1, 2. (a) Yesu akashaba ki omu kushaba kwe okw’ahamuheru ari n’entumwa ze? (b) Niki ekirikubaasa kuba kyareeteire Yesu kugamba aha bumwe?

OBU Yesu yaabaire naarya eby’okurya by’ahamuheru n’entumwa ze, akata omutima aha kugira obumwe. Arikushaba nabo, akagira ngu akaba naayenda ngu abeegi be babe omwe, nari bagire obumwe, nk’obu yaabaire aine na Ishe. (Shoma Yohaana 17:20, 21.) Okukwatanisa kw’abeegi ba Yesu kukaba nikwija kuhamiza abandi ngu Yehova niwe yaayohereize Yesu omu nsi. Abantu bakaba nibaija kumanya abeegi ba Yesu ab’amazima ahabw’okukundana, kandi okukundana oku kukaba nikwija kubareetera kwongyera kugira obumwe.​—Yohaana 13:34, 35.

² Nitumanya ahabw’enki Yesu yaagambire aha bumwe ekiro ekyo. Akaba areebire ngu entumwa ze tibarikukwatanisa gye. Nk’eky’okureeberaho, entumwa bakahakana “ngu n’oha omuribo orikuteekateekwaho kuba mukuru,” nk’oku baabaire baakozire enyima. (Luka 22:24-27; Mako 9:33, 34) Eizooba erindi, Yakobo na Yohaana bakashaba Yesu kubaha emyanya mikuru omu Bukama bw’omu iguru aha rubaju rwa Yesu.​—Mako 10:35-40.

3. Niki ekirikubaasa kuba kyabaire nikiremesa abeegi ba Kristo kugira obumwe, kandi nituza kugaaniira ahari bibuuzo ki?

 ³ Okwenda kugira amaani n’obushoboorozi tikyo kyonka ekyaremeise abeegi ba Kristo kugira obumwe. Obunaku obwo, abantu bakaba nibeebaganisamu ahabwa rwango n’okushoroora. Abeegi ba Yesu bakaba baine kusingura enyehurira zigwire ezo. Omu kicweka eki nituza kushwijuma ebibuuzo ebi: Yesu akakora ki ku yaareebire abeegi be nibashoroora abandi? Akahwera ata abakuratsi be kwega kutwariza abandi omu muringo murungi, n’okugira obumwe? Eky’okureeberaho kya Yesu n’ebi yaayegyeise nibiija kutuhwera bita kuguma twine obumwe?

4. Ha eby’okureeberaho ebirikworeka ngu abantu bakaba nibashoroora Yesu.

⁴ Yesu nawe abantu bakamushoroora. Filipo ku yaagambiire Nasanaeli ngu areebire Mesia, Nasanaeli akagira ati: “Noogira ngu omuri Nazareesi nihabaasa kurugamu ekintu kirungi?” (Yohaana 1:46) Nasanaeli naabaasa kuba yaabaire naamanya ngu Mesia naija kuzaarirwa omuri Betelehemu, nk’oku obunabi oburi omu Miika 5:2 bwabaire nibugira. Naabaasa kuba yaateekateekire ngu Nazareesi ti nkuru munonga kuba orurembo orurikurugwamu Mesia. Kandi hakaba hariho Abayudaaya baarurangaanwa abaagayire Yesu ahabw’okugira ngu akaba naaruga Galilaaya. (Yohaana 7:52) Abantu baingi aba Yuda bakaba nibamanya ngu abarikuruga Galilaaya n’ab’ahansi. Abayudaaya abandi bakateeraho kurahura Yesu barikumweta Omusamaria. (Yohaana 8:48) Abasamaria bakaba bari ab’eihanga erindi, bakaba baine ediini eyaabo erikutaana n’ey’Abayudaaya. Abayudaaya n’Abagalilaaya bakaba batarikuha Abasamaria ekitiinisa, kandi bakaba nibabeetantara.​—Yohaana 4:9.

