AHABW’ENKI tata yaabaire aine ekiniga kingi? Ka nshoboorore. Nkazaarwa Okwamushanju 29, 1929, naakurira omu kyaro kya Bulacan omuri Philippines. Tukaba tutaine sente nyingi, kandi tukaba twine ebintu bikye. Obu naabaire nkiri muto, ihe rya Japan rikataahirira Philippines orutaro rwatandika. Kwonka orutaro tirurahikire omu kyaro kyaitu ahakuba kikaba kyehereire. Tukaba tutaine radiyo, TV, nari empapura z’amakuru, kandi abandi nibo baatugambiire amakuru g’orutaro orwo.

Tukaba turi abaana mushanju, ku naahikize emyaka munaana, nkatandika kutuura na maawenkuru na tatenkuru. N’obu turaabe twabaire turi Abakaturiki, tatenkuru akaba aikiriza kugaaniira aha diini, kandi aikiriza n’ebitabo by’ediini ebi banywani be baabaire bamuha. Ninyijuka obutabo nka Protection, Safety, na Uncovered omu rurimi rwa Tagalog, * (Reeba obugambo obw’ahansi) na Baibuli ebi yaanyorekire. Nkaba ninkunda kushoma Baibuli, na munonga ebitabo by’Engiri. Okukora eki kikandeetera kwenda kukuratira Yesu.​—Yohaana 10:27.

Eihe rya Japan rikaruga omu Philippines 1945. Omu bwire obwo abazaire bangye bakanyeta kugaruka omuka. Kandi tatenkuru nawe akampiga kugarukayo, naanye naagarukayo.

Omu Kwaikumi-n’abiri 1945, Abajurizi ba Yehova kuruga omu rurembo Angat bakaija kubuurira omu kyaro kyaitu. Omwe omuribo owaabaire akuzire akaija owaitu yaatushoboororera eki Baibuli erikwegyesa aha “biro by’aha mperu.” (2 Timoseo 3:1-5) Akatweta kuza omu kyaro ekyabaire kiri haihi naitwe kuza kwega Baibuli. N’obu abazaire bangye bataragiireyo, nyowe nkazayo. Tukaba turi abantu 20, kandi abamwe bakabuuza ebibuuzo ebirikukwata ahari Baibuli.

Tindayetegyereize ebi baabaire nibeegyesa, n’ahabw’ekyo nkaba niinyenda kutaaha. Kwonka ku baatandikire kweshongora Ekyeshongoro ky’Obukama, kikanshemeza munonga naacwamu kugumaho.  Bwanyima y’ekyeshongoro n’okushaba, twena tukeetwa kuza omu ruteerane omuri Angat saabiiti erikukurataho.

Oruteerane oru rukaba ruri omu ka ya Cruz, kandi bamwe ahariitwe tukagyenda orugyendo rwa mahiro nk’itaano kuhikayo. Abantu nka 50 nibo baabaire bariho, nkashemererwa kureeba n’abaana bato barikugarukamu ebibuuzo bigumire ebirikukwata ahari Baibuli. Bwanyima y’okuza omu nteerane nk’ezi emirundi mingi, ow’eishe-emwe Damian Santos, payoniya okuzire kandi owaabaireho omwebembezi w’orurembo akanyeta kuraara owe ekiro kimwe. Tukaraara nitugaaniira aha Baibuli.

Omu bwire obwo, abantu bakaba nibabatizibwa bwanyima y’okwega enyegyesa za Baibuli ezirikutandikirwaho. Bwanyima y’okuguma ninza omu nteerane kumara akaire, nyowe n’abandi abu naabaire nyine bakatubuuza bati: “Nimwenda kubatizibwa?” Naagarukamu nti: “Eego niinyenda.” Nkaba niinyenda “kukorera Mukama waitu Kristo.” (Abakolosai 3:24) Omu Kwakabiri 1946, nyowe na mugyenzi wangye bakatubatiriza omu mugyera ogwabaire guri haihi.

Nkamanya ngu Abakristaayo ababatiziibwe bashemereire kubuurira nk’oku Yesu yaakozire. Kwonka tata akateekateeka ngu ndi muto kubaasa kubuurira, kandi ngu okubatizibwa kwangye tikurikumpindura omubuurizi. Naamushoboororera ngu n’ekigyendererwa kya Ruhanga okumanyisa abantu boona amakuru marungi g’Obukama bwa Ruhanga. (Matayo 24:14) Nkamugira ngu nyine n’okuhikiiriza endagaano yangye ei naakozire na Ruhanga. Nibwo tata yaantiinisiriza n’ebigambo ebiri aha kutandika. Akaba amaririire kundemesa kubuurira. Ogu nigwo murundi gwangye gw’okubanza obu naatsigaho ebintu, nari kwefeerereza kuheereza Yehova.

Eka ya Cruz ekanyakiira owaabo naatuura n’abo omuri Angat. Bakanshagika kuheereza nka payoniya kandi na muhara waabo omuto Nora, bakamuhiga kuba payoniya. Twembi tukatandika kuba baapayoniya omu Novemba 1, 1947. Nora akaza kuba payoniya omu rurembo orundi, nyowe naaguma omuri Angat.

