TATA owaabaire naayetwa Arthur akiri muto akaba naakunda Ruhanga, kandi akaba naayenda kuba omwebembezi w’Abamesodokisi. Kwonka akahindura emiteekateekyere ye ku yaashomire ebitabo by’Abeegi ba Baibuli reero akatandika kuza omu nteerane zaabo. Omuri 1914, obu tata yaabaire aine emyaka 17, akabatizibwa. Omu Rutaro rw’Ensi Yoona I, bakamuragiira kuza omu mahe, kwonka akanga kwejumba omu kurwana. N’ahabw’ekyo bakamuta omu kihome kya Kingston Penitentiary omuri Ontario, Canada kumara ameezi 10. Bwanyima y’okukomoororwa kuruga omu kihome, akaba omubuurizi ow’obutwire, nk’oku baapayoniya baabaire nibeetwa obunaku obwo.

Omu 1926, tata akashwera Hazel Wilkinson. Nyina akaba ayegire amazima omuri 1908. Nkazaarwa Apuri 24, 1931, ndi owa kabiri aha baana bana. Tata akaba naakunda Baibuli kandi arikugiha ekitiinisa, kandi akatwegyesa kukora nikyo kimwe. Okuramya Yehova nikyo kyabaire kiri kikuru ahariitwe. Tukaba nitukira kubuurira enju aha nju nk’eka.—Ebyakozirwe 20:20.

Omuri 1939, Orutaro rw’Ensi Yoona II rukatandika. Omwaka ogwakuratsireho, omurimo gw’Abajurizi ba Yehova omuri Canada gukeemerezibwa. Abaana b’eishomero bakaba baine kuteerera ebendera entamaamu n’okweshongora ekyeshongoro ky’eihanga baaba bari omu kibiina. Obumwe, abashomesa bakaba baikiriza nyowe na munyaanyazi Dorothy kushohora abandi baaba nibakora ebi. Kwonka eizooba rimwe, omushomesa akatandika kuumpemura ngu ndi ekinyabwoba. Ku twabaire nituruga aha ishomero, abaana abu ndikushoma nabo bakankwata baantuura ahansi. Eki kikandeetera kwongyera kumariirira “kworobera Ruhanga okukira abantu.”—Ebyakozirwe 5:29.

Omu Kwamushanju 1942, ku naabaire nyine emyaka 11, nkabatirizibwa omu tanka y’amaizi omu iriisizo. Nkaba ninkunda kuheereza nka payoniya w’ekihuumuro. Obunaku obu nitubeeta baapayoniya abahwezi. Omwaka gumwe nkabaasa kugyenda n’ab’eishe-emwe abandi bashatu omuri Ontario, reero twabuurira abarikushara embaaho.

Omu Kwakataano 1, 1949, nkatandika kuba payoniya ow’obutwire. Bakanyeta kuza kuhwera omu kwombeka aha ofiisi y’eitaagi eya Canada bwanyima naaba Omubeseeli aha ofiisi egyo. Nkaba ninkora omu iteerero ry’ebitabo ahu naayegyeire okukoresa ekyoma ky’okuteera ebitabo. Hariho obu naamara saabiiti nyingi ndikukora ekiro kyona ndikuhwera omu kuteera turakiti eyaabaire neekwata aha kuhiiganisibwa kw’Abajurizi ba Yehova omuri Canada.

Bwanyima nkaija naakora omu kitongore ky’eby’obuheereza aha Beseeli. Nkaheebwa obujunaanizibwa bw’okubuuza baapayoniya abaabaire nibaza kuheereza omuri Quebec, ahaabaire hari okuhiiganisibwa kw’amaani. Omwe ahari baapayoniya aba akaba ari Mary Zazula kuruga Edmonton, Alberta. Abazaire be bakaba bari ab’ekanisa ya Osodokisi. Mary na munyaanya omukuru ku baayangire kurekyera aho kwega Baibuli, abazaire baabo bakababinga omu ka. Mary na munyaanya bakabatizibwa omu Kwamukaaga 1951, bwanyima y’ameezi mukaaga nabo bakaba baapayoniya. Ku naabaire nimbabuuza, nkareeba ngu Mary akaba naakunda Yehova munonga. Ninyijuka ndikuteekateeka ngu ogu niwe mwishiki ou naakwenzire kushwera. Bwanyima y’ameezi mwenda, tukataaha hamwe omu bushwere omu Kwokubanza 30, 1954. Bwanyima ya saabiiti emwe, nyowe na Mary bakatweta kutendekwa kuza omu murimo gw’okutaayaayira ebibiina. Kumara emyaka ebiri, tukaba nitutaayaayira ebibiina omuri Ontario.

