1. Kurugiirira aha biri omu Abakolosai 2:4, 8, Sitaane naateeraho ata kuhabisa emiteekateekyere yaitu?

SITAANE naayenda kutwiha ahari Yehova. Kubaasa kuhikiiriza ekigyendererwa kye ekyo naateeraho kuhabisa emiteekateekyere yaitu, kugira ngu tumworobere. Naateeraho kutubeihabeiha nari kutushendashenda arikukoresa ebi turikukunda.​—Shoma Abakolosai 2:4, 8.

2-3. (a) Ahabwʼenki kiri kikuru kuta omutima aha kurabura okuri omu Abakolosai 2:8? (b) Nituza kushwijuma ki omu kicweka ekirikurataho?

² Mbwenu shi buzima turi omu kabi k’amaani k’okuhabisibwa Sitaane? Eego, nikwo kiri! Ijuka ngu okurabura okuri omu Abakolosai 2:8 entumwa Paulo tarakuhandiikiire abatari Bakristaayo. Akaba naahandiikira Abakristaayo abaabaire bashukirweho amajuta. (Kol. 1:2, 5) Abakristaayo abo bakaba bari omu kabi, kandi naitwe turi omu kabi k’amaani obunaku obu. (1 Kor. 10:12) Ahabw’enki? Sitaane akanagwa aha omu nsi, kandi naateeraho kuhabisa abaheereza ba Yehova abeesigwa. (Kush. 12:9, 12, 17) Okwongyera ahari ekyo, turi omu bwire obu abantu babi ‘barikweyongyera kuba babi.’​—2 Tim. 3:1, 13.

³ Omu kicweka eki, nituza kureeba oku Sitaane arikukoresa ‘oburyarya obutaine mugasho’ kuhabisa emiteekateekyere yaitu. Nituza n’okugamba aha “bugobya” nari obukoryo bushatu obu arikukoresa. (Efe. 6:11) Reero omu kicweka ekirikukurataho, nituza kureeba oku twine kweihamu emiteekateekyere egwire ei turikubaasa kuba twine. Kwonka ka tubanze tureebe eki turikubaasa kwegyera aha muringo ogu Sitaane yaahabaisemu Abaisraeli bwanyima y’okuhika omu Nsi Eyaaraganisiibwe.

4-6. Kurugiirira aha Eky’Ebiragiro 11:10-15, Abaisraeli ku bahikire omu Nsi Eyaaraganisiibwe bakaba baine kuhindura bata emiringo yaabo ey’okuhinga?

⁴ Sitaane akakoresa orugyezigyezi kureetera Abaisraeli kwohibwa kushambana. Ekyo akakikora ata? Akaihirira aha kyetengo kyabo ky’okwenda eby’okurya reero yaabahabisa. Ku baahikire omu Nsi Eyaaraganisiibwe, bakaba baine kwega empinga nsya y’eby’okurya. Obu baabaire bari omuri Misri, bakaba nibaitirira emisiri barikukoresa amaizi g’omugyera Nailo. Kwonka omu Nsi Eyaaraganisiibwe hakaba hatariyo migyera mihango, n’ahabw’ekyo okuhinga kwabo kukaba nikubaisibwaho enjura n’amatondo g’orume agaabaire nigaza aha bimera. (Shoma Eky’Ebiragiro 11:10-15; Isa. 18:4, 5) Abaisraeli bakaba baine kwega emiringo misya y’okuhinga. Ekyo kikaba kitoorobi ahakuba baingi abaabaire nibamanya kuhinga bakaba bafeereire omu ihamba.

⁵ Yehova akashoboororera abantu be ngu mbeera zaabo zihindukire. Bwanyima akabaha okurabura okundi, omu kubanza okwareebekire nk’okutaine kakwate n’enshonga y’okuhinga. Akabagira ati: “Mwerinde, emitima yaanyu etaribeihwabeihwa, mukateishuka, mukaheereza baaruhanga abandi, mukabaramya.” (Bir. 11:16, 17) Ahabw’enki Yehova yaahaire okurabura aha bikwatiraine n’okuramya baaruhanga b’ebishuba obwo arikugamba aha kwega emiringo misya y’okuhinga?

