1. Nitubaasa kutooreza tuta Yehova Tataitwe oine rukundo?

YEHOVA naatukunda munonga. (Yoh. 3:16) Nitwenda kutooreza Tataitwe oine rukundo. N’ahabw’ekyo nituteeraho kufayo aha bandi, kukundana nk’eishe-emwe, n’okugirira embabazi boona, kwonka okukira munonga abari naitwe omu kwikiriza. (1 Pet. 3:8; Gal. 6:10) Ab’eka yaitu ey’eby’omwoyo baaba nibaraba omu mbeera zigumire, twine kubahwera.

2. Nituza kushwijuma ki omu kicweka eki?

² Boona abarikwenda kuba omu ka ya Yehova nibaija kuraba omu mbeera zigumire. (Mak. 10:29, 30) Nitubaasa kwija kuhikwaho okugyezibwa kw’amaani emperu y’ensi egi embi yaaguma neeyirira haihi. Nitubaasa kuhwerahwerana tuta? Ka tushwijume ebiri omu Baibuli ebirikukwata ahari Looti, Yobu, na Naomi. Nituza n’okugaaniira aha mirabanamu ei ab’eishe-emwe na banyaanyazi-itwe baine ebiro ebi n’oku turikubaasa kubahwera kwemera oburemeezi.

3. Nk’oku kiri omuri 2 Petero 2:7, 8, Looti akacwamu kubi ata, kandi hakarugamu ki?

³ Ekiteekateeko kya Looti kikaba kigwire obu yaacwamu kutuura n’abantu ba Sodoma abaabaire nibakora ebihagaro by’amaani. (Shoma 2 Petero 2:7, 8.) Ekicweka ekyo kikaba kirimu eby’obugaiga, kwonka Looti akatunga oburemeezi bwingi ahabw’okucwamu kutuurayo. (Kut. 13:8-13; 14:12) Omukazi we akakunda munonga orurembo orwo nari bamwe aha bantu abaabaire nibarutuuramu yaahika n’aha kugomera Yehova. Akafeerwa  amagara ge obu Ruhanga yaareeta omuriro n’obuganga kurucwekyereza. Kandi teekateeka ahari bahara ba Looti babiri. Bakaba nibariima bamwe aha bashaija abaafeereire omuri Sodoma. Looti akafeerwa eka ye, ebintu bye, kandi eky’obusaasi munonga akafeerwa n’omukazi we. (Kut. 19:12-14, 17, 26) Mbwenu shi omu bwire bugumire obwo, Yehova akareka kugumisiririza Looti? Ngaaha.

4. Yehova akooreka ata ngu naagumisiriza Looti? (Reeba ekishushani eky’aha mutwe.)

⁴ N’obu Looti araabe yaacwiremu kutuura omuri Sodoma, Yehova akamugirira embabazi yaamwoherereza baamaraika kumucungura n’ab’eka ye. Kwonka Looti omu mwanya gw’okworobera ekiragiro kya maraika ahonaaho akaruga omuri Sodoma, akaguma “naayeziringa.” Baamaraika bakamukwata aha mukono n’ab’omu ka ye baabashohoza aheeru y’orurembo. (Kut. 19:15, 16) Reero baamaraika bakamugambira ngu ayirukye aze omu nsi y’enshozi. Kwonka omu mwanya gwa Looti kworobera Yehova, we akashaba kuza omu tauni eri haihi. (Kut. 19:17-20) Yehova akagumisiriza Looti, kandi yaamuhurikiza yaaza omu tauni eri haihi. Bwanyima Looti akatiinayo yaafuruka yaaza omu nshozi, omwanya gwenyine ogu Yehova yaabaire amugambiire kuzamu omu kubanza. (Kut. 19:30) Yehova ka yaayorekire ngu aine okugumisiriza kw’amaani! Nitubaasa kumutooreza tuta?

5-6. Nitubaasa kugyendera tuta aha 1 Abatesalonika 5:14 kutooreza Ruhanga?

⁵ Nka Looti, omwe omu kibiina naabaasa kucwamu kubi reero ekyo kimureetere oburemeezi bw’amaani. Mbwenu shi eki kyabaho, nitwija kutwaza tuta? Nitubaasa kwohibwa kugira ngu ariyo naagyesha ebi yaabibire, kandi ekirikubaasa kuba kihikire. (Gal. 6:7) Kwonka, nitubaasa kukora ekirikukira ekyo oburungi. Nitubaasa kuhwera abandi nk’oku Yehova yaahweraire Looti. Tuta?

