1, 2. (a) Ni nshonga ki enkuru erikukwata aha bantu boona? (b) Ahabw’enki enshonga egi ni nkuru ahariitwe?

ABANTU baingi obunaku obu, nibatwara sente nka kikuru. Nibaziteekateekaho kandi zibeerarikiriza. Nibamara obwire bwabo barikuteeraho kuzisherura nari okubiika ezi baine. Abandi, ekikuru aharibo n’eka yaabo, amagara gaabo, nari ebi barikwenda kukora.

² Kwonka hariho enshonga nkuru munonga erikukira ebi byona. Okumanya ngu Yehova niwe ahikire kutegyeka byona. Enshonga egi ni nkuru kandi twine kuguma nitugiteekateekaho. Twaba tuteegyendesereize, nitwija kuhuga nari twerarikirire aha buremeezi bwaitu, kandi ekyo nikibaasa kutureetera kwebwa enshonga nkuru egyo. Twashagika Yehova ohikire kutegyeka byona, nitwija kwemera oburemeezi obu twine, kandi tumwirire haihi.

3. Sitaane naagamba ki aha butegyeki bwa Ruhanga?

³ Sitaane Omuregi areetaire abantu kwebuuza yaaba Yehova ahikire kutegyeka. Sitaane naayenda abantu bateekateekye ngu Yehova n’omutegyeki mubi orikurya enguzi,  kandi ngu tarikutwendeza ebirungi. Sitaane naareetera abantu kuteekateeka ngu nibabaasa kutunga okushemererwa munonga baaba nibetegyeka. (Okutandika 3:1-5) Kandi naareetaho ekiteekateeko ngu tihariho muntu orikuhamira kimwe ahari Ruhanga, kandi ngu twatunga oburemeezi nitwehakana Ruhanga nk’omutegyeki waitu. (Yobu 2:4, 5) N’ahabw’ekyo Yehova arekire obwire kuhinguraho kworeka abantu ngu tibarikubaasa kugira amagara marungi baaba batarikutegyekwa Ruhanga.

4. Ahabw’enki twine kushoboorekyerwa enshonga erikukwata ahari ogwo ohikire kutegyeka?

⁴ Buzima, Yehova naamanya ngu ebi Sitaane arikumugambaho n’ebishuba. Mbwenu shi ahabw’enki arekire obwire kuhinguraho ngu Sitaane ayorekye abantu ngu niwe ahikire kutegyeka? Eky’okugarukamu nikikwata ahari buri omwe omu iguru n’omu nsi. (Shoma Zaaburi 83:18.) Adamu na Haawa bakanga obutegyeki bwa Yehova, kandi kuruga obwo baingi batwire nibabwanga. Eki nikibaasa kureetera abamwe kuteekateeka ngu Omuregi ahikire. Enshonga egyo yaaba etakashoboororoirwe, omu biteekateeko by’abantu nari baamaraika tiharikubaasa kubaho obusingye nari obumwe obwabuzima. Kwonka Yehova yaatandika kutegyeka buri kimwe, buri omwe naija kuza ahansi y’obutegyeki bwe ebiro byona. Nihaija kubaho obusingye omu nsi yoona n’omu iguru.​—Abaefeso 1:9, 10.

5. Enshonga y’okuba ohikire kutegyeka neetukwataho eta?

⁵ Buzima nikiija kureebwa ngu Ruhanga niwe ahikire kutegyeka, kandi obutegyeki bwa Sitaane n’abantu nibwija kuremerwa kimwe, reero bwanyima bwihweho. Obutegyeki bwa Ruhanga kurabira omu Bukama bwe oburikutegyekwa Mesia nibwija kusingura. Abeesigwa nibaija kuba boorekire gye ngu abantu nibabaasa kuguma bari abeesigwa ahari Ruhanga, kandi barikushagika obutegyeki bwe. (Isaaya 45:23, 24) Nitwenda kuba bamwe aha beesigwa aba? Eego buzima! N’ahabw’ekyo, twine kwetegyereza oku enshonga egi eri nkuru.

6. Yehova okuba ohikire kutegyeka ni kikuru kita?

⁶ Okushagika Yehova ohikire kutegyeka ni kikuru munonga okukira okushemererwa kwaitu. Kwonka ekyo tikirikumanyisa ngu okujunwa kwaitu ti kukuru nari ngu Yehova tarikutufaho. Ekyo nitukimanya tuta?

