1. Ni nshonga ki erikutureetera kushemererwa munonga?

NIKITUSHEMEZA munonga kuhurira oku abaheereza ba Ruhanga barikujwisa omushana gwabo! Omwaka oguhweire, abaheereza ba Yehova bakeegyesa abeegi Baibuli abarikurenga 10,000,000. Kandi obukaikuru bw’abantu abarikukunda amazima bakaija aha Kiijutsyo baayega aha kitambo, ekiconco eki Ruhanga atuhaire.​—1 Yohaana 4:9.

2, 3. (a) Niki ekitarikubaasa kuturemesa kwaka “nk’etabaaza omu nsi”? (b) Nituza kugaaniira ahari ki omu kicweka eki?

² Omu nsi yoona, Abajurizi ba Yehova nibagamba endimi zitarikushushana. Kwonka eki tikirikuturemesa kuhimbisa Yehova nk’eka emwe aine obumwe. (Okushuuruurwa 7:9) Oyihireho orurimi oru turikugamba, nari ei turikutuura, twena nitubaasa kwaka “nk’etabaaza omu nsi.”​—Abafilipi 2:15.

³ Omurimo gwaitu gw’okubuurira, obumwe bwaitu, n’okuguma nitureeba omu by’omwoyo, byona nibihimbisisa Yehova.  Nitubaasa kujwisa tuta omushana gwaitu omu miringo eshatu egi?​—Shoma Matayo 5:14-16.

4, 5. (a) Nitubaasa kujwisa tuta omushana gwaitu oyihireho okubuurira? (b) Ni birungi ki ebirikuruga omu kugira embabazi? (Reeba ekishushani aha kutandika.)

⁴ Okubuurira n’okuhindura abantu abeegi n’omuringo mukuru gw’okujwisa omushana gwaitu. (Matayo 28:19, 20) Omuri 1925, ekicweka “Ekyererezi omu Mwirima” kikagira ngu omu biro by’emperu, tihaine orikubaasa kuba omwesigwa ahari Mukama yaaba ataikiriize “omugisha gw’okujwisa omushana gwe.” Kandi kikoongyeraho kiti: “Aine kukora eki, arikugambira abantu omu nsi amakuru marungi, kandi arikukora ebirikuhikaana n’emitwarize y’omushana.” (Watch Tower, Okwamukaaga 1, 1925) Okwongyera aha kubuurira kwaitu, emitwarize yaitu neehimbisisa Yehova. Abantu baingi nibatureeba twaba nitubuurira. Ku turikubamwenyera kandi tukabaramutsya, nikibahwera kutugiraho emiteekateekyere mirungi na Ruhanga ou turikuramya.

⁵ Yesu akagambira abeegi be ati: “Ku muriba nimukitaaha omu nju egyo, mugiramutsye.” (Matayo 10:12) Omu kicweka eki Yesu yaabuuriiremu, abantu bakaba baine omucwe gw’okutaayaayisa abu batarikumanya omu maka gaabo. Omu bicweka bingi ebiro ebi, abantu tibaine omucwe ogu. Abantu obumwe nibatiina nari nibaguubwa kubi baareeba omuntu ou batarikumanya aha rwigi rwabo. Kwonka twaba turi abanyambabazi, kandi turikutwaza gye, ekyo nikibaasa kubareetera kwikaikana. Mbwenu shi ku orikuba noobuurira aha kagaari, nookira kureeba ngu ku orikumwenya, nikihiga abantu kutatiina kwija kwakiira ebitabo? Nibabaasa n’okwenda kutandika kugaaniira naiwe!

6. Niki ekirikuhwera omushaija n’omukazi we abakuzire kuguma nibeejumba omu kubuurira?

⁶ Ow’eishe-emwe n’omukazi we abakuzire omuri England tibaakibaasa kubuurira munonga enju aha nju ahabw’okugira amagara mabi. N’ahabw’ekyo bakata emeeza y’ebitabo aheeru y’enju yaabo. Nibatuura haihi n’eishomero, n’ahabw’ekyo nibata ebitabo aha meeza ebirikushemeza abazaire abarikuba baizire kwakiira abaana baabo. Abazaire abamwe nibatwara ebitabo ebi, otwariiremu na Questions Young People Ask​—Answers That Work, aka 1 n’aka 2. Obumwe payoniya naija abuurira nabo. Abazaire nibareeba ngu payoniya ogu naakunda abantu, kandi n’ow’eishe-emwe n’omukazi we buzima nibenda kuhwera abantu. Nangwa n’omuzaire omwe akatandika kwega Baibuli.

7. Noobaasa kuhwera ota empungi abari omu kicweka kyanyu?

⁷ Emyaka egi, abantu baingi barugire owaabo baahunga baaza omu mahanga agandi nk’empungi. Noobaasa kukora ki kuhwera empungi abari omu kicweka kyanyu, kwega ebirikukwata ahari Yehova? Eky’okubanza, noobaasa kwega kubaramutsya omu rurimi rwabo. Kandi waakoresa JW Language app, noobaasa kwega ebigambo bikye ebirikubaasa  kubareetera kwenda kwemerera bakagaaniira naiwe. Bwanyima noobaasa kubooreka vidiyo n’ebitabo ebiri aha jw.org, omu rurimi rwabo.​—Eky’Ebiragiro 10:19.

