1. Ni kintu ki ekirikutureetera kuba ab’omuhendo kukira enyamaishwa?

YEHOVA akaha abantu ekintu ky’omutaano. Akatuha omuntu w’omunda. Eki nikyo kirikutureetera kuba ab’omuhendo kukira enyamaishwa. Nitumanya tuta ngu Adamu na Haawa bakaba baine omuntu w’omunda? Bwanyima y’okugomera Ruhanga, bakamweshereka. Omuntu waabo w’omunda akaba naabashinja.

2. Omuntu waawe w’omunda naashushana ata na kampasi? (Reeba ekishushani aha kutandika.)

² Omuntu w’omunda n’enyehurira erikutuhwera kutaanisa ekihikire n’ekigwire erikutwebembera omu bi turikukora. Ogwo oine omuntu w’omunda otarikukora gye, naaba ari nk’emeeri eine kampasi efiire. Omuyaga n’ebingonzi by’enyanja nibibaasa kuhabisa emeeri egyo. Kwonka kampasi yaaba neekora gye, neehwera omuvugi w’emeeri kuguma omu muhanda oguhikire. Nikyo kimwe, twatendeka omuntu waitu w’omunda, naabaasa kutuhabura gye.

3. Niki ekirikubaasa kubaho twaba tutatendekire gye omuntu waitu ow’omunda?

³ Twaba tutatendekire gye omuntu waitu w’omunda, tarikwija  kuturabura twaba nituza kukora ekitahikire. (1 Timoseo 4:1, 2) Naabaasa n’okutuhamiza ngu ‘ekibi ni kirungi.’ (Isaaya 5:20) Yesu akagambira abeegi be ati: “Obunaku buryahika, omuntu weena oribaita aryateekateeka ngu naakorera Ruhanga.” (Yohaana 16:2) Abaitsire Stefano nikwo baabaire nibateekateeka batyo. (Ebyakozirwe 6:8, 12; 7:54-60) Omu byafaayo byona, abanyadiini baingi, batwire nibakora ebihagaro, nk’okwita, reero bagira ngu nibaita omu iziina rya Ruhanga. Kwonka omu mazima, nibaba nibakora ekirikutaana n’ebiragiro bya Ruhanga. (Okuruga 20:13) Hatariho kubangaanisa, omuntu waabo w’omunda naaba atarikubahabura gye!

4. Nitubaasa kuhamya tuta ngu omuntu waitu w’omunda naakora gye?

⁴ Mbwenu shi nitubaasa kuhamya tuta ngu omuntu waitu w’omunda naakora gye? Ebiragiro n’emisingye ebiri omu Baibuli “biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira.” (2 Timoseo 3:16) Twine kwega Baibuli obutoosha, tuteekateekye munonga aha bi erikugamba, kandi tubigyendereho omu magara gaitu. Omu muringo ogu, nitwija kwega kugira emiteekateekyere nk’eya Yehova. Reero obwo, nitubaasa kuhamya ngu omuntu waitu w’omunda naija kutwebembera gye. Ka tushwijume oku turikubaasa kukoresa ebiragiro bya Yehova n’emisingye ye kutendeka omuntu waitu w’omunda.

5, 6. Ebiragiro bya Ruhanga nibituhwera bita?

⁵ Twaba nitwenda ngu ebiragiro bya Ruhanga bituhwere, twine kukora ekirikukira aha kubishoma nari okubimanya bumanya. Twine kubikunda kandi tukabiha ekitiinisa. Baibuli neetugira eti: “Mwangye ebibi mukunde ebirungi.” (Amosi 5:15) Kwonka shi eki nitubaasa kukikora tuta? Twine kwega kureeba ebintu nk’oku Yehova arikubireeba. Kiteekateekyeho omu muringo ogu. Ka tugire ngu torikubyama gye, kandi omushaho waawe akuragiira kurya eby’okurya birungi, kumanyiiza omubiri gwawe, n’okukora ezindi mpindahinduka omu ku orikutwaza. Okuratira obuhabuzi bwe kandi bukora! Noija kutwara ota obuhabuzi bw’omushaho obwo?

