1. Ni bintu ki ebirungi ebi turaatungye ahabw’ekitambo?

EKITAMBO kya Yesu Kristo nikibaasisa emigisha mingi kubaho. Nk’eky’okureeberaho, entebeekanisa y’ekitambo neebaasisa abaana ba Adamu boona abarikukunda okuhikiirira kutunga omugisha gw’okwija kuba abaana ba Ruhanga. Omugisha ogundi n’okwija kutuuraho tushemereirwe ebiro byona. Kandi ekitambo kiine akakwate n’enshonga nkuru ezirikukwata ahari buri omwe omu iguru n’omu nsi.—Abaheburaayo 1:8, 9.

2. (a) Ni bintu ki ebikuru munonga omu iguru n’omu nsi ebi Yesu yaataire omu kushaba kwe? (Reeba ekishushani aha kutandika.) (b) Nituza kugamba ahari ki omu kicweka eki?

² Emyaka nk’ebiri Yesu ari haihi kufa, akeegyesa abeegi be okushaba bati: ‘Tataitwe ow’omu iguru, eiziina ryawe ryezibwe, Obukama bwawe bwije; ebi okunda bikorwe omu nsi nk’oku bikorwa omu iguru.’ (Matayo 6:9, 10) Ka tushwijume oku ekitambo kiine akakwate n’okweza eiziina rya Ruhanga, Yehova, okutegyeka kw’Obukama bwa Ruhanga, n’okukora ebi Ruhanga arikukunda.

3. Eiziina rya Ruhanga, Yehova nirijwekyera ki? Sitaane akashiisha ata eiziina rya Ruhanga, Yehova?

³ Eky’okubanza kya byona, Yesu akashaba ngu eiziina rya Ruhanga, Yehova ryezibwe, nari ritwarwe nk’eririkwera. Eiziina rya Ruhanga Yehova, nirijwekyera Yehova wenyini, nirishoboorora eki ari. Niwe arikukirayo kugira amaani n’okuhikiirira omu nsi n’omu iguru. Kandi Yesu akamweta “Taata orikwera.” (Yohaana 17:11) Ahabw’okugira ngu Yehova n’orikwera, buri kimwe eki arikukora n’ebiragiro byona ebi arikutaho n’ebirikwera. Kwonka omuri Edeni, Sitaane akahakanisa obushoboorozi bwa Ruhanga bw’okuteeraho abantu emitindo. Akabeiherera Ruhanga kandi yaashiisha eiziina rye.—Okutandika 3:1-5.

4. Yesu akatwara ata eiziina rya Ruhanga nk’eririkwera?

⁴ Kwonka, Yesu we, buzimazima akaba naakunda eiziina rya Ruhanga, kandi akakora kyona ekirikubaasika kuryeza. (Yohaana 17:25, 26) Ata? Omu mitwarize ye n’omu kwegyesa kwe, akahwera abandi kureeba ngu emitindo ya Yehova ehikire, kandi ngu kyona eki arikwenda ngu tukore n’eky’okutugasira. (Shoma Zaaburi 40:8-10.) N’obu Sitaane yaareeteire Yesu kubonabona n’okufeera omu busaasi, akaguma ahamiire ahari Yehova. Akakyoreka gye ngu nikibaasika omuntu ohikiriire, kworobera Yehova.

5. Nitubaasa kutwara tuta eiziina rya Ruhanga nk’eririkwera?

⁵ Nitubaasa kworeka tuta ngu nitukunda eiziina rya Ruhanga, Yehova? Omu mitwarize yaitu. Yehova naayenda ngu tube abarikwera. (Shoma 1 Petero 1:15, 16.) Eki nikimanyisa ngu niwe twine kuramya wenka kandi tukamworobera n’omutima gwaitu gwona. Nangwa n’obu twakuhikwaho okuhiiganisibwa, twine kuteeraho kugyendera aha bi Yehova arikutwegyesa. Twagyendera aha mitindo ya Yehova, nituhaisa eiziina rye ekitiinisa. (Matayo 5:14-16) Nituba twayoreka ngu ebiragiro bye ni birungi, kandi ngu Sitaane n’omubeihi. Tituhikiriire, n’ahabw’ekyo nitukora enshobe. Kwonka twakora enshobe, tushemereire kweteisa tukareka kukora ebintu ebirikujumisa eiziina rya Ruhanga.—Zaaburi 79:9.