5. Abantu bakashoroora bata abeegi ba Yesu?

⁵ Abeebembezi b’ediini Abayudaaya nabo bakaba nibagaya abakuratsi ba Yesu. Abafarisaayo bakaba nibabeeta ‘abakyeenirwe.’ (Yohaana 7:47-49) Abafarisaayo bakaba nibareeba buri omwe oteegiire omu mashomero g’Abayudaaya kandi otarikukuratira emigyenzo yaabo nk’otaine mugasho, kandi ow’ahansi. (Ebyakozirwe 4:13) Yesu n’abeegi be bakaba nibashoroorwa ahabw’okugira ngu abantu obwire obwo bakaba nibakunda ediini yaabo, ebitiinisa byabo, n’enganda zaabo. Okushoroora oku kukakwata n’aha beegi ba Yesu n’oku baabaire nibareeba abandi. Kubaasa kuguma baine obumwe, bakaba baine kuhindura emiteekateekyere yaabo.

6. Koresa eby’okureeberaho kworeka oku okushoroora kurikubaasa kushiisha emiteekateekyere yaitu.

⁶ Obunaku obu, ensi eijwiremu okushoroora. Abantu nibabaasa kuba nibatushoroora, nari nibashoroora abandi. Munyaanyazi-itwe hati ori Payoniya omuri Australia naagira ati: “Nkongyera kwanga abangyereza ku naagumire ninta omutima aha ku abantu abarikwetwa Aborigino barikutwarizibwa n’oku baatwariziibwe enyima omu muringo gw’obutari buringaaniza.” Kandi rwango ye akeeyongyera  ahabw’okugira ngu abandi bakaba baamutwariize kubi. Ow’eishe-emwe kuruga Canada naagamba oku yaabaire naayehurira ati: “Nkaba ninteekateeka ngu abantu abarikugamba Orufaransa n’ab’ahaiguru munonga.” Naagira ngu ekyarugiremu, akaba atarikukunda abarikugamba Orungyereza.

7. Yesu akatwaza ata aha bikwatiraine n’okushoroora?

⁷ Nk’obu byabaire biri omu bunaku bwa Yesu, abantu hati baine enyehurira z’amaani ez’okushoroora abandi, kandi ezigumire kuhindura. Yesu akakorera ki enyehurira nk’ezo? Eky’okubanza, akaba atarikushoroora abantu. Butoosha akaba atagwera rubaju. Akaba naabuurira abagaiga n’abooro, Abafarisaayo n’Abasamaria, hamwe n’abahooza n’abasiisi. Ekya kabiri, akeegyesa abeegi be kandi kurabira omu ky’okureeberaho kye yaabooreka ngu tibaine kwerarikirira abandi nari kubashoroora.

8. Ni musingye ki ogurikutureetera kugira obumwe? Shoboorora.

⁸ Yesu akeegyesa omusingye mukuru ogu turikwihiriraho kugira obumwe. Akagambira abeegi be ati: “Mwena muri eishe-emwe.” (Shoma Matayo 23:8, 9.) Twena turi ab’eishe-emwe ahabw’okugira ngu twena turi abaana ba Adamu. (Ebyakozirwe 17:26) Yesu akashoboorora ngu abeegi be nabo bakaba bari ab’eishe-emwe ahabw’okugira ngu boona nibeeta Yehova Ishebo ow’omu iguru. (Matayo 12:50) Boona bakaba bahindukire bamwe aha b’omu ka ya Ruhanga bateerainwe rukundo n’okwikiriza. Niyo nshonga ahabw’enki entumwa baabaire nibeeta Abakristaayo abandi ab’eishe-emwe na banyaanyabo omu mabaruha agu baabaire nibahandiikira ebibiina.​—Abarooma 1:13; 1 Petero 2:17; 1 Yohaana 3:13. *​—Reeba obugambo obw’ahansi.

9, 10. (a) Ahabw’enki Abayudaaya baabaire batashemereire kwetunguura ahabw’oruganda rwabo? (b) Yesu akeegyesa ata ngu kigwire kureeba ab’oruganda orundi nk’ab’ahansi? (Reeba ekishushani aha kutandika.)

