1, 2. (a) Yehova atumanyiise ki? (b) Ni kiraganiso ki ekiri omu Isaaya 46:10, 11 na Isaaya 55:11?

EBIGAMBO ebirikubanza omu Baibuli byorobi, kwonka biine amakuru maingi: “Omu kutandika Ruhanga akahanga eiguru n’ensi.” (Okutandika 1:1) Tureebire ebintu bikye aha bi Ruhanga yaahangire omu nsi n’omu iguru, kandi titurikumanya bingi ebirikukwata aha mwanya gw’ahaiguru, ekyererezi, n’amaani agarikukurura ebintu kubigarura ahansi. (Omubuurizi 3:11) Kwonka Yehova atumanyiise ekigyendererwa eki ainiire ensi n’abantu. Akahanga abantu omu nshusha ye, kandi akaba naayenda ngu bashemererwe kutuura omu nsi. (Okutandika 1:26) Bakaba nibaija kuba abaana be, kandi akaba naija kuba Ishebo.

² Kuruga aha shuura ya kashatu ey’Okutandika, nitureeba ngu ekigyendererwa kya Yehova kikahakanisibwa. (Okutandika 3:1-7) Kwonka, tihariho buremeezi obu Yehova atarikubaasa kushoboorora. Tihariho orikubaasa kumuremesa kukora eki arikwenda. (Isaaya 46:10, 11; 55:11) Nitubaasa kuhamiza kimwe ngu ekigyendererwa kya Yehova nikiija kuhikiirira omu bwire bwenyine obuhikire!

3. (a) Ni nyegyesa ki enkuru ezirikutuhwera kwetegyereza obutumwa bw’omu Baibuli? (b) Ahabw’enki hati nituza kugamba aha nyegyesa ezi? (c) Ni bibuuzo ki ebi turikuza kushwijuma?

 ³ Hatariho kubanganisa, nitumanya ekigyendererwa eki Ruhanga ainiire ensi n’abantu, kandi nitumanya n’omurimo gwa Yesu omu kuhikiiriza ekigyendererwa ekyo. Aga n’amazima g’omutaano kuruga omu Baibuli, kandi nigo twabandize kwega obu twatandika kwega ebiri omu Kigambo kya Ruhanga. Hati nitwenda kuhwera abandi kwega aha nyegyesa ezi enkuru. Twine omugisha gw’omutaano kukora ekyo, omwaka ogu twaba nitweta abantu kwija aha Kiijutsyo ky’okufa kwa Kristo. (Luka 22:19, 20) Baija aha mukoro ogu ogw’omutaano, nibaija kwega ebirikukiraho aha kigyendererwa kya Ruhanga eky’omutaano. N’ahabw’ekyo hati nibwo bwire burungi kuteekateeka aha bibuuzo birungi ebi turikubaasa kukoresa kuhiga abantu kwija kubaho. Omu kicweka eki, nituza kushwijuma ebibuuzo bishatu ebi: Ruhanga ainiire ensi n’abantu kigyendererwa ki? Niki ekyashobire? Kandi ahabw’enki ekitambo kya Yesu nikyo kishumuruzo kikuru omu kuhikiirira kw’ekigyendererwa kya Ruhanga?

4. Ebihangirwe nibyoreka bita “ekitiinisa kya Ruhanga”?

⁴ Yehova n’Omuhangi orikutangaaza. Buri kintu kyona eki yaahangire n’eky’omutindo gw’amaani. (Okutandika 1:31; Yeremia 10:12) Niki eki turikwegyera aha burungi n’obuteeka bw’ebyahangirwe? Nitwega ngu ebintu byona ebi Yehova yaahangire, yaaba bikye munonga nari bihango munonga, biine omugasho. Ekindi, waateekateeka aha katafaari k’omubiri gw’omuntu akarikutangaaza, nari waareeba omwereere ozairwe, nari okareeba omushana nigutandika kwaka, nooyehurira ota? Nitubikunda ahakuba Yehova akatuhanga turikubaasa kumanya ekiboneire.—Shoma Zaaburi 19:1; 104:24.