8, 9. (a) Enteerane zaitu ez’ahagati ya saabiiti nizituhwera zita? (b) Abazaire nibabaasa kuhwera bata abaana baabo kuboneza omuringo ogu barikugarukamu omu nteerane?

⁸ Yehova naatuha kyenyine ekirikwetengyesa kubaasa kubuurira gye. Nk’eky’okureeberaho, ebi turikwega omu ruteerane rw’Obuheereza Bwaitu n’Oku Turikutwaza nibituhwera kugira obumanzi bw’okugarukira abantu n’okutandika kubeegyesa Baibuli.

⁹ Abasya ku barikwija omu nteerane zaitu, nibakira kushemezibwa eby’okugarukamu by’abaana baitu. Noobaasa kwegyesa abaana baawe kugarukamu omu bigambo byabo. Abantu abamwe babaasise kwija omu mazima baaheza kuhurira abaana nibooreka okwikiriza kwabo, barikugarukamu omu muringo gworobi kandi ogw’amazima.​—1 Abakorinso 14:25.

10. Okuramya kw’eka nikubaasa kuhwera kuta amaka kwongyera kugira obumwe?

¹⁰ Twateeraho munonga kutendeka ab’eka yaitu kukorera hamwe omu busingye n’okukwatanisa, nituhimbisisa Yehova. Nk’eky’okureeberaho, waaba ori omuzaire, tebeekanisa kugira Okuramya kw’Eka otarikwosha. Amaka maingi nigareeba JW Broadcasting hamwe, reero bwanyima nibagaaniira aha  bi baayegamu. Ijuka ngu oku orikuhana omwana muto tikwo orikuhana omushogoyo. Kora kyona ekirikubaasika kuhwera buri omwe omu ka yaawe kugasirwa omu kuramya kw’eka.​—Zaaburi 148:12, 13.

11-13. Nitubaasa kuhwera tuta ekibiina kyaitu kwongyera kugira obumwe?

¹¹ N’obu waakuba ori muto, noobaasa kuhwera omu kureetera buri omwe omu kibiina kuhurira naakundwa. Omuringo gumwe n’okunywana ab’eishe-emwe na banyaanyazi-itwe abakuzire. Babuuze ekibahwereire kuheereza Yehova kumara emyaka mingi. Nibabaasa kukwegyesa ebintu by’omuhendo. Eki nikiija kubagaruramu amaani hamwe naiwe! Kandi twena, yaaba turi bakuru nari bato, nitubaasa kureetera abarikwija aha Kyombeko ky’Obukama kuhurira baikaikaine. Noobaasa kubaramutsya, obamwenyere, obahwere kutunga ah’okushutama, kandi obanjurire abandi. Bahwere kugira obuteeka.

¹² Waaba ohairwe obujunaanizibwa bw’okwebembera enteerane z’okwetebeekanisa kuza kubuurira noobaasa kuhwera abakuzire kugumizamu nibajwisa omushana gwabo. Hamya ngu baine ebicweka by’okubuuriramu ebirikuhikaana n’embeera zaabo. Bahe ababuurizi abato ab’okukora nabo. Abakuzire n’abaine amagara mabi nibakira kwehurira kubi ahabw’okutabaasa kubuurira munonga nk’oku baabaire nibakora. Kwonka nibeehurira gye baamanya ngu noobafaho, kandi ngu noomanya embeera zaabo. N’obu baakuba bakuzire munonga nari bamazire obwire buraingwa omu mazima, waabatwariza omu muringo gw’embabazi nikibahiga kugumizamu nibabuurira baine omujinya.​—Abaleevi 19:32.

¹³ Abaisraeli bakaba nibakunda kuramya hamwe. Omuhandiiki wa Zaaburi akahandiika ati: ‘Ni kirungi kandi ekirikushemeza, ab’eishe-emwe kutuura hamwe nibakwatanisa!’ (Shoma Zaaburi 133:1, 2.) Akagyeragyeranisa obumwe obu n’amajuta g’okushoroora, agarikubobeeza omubiri kandi againe omugaju murungi. Omu muringo nigwo gumwe, nitubaasa kugaruramu ab’eishe-emwe na banyaanyazi-itwe amaani turikutwaza omu muringo gw’embabazi. Eki nikireetera ekibiina kwongyera kugira obumwe. Noobaasa kuteeraho kumanya gye ab’eishe-emwe omu kibiina kyawe.​—2 Abakorinso 6:11-13.

14. Noobaasa kujwisa ota omushana gwawe omu kicweka ei orikutuura?

¹⁴ Noobaasa kujwisa omushana gwawe hoona ahu orikuba ori. Embabazi zaawe zishemereire kureetera bataahi baawe kwenda kwega ebirikukwata ahari Yehova. Yebuuze oti: ‘Abataahi nibanteekateekaho ki? Eka yangye ecumire gye kandi etebeekaniise gye? Neeyongyera aha burungi bw’ekicweka? Ei ndikutuura nibandeeba nk’omutaahi w’omugasho?’ Buuza ab’eishe-emwe abandi oku embabazi zaabo n’eky’okureeberaho kyabo kirungi bikwatsire aha banyabuzaare baabo, abataahi, abu barikukora nabo, nari abu barikushoma nabo.​—Abaefeso 5:9.