⁶ Yehova akaba naamanya ngu Abaisraeli bakaba nibabaasa kwohibwa kwegyera aha bakaafiire abaabaire babeetooroire obukoryo bw’okuhinga. Buzima, bataahi baabo bakaba bari abahangu omu kuhinga okukira Abaisraeli, kandi bakaba nibabaasa kugira obukoryo obu baabeegyeraho, kwonka ekyo kikaba nikibaasa kurugamu akabi. Emiteekateekyere y’abahingi Abakanaani ekaba ehabisiibwe okuramya kwabo. Bakaba nibareeba Baali nka  mukama w’eiguru kandi oine obushoboorozi bw’okugwisa enjura. Yehova akaba atarikwenda ngu abantu be bahabisibwe enyikiriza nk’egyo ey’ekishuba. Kwonka emirundi mingi, Abaisraeli bakaguma nibacwamu kuramya Baali. (Kub. 25:3, 5; Bar. 2:13; 1 Bag. 18:18) Hati yeetegyereze oku Sitaane yaabaasize kuhabisa Abaisraeli.

7. Okwikiriza kw’Abaisraeli kukagyezibwa kuta ku baahikire omu Nsi Eyaaraganisiibwe?

⁷ Ekyetengo kya butoosha eky’okwenda ngu enjura egwe, niko kakoryo k’okubanza aku Sitaane yaakoreise kutega Abaisraeli. Kuruga omu Kwakana kuhitsya Okwamwenda buri mwaka, hakaba nihagwa enjura nkye omu Nsi Eyaaraganisiibwe. N’ahabw’ekyo ebihingwa bikaba nibibiisibwaho enjura ey’Okwaikumi. Sitaane akareetera Abaisraeli kuteekateeka ngu kubaasa kweza eby’okurya, bakaba baine kutwaza nka bataahi baabo abakaafiire. Bataahi baabo bakaba nibaikiriza ngu baine kugira emigyenzo ei baakora kureetera baaruhanga baabo kugwisa enjura. Abo abaabaire batarikwikiririza omuri Yehova bakareeba ngu ogu nigwo muringo gwonka ogw’okumaraho ekyanda ky’obwire buraingwa, n’ahabw’ekyo bakakora emigyenzo y’okuramya Baali ruhanga w’ebishuba.

8. Ni kakoryo ki ka kabiri aku Sitaane yaakoreise kuhabisa Abaisraeli? Shoboorora.

⁸ Akakoryo ka kabiri aku Sitaane yaakoreise kutega Abaisraeli n’ekyetengo kyabo ky’okwenda kuteerana. Abantu b’amahanga amakafiire bakaba nibaramya baaruhanga baabo barikwejumba omu by’obushambani ebirikuhemurana. Okuramya kugwire oku kukaba nikutwariramu okuraaya kw’abakazi n’okw’abashaija aha hekalu. Ebitingwa n’ebindi bikorwa by’obushambani bikaba nibiikirizibwa kandi birikureebwa nk’ebitaine nshonga! (Bir. 23:17, 18; 1 Bag. 14:24) Abakaafiire aba bakaba nibaikiriza ngu emigyenzo egi ekaba neehiga baaruhanga baabo kureetera eitaka kweza eby’okurya. Abaisraeli baingi bakakunda emigyenzo y’abakaafiire aba erimu eby’obushambani, kyabareetera kuheereza baaruhanga b’ebishuba. Omu muringo ogwo, Sitaane akabahindura enkwatwa ze.

9. Nk’oku kiri omu Hosea 2:16, 17, Sitaane akashiisha ata emiteekateekyere ei Abaisraeli baabaire baine ahari Yehova?

⁹ Akakoryo ka kashatu aku Sitaane yaakoreise n’okushiisha emiteekateekyere ei Abaisraeli baabaire baine ahari Yehova. Omu biro bya nabi Yeremia, Yehova akagira ngu baanabi b’ebishuba bakareetera abantu be kwebwa eiziina rye “ahabwa Baali.” (Yer. 23:27) Abaheereza ba Ruhanga bakarekyera aho kukoresa eiziina rye, barihaanisa n’eiziina Baali, amakuru ngu “Mukama wangye.” Eki kikaba nikiza kureetera Abaisraeli kugumirwa kutaanisa Yehova na Baali, reero bajwanzye emigyenzo y’okuramya Baali n’okuramya Yehova.​—Shoma Hosea 2:16, 17.

