaba ohuriire ‘baakagarukwa emitima omunda.’​—Ebyakozirwe 20:7-12.

12, 13. Kurugiirira aha kuzooka oku twaheza kushwijuma, nitubaasa kwebuuza bibuuzo ki?

¹² Okuzooka oku twashwijuma kushemereire kutuha obuhame nk’obu Mariza yaabaire aine. Nitubaasa kuhamya ngu Ruhanga waitu, owaatuhaire amagara, naabaasa kuzoora omuntu abe ohuriire. Nikishemeza kumanya ngu abaheereza ba Ruhanga abeesigwa nka Eliya, Yesu, na Petero, bakareeba abantu nibazooka. Kandi okuzooka oku kukabaho obu Yehova yaabaire naakikora  eby’okutangaaza. Kandi shi abo abaafiire omu bwire obundi, eby’okutangaaza nk’ebi bitakikorwa? Abantu abeesigwa nibabaasa kuhamya ngu Ruhanga naija kuzooka abantu omu biro by’omumaisho? Nibabaasa kuhamya nka Mariza owaagambire ahari munyaanya ati: ‘Nimmanya ngu naija kuzooka aha kiro ky’emperu’? Ahabw’enki Mariza yaabaire naikiriza ngu nihaija kubaho okuzooka omu biro by’omumaisho, kandi ahabw’enki naiwe oine kwikiriza?

¹³ Omu Baibuli nitushoma aha baheereza ba Ruhanga abeesigwa abaabaire nibamanya ngu nihaija kubaho okuzooka omu biro by’omumaisho. Ka tureebe bamwe ahari aba.

14. Ebirikukwata ahari Abrahamu nibitwegyesa ki aha kuzooka?

¹⁴ Teekateeka aha ki Yehova yaagambiire Abrahamu kukorera omutabani Isaaka, omuhunguzi ou yaabaire aine wenka. Yehova akamugira ati: “Twara omwana waawe omwe nyamunegyere Isaaka, ou okunda, oze omu nsi ya Moria” omutambe nk’ekitambo. (Okutandika 22:2) Nooteekateeka ngu Abrahamu akeehurira ata bwanyima y’okuragiirwa kukora eki? Yehova akaba araganiise ngu kurabira omu ruzaaro rw’Abrahamu amahanga goona omu nsi nigaija kuheebwa omugisha. (Okutandika 13:14-16; 18:18; Abarooma 4:17, 18) Kandi, Yehova akagira ngu emigisha ekaba neija kurabira omuri Isaaka. (Okutandika 21:12) Kwonka shi eki kikaba nikiza kuhikiirira kita Abrahamu yaahayo omutabani nk’ekitambo? Entumwa Paulo akahwerwa kushoboorora ngu Abrahamu akaba naikiriza ngu Ruhanga naabaasa kuzoora Isaaka. (Shoma Abaheburaayo 11:17-19.) Kwonka, Baibuli terikworeka ngu Abrahamu akaba naateekateeka ngu Isaaka naaza kuzooka ahonaaho, obundi omu shaaha nk’emwe, eizooba, nari esaabiiti. Abrahamu akaba atarikumanya obu omutabani araazookye. Kwonka akaba aine obwesigye ngu Yehova naabaasa kuzoora Isaaka abe ahuriire.

15. Yobu akaba aine matsiko ki?

 ¹⁵ Omushaija omwesigwa Yobu nawe akaba naikiriza ngu nihaija kubaho okuzooka. Akaba naamanya ngu omuti gwatemwa, nigugaruka gutooka busya. Kwonka omuntu tari nk’omuti. (Yobu14:7-12; 19:25-27) Omuntu yaafa tarikubaasa kwegaruraho. (2 Samueli 12:23; Zaaburi 89:48) Kwonka eki tikirikumanyisa ngu Ruhanga tarikubaasa kuzoora omuntu. Nangwa na Yobu akaba naikiriza ngu Yehova naija kumwijuka yaaba yaafiire. (Shoma Yobu 14:13-15.) Yobu akaba atarikumanya obu ekyo kiraabeho. Kwonka nabwo, akaba naikiriza ngu omuhangi w’amagara naija kumwijuka kandi amuzoore.

16. Maraika akahuumuriza ata Danieli?

¹⁶ Teekateeka aha mushaija ondiijo omwesigwa, Danieli. Ebiro byona eby’amagara ge akaheereza Yehova, kandi Yehova akamuhwera. Eizooba rimwe maraika akeeta Danieli omushaija “orikukundwa munonga” reero yaamugira ngu “huumura, garukwamu amaani.”—Danieli 9:22, 23; 10:11, 18, 19.

17, 18. Yehova akaraganisa ki Danieli?

¹⁷ Danieli ku yaahikize emyaka 100 ari haihi kufa, naabaasa kuba yaateekateekire munonga aha kyabaire nikiza kumubaho. Mbwenu shi akaba naateekateeka ngu yaafa naija kugaruka abeho? Eego buzima! Aha muheru gw’ekitabo kya Danieli, nitushomamu okuraganisa kwa Ruhanga oku: “Yegyendere okuhitsya aha muheru; bwanyima oryahuumura.” (Danieli 12:13) Danieli akaba naamanya ngu abafu bahuumwire, kandi okuzimu ei yaabaire naaza ‘tihariyo enaama, nari okumanya n’obu bwakuba obwengye.’ (Omubuurizi 9:10) Kwonka, egyo tiyo yaabaire neeza kuba muheru ya Danieli. Yehova akamuraganisa ebiro birungi by’omumaisho.

¹⁸ Maraika akamugira ati: Noija ‘kwemerera omu mwanya ogwakuteereirweho, aha muheru gw’ebyo biro.’ Danieli akaba atarikumanya obu eki kiraabeho. Beitu akeetegyereza ngu naija kufa reero ahuumure. Kwonka Danieli ku yaamanyire ngu naija ‘kwemerera omu mwanya ogwamuteereirweho’ akeetegyereza ngu naija kuzooka omu biro by’omumaisho. Eki kikaba nikiija kubaho amazire emyaka mingi afiire “aha muheru.” Nari, envunuura ya Baibuli eya Jerusalem neegira eti: “Noija kwimuka kutunga omugabo gwawe aha muheru.”

19, 20. (a) Ebi twaheza kushwijuma biine kakwate ki n’eki Mariza yaagambiire Yesu? (b) Omu kicweka ekirikukurataho nituza kwega ahari ki?

¹⁹ Buzima, Mariza akaba ahikire kuhamya ngu munyaanya, Laazaaro, “naija kuzooka” aha mperu. Ekiraganiso eki Yehova yaahaire Danieli, n’okwikiriza kuhami oku Mariza yaabaire aine ngu nihaija kubaho kuzooka, naitwe bishemereire kutuhamiza. Buzima nihaija kubaho okuzooka

²⁰ Twayega aha kuzooka okwabaireho ira. Obu n’obuhame ngu abafu nibabaasa kugaruka babe abahuriire. Kandi twareeba oku abaheereza ba Ruhanga abeesigwa baabaire nibaikiriza ngu abafu nibaija kuzooka omu biro by’omumaisho. Kwonka shi, hariho obuhame oburikworeka ngu okuzooka okwagambirweho ira munonga nikubaasa kubaho? Kyaba nikwo kiri, ekyo nikyongyera kuhamya amatsiko gaitu g’okuzooka omu biro by’omumaisho. Kwonka obwire obwo ni ryari? Nitwija kushwijuma enshonga ezi omu kicweka ekirikukurataho.