6. Ahabw’enki Yehova naabaasa kutureeba nk’abahikiriire, n’obu turaabe twine okutahikiirira?

⁶ Yaaba tushukirweho amajuta nari turi ‘ab’entaama ezindi,’ Yehova naatusaasira ebibi byaitu twaba nitwikiririza omu kitambo. Naikiriza abarikumuramya abo abarikuba beehaireyo ahariwe. Abakristaayo abashukirweho amajuta naabeeta abahikiriire nk’abaana be, kandi “ab’entaama ezindi” naabeeta abahikiriire nka banywani be. (Yohaana 10:16; Abarooma 5:1, 2; Yakobo 2:21-25) N’ahabw’ekyo, na hati, ekitambo nikitubaasisa kugira omukago murungi na Tataitwe n’okweza eiziina rye.

7. Ni migisha ki eraabeho ahabw’ekitambo?

⁷ Omu kushaba kw’eky’okureeberaho, Yesu akagira ati: “Obukama bwawe bwije.” Ekitambo kiine kakwate ki n’Obukama bwa Ruhanga? Obukama bwa Ruhanga nari gavumenti ye, erimu Yesu n’abandi 144,000 abatoorainwe kuruga omu bantu. Ekitambo nikibaasisa abantu aba kuzooka kuza omu iguru. (Okushuuruurwa 5:9, 10; 14:1) Nibaija kuba abakama n’abanyamurwa kandi nibaija kutegyeka ensi obwo bari na Yesu omu iguru kumara emyaka rukumi. Omu bwire obwo, Yehova naija kukoresa Obukama kuhindura ensi  paradiso n’okuhwera abantu boona kuba abahikiriire. Abaheereza ba Yehova ab’omu iguru n’ab’omu nsi boona nibaija kurugaho nibahinduka eka emwe. (Okushuuruurwa 5:13; 20:6) Yesu naija kucwekyereza Sitaane, kandi aiheho oburemeezi bwona oburetsirweho Sitaane.—Okutandika 3:15.

8. (a) Yesu akahwera ata abeegi be kwetegyereza ngu Obukama bwa Ruhanga ni bukuru? (b) Nitushagika tuta Obukama obunaku obu?

⁸ Yesu akahwera abeegi be kwetegyereza obukuru bw’Obukama bwa Ruhanga. Ata? Ahonaaho Yesu aherize kubatizibwa, akatandika kubuurira “ebigambo birungi by’Obukama bwa Ruhanga” hoona ahu yaabaire aza. (Luka 4:43) Akagambira n’abeegi be kuba baakareebi be ‘okuhitsya aha muheru gw’ensi.’ (Ebyakozirwe 1:6-8) Obunaku obu, kurabira omu kubuurira aha Bukama bwa Ruhanga, abantu baine omugisha gw’okwega aha kitambo bakaba abarategyekwe Obukama bwa Ruhanga. Nitworeka ngu turi abeesigwa abarategyekwe Obukama bwa Ruhanga, turikuhwera abashukirweho amajuta kubuurira amakuru marungi omu nsi yoona.—Matayo 24:14; 25:40.

9. Ahabw’enki nitubaasa kugira obuhame ngu Yehova naija kuhikiiriza ekigyendererwa eki ainiire abantu?

⁹ Yesu akaba naamanyisa ki obu yaagira ngu “ebi okunda bikorwe”? Yehova ku arikugira ngu ekintu nikiija kubaho, buzima nikihikiirira. (Isaaya 55:11) Obugomi bwa Sitaane bukaba butarikubaasa kuremesa Yehova. Yehova akaba ainiire ensi kigyendererwa ki? Akaba naayenda ngu ensi eijuremu abaana ba Adamu na Haawa abahikiriire. (Okutandika 1:28) Kuri Adamu na Haawa baafiire batakazaire, ekigyendererwa kya Ruhanga eky’okureetera abaana baabo kwijura omu nsi kikaba nikiija kufa busha. N’ahabw’ekyo Yehova akabaikiriza kuzaara abaana. Ekitambo nikibaasisa boona abarikwikiriza kutunga omugisha gw’okwija kuba abahikiriire reero bakatuuraho ebiro byona. Yehova naakunda abantu, kandi naayenda ngu tugire amagara marungi nk’oku yaabaire agyendereire omu kubanza.