7, 8. Ruhanga kutandika kutegyeka nikiija kutugasira kita?

⁷ Yehova naakunda abantu munonga. Nangwa, turi ab’omuhendo munonga ahariwe ahabw’okugira ngu akahayo Omwana we ngu tutungye amagara agatahwaho. (Yohaana 3:16; 1 Yohaana 4:9) Kuri Yehova atarahamiire aha kiraganiso kye ekirikukwata aha biro byaitu by’omumaisho, Sitaane na boona abarikutuhakanisa bakaabaire bahikire. Sitaane naagira ngu Yehova n’omubeihi otarikuha abantu ebirungi, kandi ngu naategyeka omu muringo gutari gw’oburingaaniza.  Abarikutuhakanisa nibashekyerera ebiraganiso bya Yehova barikugira bati: “Ku yaaraganiise kwija! Mbwenu arahi? Ahakuba okwiha obu baatatenkuriitwe baagwejegyera, byona bituura nk’oku byabaire biri aha kutandika kw’okuhangwa kw’ensi.” (2 Petero 3:3, 4) Kwonka Yehova naija kuhikiiriza ebi yaaraganiise. Yehova naahamiza kimwe ngu enshonga y’okuba niwe ahikire kutegyeka neija kutwariramu n’okujunwa kw’abantu abarikumworobera. (Shoma Isaaya 55:10, 11.) Obushoboorozi bwa Yehova obw’okutegyeka bwegamiire ahari rukundo. N’ahabw’ekyo nitubaasa kuhamya ngu butoosha naija kuguma naakunda abamuhamiireho, kandi abatware nk’ab’omuhendo.​—Okuruga 34:6.

⁸ Ahabw’okugira ngu Yehova ahikire kutegyeka n’enshonga nkuru, tikirikumanyisa ngu okujunwa kwaitu ti kikuru ahariwe. Yehova naatufaho munonga. Twine kuta omutima aha kirikukira obukuru, kandi tushagikye obutegyeki bwa Yehova.

9. Sitaane akagamba ki ahari Yobu? (Reeba ekishushani aha kutandika.)

⁹ Ni kikuru kugira emiteekateekyere mirungi aha nshonga nkuru ngu Yehova niwe ahikire kutegyeka byona. Eki nitubaasa kukimanya twashoma ebiri omu kitabo kya Yobu, kimwe aha bitabo bya Baibuli ebyabandize kuhandiikwa. Omu kitabo ekyo nitushomamu ngu Sitaane akagira ngu Yobu yaabonabona munonga, naija kwehakana Ruhanga. Nangwa Sitaane akashaba Ruhanga kubonabonesa Yobu. Yehova akaba atarikubaasa kubonabonesa Yobu, kwonka akaikiriza Sitaane kugyeza Yobu, arikumugira ati: “Ebi atungire byona biri omu bushoboorozi bwawe.” (Shoma Yobu 1:7-12.) Ekyakuratsireho, Yobu akafeerwa abaheereza be n’ebintu bye. Bwanyima yaafeerwa abaana be ikumi. Sitaane akakireebekyesa ngu Ruhanga niwe yaareetsireho oburemeezi obwo. (Yobu 1:13-19) Ekindi, Sitaane akarwaza Yobu endwara y’obusaasi bwingi kandi erikunugwa. (Yobu 2:7) Muka Yobu n’abanywani be bashatu bakamugambira ebigambo ebirikucumita, kandi ebirikumumaramu amaani, baayongyera aha busaasi bwe n’amaganya ge.​—Yobu 2:9; 3:11; 16:2.

10. (a) Yobu akooreka ata ngu n’omwesigwa ahari Ruhanga? (b) Ahabw’enki Yobu yaabaire aine kuhaburwa?

¹⁰ Tugire ngu ebi Sitaane yaagambire bikaba bihikire? Ngaaha. N’obu Yobu yaabonaboine munonga, tararugire ahari Yehova. (Yobu 27:5) Kwonka, kumara akaire kakye, Yobu akeebwa ekyabaire kiri kikuru yaatandika kweteekateekaho munonga. Akaguma naagira ngu tihaine kibi eki yaabaire akozire. Ekindi Yobu akateekateeka ngu akaba ashemereire kumanya ahabw’enki yaabaire naabonabona. (Yobu 7:20; 13:24) Buzima nitubaasa kwetegyereza oku Yobu yaabaire naayehurira. Yehova akaba naamanya ngu Yobu aine emiteekateekyere egwire, reero yaamuha obuhabuzi. Ekyo akakikora ata?

