NITUTUURA omu nsi erimu amaganya, n’ahabw’ekyo tikyorobi kutunga obusingye. N’obu turaabe twine obusingye, kwonka nibubaasa kuhwaho ahonaaho. Baibuli neeyoreka ngu niki ekirikubaasa kutuhwera kutunga obusingye obwabuzima? Kandi nitubaasa kuhwera tuta abandi kubutunga?

Kubaasa kutunga obusingye obwabuzima, twine kuba twine oburinzi. Twine kugira abanywani barungi, kandi okukira byona twine kwirira haihi Ruhanga. Eki nitubaasa kukikora tuta?

Ebiragiro bya Yehova n’emisingye ye ni birungi. Twabyorobera, nitworeka ngu nitumwesiga, kandi ngu nitwenda kugira omukago murungi nawe. (Yeremia 17:7, 8; Yakobo 2:22, 23) Reero, Yehova naija kutwirira haihi abone kutuha obusingye bw’omu mutima. Isaaya 32:17 nihagira hati: “Eki okuhikiirira kurireeta kiryaba obusingye, kandi ekiriruga omuri okwo kuhikiirira kibe okutuuza n’amatsiko agatarikubanganisibwa ebiro byona.” Nitubaasa kutunga obusingye obwabuzima twayorobera Yehova twekundiire.​—Isaaya 48:18, 19.

Yehova atuhaire ekiconco ky’omuhendo kutuhwera kugira obusingye obwabuzima. Ekiconco eki n’omwoyo gurikwera.​—Ebyakozirwe 9:31.

Entumwa Paulo akagira ngu obusingye n’omutwarize gw’omwoyo gurikwera. (Abagalatia 5:22, 23) Obu omwoyo gwa Ruhanga gurikutureetera kugira obusingye, twine kugwikiriza kutwebembera kubaasa kubugira. Eki nitukikora tuta?

Eky’okubanza, twine kushoma Baibuli buri izooba. (Zaaburi 1:2, 3) Twateekateeka aha bi turikushoma, omwoyo ogurikwera nigutuhwera  kumanya emiteekateekyere ya Yehova aha nshonga zitari zimwe na zimwe. Nk’eky’okureeberaho, nitwega oku Yehova arikuguma aine obusingye bwe n’oku buri bukuru ahariwe. Twagyendera aha bi turikwega omu Baibuli, nitwongyera kutunga obusingye.​—Enfumu 3:1, 2.

Ekya kabiri, twine kushaba Ruhanga kutuha omwoyo ogurikwera. (Luka 11:13) Yehova naaraganisa abarikumushaba ati: “Kandi obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu omuri Kristo Yesu.” (Abafilipi 4:6, 7) Twaguma turi banywani ba Yehova kandi turikwesiga omwoyo gwe, nawe naija kutuha obusingye obwabuzima.​—Abarooma 15:13.

Baibuli ehwereire abantu kuhindura aha mitwarize yaabo, kandi hati baine obusingye bw’omu mutima, baine obusingye na Yehova, n’abandi. Eki babaasize kukikora mu muringo ki?

Ab’eishe-emwe abamwe batakaizire omu mazima, bakaba baine ekiniga kandi bari enshaarizi. Kwonka bakakora n’amaani kuhinduka, kandi hati baine embabazi, nibagumisiriza, kandi baine obusingye n’abandi. * (Reeba obugambo bw’ahansi.) (Enfumu 29:22) Reeba oku ow’eishe-emwe David na munyaanyazi-itwe Rachel baakozire empindahinduka.

David atakaizire omu mazima, akaba naakira kuta omutima aha nshobe z’abandi, kandi arikutwariza kubi ab’omu ka ye. Kwonka akamanya ngu aine kuhindura omu mitwarize ye. Akatunga ata obusingye? David naagira ati: “Nkatandika kugyendera aha misingye ya Baibuli, eki kikareetaho obusingye omu ka yaitu.”

 Rachel akaba naatwaza nk’ab’omu kicweka ky’owaabo. Naashoboorora ati: “Na hati, niinteeraho kwetantara kugira ekiniga n’obu naakuriire omu ka y’abantu abaine ekiniga.” Niki ekyahwereire Rachel kutunga obusingye? Naagarukamu ati: “N’okugumizamu ninshaba Yehova.”