⁹ Bwanyima ya Yesu kugambira abeegi be ngu baine kwetana ab’eishe-emwe, akooreka ngu baine kuba abacureezi. (Shoma Matayo 23:11, 12.) Nk’oku twaheza kwega, obumwe okwetunguura kukaba nikubaganisamu entumwa. Kandi omu bwire bwa Yesu, abantu bakaba nibeetunguura ahabw’enganda zaabo. Abayudaaya bakaba nibateekateeka ngu nibakira abandi ahabw’okugira ngu bakaba bari abaana ba Abrahamu. Kwonka Yohaana omubatizi akabagira ati: “Ruhanga naabaasa amabaare aga kugaihiramu Abrahamu abaijukuru.”​—Luka 3:8.

¹⁰ Yesu akeegyesa ngu kigwire abantu kwetunguura ahabw’oruganda rwabo. Akakyoreka gye obu omuhandiiki yaamubuuza ati: “Mutaahi wangye n’oha?” Yesu kubaasa kugarukamu ekibuuzo ekyo, akatebya ekitebyo. Omuyudaaya akateerwa abashuma baamureka aha ruguuto. N’obu Abayudaaya bagyenzi be baraabe baamushangire aha muhanda, tibaramuhwereire. Kwonka Omusamaria akamusaasibwa yaamuhwera. Yesu akahendera ekitebyo kye arikugambira omuhandiiki ngu aine kuba nk’Omusamaria ogwo. (Luka 10:25-37) Yesu akooreka ngu Abayudaaya nibabaasa kwegyera aha Musamaria, oku baine kukunda bataahi baabo.

11. Ahabw’enki abeegi ba Yesu baabaire bataine kushoroora abandi, kandi akabahwera ata kwetegyereza enshonga egi?

 ¹¹ Yesu atakagiire omu iguru, akagambira abeegi kubuurira “omuri Yerusaalemu, n’omuri Buyudaaya yoona, n’omuri Samaria,” n’omu bicweka by’ensi ebya hare. (Ebyakozirwe 1:8) Kubaasa kukora ekyo, abeegi ba Yesu bakaba baine kusingura omwetunguuro gwabo n’okushoroora omu bantu. Yesu akaba akira kugamba aha mitwarize mirungi y’ab’amahanga agandi, kandi eki kikatebeekanisa abeegi be kwija kubuurira omu mahanga goona. Nk’eky’okureeberaho, akahimbisa omuserukare omunyaihanga owaabaire aine okwikiriza kw’omutaano. (Matayo 8:5-10) Yesu arikushoboororera abantu omu rurembo rw’owaabo orwa Nazareesi, akooreka oku Yehova yaabaire yaahwereire abanyamahanga, nk’omukazi efaakazi owa Zarefaasi omuri Foiniike, na Naamani Omusiria owaabaire arwaire ebibembe. (Luka 4:25-27) Kandi Yesu akabuurira n’omukazi Omusamaria yaamara n’ebiro bibiri omu tauni ya Samaria ahabw’okugira ngu abantu bakaba nibakunda obutumwa bwe.​—Yohaana 4:21-24, 40.

12, 13. (a) Entumwa bakatwaza bata obu Yesu yaayegyesa omukazi Omusamaria? (Reeba ekishushani aha kutandika.) (b) Niki ekirikworeka ngu Yakobo na Yohaana tibarabaasize kwetegyereza gye eishomo eri Yesu yaabeegyeise?

¹² Kikaba kitoorobi entumwa kusingura omuze gw’okushoroora abandi. Bakatangaara kureeba ngu Yesu naayegyesa omukazi Omusamaria. (Yohaana 4:9, 27) Ahabw’enki? Abeebembezi b’ediini Abayudaaya bakaba batarikugamba n’abakazi omu bantu, n’ahabw’ekyo bakaba batarikubaasa kugamba n’omukazi Omusamaria owaabaire naakora ebibi. Entumwa bakagambira Yesu kurya, kwonka akaba yaaheza kutunga ekigaaniiro kirungi n’omukazi ogu, kyamureetera n’okureeba eby’okurya nk’ebitari bikuru. Kikaba kiri ekigyendererwa kya Ruhanga ngu Yesu abuurire omukazi Omusamaria, kandi eki akakireeba nk’okurya eby’okurya.​—Yohaana 4:31-34.

