Sulemaani ishe wa Rehoboamu, akaba ari omugabe wa Israeli kumara emyaka 40. (1 Abagabe 11:42) Sulemaani ku yaafiire, omutabani Rehoboamu akaruga Yerusaalemu yaaza Shekemu kwemekwa nk’omugabe. (2 Obusingye 10:1) Mbwenu shi akaba atiinire kuhungurira ishe? Sulemaani akaba naamanywa ahabw’okugira obwengye bwingi. Rehoboamu akaba aine kworeka ku araabe aine obwengye bw’okushoboorora oburemeezi bw’amaani.

Ahabw’okugira ngu Abaisraeli bakaba nibatwarizibwa kubi, bakoohereza abashaija kugambira Rehoboamu eki baabaire nibenda ngu akore. Bakamugira bati: “Sho akongyera oburemeezi aha kutegyekwa kwaitu. Mbwenu otutuubize aha mirimo erikurusya, ei sho yaabaire atukoresa, n’aha buremeezi bw’okutegyeka kwe, naitwe nitwija kukuheereza.”​—2 Obusingye 10:3, 4.

Rehoboamu akaba atarikwija kworoberwa kucwamu. Kuri noogira ngu akakora eki abantu baabaire nibenda, we n’eka ye n’abandi omu kikaari bakaba batarikwija kutunga ebintu ebi baabaire nibaheebwa byona. Kandi kuri yaayangire kukora eki abantu baamushabire bakaba nibaija kumugomera. Akacwamu ki? Akabanza kwehanuuza aha bakuru abaabaire nibahwera ishe. Bakamugira ngu akore eki abantu bamushabire. Kwonka bwanyima akeehanuuza aha b’orwingano rwe, kandi yaacwamu kutwariza kubi abantu. Akagambira abantu ati: “Tata akabeekoreza omugamba guremeire, kwonka nyowe niinyija kukizaho; akabateeza enkoba, kwonka nyowe niinyija kubateeza skorupio.”​—2 Obusingye 10:6-14.

Eki nikitwegyesa ki? Obunaku obu, twine abakuzire omu myaka kandi abaheereize Yehova kumara emyaka mingi abarikubaasa kutuhwera kucwamu gye. Ka tube abanyabwengye tubahurikize.​—Yobu 12:12.

Rehoboamu akarundaana eihe rye kurwanisa abagomi. Kwonka Yehova akoohereza nabi Shemaaya kubagambira ati: “Mutahurura, n’obu kwakuba  okurwanisa beene waanyu Abaisraeli. Buri muntu agarukye omu ka ye, ahakuba ekintu eki niinye kirugireho.”​—1 Abagabe 12:21-24. *​—Reeba obugambo obw’ahansi.

Mbwenu shi kikaba kyorobi Rehoboamu okworobera Yehova? Abantu bakaba nibaija kuteekateeka ki aha mugabe waabo omusya? Akaba yaabagambiire ngu naija ‘kubateeza enkoba,’ kwonka hati tihaine eki yaabaire naija kukora abagomi abo. (Gyeragyeranisa na 2 Obusingye 13:7.) Oyihireho eki abantu baabaire nibaija kumuteekateekaho we n’eihe rye, ‘baakahurira ekigambo kya Mukama, baagaruka omuka,’ nk’oku Yehova yaabaire abagambiire.

Eki nikitwegyesa ki? N’eky’obwengye kworobera Ruhanga n’obu abantu baakutujuma. Ruhanga naija kutuha emigisha twamworobera.​—Eky’Ebiragiro 28:2.

Rehoboamu akatunga migisha ki ahabw’okworobera Ruhanga? Akaguma ari omugabe w’enganda za Yuda na Benyamiini, kandi akombeka n’endembo ezindi ensya omu bicweka ebyo. Akoongyera kuhamya n’endembo ezindi “yaazihindura ez’amaani.” (2 Obusingye 11:5-12) Ekirikukirayo obukuru, akoorobera ebiragiro bya Yehova kumara akaire. Ahabw’okugira ngu enganda ezindi ikumi zikatandika kuramya ebishushani, baingi bakaba baija omuri Yerusaalemu kushagika Rehoboamu n’okuramya okw’amazima. (2 Obusingye 11:16, 17) Ahabw’okworobera Yehova, obugabe bwe bukongyera kuhama.