⁶ Omu muringo nigwo gumwe, Omuhangi waitu atuhaire ebiragiro kuturinda kwetantara ebibi ebirikuruga omu kibi n’okutuhwera kugira amagara marungi. Nk’eky’okureeberaho, Baibuli neetwegyesa ngu titwine kubeiha, kwiba, kuryangatanisa, kushambana, kuba enshaarizi, nari kwejumba omu by’obufumu. (Shoma Enfumu 6:16-19; Okushuuruurwa 21:8) Twareeba ebirungi ebirikuruga omu kworobera Yehova, nitweyongyera kumukunda n’ebiragiro bye.

7. Eby’okureeberaho by’omu Baibuli nibituhwera bita?

⁷ Titurikwenda kubonabona ahabw’ebirikuruga omu kuhenda ebiragiro bya Ruhanga, reero tukabona kumanya ekihikire n’ekigwire. Nitubaasa kwegyera aha nshobe ezi abandi baakozire ira. Eby’okureeberaho ebi biri omu Baibuli. Enfumu 1:5 nihagira hati: “Omunyabwengye ahurire, ayeyongyere kwega.” Obuhabuzi obu niburuga ahari Ruhanga, kandi nibwo burikukirayo oburungi! Nk’eky’okureeberaho, teekateeka aha ku Daudi yaabonaboine bwanyima y’okugomera Yehova akashambana na Batisheba. (2 Samueli 12:7-14) Waashoma ebyamuhikireho, noobaasa kwebuuza oti: ‘Daudi akaba naabaasa kwetantara ata oburemeezi obu? Nimbaasa  kukora ki naayeshanga omu mbeera nk’egi? Mbwenu shi naayohibwa kushambana ninyija kuba nka Daudi nari nka Yosefu?’ (Okutandika 39:11-15) Twateekateeka n’obwegyendesereza aha bibi ebirikuruga omu kibi, nitwija kuguma nitweyongyera ‘kwanga ebibi reero tukunde ebirungi.’

8, 9. (a) Omuntu waitu w’omunda naatuhwera kukora ki? (b) Omuntu waitu w’omunda aine kakwate ki n’emisingye ya Yehova?

⁸ Nitwirira hare n’ebintu ebi Ruhanga arikwanga. Nitwija kukora ki, twayeshanga omu mbeera kandi omu Baibuli hatarimu ekiragiro ekirikugamba aha mbeera egyo butunu? Nitwija kumanya tuta eki Ruhanga arikwenda ngu tukore? Twaba twikiriize Baibuli kutendeka omuntu waitu w’omunda, nitwija kucwamu omu muringo murungi.

⁹ Ahabw’okugira ngu Yehova naatukunda, atuhaire emisingye erikurinda omuntu waitu w’omunda. Naashoboorora ati: “Niinye Mukama Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.” (Isaaya 48:17, 18) Twateekateeka munonga aha misingye ya Baibuli, kandi tukagiikiriza kutuhika aha mutima, nitubaasa kutereeza omuntu waitu w’omunda. Eki nikituhwera kucwamu omu muringo murungi.

10. Omusingye niki, kandi Yesu akakoresa ata emisingye omu kwegyesa kwe?

¹⁰ Omusingye n’amazima agarikwebembera emiteekateekyere yaitu, reero tukacwamu gye. Okumanya emisingye ya Yehova nikituhwera kwetegyereza oku arikuteekateeka n’enshonga ahabw’enki naatuha ebiragiro ebimwe. Yesu akakoresa emisingye kwegyesa abeegi be ngu emiteekateekyere n’ebikorwa by’abantu haine ebirikurugamu. Nk’eky’okureeberaho, akeegyesa ngu okugira ekiniga nikubaasa kurugamu obushaarizi, kandi ebiteekateeko bibi by’okuteerana nibibaasa kurugamu okushambana. (Matayo 5:21, 22, 27, 28) Twaikiriza emisingye ya Yehova kutuhabura, omuntu waitu w’omunda naija kuba atendekirwe gye, kandi nitwija kucwamu ebirikuhaisa Ruhanga ekitiinisa.​—1 Abakorinso 10:31.

