1, 2. Yehova naatuhuumuriza ata omu busaasi bwaitu, kandi naaturaganisa ki omu Kigambo kye?

OW’EISHE-EMWE omutsigazi otakagiire omu bushwere akateekateeka aha 1 Abakorinso 7:28, aharikugira ngu abo abarikuza omu bushwere nibaija kugira “obusaasi omu mubiri.” Ow’eishe-emwe ogwo akabuuza omureeberezi okuzire ati: “Ni ‘busaasi’ ki obu, kandi ku ndashwere nimbaasa kubwemera nta?” Omureeberezi atakagarukiremu ekibuuzo ekyo, akagambira ow’eishe-emwe kuteekateeka aha bigambo bya Paulo ebirikugira biti: Yehova ni “Ruhanga ow’okuhuumuza kwona, otuhuumuza omu busaasi bwaitu bwona,” nari omu buremeezi bwaitu byona.​—2 Abakorinso 1:3, 4.

² Nitumanya ngu Yehova, Tataitwe, naatukunda, kandi naatuhuumuriza twahikwaho embeera zigumire. Shana obundi noijuka obu Yehova yaakushagika, kandi akakuhabura arikukoresa Ekigambo kye. Nitubaasa kugira obuhame ngu naatwendeza ebirungi, nk’oku yaabaire naabyendeza abaheereza be aba ira.​—Shoma Yeremia 29:11, 12.

3. Nituza kugarukamu bibuuzo ki omu kicweka eki?

 ³ Butoosha, nikitworobera kugumisiriza oburemeezi obu twine twaba nitumanya eki bureetsire. Mbwenu shi ahabw’enki turikubaasa kugira oburemeezi omu bushwere nari omu maka gaitu? Kandi ni by’okureeberaho ki ebya ira n’eby’obunaku obu ebirikubaasa kutuhwera kuhuumurizibwa? Ka tugarukyemu ebibuuzo ebi, kandi tureebe oku turikubaasa kugumisiriza oburemeezi.

4, 5. Omushaija n’omukazi we nibabaasa kuhikwaho busaasi ki?

⁴ Bwanyima ya Yehova kuhanga omukazi w’okubanza, akamureetera omushaija, yaaba omukazi we. Reero Yehova yaagira ati: “Nikyo omushaija aritsigiraho ishe na nyina, akaguma n’omukazi we; bombi bakaba omubiri gumwe.” (Okutandika 2:24) Twena abariho obunaku obu tituhikiriire. (Abarooma 3:23) Ahabw’enshonga egi, omushaija n’omukazi ku barikutaaha omu bushwere, nibaba nibamanya ngu obumwe nibaija kugira oburemeezi. Nk’eky’okureeberaho, omukazi yaaba atakagiire omu bushwere, obundi naaba naayorobera abazaire be. Kwonka Ekigambo kya Ruhanga nikigira ngu bwanyima y’obushwere, omushaija naaba omutwe gw’omukazi we. (1 Abakorinso 11:3) Omu kubanza, omushaija nikibaasa kumugumira kuha omukazi we obuhabuzi. Kandi n’omukazi nawe naabaasa kugumirwa kworobera obuhabuzi bwa iba nk’oku yaabaire naayorobera abazaire be. Kandi bombi ku barikutaaha omu bushwere, nibabaasa kugira obutaikirizana n’abanyabuzaare ab’embaju zombi, kandi eki nakyo nikibaasa kureetaho oburemeezi.

⁵ Teekateeka n’oku omushaija n’omukazi we barikubaasa kwehurira baamanya ngu nibaza kuzaara omwana. N’obu ekyo kirikubaasa kubashemeza munonga, butoosha nikibareetera n’okwerarikirira. Nibabaasa kwebuuza yaaba enda neija kuzaarwa gye, kandi nibabaasa n’okwerarikirira aha magara g’omwana. Kandi nibaba nibamanya ngu enshohoza yaabo neeza kweyongyera. Omwana yaazaarwa, abashweraine nibaba baine kukora empindahinduka ezindi. Omukazi hati naabaasa kumara obwire bwingi arikureeberera omwereere we. N’ahabw’ekyo omukazi na iba nibabaasa kutafaanaho nk’omu kubanza. Ishe omwana naabaasa kugira obujunaanizibwa bwingi. Aine kureeba ngu omukazi we n’omwana waabo baatunga ebirikwetengyesa.

