1. Ahabw’enki twine kworobera okurabura kwa Yesu?

YESU arikugamba aha bunabi oburikukwata aha biro by’emperu, akagira ati: ‘Mwerinde emitima yaanyu etakaaremesibwa amaganya g’amagara aga,’ ekirikumanyisa amaganya g’okutunga esente z’okwebaisaho nari okwerarikirira aha mbeera za buri izooba. (Luk. 21:34) Twine kworobera okurabura okwo. Ahabw’enki? Ahakuba hati twena twine kwemera amaganya agarikureetwaho oburemeezi obu buri omwe aine.

2. Ni buremeezi ki oburikureeta amaganya obu ab’eishe-emwe na banyaanyazi-itwe baine?

² Obumwe nitugira oburemeezi oburikureeta amaganya omu bwire bumwe. Yetegyereze eby’okureeberaho ebi. Omujurizi wa Yehova oine endwara ya muhinya, orikwetwa John, * akagwerwa akagwe omukazi we ou yaabaire amazire nawe emyaka 19 omu bushwere, ku yaamutsigireho. Bwanyima abahara babiri bakarekyera aho kuheereza Yehova. Bob n’omukazi we Linda bakaba baine oburemeezi oburikutaana n’obwa John. Bombi bakafeerwa emirimo yaabo, baaremwa n’okushashurira enju yaabo. Okwongyera aha buremeezi obwo, Linda akacebeza yaashanga aine endwara y’omutima erikubaasa kumwita, kandi endwara endiijo ekaba etandikire kushiisha obutafaari oburikurwanisa endwara.

3. Kurugiirira aha Abafilipi 4:6, 7, nitubaasa kugira buhame ki?

³ Nitubaasa kugira obuhame ngu Omuhangi waitu, kandi Tataitwe Yehova naayetegyereza gye oku turikwehurira  twaba twine amaganya. Kandi naayenda kutuhwera kwemera embeera zigumire ezi turikuba twine. (Shoma Abafilipi 4:6, 7.) Ekigambo kya Ruhanga nikigamba aha baheereza be abaabaasize kugumisiriza. Kandi nikyoreka n’oku Yehova yaabahweraire kwemera amaganya. Ka tushwijume bamwe aharibo.

4. Eliya akaba aine mbeera ki ezigumire, kandi akaba aine miteekateekyere ki ahari Yehova?

⁴ Eliya akaheereza Yehova omu bwire bugumire, kandi akaraba omu mbeera zigumire. Omugabe Ahabu, omwe aha bagabe ba Israeli owaabaire atari mwesigwa akaba aine omukazi w’emicwe mibi orikwetwa Yezebeeli owaabaire naaramya Baali. Bombi bakajanjaaza okuramya Baali omuri Israeli, kandi bakaita na baanabi ba Yehova. Eliya akabaasa kuhunga. Kandi akakira n’enjara y’amaani ahabw’okwesiga Yehova. (1 Bag. 17:2-4, 14-16) Okwongyera ahari ekyo, Eliya ekeesiga Yehova obu yaataahirira baanabi abaabaire nibaramya Baali. Akahiga Abaisraeli kuheereza Yehova. (1 Bag. 18:21-24, 36-38) Eliya akaba aine obuhame bwingi ngu Yehova naamushagika omu bwire bw’amaganya.

5-6. Kurugiirira aha 1 Bagabe 19:1-4, Eliya akeehurira ata, kandi Yehova akooreka ata ngu naakunda Eliya?

⁵ Shoma 1 Abagabe 19:1-4. Kwonka Eliya akatiina, obu omugabekazi Yezebeeli yaatiinatiinisa kumwita. N’ahabw’ekyo akahunga yaaza omu mwanya ogurikwetwa Beeri-sheba. Akatamwa embeera “yaashaba Ruhanga ngu afe.” Niki ekyamureeteire kwehurira atyo?  Eliya akaba ari otahikiriire, “akaba ari omuntu nkaitwe.” (Yak. 5:17) Obundi akarengwa amaganya n’oburuhe bw’omubiri. Nikireebeka Eliya akateekateeka ngu okuteeraho kwe kwenegyeza okuramya okw’amazima kufiire busha, ngu tihaine ekihindukire omuri Israeli, kandi ngu niwe wenka okirikuheereza Yehova. (1 Bag. 18:3, 4, 13; 19:10, 14) Nikibaasa kututangaaza kureeba ngu nabi akeehurira atyo. Kwonka Yehova akeetegyereza enyehurira za Eliya.

⁶ Yehova taragambiire kubi Eliya ahabw’okworeka enyehurira ze. Omu mwanya gw’ekyo, akamuhwera kugaruka kugira amaani. (1 Bag. 19:5-7) Bwanyima Yehova akahwera Eliya kuhindura emiteekateekyere ye arikumworeka ngu aine amaani maingi. Kandi Yehova akooreka Eliya ngu hakiriho baanabi abandi 7,000 omuri Israeli abaayangire kuramya Baali. (1 Bag. 19:11-18) Omu muringo ogu, Yehova akooreka Eliya ngu naamukunda.