11, 12. Yehova akahwera Yobu kwetegyereza ki, kandi Yobu akatwaza ata?

¹¹ Nitubaasa kushoma ebi Yehova yaagambiire Yobu shuura 38 kuhika Yobu shuura 41 omu kitabo kya Yobu. Yehova tarashoboororoire Yobu ahabw’enki yaabaire naabonabona. Omu mwanya gw’ekyo, Yehova akaba naayenda kuhwera Yobu kwetegyereza ngu tarikubaasa kwingana nawe. Akegyesa Yobu  ngu hakaba hariho enshonga nkuru munonga okukira oburemeezi bwe. (Shoma Yobu 38:18-21.) Yehova akahwera Yobu kuhindura aha miteekateekyere ye.

¹² Mbwenu shi kikaba kitari kikorwa ky’embabazi Yehova kugamba na Yobu omu muringo ogwo bwanyima y’ebi yaarabiremu byona? Ngaaha, kandi Yobu nawe tarakiteekateekireho omu muringo ogwo. Yobu akeetegyereza enshonga, kandi yaikiriza obuhabuzi bwa Yehova. Akagira ati: “Nikyo ndikwetamira, nkeeteisiza omu mucuucu n’omu iju.” (Yobu 42:1-6) Ebyo bitakabaireho, omushaija muto orikwetwa Elihu nawe akaba yaahwereire Yobu kuhindura aha miteekateekyere ye. (Yobu 32:5-10) Bwanyima ya Yobu kuhurikiza obuhabuzi bwa Yehova, kandi akahindura aha miteekateekyere ye, Yehova akamanyisa abandi ngu akaba naasiima obwesigwa bwa Yobu.​—Yobu 42:7, 8.

13. Obuhabuzi bwa Yehova bukahwera buta Yobu bwanyima y’okuruga omu buremeezi?

¹³ Obuhabuzi bwa Yehova bukaguma nibuhwera Yobu na bwanyima y’okuruga omu buremeezi bwe. Yehova ‘akaha omugisha ebiro bya Yobu ebya bwanyima okukira eby’okubanza.’ Bwanyima, Yobu ‘akazaara aboojo mushanju n’abaishiki bashatu.’ (Yobu 42:12-14) N’obu Yobu yaabaire naakunda abaana abo, buzima akafeerwa abu yaabaire aine omu kubanza. Kandi naabaasa kuba atarayebirwe ebihikiirizi ebyamubaireho n’eka ye. N’obu bwanyima Yobu yaayetegyereize enshonga ahabw’enki yaabonaboine, naabaasa kuba yaayebuurize ahabw’enki Ruhanga yaikiriize akabonabona munonga. Obu Yobu yaabaire naateekateeka atyo, naabaasa kuba yaijukire ebi Yehova yaamugambiire. Ekyo nikibaasa kuba kyamuhuumuriize kandi kikamuhwera kugira emiteekateekyere mirungi.​—Zaaburi 94:19.

14. Nitwega ki aha byahikire ahari Yobu?

¹⁴ Okuteekateeka aha byahikire ahari Yobu nikibaasa kutuhwera kuhindura emiteekateekyere yaitu, kandi kituhuumurize. Ebiri omu kitabo kya Yobu ni bimwe aha bi Yehova yaahandiikiise “kutwegyesa, ngu tubone kugira amatsiko ahabw’okugumisiriza,  n’ahabw’okuhuumuzibwa Ebyahandiikirwe ebyo.” (Abarooma 15:4) Nikitwegyesa ngu titwine kuteekateeka munonga aha buremeezi bwaitu, ahakuba ekyo nikibaasa kuturemesa kwikiriza Yehova ohikire kutegyeka byona. Nka Yobu, nitushagika Yehova ohikire kutegyeka byona turikuguma turi abeesigwa n’obu twakuba turi omu mbeera zigumire.