¹³ Yakobo na Yohaana tibarabaasize kwetegyereza eishomo rikuru eri. Abeegi ku baabaire nibagyenda na Yesu barikuraba omuri Samaria, bakasherura omwanya gw’okuraaramu omu kyaro kya Samaria. Kwonka Abasamaria bakanga kubaikiriza kuraarayo. Yakobo na Yohaana bakagira ekiniga kingi baashaba Yesu ngu abaikirize boohereze omuriro kuruga omu iguru gucwekyereze ekyaro kyona. Yesu akabahana. (Luka 9:51-56) Obundi Yakobo na Yohaana bakaba batarikwija kugira ekiniga ku ogire ngu eki kikabaho omu kicweka ky’owaabo omuri Galilaaya. Bakagira ekiniga obundi ahabw’okugira ngu bakaba nibashoroora omu bantu. Bwanyima, obu Yohaana yaabaire naabuurira Abasamaria kandi baingi bakamuhurikiza, naabaasa kuba yaahemukire ahabw’oku yaatwarize enyima.​—Ebyakozirwe 8:14, 25.

14. Oburemeezi bw’okushoroora bukashoboororwa buta?

¹⁴ Bwanyima ya Pentekoote omu gwa 33, hakabaho oburemeezi bw’okwebaganisamu omu kibiina. Ab’eishe-emwe ku baabaire nibaha efaakazi eby’okurya, baakeehuzya efaakazi ezaabaire nizigamba Orugriika. (Ebyakozirwe 6:1) Eki nikibaasa kuba kyabaireho ahabw’okushoroora orurimi rwabo. Entumwa bakashoboorora oburemeezi obwo ahonaaho. Bakatoorana ab’eishe-emwe abahikire, mushanju kugabura eby’okurya. Ab’eishe-emwe boona abu baatooraine bakaba baine amaziina g’Orugriika, n’ahabw’ekyo nikibaasa kuba kyahuumuriize  efaakazi ezaabaire nizeetomboita.

15. Niki ekyahwereire Petero kwega kutashoroora omuntu weena? (Reeba ekishushani aha kutandika.)

¹⁵ Omu mwaka gwa 36, abeegi ba Yesu bakatandika kubuurira abantu b’amahanga. Omwaka ogu gutakahikire, entumwa Petero akaba atwire naamara obwire bwingi n’Abayudaaya bonka. N’ahabw’ekyo Ruhanga akakyoreka butunu ngu Abakristaayo tibaine kushoroora abandi, kandi Petero akabuurira Koruneelio omuserukare Omurooma. (Shoma Ebyakozirwe 10:28, 34, 35.) Bwanyima y’ekyo, Petero akatandika kurya n’Abakristaayo abatari Bayudaaya n’okumara obwire nabo. Kwonka ku haahingwireho emyaka, ari omu rurembo Antiokia, akarekyera aho kurya n’Abakristaayo abatari Bayudaaya. (Abagalatia 2:11-14) Paulo akamuhana, kandi Petero akaikiriza okuhanwa okwo. Eki nitukimanya tuta? Obu Petero yaahandiikira Abayudaaya n’abatari Bayudaaya ebaruha y’okubanza omuri Asia, akagamba aha ku kiri kikuru kukunda ab’eishe-emwe boona.​—1 Petero 1:1; 2:17.

16. Abakristaayo ab’okubanza bakaba nibamanywa ahabw’okukora ki?

¹⁶ Buzima, ahabwa Yesu kuteeraho entumwa ze eky’okureeberaho, bakeega kukunda abantu b’emiringo yoona. (Yohaana 12:32; 1 Timoseo 4:10) N’obu kiraabe kyatwire obwire, bakahindura aha muringo ogu baabaire nibatwaramu abandi. Kandi buzima, Abakristaayo ab’okubanza bakaba nibamanywa ahabw’okukundana. Omu mwaka nk’ogwa 200, omuhandiiki wa ira akajuriza ebi abantu baabaire nibagamba aha Bakristaayo ati: “Bakaba nibakundana,” kandi “bakaba beeteekateekire kufeera bagyenzi baabo.” Ahabw’okugira ngu Abakristaayo abo bakataho “omuntu omusya,” bakeega kureeba abantu boona nk’abarikwingana, nk’oku Ruhanga arikubareeba.​—Abakolosai 3:10, 11.