7. Omuringo ogu Yehova yaahwerairemu Eliya nigutuha buhame ki?

⁷ Oine oburemeezi bw’amaani? Ka nikihuumuriza kumanya ngu Yehova akeetegyereza enyehurira za Eliya! Eki nikituhamiza ngu naayetegyereza oku turikwehurira twaba twine oburemeezi bwingi. Naamanya obugarukiro bwaitu, kandi naaba naamanya eki turikuteekateeka n’oku turikwehurira. (Zab. 103:14; 139:3, 4) Twatooreza Eliya turikwesiga Yehova, naija kutuhwera kusingura oburemeezi bwaitu oburikutureetera amaganya.​—Zab. 55:22.

8. Yehova naija kukuhwera ata kusingura amaganya?

⁸ Amaganya nigabaasa kukureetera kugira emiteekateekyere egwire, kikumaremu amaani. Ekyo kyabaho, ijuka ngu Yehova naija kukuhwera kusingura amaganya. Naija kukuhwera ata? Naakuhiga kumugambira ebirikukwerarikiriza. Kandi naija kukugarukamu waamushaba obuhwezi. (Zab. 5:3; 1 Pet. 5:7) N’ahabw’ekyo guma nooshaba Yehova orikumugambira oburemeezi bwawe. Tarikwija kugamba naiwe butunu nk’oku yaagambire na Eliya, kwonka naagamba naiwe kurabira omu Kigambo kye Baibuli, n’ekibiina kye. Ebi orikushoma omu Baibuli nibibaasa kukuhuumuriza kandi bikuhe amatsiko. Kandi ab’eishe-emwe na banyaanyazi-itwe nabo nibabaasa kukugumya.​—Rom. 15:4; Heb. 10:24, 25.

9. Omunywani ou orikwesiga naabaasa kukuhwera ata?

⁹ Yehova ku yaagambiire Eliya kurekurira Elisa obujunaanizibwa, akaha Eliya omuhwezi owaabaire naamuhwera kwemera amaganya ge. Nikyo kimwe, waagambira munywani waawe enyehurira ezi oine, naabaasa kukuhwera waaba nooyehurira kubi. (2 Bag. 2:2; Enf. 17:17) Ku oraabe nooteekateeka ngu toine w’okugambira oburemeezi bwawe, shaba Yehova kukuhwera kutunga Omukristaayo okuzire omu by’omwoyo kukugumya.

10. Ebi Eliya yaarabiremu nibituha bita amatsiko, kandi okuraganisa okuri omu Isaaya 40:28, 29 nikutuhwera kuta?

¹⁰ Yehova akahwera Eliya kusingura amaganya ge, reero yaagumizamu naaheereza omu bwesigwa. Ebi Eliya yaarabiremu nibituha amatsiko. Nitubaasa kutunga oburemeezi oburikureeta amaganya maingi reero tuhwemu amaani omu mubiri n’omu nyehurira. Kwonka twayesiga Yehova, naija kutuha amaani g’okugumizamu nitumuheereza.​—Shoma Isaaya 40:28, 29.

11-13. Amaganya gakakwata gata aha baheereza ba Ruhanga bashatu aba ira?

¹¹ Hariho abandi abarikugambwaho omu Baibuli abaatungire amaganya maingi. Nk’eky’okureeberaho,  Hanna akagira amaganya maingi ahabw’okuba engumba n’ahabw’okwemera ebijumo bya muka iba. (1 Sam. 1:2, 6) Amaganya ga Hanna gakamureetera kugira obusaasi bwingi yaahika n’aha kurira yaaremwa n’okurya eby’okurya.​—1 Sam. 1:7, 10.

¹² Obumwe, Omugabe Daudi akaba arengwa amaganya. Teekateeka aha mbeera zigumire ezi yaarabiremu. Okweshinja ahabw’enshobe ezi yaakozire kukamureetera kuhwamu amaani. (Zab. 40:12) Omutabani omukundwa orikwetwa Abusolomu akamugomera, ekyarugiiremu Abusolomu kwitwa. (2 Sam. 15:13, 14; 18:33) Kandi omwe ahari banywani ba Daudi ab’aha mara akamureebya. (2 Sam. 16:23–17:2; Zab. 55:12-14) Zaaburi nyingi ezi Daudi yaahandiikire nizooreka enyehurira ze, enaku ei yaabaire aine n’obwesigye bw’amaani obu yaabaire aine omuri Yehova.​—Zab. 38:5-10; 94:17-19.

¹³ Bwanyima, omuhandiiki wa Zaaburi ondiijo akeegomba abantu ababi. Naabaasa kuba yaabaire ari mwijukuru w’Omuleevi orikwetwa Asafu owaabaire naaheereza omu mwanya gwa Ruhanga ogurikwera. Omuhandiiki wa Zaaburi ogu akaba aine amaganya omu nyehurira, ekyamureeteire kutashemererwa n’okutamarwa. Akatandika n’okubangaanisa aha migisha erikuruga omu kuheereza Ruhanga.​—Zab. 73:2-5, 7, 12-14, 16, 17, 21.