⁶ Yehova akoohereza baamaraika kurabura Looti n’okumuhwera kuhunga akabi akaabaire nikaza kuhika ahari Sodoma. Naitwe nikyo kimwe, nituba twine kurabura ow’eishe-emwe twareeba naaza kugwa omu kabi. Kwonka nabwo nitubaasa kumuhwera. Nangwa n’obu yaakuba naayeziringa kugyendera aha buhabuzi bwa Baibuli, twine kuba abagumisiriza. Twine kuba nka baamaraika babiri. Omu mwanya gw’okuhanika tukeehuzya ow’eishe-emwe, twine kugira eki twakora kumuhwera omu miringo erikureebwa. (1 Yoh. 3:18) Nitubaasa kumukwata aha mukono omu muringo gw’akamanyiso, reero tumuhwere kugyendera aha buhabuzi burungi obu arikuheebwa.​—Shoma 1 Abatesalonika 5:14.

7. Nitubaasa kureeba tuta abandi nk’oku Yehova yaareebire Looti?

⁷ Yehova kuri yaayenzire akaba naija kuta omutima aha bweremwa bwa Looti. Kwonka omu mwanya gw’ekyo, bwanyima akabaasisa entumwa Petero kugamba ahari Looti nk’omushaija ohikiirire. Ka twine okushemererwa ahabw’okugira ngu Yehova naatusaasira enshobe zaitu! (Zab. 130:3) Nitubaasa kutooreza Yehova tureebe abandi nk’oku yaareebire Looti? Twata omutima aha mitwarize mirungi y’ab’eishe-emwe na banyaanyazi-itwe, nitwija kubagumisiririza. Nabo nikibaasa kuboorobera kwikiriza obuhwezi obu turikubaha.

8. Okuba abanyambabazi nikiija kutuhiga kukora ki?

⁸ Okutashushana na Looti, we Yobu okucwamu kubi tikwo kwamureeteire kubonabona. Kwonka nabwo akagwerwa obugwe. Akafeerwa ebintu bye, ekitiinisa kye omu kicweka eki yaabaire naatuuramu, n’amagara ge marungi. Kandi ekibi munonga, we n’omukazi we bakafeerwa abaana baabo. Banywani be bashatu ab’ebishobobo bakamucwera orubanja. Ni nshonga ki emwe eyaareeteire  abahuumuriza ba Yobu bashatu ab’ebishobobo kuremwa kumugirira embabazi? Bakaremwa kwetegyereza gye embeera yenyini ei yaabaire arimu. N’ekyarugiremu, bakateembera egaari omu mahembe kandi baacwera Yobu orubanja bataine mbabazi. Nitubaasa kwetantara tuta enshobe nk’egyo? Twine kumanya ngu Yehova niwe arikumanya amazima goona agarikukwata aha mbeera y’omuntu. Hurikiza gye omuntu oine obusaasi yaaba naakugambira. Kora ekirikukira aha kuhurira ebigambo bye, teeraho kumusaasibwa. Waakora otyo nibwo oraabaase kugirira ow’eishe-emwe nari munyaanyoko embabazi kuruga aha mutima.

9. Nitwija kwetantara ki twaba turi abanyambabazi, kandi n’ahabw’enki?

⁹ Okugira embabazi nikiija kutuhwera kutajanjaaza orugambo orurikukwata aha buremeezi obu abandi baine. Omuntu oine orugambo tarikwombeka kibiina, kureka naakireetera kwebaganisamu. (Enf. 20:19; Rom. 14:19) Naaba atari munyambabazi, kureka naagamba atabandize kuteekateeka, kandi ebigambo bye nibibaasa kwongyerera amaganya omuntu orikubonabona. (Enf. 12:18; Efe. 4:31, 32) Ka kyakubaire kirungi kuta omutima aha mitwarize mirungi y’omuntu, reero tukateekateeka aha ku turikubaasa kumuhwera kwemera okugyezibwa kwe!

10. Ebigambo ebiri omuri Yobu 6:2, 3 nibitwegyesa ki?

¹⁰ Shoma Yobu 6:2, 3. Yobu obumwe akaba ‘arahuka kugambisibwa.’ Kwonka bwanyima ebigambo bye akabimira yaikiriza enshobe ye. (Yob. 42:6) Nka Yobu, omuntu ori omu mbeera erikumureetera amaganya naabaasa kurahuka kugambisibwa ebigambo ebi araayefuuze bwanyima. Mbwenu shi tushemereire kumutwariza tuta? Omu mwanya gw’okumucwera orubanja, twine kumugirira embabazi. Ijuka ngu ti kigyendererwa kya Yehova ngu abantu batungye oburemeezi obu turikurabamu  obunaku obu. N’ahabw’ekyo nikyetegyerezibwa, omuheereza wa Yehova omwesigwa yaagamba atabandize kuteekateeka yaaba aine amaganya maingi. Nangwa n’obu yaakutugambaho ebitahikire nari akabigamba ahari Yehova, titushemereire kurahuka kumugirira ekiniga nari kumucwera orubanja ahabw’ebi yaagamba.​—Enf. 19:11.