6-8. Abari omu bushwere nibabaasa kwehurira bata baaba batarikubaasa kuzaara abaana?

⁶ Abari omu bushwere abamwe baine obusaasi bw’omuringo ogundi. Nibabaasa kuba nibendera kimwe kuzaara abaana, kwonka beeshanga batarikubaasa. Omukazi ku arikubura kugira enda, naabaasa kugira obusaasi bwingi. (Enfumu 13:12) Ira, kikaba kiri kikuru munonga abakazi kuza omu bushwere bakazaara abaana. Niyo nshonga ahabw’enki Rakeeli, muka Yakobo, yaagizire obusaasi bwingi munonga ahabw’okutagira enda n’obu mukuru we yaabaire arikubaasa kuzaara. (Okutandika 30:1, 2) Omu mahanga agamwe, baingi nibateekateeka ngu ni kikuru kugira abaana baingi. Butoosha abantu nibabuuza abamiisani abarikutuura omu mahanga  gaabo ahabw’enki bataine mwana weena. N’obu Abamiisani barikushoboorora gye, abamwe nabwo nibagira bati: “Bambi, nituza kubashabira!”

⁷ Teekateeka aha ky’okureeberaho ekindi. Munyaanyazi-itwe kuruga England akaba atwire naayenda kugira abaana. Ku yaamanyire ngu tarikubaasa kuzaara abaana omu nsi egi embi, akeehurira yaarimbagirirwa. Bwanyima we n’omushaija we bakacwamu kworora omwana otari waabo. Kwonka nabwo akaguma aine amaganya kumara obwire. Akagira ati: “Nkaba nimmanya ngu okworora ow’abandi tikiri nk’okworora ou nyezaariire.”

⁸ Baibuli neegira ngu omukazi aryarindwa gye kurabira omu kuzaara abaana. (1 Timoseo 2:15) Kwonka eki tikirikumanyisa ngu naija kutunga amagara agatahwaho ahabw’okugira abaana. Mbwenu shi, omushororongo ogu nigumanyisa ki? Omukazi naareeberera abaana n’eka ye. Ekyo nikibaasa kumuhwera kwerinda ebintu bibi nk’orugambo nari okwejumba omu bitarikumukwataho. (1 Timoseo 5:13) Kwonka nabwo, naabaasa kugira oburemeezi omu bushwere bwe n’omu ka ye.

9. Ni busaasi ki obundi obu abari omu bushwere barikubaasa kugira?

⁹ Obundi obusaasi obu abari omu bushwere abamwe barikutunga n’okufeerwa abu bari nabo omu bushwere. N’obu bamwe baraabe baabaire nibateekateeka ngu eki tikirikubaasa kubahikaho, bagumisiriize embeera egi egumire. Abakristaayo abaine amaka nibaikiririza omu kiraganiso ky’okuzooka, kandi eki nikibagaruramu amaani. (Yohaana 5:28, 29) Omu nsi egi, Tataitwe, Yehova, aturaganiise bingi ebirikutugaruramu amaani omu mbeera ezigumire. Hati ka tureebe oku bamwe aha baheereza ba Yehova batungire okuhuumurizibwa n’oku bahwereirwe.

10. Hanna akahuumurizibwa ata? (Reeba ekishushani aha kutandika.)

¹⁰ Teekateeka aha kyahikire ahari Hanna, muka Elukaana. Akaba naayenda ngu azaare abaana kwonka akaba atarikubaasa. Kwonka, muka iba, Penina, akaba aine abaana baingi. (Shoma 1 Samueli 1:4-7.) Ekibi munonga, Penina akaba naakiniika Hanna “buri mwaka” ahabw’enshonga egi. Ekyo kikashaasha Hanna munonga. Mbwenu shi akakora ki kubaasa kuhuumurizibwa? Akashaba Yehova. Hanna akaza n’omu mwanya gwa Yehova kuramya n’okushaba kumara obwire buraingwa. Akashaba Yehova kumuha omwana, kandi akamwesiga ngu naija kumuhwera. Hanna ku yaaherize kushaba, akatunga obugwagye kandi “tiyaagaruka kureebwa aine enaku.” (1 Samueli 1:12, 17, 18) Akaba naamanya ngu Yehova naija kumuha omwana nari amuhuumurize omu muringo ogundi.