 Omurimo gw’okubuurira ku gwagumire nigweyongyera kutunguuka, abamiisani bakeetengwa munonga. Nyowe na Mary tukaba nituteekateeka ngu twaba nitubaasa kwemera obufuki bwa Canada n’ensiri omu bwire bw’omushana, nitubaasa kutuura buri hamwe. Tukaza omu ishomero rya Gileadi eya 27 twarihendera omu Kwamushanju 1956. Kuza kuhika Okwaikumi-na-kumwe tukaba turi omu maka gaitu amasya omuri Brazil.

Ku twahikire omuri Brazil, tukatandika kwega Orupotuguezi. Omu kubanza, tukeega emiringo eyorobi ey’okugaaniiramu n’abantu. Ekyakuratsireho, tukakwata enyanjura ngufu y’okugaba magaziini. Bwanyima, twaza omu kubuurira twabugana omukazi owaakunzire ebi twabaire nitubuurira. Tukacwamu ngu twabugana omuntu orikusiima, nituza kumushomera ekyahandiikirwe ekirikworeka embeera oku ziraabe nizishusha Obukama bwa Ruhanga bwaba nibutegyeka. N’ahabw’ekyo nkamushomera Okushuuruurwa 21:3, 4, reero naagwa kihuumura! Nkaba ntamanyiriire omushana mwingi. Omushana gukagumizamu nigunkora kubi.

Tukaba twine kubuurira omu rurembo Campos. Obunaku obu, omu rurembo oru harimu ebibiina 15! Kwonka obu twahikayo, hakaba harimu guruupu emwe eri hare omu rurembo orwo n’abanyaanyazi-itwe bana abamiisani, Esther Tracy, Ramona Bauer, Luiza Schwarz, na Lorraine Brookes (hati orikwetwa Wallen). Obujunaanizibwa bwangye omu ka y’abamiisani bukaba buri okwozya emyenda n’okushenya enku z’okuteekyesa. Aha Rwokubanza rumwe bwanyima y’okwega Omunaara gw’Omurinzi, Mary akaba ahuumwireho omu ntebe omutwe agutaire aha mushego. Tukaba nitugaaniira aha ku eizooba ryaitu ryaba. Mary ku yaimukire omu ntebe, enjoka yaaruga ahansi y’omushego! Enjoka egi ekareetaho akajagararo kuhitsya obu naagiitsire.

Bwanyima y’okumara omwaka nitwega Orupotuguezi. Tukatandika kuheereza omu myanya etarimu mashanyarazi. Tukaba tubyama aha birago kandi tugyenda aha mbaraasi n’ebigaari. Eizooba rimwe tukagyendera omu gaari y’omwika turikuza omu tauni eri omu nshozi, kuza kubuurira omu myanya etarikukira kubuurirwamu. Tukapangisa ekishengye. Ofiisi y’eitaagi ekatuha magaziini 800 ez’okukoresa omu kubuurira. Tukaba nitwehuuba aha posita ofiisi kwakiira ebibokisi bya magaziini.

Omuri 1962, Eishomero ry’Obuheereza bw’Obukama rikaba omu bicweka bingi omuri Brazil. Nkaheebwa obujunanizibwa bw’okugyenda kwegyesa omu mashomero ago nyenka kumara ameezi mukaaga. Nkeegyesa eishomero eryabaire riri omuri Manaus, Belém, Fortaleza, Recife, na Salvador. Ku naabaire ndi omuri Manaus, nkatebeekanisa oruteerane oruhango orw’ebiro bishatu aha kyombeko ky’emizaano. Ahabw’enjura nyingi, kikaba kigumire kutunga amaizi marungi g’okunywa, kandi tukaba tutaine mwanya murungi gw’ab’eishe-emwe kuriiramu omu bwire bw’oruteerane orwo. Nkagamba n’omuserukare aha buremeezi bwaitu. Akakora entebeekanisa y’okutuha amaizi marungi g’okunywa omu ruteerane orwo rwona. Kandi akatuma abaserukare baatuteeraho eihema rihango ry’okuteekyeramu, n’okuriiramu.