11. Abareeberezi nibabaasa kutooreza bata Elihu baacwamu kuha obuhabuzi omuntu oine amaganya?

¹¹ Obumwe omuntu oine oburemeezi oburikumureetera amaganya nikibaasa kwetengyesa kuhaburwa nari kuhanwa. (Gal. 6:1) Eki abareeberezi nibabaasa kukikora bata? Nibakora gye baatooreza Elihu, owaagiriire Yobu embabazi akamuhurikiza gye. (Yob. 33:6, 7) Elihu akaha Yobu obuhabuzi bwanyima y’okwetegyereza emiteekateekyere ye. Abareeberezi abarikutooreza Elihu nibahurikiza gye, kandi bateeraho kwetegyereza embeera y’omuntu. Reero baacwamu kumuha obuhabuzi, nibubaasa kumuhika aha mutima.

12. Naomi akakwatwaho ata ahabw’okufeerwa iba n’abatabani babiri?

¹² Naomi akaba ari omukazi omwesigwa owaabaire naakunda Yehova. Kwonka bwanyima iba na batabani be babiri ku baafiire, akaba naayenda kuhindura eiziina rye Naomi akeeyeta “Maara,” amakuru ngu “Obushaarizi.” (Rus. 1:3, 5, 20, kany., 21) Ruusi mukamwana wa Naomi akaguma na nyinazaara omu kugyezibwa kwe kwona. Ruusi akaha Naomi obuhabuzi oburikukora kandi yaagamba nawe omu muringo ogurikuhuumuriza. Ruusi akooreka ngu naakunda Naomi, yaamushagika arikukoresa ebigambo byorobi kandi eby’amazima.​—Rus. 1:16, 17.

13. Ahabw’enki twine kushagika abafeereirwe abakundwa baabo omu bushwere?

¹³ Omwe aha b’eka yaitu ey’omwoyo yaafeerwa ou ari nawe omu bushwere, nituba twine kumushagika. Omushaija n’omukazi we nibabaasa kugyeragyeranisibwa n’emiti ebiri ehikaine. Bwanyima y’emyaka, emizi y’emiti egyo neerabanamu ekwatana. Omuti gumwe gwakuurwa gukafa, ogundi nigubaasa kuhutaazibwa kubi munonga. Nikyo kimwe, omuzigu rufu yaita omwe aha bari omu bushwere, orikutsigaraho naabaasa kuguma naayehurira kubi kumara obwire buraingwa. Paula, * owaafeereirwe iba kitaraariire, naagira ati: “Embeera zangye zikahindukira kimwe, kandi nkatsigara ntaine maani na kakye. Nkafeerwa munywani wangye orikukirayo. Nkaba ngambira ibanyi buri kimwe. Akaba ashemererwa naanye kandi ankwatsa omu bwire bugumire. Akaba naampa obwegamo naaba nimugambira oburemeezi bwangye. Buzima nkehurira nk’ou batemiremu kabiri.”

14-15. Nitubaasa kugamba tuta n’ofeereirwe omukundwa omu bushwere omu muringo ogurikuhuumuriza?

¹⁴ Noobaasa kuhuumuriza ota ofeereirwe omukundwa omu bushwere? Ekintu kikuru eky’okubanza kukora n’okugamba nawe, n’obu kyakuba nikikuteganisa kukigambaho, nari otarikumanya eky’okugamba. Paula, owaaba yaagambirweho, naagira ati: “Ninyetegyereza ngu rufu neebuza abantu obusingye. Nibaba nibatiina ngu ebi baraagambe nibibaasa kugwisa kubi abandi. Kwonka abantu baaba batagambire naiwe nooyehurira kubi munonga, okukira okugamba naiwe.” Obundi omuntu orikuganya naabaasa kuteekateeka ngu tihariho ky’omutaano eki turaamugambire. Paula naagira ati: “Kikaba nikinshemeza banywani bangye baagambira bugambira ngu, ‘nitusaasa naiwe ahabw’okufeerwa.’”