Obugabe bwa Rehoboamu ku bwahamire, akakora ekintu ky’obushema. Akarekyera aho kworobera ebiragiro bya Yehova yaatandika kuramya baaruhanga b’ebishuba. Ahabw’enki? Mbwenu shi nyina Omwamonikazi niwe yaamureeteire kucwamu atyo? (1 Abagabe 14:21) Eki titurikukimanya, kwonka eihanga ryona rikamutooreza. N’ahabw’ekyo Yehova akaikiriza omugabe Shishaki owa Misri kuhamba endembo nyingi omuri Yuda. Eki kikabaho n’obu Rehoboamu yaabaire yaahamize endembo ezo!​—1 Abagabe 14:22-24; 2 Obusingye 12:1-4.

Embeera ekeyongyera kuba mbi obu Shishaki n’eihe rye baija kutaahirira Yerusaalemu, ahu Rehoboamu yaabaire naategyeka. Omu kaanya ako, nabi Shemaaya akooherezibwa Ruhanga kugambira Rehoboamu n’abanyiginya be ati: “Ondugireho, mbwenu naanye naakurekurira Shishaki.” Rehoboamu akatwara ata obuhabuzi obu? Baibuli neegarukamu eti: “Abategyeki ba Israeli n’omugabe baayecureeza, nibagira bati: Mukama niwe ahikiriire.” N’ahabw’ekyo, Yehova akacungura Rehoboamu na Yerusaalemu.​—2 Obusingye 12:5-7, 12.

Bwanyima y’ekyo, Rehoboamu akagumizamu naategyeka obugabe bwa Yuda. Atakafiire akaha batabani be ebiconco bingi. Obundi, akakora eki kugira ngu batakaagomera mwene ishebo orikwetwa Abiya ou yaabaire naayenda kuhindura omugabe. (2 Obusingye 11:21-23) Omu muringo ogu, Rehoboamu akatwaza omu muringo gw’obwengye okukira obu yaabaire ari muto.

N’obu Rehoboamu araabe aine ebirungi ebi yaakozire, Baibuli neeyoreka ngu: “Akakora kubi.” Ahabw’enki? Ahabw’okuba ‘tarataire omutima aha kusherura’ Yehova. Eki tikiraashemeize Yehova.​—2 Obusingye 12:14.

Ebi Rehoboamu yaarabiremu nibitwegyesa ki? Obumwe akaba ayorobera Ruhanga. Kandi haine n’ebintu birungi ebi yaakoreire abaheereza ba Ruhanga. Kwonka akaba ataine mukago guhami na Yehova, kandi akaba atarikufayo kumushemeza. N’ahabw’ekyo, akaremwa kuhamira aha kihikire yaatandika kuramya baaruhanga b’ebishuba. Noobaasa kwebuuza oti: ‘Mbwenu shi obu Rehoboamu yaayorobera Yehova, akakikora ayihire aha mutima kwenda kumushemeza? Nari akakikora ahabw’abandi kumugambira eky’okukora?’ (2 Obusingye 11:3, 4; 12:6) Bwanyima akagaruka yaatwaza kubi. Akaba naataanira kimwe n’omugabe Daudi owaabaire ari Ishenkuru. N’amazima Daudi aine ebibi ebi yaakozire. Kwonka akeeteisiza kimwe enshobe ezi yaakozire. Kandi akaba naakunda Yehova n’okuramya okw’amazima.​—1 Abagabe 14:8; Zaaburi 51:1, 17; 63:1.

 Haine bingi ebi turikubaasa kwega omu ky’okureeberaho kye. Ni kirungi abantu kureeberera ab’omu maka gaabo, kandi bakakorera abandi ebirungi. Kwonka kubaasa kusiimwa Yehova, twine kumuramya omu muringo ogu arikusiima, kandi twine kugira omukago guhami nawe.

Eki nitubaasa kukikora twaba nitukundira kimwe Yehova. Nk’oku omuriro gwine kuguma nigwongyerwamu enku kubaasa kuguma nigwaka, twine kweyegyesa Baibuli butoosha, tugiteekateekyeho, kandi tugume nitushaba, kubaasa kuguma nitukunda Ruhanga. (Zaaburi 1:2; Abarooma 12:12) Rukundo egi neija kutuhiga kworobera Yehova omuri byona ebi turikukora. Kandi eki nikiija kutuhiga kweteisiza kimwe n’okushaba Yehova kutusaasira bwanyima y’okukora enshobe. Nikiija kuturinda kutaba nka Rehoboamu kandi tukaguma turi abeesigwa omu kuramya okw’amazima.​—Yuda 20, 21.