 Ku naabaire ntariho, Mary akabuurira omu kicweka ky’eby’obushuubuzi, ahu abantu baabaire batarikukunda kugamba ahari Baibuli. Abantu abo bakaba barugire Portugal kwija Brazil kukora sente. Mary akahwamu amaani reero yaagambira bamwe ahari banywani be ati: “Omwanya ogu naakwenzire kuheereruka kutuuramu omu nsi egi ni Portugal.” Bwanyima y’ekyo, tukatunga ebaruha. Ebaruha ekaba neetweta kuza kuheereza omuri Portugal, ahu omurimo gwaitu gw’okubuurira gwabaire gwemereziibwe. Eki kikatangaaza Mary! Kwonka tukaikiriza twaza Portugal kuheereza.

Tukahika omuri Lisbon, Portugal, omu Kwamunaana 1964. Abaporiisi bakaba nibateganisa ab’eishe-emwe omu mwanya ogwo. N’ahabw’ekyo tukareeba ngu n’eky’obwengye kuteehitsya Abajurizi ba Yehova omu kubanza. Omu kubanza, tukapangisa ekishengye ky’okuba nitutuuramu. Bwanyima ku twatungire ebipapura by’okutwikiriza kutuura omu ihanga, tukapangisa enju. Bwanyima y’ameezi ataano, hakabaho obusingye twatandika kuhurizana n’ab’eishe-emwe aha ofiisi y’eitaagi. Tukashemererwa munonga ku twarugireho tukaza omu nteerane!

Ahabw’okugira ngu omurimo gwaitu gukaba gutarikwikirizibwa, Ebyombeko by’Obukama bikaba bikiingirwe kandi enteerane zikaba niziba omu maka g’ab’eishe-emwe. Abaporiisi bakaba nibakira kushwijuma enju zaitu. Ab’eishe-emwe baingi na banyaanyazi-itwe bakaba nibakira kutwarwa aha poriisi kubuuzibwa kana na kataano. Abaporiisi bakaba babatwariza kubi barikubagyema kugamba amaziina g’ab’eishe-emwe abaine obujunaanizibwa. N’ahabw’ekyo kubaasa kurindana, ab’eishe-emwe bakarekyera aho kwetana amaziina g’obuzaarwa.

Ekigyendererwa kyaitu kikaba kiri okuhamya ngu ab’eishe-emwe baaguma nibatunga ebitabo by’okubahwera kugumisiriza. Mary akaba ahandiika ebicweka by’Omunaara gw’Omurinzi eby’okwega aha rupapura rw’omutaano. Bwanyima orupapura orwo rukaba rukoresibwa kukoramu kopi ezindi nyingi ez’okuha ab’eishe-emwe.

Omu Kwamukaaga 1966, hakabaho orubanja rukuru omu icwero ry’emanja omuri Lisbon. Boona 49 abaabaire bari omu kibiina kya Feijó bakateebwaho orubanja rw’okuza omu ruteerane rutarikwikirizibwa omu ka y’omuntu. Kubaasa kwetebeekanisiza okuhozesibwa, nk’eshushaniriza nk’omuhorereza owaabaire naahamya ngu ab’eishe-emwe baine orubanja. Kwonka nk’oku twabaire nituteekateeka, tukasingwa orubanja. Ab’eishe-emwe na banyaanyazi-itwe 49 bakateebwa omu kihome kuruga aha biro 45 kuhika aha meezi ataano n’ekicweka. Kwonka okuhozesibwa okwo bukaba obujurizi bw’amaani. Nangwa n’omu kuhozesibwa, omuhorereza waitu akajuriza ebigambo bya Gamalieli ebiri omu Baibuli. (Ebyakozirwe 5:33-39) Bwanyima, ab’amakuru bakagamba aha kuhozesibwa kwaitu. Tukashemererwa munonga omuhorereza waitu ku yaatandikire kwega Baibuli, kandi akaguma naija n’omu nteerane.