¹⁵ William, ou omukazi we yaafiire emyaka ehingwire, naashoboorora ati: “Nikinshemeza abandi baaba nibangambira ebirungi ebi omukazi wangye yaabaire naakora. Ekyo  nikimpamiza ngu akaba naakundwa, kandi naaheebwa ekitiinisa. Obushagiki obu nibumpwera munonga. Eki nikindeetera kuhurira mmazirwe, ahakuba omukazi wangye akaba ari ow’omuhendo ahariinye, kandi ari ekicweka kihango eky’amagara gangye.” Omukazi efaakazi orikwetwa Bianca naashoboorora ati: “Abandi baashaba naanye nari bakanshomera ekyahandiikirwe kimwe nari bibiri, nikimpuumuriza. Nikimpwera baagamba ahari ibanyi, kandi bakampurikiza naaba nimbagambira.”

16. (a) Nitubaasa kuhwera tuta ofeereirwe omukundwa? (b) Kurugiirira ahari Yakobo 1:27, twine bujunaanizibwa ki?

¹⁶ Nk’oku Ruusi yaahamiire aha faakazi Naomi, twine kugumizamu nitushagika abafeereirwe abakundwa baabo. Paula owaaba yaagambirweho, naagira ati: “Ahonaaho ibanyi aherize kufa, nkatunga obushagiki bwingi. Obwire ku bwahingwireho, abantu bakagaruka aha mirimo yaabo ya butoosha. Kwonka embeera zangye zikaba zaahindukiire kimwe. Nikihwera munonga abandi kumanya ngu omuntu orikuganya naaba aine kuhwerwa kumara ameezi, nari emyaka bwanyima y’okufeerwa.” Twine kwijuka ngu abantu nibataana. Abamwe nibarahuka kumanyiira embeera nsya ezibaireho. Kwonka abamwe, buri murundi ogu barikukora ekintu eki baabaire nibakora na nyakufa obu yaabaire akiriho, nikibaijutsya ku yaafiire. Emiringo ei abantu barikuganyamu terikushushana. Ka tugume nitwijuka ngu Yehova naatuha omugisha n’obujunaanizibwa bw’okuhwera abafeereirwe abakundwa baabo.​—Shoma Yakobo 1:27.

17. Ahabw’enki twine kushagika abatsigirweho abakundwa baabo omu bushwere?

 ¹⁷ Abamwe nibagira amaganya ahabw’okutsigwaho abu baabaire bari nabo omu bushwere. Joyce, ou iba yaatsigireho akataatsya omukazi ondiijo, naagira ati: “Obusaasi obu naatungire ahabw’okugaitururwa, shana nibukira obu naakutungire ku ogire ngu ibanyi akafa. Ku ogire ngu akaitwa butandu nari endwara, ekyo tiwe yaakubaire ayecwereiremu kukikora. Kwonka ibanyi niwe yaacwiremu kuntsigaho. Nkahemuka munonga kandi naaguma ntaine kitiinisa kyona.”

18. Nitubaasa kukora ki kuhwera abatakiine bakundwa baabo omu bushwere?

¹⁸ Twakora obuntu bukye kuhwera abatakiine bakundwa baabo omu bushwere, nitubahamiza ngu nitubakunda. Omu bwire nk’obu, nibaba nibenda abanywani barungi. (Enf. 17:17) Noobaasa kworeka ota ngu ori munywani waabo? Noobaasa kubeeta owaawe kugira eki waarya nabo. Kandi noobaasa kwehayo kubaho nabo omu by’okweshemeza nari omu kubuurira. Obumwe n’obumwe noobaasa kubeeta kukwegaitaho omu kuramya kwawe okw’eka. Waakora otyo, noija kushemeza Yehova, ahakuba ari “haihi ab’emitima ehendekire,” n’omurinzi, kandi ‘omucwi w’emanja ow’abafaakazi.’​—Zab. 34:18; 68:5.

19. Kurugiirira ahari 1 Petero 3:8, omaririire kukora ki?

¹⁹ Juba, Obukama bwa Ruhanga ku buraatandikye kutegyeka ensi, ‘enaku eza ira [zoona] niziija kweba.’ Twine ekihika ky’okureeba obunaku obu ‘ebya ira bitaraagarukye kwijukwa, n’obu kwakuba okuteebwaho omutima.’ (Isa. 65:16, 17) Obwire obwo butakahikire, ka tuhwerahwerane kandi tukyorekye omu bigambo n’omu bikorwa ngu nitukunda boona abari omu ka yaitu ey’eby’omwoyo.​—Shoma 1 Petero 3:8.