11. Omuntu w’omunda ow’omuntu omwe naabaasa kutaana ata aha w’ondiijo?

¹¹ N’obu Abakristaayo baakutendeka omuntu waabo w’omunda barikukoresa Baibuli, nabwo nibabaasa kucwamu ebitarikushushana aha nshonga emwe. Nk’okunywa amaarwa, Baibuli terikugira ngu kigwire. Kwonka neeturabura ngu titushemereire kunywa amaarwa maingi nari kusinda. (Enfumu 20:1; 1 Timoseo 3:8) Kwonka shi eki nikimanyisa ngu Omukristaayo yaaba atanywaire amaarwa maingi, tihaine ekindi eki aine kuteekateekaho yaaba naacwamu? Ngaaha. N’obu omuntu we w’omunda araabe naamwikiriza kunywa amaarwa, nabwo naaba aine kufayo aha muntu w’omunda ow’abandi.

12. Ebiri omu Abarooma 14:21 nibibaasa kutuhwera bita kuha ekitiinisa omuntu w’omunda ow’abandi?

¹² Paulo akooreka ngu twine kuha ekitiinisa omuntu w’omunda ow’abandi, obu yaagira ati: “Ni kirungi okutarya nyama, nari okunywa viinyo, nari ekintu kyona ekirikuteeza mwene sho entsibo, nari okumugwisa nari okumumaramu amaani.” (Abarooma 14:21) N’ahabw’ekyo n’obu turaabe twine obugabe bw’okunywa amaarwa, nituba tweteekateekire kwefeerereza obugabe obwo twamanya ngu okunywa amaarwa nikubaasa kugwisa kubi omuntu w’omunda ow’abandi. Obundi ow’eishe-emwe naabaasa kuba yaabaire ari omusinzi atakeegire amazima, kandi hati acwiremu kutagaruka kunywa maarwa na kakye. Nituba tutarikwenda kukora ekintu kyona ekirikubaasa kumureetera kugaruka aha mize ye ey’enyima. (1 Abakorinso 6:9, 10) Mbwenu shi twaba tutaayaayiise ow’eishe-emwe ogwo, nitwija kumugyemesereza kunywa amaarwa, n’obu yaakwanga? Ngaaha buzima!

13. Timoseo akaha ata ekitiinisa omuntu w’omunda ow’abandi kubaasa kubahwera kwikiriza amakuru marungi?

¹³ Obu Timoseo yaabaire ari muto, akaikiriza kusharwa n’obu eki kiraabe kyabaire nikireeta obusaasi omu mubiri gwe. Akaba naamanya ngu okusharwa ni kikuru aha Bayudaaya abu yaabaire naaza kubuurira. Timoseo okushushana na Paulo, akaba atarikwenda kugwisa kubi omuntu weena.  (Ebyakozirwe 16:3; 1 Abakorinso 9:19-23) Mbwenu shi naiwe nooyefeerereza kuhwera abandi?

14, 15. (a) Twine kukora ki kukura omu by’omwoyo? (b) Abakristaayo abakuzire nibatwariza bata abandi?

¹⁴ Twena titushemereire kuguma aha ‘by’okubandizaho ebya Kristo’ kureka twine ‘kugumizamu tuhikye aha by’obukuru.’ (Abaheburaayo 6:1) Titurikuhinduka Abakristaayo abakuzire omu by’omwoyo ahabw’okugira ngu tumazire emyaka mingi omu mazima. Nikyetengyesa okukora n’amaani kukura omu by’omwoyo. Twine kugumizamu nitutunguuka omu kumanya n’okwetegyereza. N’ahabw’ekyo, twine kushoma Baibuli buri izooba. (Zaaburi 1:1-3) Waaba nooshoma Baibuli buri izooba, noija kwetegyereza gye ebiragiro bya Yehova n’emisingye ye.