Bwanyima y’okuheereza nka payoniya emyaka ebiri, ow’eishe-emwe Earl Stewart kuruga aha Beseeli akaha orubazo omuri Angat orwabaire ruriho abantu nka 500. Akaruha omu Rungyereza, bwanyima naaruvunuura omu bugufu omu rurimi rwa Tagalog. Oru ni rumwe aha mbazo nyingi ezi naavunwire okwiha obwo. Niki ekyampwereire? N’obu ndaabe naayegire kumara emyaka mushanju yonka, abashomesa bangye bakaba nibakira kukoresa Orungyereza. Ekindi, nkashoma ebitabo by’ekibiina ebyabaire biri omu Rungyereza ahakuba hakaba hariho ebitabo bikye ebirikukwata aha Baibuli omu rurimi rwa Tagalog. Eki kikampwera kwetegyereza gye Orungyereza kubaasa kuvunuura embazo.

 Ow’eishe-emwe Stewart akagambira ebibiina ngu abamiisani nibaza kugyenda kuza omu ruteerane Oruhango orwabaire rwine omutwe Theocracy’s Increase orwa 1950 omuri New York, U.S.A. N’ahabw’ekyo ofiisi y’eitaagi ekaba neeyenda payoniya omwe nari babiri kuhwera aha Beseeli. Nkaba ndi omwe aha b’eishe-emwe abaayetsirwe. Aha murundi ogu nabwo, nkatsigaho eki naabaire mmanyiriire, naaza kuheereza aha Beseeli.

Aha Beseeli nkazayo Okwamukaaga 19, 1950. Obwo Beseeli ekaba eri omu nju nkuru mpango, kandi eri ahagati y’emiti mihango aha itaka rya hiika ibiri n’ekicweka. Ab’eishe-emwe ikumi na babiri nibo baabaire nibakorayo. Omu kasheeshe kare, nkaba mpwera omu kiyungu. Okuruga shaaha ishatu z’akasheeshe nkaba nza kugorora emyenda. N’omu ihangwe nkora emirimo niyo emwe. Abamiisani n’obu baagarukire kuruga aha ruteerane oruhango nkagumayo aha Beseeli. Nkaba nkora kyona eki ab’eishe-emwe baabaire bagambira kukora. Nkaba nshemba magaziini kuzohereza, kuzitwekyera abo abaabaire bashabire kuguma nibazitunga, n’okwakiira abantu aha Beseeli.

Omuri 1952, nyowe n’ab’eishe-emwe abandi mukaaga kuruga Philippines tukeetwa kuza omu ishomero rya Gileadi erya 20. Ekyo kikanshemeza munonga! Obu twabaire turi omu United States, tukareeba ebintu bingi ebi twabaire tutarikumanya. Embeera y’okwo ekaba neetaanira kimwe n’ey’omu kyaro kyaitu kikye ahu naakuriire.

Nk’eky’okureeberaho, tukaba twine kwega kukoresa ebikwato ebi twabaire tutakareebaga. Embeera y’obwire nayo ekaba neetaana n’eyaitu! Akasheeshe kamwe nkaimuka, naashanga aheeru hoona niheera. Ogu gukaba guri omurundi gwangye gw’okubanza kureeba ebirika. Hakaba nihareebeka gye, kwonka ahonaaho nkahurira obutiti bw’amaani.

Embeera ensya ezi naabaire ndimu tiziranteganiise ahabw’okuta omutima aha birungi ebi twabaire nitwega aha ishomero rya Gileadi. Abashomesa baitu bakaba bari barungi kandi bakatworeka oku tushemereire kwega n’okucondooza. Okutendekwa oku naatungire aha Gileadi kukampwera kuhamya omukago gwangye na Yehova.

Ku twaherize, nkooherezibwa nka payoniya ow’omutaano kubuurira omu kicweka kya Bronx omuri New York. N’ahabw’ekyo omu Kwamushanju 1953, nkabaasa kuza omu ruteerane orwine omutwe New World Society omuri Bronx. Bwanyima y’oruteerane, nkagaruka omuri Philippines.

Ab’eishe-emwe aha Beseeli bakampa omurimo gw’okutaayaayira ebibiina. Eki kikampa omugisha  gw’okutooreza Yesu, owaabaire agyenda omu ndembo kuhwera abantu. (1 Petero 2:21) Ekicweka kyangye kikaba kirimu ebibiina bingi omuri Luzon, ekirwa ekirikukirayo obuhango omuri Philippines. Kikaba nikitwariramu Bulacan, Nueva Ecija, Tarlac, na Zambales. Kubaasa kutaayaayira endembo ezimwe nkaba nyine kwambuka enshozi z’amabaare eza Sierra Madre. Okwo baasi n’egaari z’omwika zikaba zitariyo, n’ahabw’ekyo nkaba nshaba abavugi b’ebiroore kushutama aha mutwe gw’empimbi ezi byekoreire. Emirundi emingi bakaba baikiriza, kwonka engyenda egi ekaba etari nungi.