10. Sitaane naakoresa bukoryo ki obunaku obu?

¹⁰ Sitaane naakoresa obukoryo nibwo bumwe obunaku obu. Naahabisa abantu arikubareetera kukuratira ebyetengo byabo, kwejumba omu bushambani n’okubeebesa emitindo ya Yehova. Ka tubanze tureebe oku Sitaane arikukoresa akakoryo ka kashatu obunaku obu.

11. Sitaane naashiisha ata emiteekateekyere ei abantu baine ahari Yehova?

¹¹ Sitaane naashiisha emiteekateekyere ei  abantu baine ahari Yehova. Bwanyima y’okufa kw’entumwa za Yesu abeesigwa, bamwe abaabaire nibeetwara nk’Abakristaayo bakatandika kujanjaaza enyegyesa zigwire. (Byak. 20:29, 30; 2 Tes. 2:3) Abagomi aba bakatandika kureetera abantu kutamanya Ruhanga omwe ow’amazima. Nk’eky’okureeberaho, omu Baibuli zaabo bakaihamu eiziina rya Ruhanga, baacwamu kukoresa ebigambo nka “Mukama.” Ahabw’okwihamu eiziina rya Ruhanga bakarihaanisa na “Mukama,” nikireetera omuntu orikushoma Baibuli kugumirwa kumanya entaaniso eri aha gati ya Yehova na ‘bamukama’ abandi abarikugambwaho omu Byahandiikirwe. (1 Kor. 8:5) Nibakoresa ekitiinisa nikyo kimwe “Mukama,” kumanyisa Yehova na Yesu, kireetera abantu kugumirwa kwetegyereza ngu Yehova n’Omwana we nibataana, kandi ngu tibarikwingana. (Yoh. 17:3) Okubuzabuza oku kureetsireho enyegyesa y’Obushatu etari mu Kigambo kya Ruhanga. Ahabw’enyegyesa egyo baingi nibareeba Ruhanga nk’otarikwetegyerezibwa, kandi nibagira ngu tikirikubaasika kumumanya. Buzima eki ka n’ekishuba ky’akabi!​—Byak. 17:27.

12. Ediini y’ebishuba etwire neeshagika bikworwa ki, kandi kirugiremu ki nk’oku kirikworekwa omu Abarooma 1:28-31?

¹² Sitaane naareetera abantu kukuratira ebyetengo by’obushambani. Ira omu bwire bw’Abaisraeli, Sitaane akakoresa ediini y’ebishuba kushagika obushambani. Naakora nikyo kimwe obunaku obu. Ediini y’ebishuba neeshwekyerera ebikorwa by’obushambani kandi ebishagika. Ekirugiremu, baingi abarikwetwara nk’abarikuheereza Ruhanga tibarikworobera emitindo ye erikukwata aha micwe. Entumwa Paulo omu baruha ei yaahandiikire Abarooma naayoreka ekirikurugamu. (Shoma Abarooma 1:28-31.) Bimwe aha bintu “ebitashemeire” nibitwariramu obushambani obw’emiringo yoona otwariiremu n’obutingwa. (Rom. 1:24-27, 32; Kush. 2:20) Ka ni kikuru munonga ahariitwe kuhamira aha nyegyesa za Baibuli!

13. Ni kakoryo ki akandi aku Sitaane arikukoresa?

¹³ Sitaane naakoresa ebyetengo byaitu. Twena twine ekyetengo ky’okwega emyoga etari emwe n’emwe kubaasa kwebaisaho kandi tukareeberera n’ab’omu maka gaitu. (1 Tim. 5:8) Kaingi, emyoga egi nitugitunga twaza  ah’eishomero kandi tukeega n’amaani. Kwonka twine kwegyendesereza. Omu mahanga maingi, abeegi aha ishomero nibabeegyesa emyoga n’obwengye bw’abantu. Abeegi nibeegyesibwa kubangaanisa aha kubaho kwa Ruhanga n’okutaha Baibuli ekitiinisa. Kandi nibeegyesibwa ngu enyegyesa erikugira ngu ebintu bikaruga omu bindi niyo nshoboorora y’obwengye yonka erikworeka obukomooko bw’amagara. (Rom. 1:21-23) Enyegyesa nk’ezi nizihakanisa “obwengye bwa Ruhanga.”​—1 Kor. 1:19-21; 3:18-20.

