Ku ogire ngu eki kihikire, teekateeka aha ku kyakutukwatsireho. Nk’eky’okureeberaho, mutabani w’ow’eishe-emwe omwe akeyita. Ishe akagira obusaasi bwingi. Akeebuuza yaaba Yehova yaabaire naamanya ebiraababeho omu biro by’omumaisho, reero akacwamu ngu we n’omukazi we beemere akagwe aka. Omu bunaku obu, baingi ahariitwe nitwija kuhikwaho obugwe. Mbwenu shi nitwija kuteekateeka ngu buri kimwe ekirikutuhikaho Yehova niwe arikukitebeekanisa?

Twaba nitushwijuma 1 Abakorinso 10:13, nitwija kureeba ngu Baibuli terikushagika eky’okugira ngu Yehova naamanya kare eki turikubaasa kugumisiriza reero atutooranira ebiraatugyeze. Ahabw’enki nitugira tutyo? Ka tureebe enshonga ina.

Ey’okubanza, Yehova akaha abantu obugabe bw’okwecweramu. Naayenda ngu twecweremu ebi turaakore. (Eky’Ebiragiro 30:19, 20; Yoshua 24:15) Twacwamu kukora ebirikushemeza Yehova, nitumwesiga ngu naija kutwebembera. (Enfumu 16:9) Kwonka twacwamu kubi, twine kwemera ebiraarugyemu. (Abagalatia 6:7) Mbwenu shi ku ogire ngu Yehova naatutooranira ebiraatugyeze, buzima tukaabaire twine obugabe bw’okwecweramu?

Eya kabiri, Yehova tarikuturinda ngu tutahikwaho ‘ebihikiirizi.’ (Omubuurizi 9:11) Omuntu naabaasa kutunga butandu ahabw’okugira ngu yaaba ari omu mwanya gugwire omu bwire bugwire. Yesu akagamba ahari butandu eyaafeereiremu abantu 18 obu omunaara gwabagwera. Akakyoreka gye ngu Ruhanga tiwe yaaretsireho okufa kwabo. (Luka 13:1-5) Nikiba kitari ky’obwengye kuteekateeka ngu butandu etakabaireho, Ruhanga niwe arikucwamu oraagumeho nari oraafe.

Eya kashatu, buri omwe ahariitwe aine kuguma amaririire kwesiga Yehova. Sitaane akagira ngu abaheereza ba Yehova nibamuheereza ahabw’ebi arikubaha. Sitaane akagira ngu titurikubaasa kuguma tuhamiire ahari Yehova twagyezibwa. (Yobu 1:9-11; 2:4; Okushuuruurwa 12:10) Yehova yaaturinda kutahikwaho okugyezibwa okumwe, nikibaasa kureebeka ngu Sitaane akaba ahikire.

Eya kana, Yehova tarikucwamu kumanya kare buri kimwe ekiraatubeho. N’amazima Yehova naabaasa kumanya ekiraabeho omu biro by’omumaisho yaaba naayenda. (Isaaya 46:10) Kwonka Baibuli neeyoreka ngu tarikucwamu kumanya kare buri kimwe ekiraabeho. (Okutandika 18:20, 21; 22:12) Yehova aine rukundo kandi ahikiriire, n’ahabw’ekyo tarikutaahataaha omu bugabe bwaitu bw’okucwamu.—Eky’Ebiragiro 32:4; 2 Abakorinso 3:17.

Mbwenu shi Paulo akaba naamanyisa ki obu yaagira ngu Yehova “taribaikiriza kugyezibwa ekigyezo eki mutarikubaasa”? Aha, Paulo akaba naashoboorora eki Yehova arikukora twaba nitugyezibwa, beitu akaba atarikumanyisa okugyezibwa kutakabaireho. * (Reeba obugambo obw’ahansi.) Twayesiga Yehova, naija kutuhwera omu kugyezibwa kwona okurikutuhikaho. (Zaaburi 55:22) Hati nituza kureeba enshonga ibiri ahabw’enki Paulo yaagambire ebigambo ebi.

Enshonga y’okubanza eri ngu okugyezibwa okurikutuhikaho ‘n’okw’abantu boona’ nari n’okurikukira kuhika aha bantu. Twaba tukiri omu nsi ya Sitaane, nitwija kuhikwaho embeera zigumire, nangwa n’akagwe. Kwonka twayesiga Yehova, nitubaasa kwemera ebigyezo ebi, tugume tuhamiire ahari Yehova. (1 Petero 5:8, 9) Omu mishororongo erikubanza omu 1 Abakorinso eshuura 10, Paulo akagamba aha kugyezibwa oku Abaisraeli baraabiremu omu ihamba. (1 Abakorinso 10:6-11)  Abo abaayesigire Yehova bakabaasa kwemera okugyezibwa okwo. Kwonka abamwe bakagomera Yehova. Bakaremwa kuhamira ahari Yehova ahabw’okuba bakaba batarikumwesiga.

Enshonga ya kashatu eri ngu “Ruhanga n’ow’okwesigwa.” Eki nikimanyisa ki? Twareeba oku Yehova atwire naareeberera abaheereza be kuruga ira, nitureeba ngu naahwera “abarikumukunda, bakoorobera ebiragiro bye.” (Eky’Ebiragiro 7:9) Nitwega ngu Yehova butoosha naahikiiriza ebi arikuraganisa. (Yoshua 23:14) Nitubaasa kuhamya ngu (1) Yehova tarikwija kwikiriza ekigyezo kyona kuguma munonga kikaturema kukyemera, kandi (2) naija kututeeraho “oburyo bw’okuhunga.”

Abo abarikwesiga Yehova naabateeraho ata “oburyo bw’okuhunga”? Yaayenda naabaasa kwihaho okugyezibwa. Kwonka ijuka ngu Paulo akagira ngu Yehova naija kubateeraho “oburyo bw’okuhunga, ngu mubaase kukigumisiririza.” N’ahabw’ekyo, Yehova naakira kututeeraho oburyo arikutuha amaani kugira ngu tugume tumuhamiireho. Ka tushwijume emwe aha miringo ei arikukoramu ekyo.

• Yehova naatuhuumuriza “omu busaasi bwaitu bwona.” (2 Abakorinso 1:3, 4) Naabaasa kutuha obusingye bw’omu biteekateeko, omu mutima, n’enyehurira arikukoresa Baibuli, omwoyo gurikwera, n’omwambari omwesigwa.—Matayo 24:45; Yohaana 14:16, Abarooma 15:4.

• Yehova naabaasa kukoresa omwoyo gwe gurikwera kutwebembera. (Yohaana 14:26) Omwoyo gurikwera nigubaasa kutuhwera kwijuka Ebyahandiikirwe n’emisingye kugira ngu tubaase kucwamu gye.

• Yehova naabaasa kukoresa baamaraika be kutuhwera.—Abaheburaayo 1:14.

• Yehova naabaasa kukoresa ab’eishe-emwe kutuhwera. Nibabaasa kutugumya kurabira omu bi barikugamba n’ebi barikukora.—Abakolosai 4:11.

Mbwenu shi twayega ki omu bigambo bya Paulo ebiri 1 Abakorinso 10:13? Yehova tarikututooranira ebigyezo ebiraatuhikyeho. Kwonka nitubaasa kuhamya ngu twamwesiga, nitubaasa kugumisiriza okugyezibwa kwona. Nitumanya ngu Yehova butoosha naija kututeeraho oburyo bw’okuhunga kuruga omu kugyezibwa twaguma tumuhamiireho.