10. Ekitambo nikigasira kita abantu abaafiire?

¹⁰ Kandi shi obukaikuru bw’abantu abaafiire batakatungire omugisha gw’okumanya Yehova? Yehova naayenda ngu abantu bagumeho. N’ahabw’ekyo naija kuzoora abaafiire. Ekitambo nikibabaasisa kwija kugaruka bakaba abahuriire. Reero nibaija kubaasa kwega ahari Yehova kandi bagumeho ebiro byona. (Ebyakozirwe 24:15) Yehova niwe bukomooko bw’amagara. Yehova ku araazoore abaafiire, naija kuba Ishebo. (Zaaburi 36:9) Omu kushaba kw’eky’okureeberaho, Yesu akagira ngu Yehova ni ‘Tataitwe ow’omu iguru.’ (Matayo 6:9) Yehova ahaire Yesu omurimo mukuru ogw’okuzoora abaafiire. Yesu akagira ati: “Niinye kuzooka n’amagara.”—Yohaana 6:40, 44; 11:25.

11. Ni kigyendererwa ki eki Ruhanga ainiire “ab’omutwe muhango”?

¹¹ Kandi Yesu akagira ati: ‘Weena okora ebi Ruhanga akunda, niwe murumuna wangye, niwe munyaanyazi, kandi niwe maawe.’ (Mako 3:35) N’ekigyendererwa kya Ruhanga ngu amahanga goona, n’enganda zoona n’endimi zoona babe abarikumuramya. Nibeetwa abantu ‘b’omutwe muhango, ogu omuntu atarikubaasa kubara.’ Nibaikiririza omu kitambo kandi nibenda kworobera Ruhanga. Nibamuhimbisa kandi bagira bati: “Okujuna n’okwa Ruhanga waitu, oshutami aha kitebe  ky’obukama, kandi n’okw’Omwana gw’entaama.”—Okushuuruurwa 7:9, 10.

12. Nitwega ki aha kushaba kw’eky’okureeberaho, aha bikwatiraine n’ekigyendererwa eki Yehova ainiire abantu?

¹² Omu kushaba kwa Yesu okw’eky’okureeberaho, twayegamu bingi ebirikukwata ahari Yehova n’ekigyendererwa eki ainiire abantu. Eky’okubanza, twine kukora kyona eki turikubaasa kweza eiziina rya Ruhanga, Yehova tukamuha n’ekitiinisa. (Isaaya 8:13) Ekitambo kya Yesu, ekirikutubaasisa kwija kujunwa, nakyo nikihaisa eiziina rya Ruhanga ekitiinisa. Nangwa, eiziina rya Yesu nirimanyisa ngu ‘Yehova n’okujunwa.’ Ekya kabiri, Yehova arikurabira omu Bukama bwe naija kuha abantu abarikumworobera, emigasho y’ekitambo. Kandi ekya kashatu, twine obuhame ngu tihaine ekirikubaasa kuremesa ebi Yehova arikukunda kukorwa.—Zaaburi 135:6; Isaaya 46:9, 10.

13. Ahabw’enki nitubatizibwa?

¹³ Omuringo mukuru ogu turikworekamu ngu nitusiima ekitambo, n’okwehayo ahari Yehova kandi tukabatizibwa. Omu muringo ogu, nitworeka ngu nitwikiririza omu kitambo kandi ngu “turi aba” Yehova. (Abarooma 14:8) Ku turikubatizibwa, nitushaba Yehova kutuha ‘omutima ogutarikweshinja.’ (1 Petero 3:21) Yehova naatugarukamu arikutuhwera kugasirwa migisha y’ekitambo. Kandi nituhamiza kimwe ngu naija kuhikiiriza byona ebi yaaraganiise.—Abarooma 8:32.