Ebibiina bingi bikaba biri bisya kandi birimu abantu bakye. N’ahabw’ekyo ab’eishe-emwe bakasiima ku naatebeekaniise gye enteerane z’ekibiina n’ez’okubuurira.

Bwanyima, nkatunga obuheereza obundi bw’okutaayaayira ebibiina omuri Bicol hoona. Omu kicweka ekyo, hakaba hariyo guruupu nyingi ezaabaire nizibuurirwamu baapayoniya ab’omutaano omu bicweka ebi Abajurizi ba Yehova baabaire batakabuuriiremu. Emwe aha ka ezo ekaba eine ekihoroonio kirambikireho empimbi ebiri ahagati yaakyo. Ku naayemereire aha mpimbi ezi zaabandama naagwamu nazo. Kikantwarira obwire buraingwa kweboneza n’okwetebeekanisa kyantsya!

Obu naabaire nintayaayira ebibiina omu kicweka eki, nkatandika kuteekateeka aha Nora, ou naatandikire nawe kuheereza nka payoniya. Nora akaba naaheereza nka payoniya w’omutaano omu rurembo Dumaguete, kandi nkazayo kumutaayaayira. Bwanyima tukaguma nituhandiikirana kumara obwire bukye, kuhitsya obu twataahire omu bushwere omu 1956. Esaabiiti y’okubanza tuherize kugaitwa tukagimara turikutaayaayira ekibiina aha kirwa kya Rapu Rapu. Okwo tukaba tugyenda engyendo ndaigwa turikutemba enshozi, kwonka tukaba tushemereirwe kuba hamwe turikuhwera ab’eishe-emwe omu myanya ya hare.

Bwanyima y’okumara emyaka nk’ena omu kutaayaayira ebibiina, ab’eishe-emwe bakatweta kugaruka aha ofiisi y’eitaagi omu Kwokubanza 1960. Emyaka ei tumazire aha Beseeli, nyegire bingi omu kukora n’ab’eishe-emwe abaine obujunaanizibwa bwingi omu kibiina kya Yehova. Kandi Nora abaasize kukora emirimo etari emwe n’emwe aha Beseeli.

Ntungire omugisha gw’okureeba ababuurizi barikukanya omuri Philippines. Obu naaza aha Beseeli nkiri omunyeeto, ntakashweire, ihanga ryona rikaba ririmu ababuurizi nka 10,000. Hati omuri Philippines harimu ababuurizi abarikurenga omuri 200,000, kandi ab’eishe-emwe baingi nibaheereza aha Beseeli barikushagika omurimo gw’okubuurira.

Ku haahingwireho obwire, Beseeli ekafunda. Akakiiko Akareeberezi kakatushaba kusherura omwanya ogw’okwombekamu ofiisi y’eitaagi empango. Nyowe n’ogwo owaabaire naareeberera omurimo gw’okuteera ebitabo tukagyenda enju aha nju haihi na ofiisi yaitu turikusherura eitaka ry’okugura. Kwonka tihariho n’omwe owaabaire naayenda kuguza. Nangwa n’omwe akatugira ati: “Abachaina tibarikuguza. Nitugura.”

Kwonka eizooba rimwe, haine eky’omutaano ekyabaireho. Omutaahi omwe owaabaire akaba naayenda kufuruka kuza omu United States, n’ahabw’ekyo akatubuuza yaaba nitwenda kugura eitaka rye. Ondiijo nawe akacwamu kutuguza eitaka rye, yaahiga n’abandi nabo kutuguza. Nangwa tukagura n’eitaka ry’ogwo owaatugizire ngu “Abachaina tibarikuguza.” Omu kaanya kakye, ofiisi y’eitaagi ekaba mpango erikukira ey’okubanza emirundi eshatu. Nimpamya ngu Yehova niwe yaabaasiise eki kubaho.

Omuri 1950, niinye naabaire niinkirayo kuba muto aha Beseeli. Hati nyowe n’omukazi wangye naitwe turikukirayo obukuru. Tindikwefuuza na kakye ahabw’okukuratira Yesu hoona ahu arikwenda. N’obu abazaire bangye baambingire omuka, Yehova ampaire eka mpango erimu ab’eishe-emwe abarikumukunda. Niinyikiriza ngu Yehova atuhaire buri kimwe eki turikwenda, omu buheereza bwaitu bwona. Nyowe na Nora nitusiima Yehova ahabw’ebi arikutuha, kandi nituhiga abandi bagyeze Yehova bareebe.​—Malaki 3:10.

Haine obu Yesu yaashaba omuhooza orikwetwa Matayo Levi kuba omukuratsi we. Matayo akakora ki? “Akatsigaho byona, yaimuka, yaamukuratira.” (Luka 5:27, 28) Naanye ntungire omugisha kw’okutsigaho ebintu nkakurata Yesu, kandi nimpiga abandi kukikora reero batungye emigisha mingi.