5. Yehova akozire ki kugira ngu byona ebi yaahangire bikoragane gye?

⁵ Yehova ebihangirwe bye byona akabiteeraho obugarukiro. Akakora ebiragiro by’obuhangwa, n’ebirikukwata aha micwe. Akakora ebiragiro ebi kugira ngu byona ebiri omu nsi n’omu iguru bikoragane gye. (Zaaburi 19:7-9) Byona eby’omu nsi n’omu iguru biri omu mwanya gwabyo, kandi buri kimwe kiine omugasho gwakyo. Nk’eky’okureeberaho, amaani agarikukurura ebintu kubigarura ahansi nigarinda omwanya gw’ahaiguru oguri haihi n’ensi, kandi nigarinda enyanja empango n’ebingonzi byayo. Haaba hatariho amaani aga, tikikaabaasikire kutuura omu nsi. Obugarukiro obu Yehova yaateeraireho ebihangirwe nibureetera haabaho obuteeka omu mwanya n’omu nsi. Eki nikyoreka ngu ainiire abantu n’ensi ekigyendererwa. Omu kubuurira, nitubaasa kuhwera abantu kumanya Omuhangi w’ebintu ebi ebirikutangaaza.—Okushuuruurwa 4:11.

6, 7. Ni biconco ki ebimwe ebi Yehova yaahaire Adamu na Haawa?

⁶ Yehova akaba naayenda ngu abantu batuure omu nsi ebiro byona. (Okutandika 1:28; Zaaburi 37:29) Yehova n’efura, kandi akaha Adamu na Haawa ebiconco by’emiringo mingi. (Shoma Yakobo 1:17.) Yehova akabaha ekiconco ky’okwecweramu, kandi bakaba nibabaasa kuteekateeka, kukunda, n’okugira emikago mirungi. Omuhangi akagamba na Adamu yaamuragiira oku ashemereire kukora ekirungi. Adamu akeega n’oku  arikubaasa kwereeberera, kureeberera enyamaishwa, n’eitaka. (Okutandika 2:15-17, 19, 20) Yehova akahanga Adamu na Haawa barikubaasa kuroza, kukwata, kureeba, kuhurira, n’okukaga ebintu birungi ebi yaabahaire. Eki kikaba nikiija kubabaasisa kugira amagara marungi omu ka yaabo nungi. Adamu na Haawa bakaba baine emirimo mingi erikushemeza. Kandi bakaba nibaija kuguma nibeega barikuzoora n’ebintu bisya ebiro byona.

⁷ Ekigyendererwa kya Ruhanga kikaba nikitwariramu ki ekindi? Yehova akahanga Adamu na Haawa barikubaasa kuzaara abaana abahikiriire. Kandi n’abaana baabo nabo bakaba nibaija kuzaara abaana, kuhitsya obu abantu baakwijwire omu nsi. Yehova akaba naayenda ngu abazaire bakunde abaana baabo, nk’oku yaabaire naakunda abaana be b’okubanza abahikiriire, Adamu na Haawa. Akabaha ensi n’ebintu byona eby’omuhendo kandi ebirungi ebigirimu. Ensi ekaba neija kuba eka yaabo, kandi ekaba etarikuza kubaihwaho.—Zaaburi 115:16.

8. Ahabw’enki Ruhanga yaahaire Adamu na Haawa ekiragiro ekiri omu Okutandika 2:16, 17?

⁸ Ebintu ahonaaho tibirabaire nk’oku Yehova yaabaire naayenda. Niki ekyabaireho? Yehova akaha Adamu na Haawa ekiragiro kyorobi kugira ngu bamanye obugarukiro bw’obugabe bwabo. Akagira ati: “Omuti gwona ogw’omu kibanja noikirizibwa kuryaho nk’oku orikwenda; kwonka omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima oryafa.” (Okutandika 2:16, 17) Ekiragiro ekyo kikaba kyorobi kwetegyereza. Kandi kikaba kitarikubaasa kubagumira kworobera, ahabw’okugira ngu bakaba baine eby’okurya ebirungi ebindi omu musiri.

9, 10. (a) Sitaane akabeiherera ata Yehova? (b) Adamu na Haawa bakacwamu kukora ki? (Reeba ekishushani aha kutandika.)

⁹ Sitaane Omuregi akakoresa enjoka yaabeihabeiha Haawa kugomera Ishe, Yehova. (Shoma Okutandika 3:1-5; Okushuuruurwa 12:9) Sitaane akaba naayenda kureetera abaana ba Ruhanga kuteekateeka ngu bakaba batarikwikirizibwa ‘kurya ahari buri muti gwona ogw’omu kibanja.’ Akaba ari nk’orikugira ati: ‘Nimumanyisa tumurikubaasa kukora eki murikwenda?’ Ekindi, akagambira Haawa ati: “Okufa kwo, buzima timurifa.” Ekyo kikaba kiri ekishuba. Reero yaateeraho kushendashenda Haawa ngu kikaba kitarikumwetengyesa kuhurikiza Ruhanga. Sitaane akagira ati: “Ruhanga naamanya ngu eizooba eri muriguryaho, amaisho gaanyu garyaiguka.” Sitaane akaba ariyo naagira ngu Yehova akaba atarikwenda ngu barye aha kijuma ahabw’okugira ngu kikaba nikiija kubaha obwengye bw’omutaano. N’ekyarugiremu, akabaraganisa ekishuba ngu nimwija kuba “nka Ruhanga, mumanye oburungi n’obubi.”