14-15. Nitwegyera ki aha bantu bashatu abarikugambwaho omu Baibuli aha bikwatiraine n’okushaba Yehova obuhwezi?

¹⁴ Abaheereza ba Yehova bashatu abaagambwaho boona bakamwesiga. Bakamugambira okwerarikirira kwabo kurabira omu kushaba. Bakagambira Yehova butunu enshonga ezaabaire nizibareetera kugira amaganya. Kandi bakagumizamu nibaza omu iramizo rya Yehova.​—1 Sam. 1:9, 10; Zab. 55:22; 73:17; 122:1.

 ¹⁵ Yehova akagarukamu buri omwe aharibo. Hanna akagira obugwagye. (1 Sam. 1:18) Daudi akahandiika ati: “Ebibonabono by’ohikiriire ni bingi; kwonka [Yehova] abimwihamu byona.” (Zab. 34:19) Omuhandiiki wa Zaaburi bwanyima akamanya ngu Yehova akaba ‘akwaitse omukono [gwe] gwa buryo,ʼ arikumuha obuhabuzi oburikworeka ngu naamukunda. Akeeshongora ati: “Ekirungi ahariinye n’okwirira haihi Ruhanga; [Yehova] Ruhanga mmuhindwire obweshereko bwangye.” (Zab. 73:23, 24, 28) Niki eki turikwegyera aha by’okureeberaho ebi? Obumwe n’obumwe, nitwija kuba nitutunga oburemeezi oburikutureetera amaganya. Kwonka nitubaasa kugumisiriza twateekateeka aha ku Yehova yaahweraire abandi, twamwesiga kurabira omu kushaba, kandi tukamworobera turikukora ebi arikutushaba kukora.​—Zab. 143:1, 4-8.

16-17. (a) Ahabw’enki tutashemereire kwetaanisa ahari Yehova n’abaheereza be? (b) Nitubaasa kugarurwamu tuta amaani?

¹⁶ Eby’okureeberaho ebyo bishatu nitubyegyeraho erindi eishomo, ngu titushemereire kwetaanisa ahari Yehova n’abantu be. (Enf. 18:1) Nancy, owaagizire amaganya maingi obu iba yaamutsigaho, naagira ati: “Ebiro bingi nkaba mpurira ntarikwenda kureeba omuntu weena nari kugamba nawe. Kwonka,  ku naabaire nyeyongyera kwetaanisa aha bantu, nyeyongyera kugira ekiniga.” Ebintu bikahinduka Nancy ku yaatandikire kuhwera abandi abaabaire baine oburemeezi. Naagira ati: “Nkaba mpurikiza abandi barikushoboorora oburemeezi bwabo. Nketegyereza ngu ku naabaire mbasaasibwa, nkaba ntata munonga omutima aha buremeezi bwangye.”

¹⁷ Nitubaasa kugarukwamu amaani turikuza omu nteerane. Twaba turi omu nteerane, nitwongyera kuha Yehova omugisha ‘gw’okutuhwera, n’okutuhuumuriza.’ (Zab. 86:17) Naatuha amaani arikukoresa omwoyo gwe ogurikwera, Ekigambo kye, n’abaheereza be. Enteerane nizitubaasisa kutunga omugisha ‘gw’okugumyana.’ (Rom. 1:11, 12) Munyaanyazi-itwe orikwetwa Sophia akagira ati: “Yehova n’ab’eishe-emwe bakampwera kugumisiriza. Enteerane zaitu ez’ekibiina zikaba ziri nkuru ahariitwe. Nshangire ngu ku ndikweyongyera kwejumba omu kubuurira n’omu ntebeekanisa z’ekibiina, nyeyongyera kwemera amaganya n’okwerarikirira.”

18. Twaba tuhwairemu amaani Yehova naatuhwera ata?

¹⁸ Waagira amaganya, ijuka ngu Yehova naatuhwera kugumisiriza hati, kandi naaturaganisa oburuhuuko bw’obutwire omu biro by’omumaisho. Naatuha “okukunda” n’amaani g’okusingura enyehurira z’okutamwa n’okwehwa amatsiko.​—Fil. 2:13.

19. Abarooma 8:37-39 nihaturaganisa ki?

¹⁹ Shoma Abarooma 8:37-39. Entumwa Paulo naatuhamiza ngu tihaine ekirikubaasa kututaanisa na rukundo ya Ruhanga. Nitubaasa kuhwera tuta ab’eishe-emwe na banyaanyazi-itwe abarikuteganisibwa amaganya? Ekicweka ekirikukurataho nikiza kworeka oku turikubaasa kutooreza Yehova turikugirira ab’eishe-emwe na banyaanyazi-itwe embabazi baaba baine amaganya, kandi tukabashagika.