14. Ahabw’enki Yehova naayenda ngu tukunde abandi?

¹⁴ Buri kimwe eki Yehova arikukora naakikora ahabwa rukundo ye. Naayenda ngu abaheereza be boona bamutooreze, kandi bakundane. (1 Yohaana 4:8-11) Ku turikukunda abantu, nitworeka butunu ngu nitwenda “kuba abaana ba [Tataitwe] ori omu iguru.” (Matayo 5:43-48) Ebiragiro bibiri ebikuru, n’okukunda Yehova, n’okukunda abataahi. (Matayo 22:37-40) Omuringo gumwe ogu turikworekamu ngu nitukunda abantu n’okubabuurira amakuru marungi g’Obukama bwa Ruhanga. Twayorobera ekiragiro kya Yehova eky’okukunda abandi, na munonga ab’eishe-emwe, rukundo ei tumwiniire neija “kuhikiirizibwa.”—1 Yohaana 4:12, 20.

15. (a) Ni migisha ki ei turikutunga hati kuruga ahari Yehova? (b) Ni migisha ki ei turaatungye omu biro by’omumaisho?

¹⁵ Yehova naatuhamiza ngu twikiririza omu kitambo, ebibi byaitu nibaija ‘kuragazibwa.’ Naabaasa kusaasirira kimwe ebibi byaitu. (Shoma Ebyakozirwe 3:19-21.) Nk’oku twaba twagambire, ahabw’ekitambo Yehova naabaasa kweta abantu abamwe kuba abaana be ab’omu iguru. Aba n’abashukirweho amajuta. (Abarooma 8:15-17) Naayeta ‘ab’entaama ezindi’ kwija omu ka ye omu nsi. Baaheza kuba abahikiriire, nihaija kubaho okugyezibwa okw’aha muheru. Baaguma bari abeesigwa ahari Yehova, nabo naija kubahindura abaana be. (Abarooma 8:20, 21; Okushuuruurwa 20:7-9) Yehova naija kuguma naakunda abaana be boona. Ekitambo nikiija kuguma nikibaasisa emigisha kubaho ebiro byona. (Abaheburaayo 9:12) Yehova atuhaire ekiconco eki eky’omutaano, kandi tihariho orikubaasa kukitwihaho.

16. Ekitambo nikituhwera kita kucungurwa?

¹⁶ Twayeteisa ebibi byaitu, tihariho eki Omuregi arikubaasa kukora ekirikubaasa kwija kuturemesa kuba omu ka ya Yehova. Yesu akafa ‘rimwe yaaheza.’ Ekitambo kikaheebwayo ahabw’ebiro byona. (Abaheburaayo 9:24-26) Adamu akatureetera okufa, kwonka ekitambo kya Yesu nikiija kutureetera amagara agatahwaho. Ekitambo nikibaasa kutucungura kuruga omu nsi ya Sitaane n’omu kutiina okufa.—Abaheburaayo 2:14, 15.

17. Noogasirwa ota omuri rukundo ya Yehova?

¹⁷ Ebi Ruhanga araganiise nibiija kuguma nibihikiirira. Nk’oku ebiragiro ebi Yehova yaakozire bitarahindukire, nawe Yehova tarikubaasa kuhinduka. Tarikubaasa kutureebya. (Malaki 3:6) Yehova naatuha ebirikukira aha kiconco ky’amagara agu twine. Naatuha rukundo ye. Baibuli neegira eti: “Nitumanya, kandi nitwikiriza okukunda oku Ruhanga atukunda. Ruhanga ni rukundo.” (1 Yohaana 4:16) Ebi arikuraganisa butoosha nibihikiirira. Juba, ensi neija kuba paradiso nungi. Buri omwe oraatungye omugisha gw’okugibamu naija kuba naatooreza Yehova, kandi hariho n’okukundana. Abaheereza ba Yehova omu iguru n’omu nsi nibaija kugira bati: “Ruhanga waitu aheebwe omugisha n’ekitiinisa n’obwengye n’okusiimwa n’okuhimbisibwa n’obushoboorozi n’amaani ebiro n’ebiro Amiina.”—Okushuuruurwa 7:12.