15. Twaba twine oburemeezi, obwesigwa bwaitu nibutuhwera buta?

¹⁵ Ebyahikire ahari Yobu nibibaasa kutuhuumuriza ahakuba nibyoreka ngu okuhikwaho oburemeezi tikirikumanyisa ngu Yehova atwiniire ekiniga. Okuhikwaho oburemeezi nikituha akagisha k’okushagika Yehova ohikire kutegyeka. (Enfumu 27:11) Ku turikugumisiriza omu bwesigwa, nitushemeza Yehova, kandi tuhamya amatsiko gaitu g’ebiro by’omumaisho. (Shoma Abarooma 5:3-5.) Ebyahikire ahari Yobu nibyoreka ngu Yehova “aine embabazi nyingi n’okusaasira.” (Yakobo 5:11) Twashagika Yehova ohikire kutegyeka byona naija kutuha ebiconco. Okumanya eki, nikituhwera ‘kugumisiriza omuri byona n’okutaruha, twine okushemererwa.’​—Abakolosai 1:11.

16. Ahabw’enki twine kuguma nitwijuka ngu okushagika Yehova ohikire kutegyeka byona ni kikuru munonga?

¹⁶ N’amazima nikibaasa kutugumira kuta omutima aha kushagika Yehova ohikire kutegyeka byona twaba twine oburemeezi. N’oburemeezi bukye nibubaasa kureebeka nk’obw’amaani twabuteekateekaho munonga. N’ahabw’ekyo twine kuguma nitweijutsya ngu ni kikuru kushagika Ruhanga ohikire kutegyeka byona, n’obu twakuba twine oburemeezi bwa muringo ki.

17. Okugira bingi by’okukora omu buheereza bwa Yehova nikituhwera kita kuta omutima aha nshonga nkuru?

¹⁷ Okugira bingi by’okukora omu buheereza bwa Yehova nikutuhwera kwijuka ekikuru munonga. Nk’eky’okureeberaho, munyaanyazi-itwe orikwetwa Renee akatunga endwara y’okusharara, akaba aine  obusaasi bwingi, kandi akaba aine n’ekookoro. Ku yaabaire ari omu irwariro, akabuurira abaabaire nibakoramu, abarwaire abandi, n’abagyenyi. Hariho obu Renee yaamara saabiiti ibiri n’ekicweka omu irwariro, reero akabuurira eshaaha 80. N’obu Renee yaabaire naamanya ngu naaza kufa, tarayebirwe ekyabaire kiri kikuru munonga. Okushagika Yehova ohikire kutegyeka byona, kukamuha obusingye.

18. Ebyahikire ahari Jennifer nibitwegyesa ki aha kushagika Yehova ohikire kutegyeka byona?

¹⁸ Nitubaasa kushagika obushoboorozi bwa Yehova twaba nituhikwaho oburemeezi. Munyaanyazi-itwe orikwetwa Jennifer akamara ebiro bishatu aha kishaayi ky’enyonyi ategyereize enyonyi kumutwara owaabo. Ku baagumire nibashazamu orugyendo rwe, Jennifer akahurira yaaruha kandi yaagira eihamba. Akaba naabaasa kugira enaku. Kwonka omu mwanya gw’ekyo, Jennifer akashaba Yehova ngu amuhwere kubuurira amakuru marungi abantu abandi abaabaire bategyereize aha kishaayi ky’enyonyi. Ekyarugiremu akabuurira abantu baingi, kandi yaagaba n’ebitabo bingi. Jennifer akagira ati: “Nkareeba ngu Yehova naampa emigisha n’obu ndaabe naabaire ndi omu mbeera egumire kandi akampa amaani maingi kutwara eiziina rye nk’ery’omugasho.”

19. Abaheereza ba Yehova ab’amazima nibamanyirwa ahari ki?

¹⁹ Abaheereza ba Yehova nibo bonka abarikwetegyereza obukuru bw’okushagika Yehova ohikire kutegyeka. Okwetegyereza okwo nikwo kurikubataanisaho nk’abaheereza ba Ruhanga ab’amazima. N’ahabw’ekyo buri omwe ahariitwe aine kureeba ngu yaaguma naashagika Yehova ohikire kutegyeka byona.

20. Yehova naatwara ata ebi orikukora byona kumushagika ohikire kutegyeka byona?

²⁰ Yehova naareeba kandi asiima ebi orikukora kumushagika ohikire kutegyeka byona, orikumuheereza omu bwesigwa, kandi orikugumisiriza oburemeezi. (Zaaburi 18:25) Ekicweka ekirikukurataho nikiza kwongyera kushoboorora ahabw’enki oshemereire kushagika Yehova ohikire kutegyeka n’oku orikubaasa kwongyeramu amaani.