Omu Kwaikumi-n’abiri 1966, nkatooranwa kuba omureeberezi w’eitaagi kandi nkaba mmara obwire bwingi ninkora aha nshonga eziine akakwate n’ebiragiro. Tukakora kyona ekirikubaasika kworeka enshonga  zihikire ahabw’enki Abajurizi ba Yehova baabaire baine kuramya bataine orikubateera aha mukono omuri Portugal. (Abafilipi 1:7) Bwanyima, omu Kwaikumi-n’abiri 18, 1974, tukarugaho twaikirizibwa. Ow’eishe-emwe Nathan Knorr na Frederick Franz bakaija kuruga aha ofiisi enkuru kushemererwa hamwe naitwe. Tukagira nabo oruteerane omuri Oporto na Lisbon orwaizirweho abantu 46,870.

Yehova akatuhwera omurimo gwaitu gw’okubuurira gwahika n’omu birwa nka Azores, Cape Verde, Madeira, na São Tomé hamwe na Príncipe, ei abantu barikugamba Orupotuguezi. Omubaro gw’Abajurizi ba Yehova ku gwagumire nigweyongyera omu myanya egi, tukaba twine kutunga ofiisi y’eitaagi empango. Bwanyima y’okwombekwa, Ow’eishe-emwe Milton Henschel akaha orubazo rw’okugihayo omu Kwakana 23, 1988. Hakaba hariho ab’eishe-emwe na banyaanyazi-itwe 45,522, otwariiremu na 20 abaabaire baabaireho abamiisani omuri Portugal reero bakagaruka ahabw’okuheebwayo kwa ofiisi y’eitaagi egi.

Kumara emyaka, nyowe na Mary buzima tutwire nitwegyera aha b’eishe-emwe abeesigwa. Nk’eky’okureeberaho, obu naagyenda n’Ow’eishe-emwe Theodore Jaracz kutaayaayira eitaagi rimwe, nkeega eishomo ry’amaani. Eitaagi eri twabaire tutaayaayiire rikaba riine oburemeezi bw’amaani, kandi Akakiiko k’Eitaagi kakaba kakozire kyona ekirikubaasika kuhwera. Bakaba nibahurira kubi ngu tibabaasize kuhwera. Ow’eishe-emwe Jaracz akabagumya arikugira ati: “Hati nibwo bwire bw’okuha omwoyo gurikwera omwanya gukakora.” Kandi tindikubaasa kwebwa eki Ow’eishe-emwe Franz yaagambire obu nyowe na Mary twabaire tutaayaayire Brooklyn. Turi omu guruupu tukamushaba obuhabuzi, kandi akatugira ati: “Nimbahabura nti: Mugume n’ekibiina kya Yehova ekirikureebwa, omu bwire burungi n’obubi. Nikyo kyonka ekirikukora omurimo ogu Yesu yaaragiire abeegi be kukora, ogw’okubuurira amakuru marungi g’Obukama!”

Okukora eki kihwereire Mary naanye kugira okushemererwa. Kandi nitwijuka ebintu bingi birungi ebi twarabiremu turikutaayaayira amataagi maingi omu nsi yoona. Tukaba nitukunda kubugana abaheereza ba Yehova ab’emyaka yoona kandi tukabahamiza ngu obuheereza bwabo Yehova naabusiima munonga. Butoosha tukaba tubahiga kugumizamu nibamuheereza.

Hati hahingwireho emyaka mingi, kandi twembi hati turi omu myaka ya 80. Mary aine endwara nyingi. (2 Abakorinso 12:9) Kandi tutungire n’okugyezibwa kwingi okundi. Kwonka okugyezibwa oku kuhamize okwikiriza kwaitu kandi kwatureetera kumariirira kuhamira ahari Yehova. Ku turikureeba enyima emyaka ei tumazire nituheereza Yehova, nitureeba ngu atworekire rukundo omu miringo mingi munonga. *—Reeba obugambo obw’ahansi.