17. Nitubaasa kweihamu tuta enyehurira zoona ez’okushoroora abandi? Ha eby’okureeberaho.

¹⁷ Obunaku obu, naitwe nikibaasa kututwarira obwire kweihamu enyehurira z’okushoroora abandi. Munyaanyazi-itwe kuruga  France naashoboorora oku eki kyabaire kimugumiire. Naagira ati: “Yehova anyegyeise eki okukunda kirikumanyisa, eki okubagana n’abandi kirikumanyisa, n’eki kirikumanyisa okukunda abantu b’emiringo yoona. Kwonka na hati nkiriyo niinyega kusingura okushoroora oku nyine aha bandi, kandi tikugira ngu butoosha kyorobi. Niyo nshonga ahabw’enki ningumizamu ninshaba aha bikwatiraine n’obweremwa obu.” Munyaanyazi-itwe omuri Spain naashoboorora ngu obumwe naarwana n’enyehurira zigwire ezi aine aha bantu b’oruganda orumwe. Naagira ati: “Kaingi nimba omusinguzi. Kwonka nimmanya ngu nyine kugumizamu nindwana. Ninsiima Yehova, ahakuba ninshemererwa kuba omu ka eine obumwe.” Twena twine kuteekateeka n’obwegyendesereza aha nyehurira zaitu. Mbwenu shi naitwe nituba twine kweihamu enyehurira z’okushoroora abandi?

18, 19. (a) Ni nshonga ki ezishemereire kutureetera kwakiira buri omwe? (b) Eki nitubaasa kukikora tuta?

¹⁸ Ni kirungi kwijuka ngu twena tukaba tutaanisiibwe ahari Ruhanga. (Abaefeso 2:12) Kwonka Yehova akatweyiriza haihi ahabwa rukundo ye. (Hosea 11:4; Yohaana 6:44) Kandi na Kristo nawe akatwakiira. Akatubaasisa kuba bamwe aha b’omu ka ya Ruhanga. (Shoma Abarooma 15:7.) N’obu turaabe turi abatahikiriire, Yesu akatwakiira, n’ahabw’ekyo naitwe titwine kushoroora omuntu weena!

¹⁹ Obu emperu y’ensi ya Sitaane eri haihi kuhika, abantu nibaija kweyongyera kwebaganisamu, kushoroora abandi, n’okugira rwango. (Abagalatia 5:19-21; 2 Timoseo 3:13) Kwonka itwe abaheereza ba Ruhanga, nituteeraho kugira “obwengye oburikuruga omu iguru,” oburikutuhwera kutashoroora abandi, n’okureetaho obusingye. (Yakobo 3:17, 18) Nitushemererwa kunywana abantu abarikuruga omu mahanga agandi, tukaikiriza omuringo ogu barikukoramu ebintu, obundi tukeega n’endimi zaabo. Twakora tutyo, nitugira obusingye “nk’omugyera” n’oburingaaniza “nk’ebingonzi by’enyanja.”​—Isaaya 48:17, 18.

20. Niki ekirikubaho rukundo yaatuhwera kuhindura emiteekateekyere yaitu n’oku turikwehurira?

²⁰ Munyaanyazi-itwe omuri Australia ku yaayegire Baibuli, mporampora akarekyera aho kushoroora abandi n’okugira rwango. Rukundo ekamuhiga kuhindura aha miteekateekyere ye n’enyehurira ze. Ow’eishe-emwe orikugamba Orufaransa orikutuura omuri Canada naagira ngu hati naayetegyereza ngu abantu nibanga abandi ahabw’okugira ngu nibaba batarikubeetegyereza. Akeega ngu “abantu tibarikugira emitwarize kurugiirira ei baazaariirwe.” Nangwa akataaha omu bushwere na munyaanyazi-itwe orikugamba Orungyereza! Eby’okureeberaho ebi nibyoreka ngu rukundo neesingura omuze gw’okushoroora abandi. Rukundo neetugaita tugira omukago ogutarikubaasa kucweka.​—Abakolosai 3:14.