11. Okushaba nikubaasa kutuhuumuriza kuta?

¹¹ Ahabw’okugira ngu tituhikiriire, kandi nitutuura omu nsi ya Sitaane, nituhikwaho  oburemeezi. (1 Yohaana 5:19) Kwonka twine obuhwezi. Nitubaasa kushaba Yehova, “Ruhanga ow’okuhuumuza kwona.” Ekyo nikyo Hanna yaakozire. Akagambira Yehova oku yaabaire naayehurira, kandi yaamweshengyereza kumuhwera. Omu muringo nigwo gumwe, twahikwaho oburemeezi, tushemereire kukora ekirikukira aha kugambira Yehova oburemeezi bwaitu. Twine kumweshengyereza kutuhwera kandi tukamugambira nk’oku turikwehuurira.​—Abafilipi 4:6, 7.

12. Niki ekyahwereire Anna kushemererwa n’obu araabe yaabaire aine oburemeezi?

¹² Nitubaasa kuhurira twine obusaasi bwingi ahabw’okugira ngu titwine baana, nari ahabw’okugira ngu tufeereirwe omukundwa waitu. Kwonka nabwo nitubaasa kutunga okuhuumurizibwa. Yetegyereze ekyahikire ahari Anna, owaabaire ariho omu bwire bwa Yesu. Bwanyima y’okumara emyaka mushanju yonka omu bushwere, iba akafa. Kandi nikireebeka ngu naabaasa kuba yaabaire ataine mwana weena. Kwonka niki ekyamuhweraire? “Omukazi ogwo akaba ataruga omuri hekalu.” Nangwa n’obu Anna yaabaire aine emyaka 84 y’obukuru, akaguma naaza omu hekalu kushaba n’okuramya Yehova. (Luka 2:37) Ekyo nikyo kyamuhuumuriize, kandi kikamuhwera kuguma ashemereirwe n’obu araabe yaabaire aine oburemeezi.

13. Abanywani abaabuzima nibabaasa kutuhuumuriza bata abanyabuzaare baitu baatureebya?

¹³ Nitubaasa n’okuhuumurizibwa abanywani abu twine omu kibiina. (Enfumu 18:24) Paula akaba aine emyaka etaano y’obukuru obu nyina yaarekyera aho kuheereza Yehova. Paula akaba aine enaku, kandi buri kimwe kikaba kimugumiire. Kwonka munyaanyazi-itwe payoniya orikwetwa Ann akamugaruramu amaani, kandi yaayoreka ngu naamufaho. Paula naashoboorora ati: “N’obu ndaabe naabaire ntaine buzaare na Ann, akanyoreka rukundo kandi yaampwera munonga. Eki kikampwera kugumizamu nimpeereza Yehova.” Bwanyima, nyina wa Paula akagaruka omu kibiina, kandi eki nikireetera Paula okushemererwa.  Ann nawe ashemereirwe munonga ahabw’okugira ngu akahwera Paula kugumizamu naaheereza Yehova.