¹⁰ Adamu na Haawa bakaba baine kucwamu eky’okukora. Mbwenu shi bakaba baine kworobera Ruhanga, nari bakaba baine kuhurikiza enjoka? Eky’obusaasi, bakacwamu kugomera Ruhanga. Bakanga Yehova Ishebo baayegaita ahari Sitaane. Obwo bakatandika kubaho ahabwabo, bataine burinzi bwa Yehova.—Okutandika 3:6-13.

11. Ahabw’enki Yehova atarayehugize ekibi kya Adamu na Haawa?

¹¹ Adamu na Haawa ku baagomeire ekiragiro kya Ruhanga, baahinduka abatahikiriire. Nangwa, bakahinduka abazigu ba  Ruhanga ahakuba naayanga abarikukora ebibi. ‘Amaisho ge gashemeire, tigenda kureeba kibi.’ (Habakuuki 1:13) Ku ogire ngu Yehova ekeehuzya ekibi kya Adamu na Haawa, ebihangirwe ebindi bikaabaire bitarikwetegyereza gye enshonga. Baamaraika n’abantu bakaabaire nibeebuuza yaaba nibabaasa kwesiga eki Ruhanga agambire. Kwonka Yehova n’omwesigwa aha mitindo ye, tarikugihenda. (Zaaburi 119:142) N’obu Adamu na Haawa baraabe baabaire baine obugabe bw’okwecweramu, bakaba batarikubaasa kwetantara ebyarugire omu kugomera Yehova. Bakahitsya obwire baafa baagaruka omu mucuucu ogu baahangirwemu.—Okutandika 3:19.

12. Niki ekyahikire aha baana ba Adamu?

¹² Bwanyima ya Adamu na Haawa kurya ekijuma, Yehova akaba atarikubaasa kubaikiriza nka bamwe aha b’omu ka ye. Akababinga omu musiri Edeni, kandi bakaba batarikwija kubaasa kugugarukamu. (Okutandika 3:23, 24) Yehova akabareka kuhikwaho ebyarugire omu kucwamu kubi kwabo. (Shoma Eky’Ebiragiro 32:4, 5.) N’ekyarugiremu, bakaba batakibaasa kutooreza emitwarize ya Yehova omu muringo oguhikiriire. Adamu akafeerwa ebirungi by’omumaisho hamwe n’abaana be. Eki yaabaire naabaasa kuha abaana be, n’okutahikiirira, ekibi, n’okufa. (Abarooma 5:12) Adamu akabafeerereza omugisha gw’okutuuraho ebiro byona. Adamu na Haawa bakaba batarikubaasa kuzaara omwana ohikiriire, kandi n’abaana baabo bakaba batarikubaasa kuzaara abaana abahikiriire. Kuruga obu Sitaane yaiha Adamu na Haawa ahari Ruhanga, atwire naateeraho kushendashenda abantu boona kukora nikyo kimwe.—Yohaana 8:44.

13. Yehova naayendeza ki abantu?

¹³ Yehova nabwo akaba naakikunda abantu. N’obu Adamu na Haawa baamurugireho, nabwo akaguma naayenda ngu abantu bagire omukago murungi nawe. Kandi akaba atarikwenda omwe aharibo kufa. (2 Petero 3:9) N’ahabw’ekyo, Ruhanga akakora entebeekanisa ahonaaho kugira ngu abantu bagarukye bagire omukago murungi nawe. Mbwenu shi ekyo akaba naabaasa kukikora ata atahenzire mitindo ye? Ka tureebe.

14. (a) Kurugiirira ahari Yohaana 3:16, Ruhanga akakora ki kucungura abantu kuruga omu kibi n’okufa? (b) Ni bibuuzo ki ebi turikubaasa kugaaniiraho n’abantu?

¹⁴ Shoma Yohaana 3:16. Abantu baingi abu turikweta kwija aha Kiijutsyo bakakwata ekyahandiikirwe eki omu mutwe. Kwonka shi ekitambo kya Yesu nikibaasisa kita abantu kutunga amagara agatahwaho? Twine omugisha gw’okuhwera abantu kumanya eky’okugarukamu  ky’ekibuuzo eki twabeeta kwija aha Kiijutsyo, twaba turi nabo aha Kiijutsyo, na twabataayaayira bwanyima. Oku barikweyongyera kwetegyereza ekitambo, nikwo baraayeyongyere kumanya oku Yehova arikukunda abantu n’oku aine obwengye. Mbwenu shi ni bintu ki ebirikukwata aha kitambo ebi turikubaasa kubagambira?