14. Ni bintu ki ebibi ebirikuruga omu kukuratira obwengye bw’abantu?

¹⁴ Obwengye bw’abantu nibwehuzya emitindo ya Yehova ehikire nari bugihakanisa. Tiburikutuhwera kugira emitwarize y’omwoyo ogurikwera, kureka “emirimo y’obuzaarwa bw’omubiri.” (Gal. 5:19-23) Nibutureetera kugira amaryo n’omwetunguuro, n’ekirikurugamu abantu nibatandika ‘kwekunda.’ (2 Tim. 3:2-4) Emitwarize egi neetaanira kimwe aha mutwarize gw’obucureezi ogu Ruhanga arikwenda abaheereza be bagire. (2 Sam. 22:28) Abakristaayo abamwe abagiire kutunga obwegyese bwa yunivasite bahabisiibwe obwengye bw’abantu omu mwanya gw’okugira emiteekateekyere ya Ruhanga. Ka tushwijume eky’okureeberaho kimwe ekirikworeka ekirikubaasa kubaho.

15-16. Ekyahikire ahari munyaanyazi-itwe omwe nitukyegyeraho ki?

¹⁵ Munyaanyazi-itwe omazire emyaka erengire 15 omu buheereza obw’obutwire naagira ati: “Ahabw’okuba omwe aha Bajurizi ba Yehova obatiziibwe, ntwire ninshoma aha kabi k’obwegyese bwa yunivasite kandi ndikukahurira, kwonka ndikwehuzya okurabura okwo.  Nkaba ninteekateeka ngu obuhabuzi obu tiburikunkwataho.” Akatunga buremeezi ki? Naagira ati: “Amashomo agu naabaire niinyega gakaba nigatwara obwire buraingwa n’amaani, kandi nkaba ntaine bwire burikumara obw’okushaba Yehova nk’oku naabaire ninkora enyima, nkaba mba nduhire kwejumba omu kugaaniira ahari Baibuli n’abandi, kandi nkaba mba nduhire kutebeekanisiza gye enteerane. Kwonka ku naayetegyereize ngu obwegyese bw’ahaiguru nibushiisha omukago gwangye na Yehova, nkamanya ngu nyine kurekyera aho. Kandi nikyo naakozire.”

¹⁶ Obwegyese bw’ahaiguru bukashiisha buta emiteekateekyere ya munyaanyazi-itwe omwe? Naagarukamu ati: “Nimpemuka kwikiriza ngu obwegyese obu naatungire bukanyegyesa kuta omutima aha nshobe z’abandi, okukira munonga ab’eishe-emwe n’abanyaanyazi-itwe, okubeenza ebi batarikubaasa, n’okubeetanisaho. Kikantwarira obwire buraingwa kurekyera aho kuteekateeka ntyo. Nketegyereza oku kiri eky’akabi okwehuzya obuhabuzi obu Tataitwe ow’omu iguru arikutuha kurabira omu kibiina kye. Yehova akaba nammanya gye kukira oku ndikwemanya. Nkaba nshemereire kumuhurikiza omu kubanza!”

17. (a) Twine kumariirira kukora ki? (b) Nituza kushwijuma ki omu kicweka ekirikukurataho?

¹⁷ Mariirira okutahabisibwa “obwengye bw’abantu n’oburyarya obutaine mugasho” obw’ensi egi embi erikwebemberwa Sitaane. Yerinde obukoryo bwa Sitaane. (1 Kor. 3:18; 2 Kor. 2:11) Otaikiriza Sitaane kukureetera kwebwa oku oshemereire kuramya Yehova. Guma noogyendera aha mitindo ya Yehova ey’emicwe erikukirayo. Kandi otaikiriza Sitaane kukubeihabeiha okareka kukuratira obuhabuzi bwa Yehova. Kwonka shi ku waakushanga ngu waatandikire kuhabisibwa emiteekateekyere y’ensi egi? Ekicweka ekirikukurataho nikiza kworeka oku Ekigambo kya Ruhanga kirikubaasa kutuhwera kusingura emiteekateekyere n’emize eri ‘nk’ebigo’ bihami.​—2 Kor. 10:4, 5.