14. Nitugasirwa tuta ku turikuhuumuriza abandi?

¹⁴ Ku turikwejumba omu kukorera abandi ebirungi, nitukira kwebwa oburemeezi obu twine. Nk’eky’okureeberaho, banyaanyazi-itwe baingi, abari omu bushwere nari abataburimu, nibamanya ngu ku barikugaaniira n’abandi aha makuru marungi g’Obukama, nibaba nibakora na Yehova, kandi barikukora ebi arikukunda. Eki nikibareetera okushemererwa. Kandi, twena nitubaasa kworeka ngu nitufa aha bandi turikubagambira amakuru marungi. Kandi ku turikukorera ab’eishe-emwe na banyaanyazi-itwe ebirungi, nitubairira haihi. (Abafilipi 2:4) Ekyo nikyo entumwa Paulo yaakozire. Akaba naafayo aha bandi “nk’oku omurezi arera abaana be.” Kandi  akahuumuriza ab’eishe-emwe kandi yaabahiga “nk’oku omushaija ahana abaana be.”​—Shoma 1 Abatesalonika 2:7, 11, 12.

15. N’oha oine obujunaanizibwa bw’okwegyesa abato ahari Yehova?

¹⁵ Nitubaasa kuhuumuriza tuta amaka agari omu kibiina? Obumwe, abasya nibabaasa kutushaba kubahwera kwegyesa abaana baabo ebirikukwata ahari Yehova, nari obumwe n’okubeegyesa Baibuli. Baibuli neeyoreka ngu Yehova naaha abazaire obujunaanizibwa bw’okwegyesa n’okutendeka abaana baabo. (Enfumu 23:22; Abaefeso 6:1-4) N’obu omu mbeera ezimwe abandi barikubaasa kuhwera, ni kikuru munonga abazaire kuba nibo baayegyesa abaana baabo. Abazaire baine kuguma nibagaaniira n’abaana baabo butoosha.

16. Twine kwijuka ki twaba nituhwera abaana batari baitu?

¹⁶ Omuzaire ku arikutushaba kwegyesa omwana we Baibuli, ni kirungi kwijuka ngu titwine bushoboorozi nk’obw’omuzaire. Obumwe nitubaasa kwegyesa abaana abu abazaire baabo batari mu mazima. Ku turikwegyesa abaana abatari baitu, nikibaasa kuba eky’obwengye kubeegyeseza omu maka gaabo abazaire baabo bariho, nari shi haaba hariho Omujurizi wa Yehova okuzire omu by’omwoyo, nari obeegyeseze ahu abantu bari. Omu muringo ogu, titurikwija kureetera abantu kututeekateekaho ebitahikire. Kandi haahinguraho obwire, obundi abazaire nibabaasa kweyegyeseza abaana baabo ebirikukwata ahari Yehova.

17. Abaana nibabaasa kuhuumuriza bata ab’omu maka gaabo?

¹⁷ Abato abeegire kukunda Yehova nibabaasa kuhiga ab’omu maka gaabo kandi babahuumurize. Mu muringo ki? Barikuha abazaire baabo ekitiinisa, kandi bakakora n’amaani kubahwera omu miringo erikureebwa. Kandi, abaana ku barikuguma bari abeesigwa ahari Yehova, eki nikigaruramu amaani eka yoona. Omwegyemure gutakaizire, Lameka akaba naramya Yehova. Akagamba aha mutabani Noa ati: “Ogu niwe aritutambira enaku ezi turikureeba omu mirimo n’okufa kubi nitukoresa emikono yaitu, ebirikuruga omu itaka eri Mukama yaakyeenire.” Obunabi obwo bukahikirizibwa bwanyima y’Omwegyemure obu Yehova yaiha omukyeeno aha itaka. (Okutandika 5:29; 8:21) Obunaku obu, abaana abarikuguma bari abeesigwa ahari Yehova nibabaasa kuhuumuriza ab’omu maka gaabo. Nibabaasa kuhwera buri omwe omu ka kugumisiriza oburemeezi hati n’omumaisho.

18. Niki ekirikubaasa kutuhwera kugumisiriza n’obu twakuba twine oburemeezi?

¹⁸ Abaheereza ba Yehova obunaku obu nibahuumurizibwa kurabira omu kushaba, okuteekateeka aha by’okureeberaho by’omu Baibuli, n’okugira omukago murungi n’ab’eishe-emwe. (Shoma Zaaburi 145:18, 19.) Nitumanya ngu Yehova butoosha ayeteekateekire kutuhuumuriza, kandi naija kutuhwera kugumisiriza oburemeezi bwona obu turikutunga!