15. Ahabw’enki twine kuguma nitureeba?

¹⁵ Ku turaabe nitwenda kugumizamu nitujwisa gye omushana gwaitu, twine kumanya obwire obu turimu. Emirundi mingi, Yesu akaba agambira abeegi be ati: “Mugume nimureeba.” (Matayo 24:42; 25:13; 26:41) Twaba nituteekateeka ngu “okubonabona kwingi” kukiri hare munonga, titurikwija kukoresa buri mugisha kuhwera abandi kwega ebirikukwata ahari Yehova. (Matayo 24:21) Omu mwanya gw’omushana gwaitu kwaka gye, mporampora nigwija kuhwa amaani, kandi nigubaasa n’okuhwaho.

16, 17. Nitubaasa kukora ki kuguma nitureeba?

¹⁶ Twine kuguma nitureeba hati okukira ira. Embeera omu nsi nizeeyongyera kusiisikara. Kwonka nitumanya ngu emperu neeza kwija omu bwire bwenyine nk’oku Yehova arikwenda. (Matayo 24:42-44) Kwonka hati, twine kugumisiriza kandi tukata omutima aha biro by’omumaisho. Shoma Baibuli buri izooba, kandi gumizamu nooshaba Yehova. (1 Petero 4:7) Yegyera aha b’eishe-emwe na banyaanyazi-itwe abaheereize Yehova kumara emyaka mingi. Nk’eky’okureeberaho, noobaasa kushoma aha byahikire aha b’eishe-emwe, nk’ebiri omu kicweka  “Emyaka Nshanju ey’Okukwata aha Kanzu y’Omuyudaaya,” omu Watchtower ey’Okwakana 15, 2012, orupapura 18-21.

¹⁷ Heereza Yehova n’omutima gwawe gwona. Korera abandi eby’embabazi, kandi gira obwire bw’okubaho n’ab’eishe-emwe na banyaanyazi-itwe. Obwo noija kushemererwa, kandi n’obwire nibwija kureebeka nk’oburikurahuka. (Abaefeso 5:16) Abajurizi ba Yehova babaasize kukora ebintu bingi omu myaka igana ehingwire. Kandi obunaku obu, twine bingi by’okukora kukira ira. Omurimo gwa Yehova gweyongyeire kutunguuka kukira oku twabaire nitubaasa kuteekateeka. Omushana gwaitu nigwakira kimwe!

18, 19. Abareeberezi nibabaasa kutuhwera bata kuheereza Yehova twine omujinya? Ha eky’okureeberaho.

¹⁸ N’obu turaabe nitukora enshobe nyingi, Yehova naatwikiriza kumuheereza. Kutuhwera, atuhaire “ebiconco” omu bantu nibo bareeberezi b’ekibiina. (Shoma Abaefeso 4:8, 11, 12.) N’ahabw’ekyo, abareeberezi baakutaayaayira, koresa gye obwire obu baraamare naiwe kugasirwa omu bwengye bwabo n’obuhabuzi.

¹⁹ Nk’eky’okureeberaho, omushaija n’omukazi we omuri England bakaba baine oburemeezi omu bushwere bwabo, reero baashaba abareeberezi babiri obuhwezi. Omukazi akaba naareeba ngu iba tarikwebembera omu kuheereza Yehova. Iba akaba naateekateeka ngu ti mwegyesa murungi, kandi akaikiriza ngu akaba atarikutebeekanisiza okuramya kw’eka butoosha. Abareeberezi bakabahwera kuteekateeka aha ky’okureeberaho kya Yesu. Bakahiga omushaija kutooreza Yesu oku yaabaire naatwariza abeegi be. Bakahiga omukazi kugumisiririza iba. Kandi bakabagambira n’ebi barikubaasa kukora kugira okuramya kw’eka n’abaana baabo babiri. (Abaefeso 5:21-29) Omushaija akakora munonga kuba omutwe gw’eka murungi. Abareeberezi bakamuhiga kutaruha n’okuguma naayesiga amaani g’omwoyo gurikwera. Rukundo n’embabazi ebi abareeberezi baayorekire, bikahwera eka egyo!

20. Nihaija kurugamu ki waaguma noojwisa omushana gwawe?

²⁰ “Aine omugisha omuntu weena orikutiina” Yehova “akagyendera omu mihanda ye.” (Zaaburi 128:1) Noija kushemererwa waajwisa omushana gwawe. N’ahabw’ekyo yegyesa abandi ebirikukwata ahari Yehova, kora ekirikubaasika kuhwera eka yaawe n’ekibiina kugira obumwe, kandi guma nooreeba. Abandi nibaija kureeba eky’okureeberaho kyawe kirungi, kandi nibaija kwenda kuhimbisa Tataitwe Yehova.​—Matayo 5:16.