¹⁵ Ekiragiro kikuru eky’Abakristaayo ni kiiha? N’ekirikukwata ahari rukundo. Yehova akagambira abeegi ati: “Ku muriguma nimukundana, nibwo abantu boona baribamanya ku muri abeegi bangye.” (Yohaana 13:35) Rukundo neeyetwa “ekiragiro kya Mukama” kandi neeyetwa ‘n’okuhitsya Ebiragiro.’ (Yakobo 2:8; Abarooma 13:10) Tikirikututangaaza ngu rukundo n’omutwarize mukuru, ahakuba Baibuli neegira ngu ‘Ruhanga ni rukundo.’ (1 Yohaana 4:8) Ahari Ruhanga, rukundo neekira aha kugira enyehurira. Ruhanga naayoreka ngu aine rukundo kurabira omu bikorwa bye. Yohaana akahandiika ati: “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe.” (1 Yohaana 4:9) Twayoreka ngu nitukunda Yehova, Yesu, ab’eishe-emwe, n’abantu abandi, nitworeka ngu turi ab’eishe-emwe abakuzire omu by’omwoyo.​—Matayo 22:37-39.

16. Ku turikuba Abakristaayo abakuzire, ahabw’enki nitweyongyera kutwara emisingye nk’ey’omuhendo?

 ¹⁶ Ku turikweyongyera kuba Abakristaayo abakuzire, nitweyongyera kutwara emisingye nk’ey’omuhendo. Ebiragiro nibiba nibikwata aha mbeera emwe, kwonka emisingye neekwata aha mbeera nyingi. Nk’eky’okureeberaho, omwana muto naaba atarikumanya oku kiri eky’akabi kunywana abantu babi, n’ahabw’ekyo abazaire be baine kutaho ebiragiro kumurinda. (1 Abakorinso 15:33) Kwonka omwana ku arikweyongyera kukura, naayega kugyendera aha misingye ya Baibuli. Emisingye egi neemuhwera kutoorana abanywani barungi. (Shoma 1 Abakorinso 13:11; 14:20.) Ku turikweyongyera kuteekateeka aha misingye ya Baibuli, omuntu waitu ow’omunda naayeyongyera kwesigwa. Nitwetegyereza gye eki Ruhanga arikwenda tukore omuri buri mbeera.

17. Ahabw’enki turikubaasa kugira ngu twine buri kimwe ekirikutuhwera kucwamu gye?

¹⁷ Twine buri kimwe ekirikwetengyesa kubaasa kucwamu ebirikushemeza Yehova. Omu Baibuli, nitushangamu ebiragiro n’emisingye ebirikutuhwera kuba abaine “byona ebishemereire omurimo gwona omurungi.” (2 Timoseo 3:16, 17) Emisingye ya Baibuli neetuhwera kwetegyereza emiteekateekyere ya Yehova. Kwonka twine kuteeraho n’amaani kusherura emisingye egyo. (Abaefeso 5:17) Twine ebirikutuhwera omu kugimanya nka Watch Tower Publications Index, Akatabo k’Okucondooza ak’Abajurizi ba Yehova, Watchtower Library, Raiburare y’aha mukura, na JW Library app. Ebi twabikoresa gye, nitugasirwa omu kweyegyesa n’omu kwega kw’eka.

18. Niki ekirikubaho twagyendera aha biragiro n’emisingye ya Yehova?

¹⁸ Embeera zaitu nizoongyera kushemera twagyendera aha biragiro n’emisingye ya Yehova! Zaaburi 119:97-100 nihagira hati: “Eshi nkunda ebiragiro byawe! Nibyo nsiiba ninteekateekaho eizooba ryona. Ebi aragiira bimpa obwengye oburikukira obw’abazigu bangye; ahakuba biguma naanye obutoosha. Nyine okwetegyereza okurikweshumba okw’abarikuunyegyesa boona; ahakuba ebi waahamize nibyo ntuura ninteekateekaho. Niinyetegyereza okukira abagurusi, ahakuba nyorobera ebi oyegyesa.” Twagira obwire bw’okuteekateeka munonga aha biragiro n’emisingye ya Yehova, nitwongyera kutwaza omu muringo gw’obwengye n’okwetegyereza. Kandi twakoresa ebiragiro bye n’emisingye ye kutendeka omuntu waitu ow’omunda, nitwija kuhika aha ‘rugyero rwa Kristo oruhikire.’​—Abaefeso 4:13.