David na Rachel ni bamwe aha babaasize kutunga obusingye ahabw’okugyendera aha misingye ya Baibuli n’okushaba Yehova omwoyo ogurikwera. N’obu turaabe twetoroirwe abantu abaine ekiniga, nitubaasa kugira obusingye omu mutima. Eki nikituhwera kugira obumwe n’ab’omu maka gaitu n’ab’eishe-emwe omu kibiina. Kwonka Yehova naatuhiga ati: ‘Mutuurane n’abantu boona n’obusingye.’ (Abarooma 12:18) Buzima ekyo nikibaasika? Kandi ahabw’enki twine kuteeraho kugira obusingye n’abandi?

Omu kubuurira, nitumanyisa abandi obutumwa bw’obusingye oburikukwata aha Bukama bwa Ruhanga. (Isaaya 9:6, 7; Matayo 24:14) Baingi nibaakiira obutumwa obu kandi nibabukunda. N’ekirugiremu, tibakiine kiniga nari kwehurira nk’abataine buhwezi ahabw’ebirikubaho omu nsi. Hati baine amatsiko agaabuzima aha biro by’omumaisho, kandi eki kibareeteire kwenda, ‘kusherura obusingye.’​—Zaaburi 34:14.

Kwonka, ti buri omwe ou turikubuurira ngu naakunda obutumwa bwaitu omu kubanza. (Yohaana 3:19) N’obu abantu bakwanga kutuhurikiza, Ruhanga naatuha omwoyo gwe gurikwera. Eki nikituhwera kuguma twine obusingye n’okuha ekitiinisa abu turikubuurira. Omu muringo ogu, nitugyendera aha buhabuzi bwa Yesu oburikugira ngu: ‘ku muriba nimukitaaha omu nju egyo, mugiramutsye. Enju ku eribashemererwa, etungye obusingye bwanyu; ku eriba etabashemereirwe, obusingye bwanyu bubagarukire.’ (Matayo 10:11-13) Twaba twine emiteekateekyere nk’egi, nituguma twikaikaine n’obu abantu baakututwariza kubi. Kandi nitwijuka ngu tukiine omugisha gw’okugaruka kuhwera abantu abo omu biro by’omumaisho.

Kandi nitureetaho obusingye twaba nitugamba n’abeebembezi ba gavumenti omu muringo gw’ekitiinisa n’obu baakuba nibatuhakanisa. Nk’eky’okureeberaho, omu ihanga rimwe omuri Afrika, gavumenti yaayo ekaba etarikutwikiriza kwombeka Ebyombeko eby’Obukama. Ab’eishe-emwe bakaba nibamanya ngu baine kushoboorora oburemeezi obu omu muringo gw’obusingye. N’ahabw’ekyo bakoohereza ow’eishe-emwe owaabaireho omumiisani omu ihanga eri, kuza omu ofiisi y’Omujwekyerwa w’eihanga eryo omuri London, omuri England, kumugambira aha omurimo ogurikukorwa Abajurizi ba Yehova.

Ow’eishe-emwe akagira ati: “Ku naahikire nti ahu barikwakiirira abagyenyi, omukazi owaanyakiire akaba ajwaire nk’ab’oruganda oru naabaire nimmanya abaabaire nibakoresa orurimi oru naayegire. Nkamuramutsya omu rurimi rw’owaabo. Akatangaara, yaambuuza ati: ‘Ni nshonga ki eyaakureeta aha?’ Omu bucureezi nkamushaba ngu niinyenda kureeba Omujwekyerwa w’eihanga. Akamuteerera esimu yaija, yaandamutsya omu rurimi rwaabo. Bwanyima akahurikiza gye obu naabaire nimmushoboororera aha omurimo gw’obusingye ogurikukorwa Abajurizi ba Yehova.”

Bwanyima y’Omujwekyerwa w’eihanga kuhurikiza gye ow’eishe-emwe, akeetegyereza omurimo gwaitu yaahindura aha miteekateekyere ye. Bwanyima y’akaire kakye, gavumenti ekaikiriza Abajurizi ba Yehova kwombeka Ebyombeko by’Obukama. Ab’eishe-emwe bakashemererwa munonga! Hatariho kubangaanisa, nitureetaho obusingye twaha abandi ekitiinisa.

Obunaku obu, abaheereza ba Yehova nibamuramiza omu paradiso y’eby’omwoyo baine obusingye. Buri omwe ahariitwe naabaasa kugira eki yaakora kwongyera aha busingye obwo. Bwanyima nitubaasa kuhamya ngu eki nikishemeza Yehova. Kandi omu nsi ensya, naija kutuha obusingye obw’ebiro byona.​—2 Petero 3:13, 14.