15. Yesu akaba naataana ata ahari Adamu?

¹⁵ Yehova akatuha omuntu ahikiriire owaabaire naabaasa kuhayo amagara ge nk’ekitambo. Omuntu ogwo akaba aine kuhamira ahari Yehova. Akaba aine kuhayo amagara ge ayekundiire ahabw’abantu. (Abarooma 5:17-19) Yehova akafurura amagara ga Yesu, ekihangirwe kye eky’okubanza, kuruga omu iguru kwija omu nsi. (Yohaana 1:14) N’ahabw’ekyo Yesu akaba omuntu ohikiriire, nk’oku Adamu yaabaire ari. Kwonka obutashushana na Adamu, Yesu akakuratira emitindo ehikiriire ei Yehova yaabaire naayenda ngu omuntu ohikiriire abe niyo yaakuratira. Nangwa n’obu yaabaire ari omu kugyezibwa kw’amaani, tarahenzire kiragiro kya Ruhanga kyona.

16. Ahabw’enki ekitambo kiri ekiconco eky’omuhendo munonga?

¹⁶ Yesu okufa nk’omuntu ohikiriire, akaba naabaasa kujuna abantu kuruga omu kibi n’okufa. Akaba naingana na kyona eki Adamu yaabaire ashemereire kuba. Yesu akaba ari omuntu ohikiriire, ohamiire ahari Ruhanga kandi orikumworobera. (1 Timoseo 2:6) Akatufeera, kandi ekitambo kye nikiha abashaija, abakazi, n’abaana omugisha gw’okutuuraho ebiro byona. (Matayo 20:28) Ekitambo nikyo kishumuruzo kikuru omu kuhikiirira kw’ekigyendererwa kya Ruhanga.—2 Abakorinso 1:19, 20.

17. Ekitambo nikibaasisa ki kubaho?

¹⁷ Yehova akeefeerereza bingi kutuha ekitambo eky’omuhendo ahariwe. (1 Petero 1:19) Naatutwara nk’ab’omuhendo kandi ekyo kikamureetera kuhayo Omwana we ayekundiire kutufeera. (1 Yohaana 4:9, 10) Ekirikumanyisa ngu Yesu akaba nka tataitwe omu mwanya gwa Adamu. (1 Abakorinso 15:45) Yesu akatubaasisa kugira omugisha gw’okwija kutunga amagara agatahwaho n’okwija kuba omu ka ya Ruhanga. Kurabira omu kitambo, abantu nibaija kuba abahikiriire kandi Yehova naija kubaikiriza kugaruka omu ka ye batarikuhenda biragiro bye. Teekateeka oku kiraije kuba nikishemeza boona abahamiire ahari Yehova ku baraabe abahikiriire! Obwo, boona omu iguru n’omu nsi nibaija kugira obumwe nk’eka emwe. Twena nitwija kuba abaana ba Ruhanga.—Abarooma 8:21.

18. Ni ryari obu Yehova araabe “byona ahari boona”?

¹⁸ N’obu abazaire baitu b’okubanza baraabe baayangire Yehova, we tararekyeire aho kuguma naakunda abantu, kandi akahayo ekitambo. Kandi n’obu turi abatahikiriire, Sitaane tarikubaasa kutuzibira kuhamira ahari Yehova. Yehova naija kutuhwera kubeera kimwe abahikiriire kurabira omu kitambo. Teekateeka oku embeera ziraabe ziri obu buri omwe “weena orikureeba omwana, akamwikiriza” araatungye amagara agatahwaho! (Yohaana 6:40) Tataitwe oine rukundo n’obwengye naija kuhikiiriza ekigyendererwa kye kandi ahwere abantu kuba abahikiriire. Obwo Yehova naija kuba “byona ahari boona.”—1 Abakorinso 15:28.

19. (a) Okusiima ekitambo kushemereire kutuhiga kukora ki? (Reeba akabokisi “ Ka Tugume Nitusherura Abashemeire.”) (b) Omu kicweka ekirikukurataho nituza kushwijuma ki?

¹⁹ Okusiima ekitambo kushemereire kutuhiga kugambira abandi aha kiconco eki ekitarikubaasa kushashurirwa. Abantu baine kumanya ngu Yehova naaha abantu boona omugisha gw’okutuuraho ebiro byona kurabira omu kitambo. Kwonka ekitambo nikikora ekirikukira ahari ekyo. Nikishoboorora oburemeezi obwaretsirweho Sitaane omu kibanja Edeni. Nitwija kureeba oku ekyo kirikubaasika omu kicweka ekirikukurataho.