Girira Esaasi “Abantu Boona”
OBU Yesu yaayegyesa abakuratsi be oku baine kubuurira amakuru marungi, akabarabura ngu abantu abamwe tibarikwija kubahurikiza. (Luka 10:3, 5, 6) Nikyo kimwe naitwe twaba nitubuurira. Abamwe abu turikuburira nibabaasa kutugambira kubi nari barikwenda kurwana. Ku barikutwaza omu muringo ogu, nikibaasa kutugumira kubagirira esaasi n’okubabuurira.
Omuntu oine esaasi naareeba oburemeezi n’ebyetengo by’abandi, reero abasaasibwa, kandi naaba naayenda kubahwera. Niki ekirikubaasa kubaho twaba tutagirire abantu esaasi omu kubuurira? Omujinya gwaitu nigwija kutuuba, kandi tituraije kugira ekihika ky’okwenda kubabuurira n’okubahwera. Omujinya gwaitu nigushushanisibwa n’omuriro. Omuriro kubaasa kwaka gye, oine kwongyeramu enku. Omu muringo nigwo gumwe, kubaasa kugira omujinya gw’okubuurira twine kugirira abandi esaasi!—1 Abatesalonika 5:19.
Nitubaasa kwongyera tuta kugirira abandi esaasi n’obu kyakuba kitoorobi? Ka tureebe eky’okureeberaho ekya, Yehova, Yesu, n’entumwa Paulo.
GIRA ESAASI NK’EZI YEHOVA AINE
Kumara ebyasha bingi, abantu batwire nibagamba ebitahikire ahari Yehova. Kwonka atwire naatwariza gye ‘abatarikusiima n’ababi.’ (Luka 6:35) Naabooreka ata embabazi? Naagumisiriza buri omwe kandi naayenda ngu “abantu boona” bajunwe. (1 Timoseo 2:3, 4) N’obu Ruhanga arikwanga obubi, abantu n’ab’omuhendo ahariwe, kandi tarikwenda omuntu weena kuhwerekyerera.—2 Petero 3:9.
Yehova naamanya ngu Sitaane naamanya kubeihabeiha abantu kwikiriza ebishuba bye. (2 Abakorinso 4:3, 4) Baingi tibeegyesiibwe amazima agarikukwata ahari Ruhanga okwiha omu buto. N’ahabw’ekyo oku barikuteekateeka n’oku barikwehurira nikubaasa kubareetera kugumirwa kwikiriza amazima. Kwonka Yehova aine ekihika ky’okubahwera. Nitukimanya tuta?
Nk’eky’okureeberaho, teekateeka aha ku Yehova yaayehuriire ahabw’abantu ba Nineeve. N’obu baabaire bari enshaarizi, Yehova akagambira Yona ati: “Mbwenu noogira ngu tinkusaasiibwe Nineeve, orwo rurembo ruhango, orurimu abantu akasiriira kamwe n’obukumi bubiri n’okukiraho [120,000], abatarikubaasa kutaanisa ndyo na mosho?” (Yona 4:11) Yehova akagirira esaasi abantu abo, abaabaire batarikumanya amazima agarikumukwataho. Nikyo yaatumiire Yona kubarabura.
Naitwe twine kugirira abantu esaasi nk’ezi Yehova abainiire. N’ab’omuhendo ahariwe. Nka Yehova, nituba tweteekateekire kubahwera kumumanya n’obu baakuba nibareebeka nk’abatarikwenda.
GIRA ESAASI NK’EZI YESU YAABAIRE AINE
Yesu akagirira abantu esaasi nk’eza ishe “ahakuba bakaba baburaburiirwe, bashobeirwe nk’entaama ezitaine muriisa.” (Matayo 9:36) Yesu akeetegyereza ahabw’enki baabaire bari omu mbeera nk’egyo. N’ahabw’okugira ngu abeebembezi b’ediini bakaba nibabeegyesa ebishuba, kandi barikubatwariza kubi. Yesu akabeegyesa bingi n’obu yaabaire naamanya ngu baingi aharibo ahabw’enshonga zitari zimwe, bakaba batarikwija kuba abakuratsi be.—Mako 4:1-9.
Otahwamu amaani omuntu yaayanga kuhurikiza omurundi gw’okubanz
Embeera ku zirikuhinduka, abantu nibabaasa kwikiriza amazima
Abantu ku barikwanga obutumwa bwaitu, twine kuteeraho kumanya ahabw’enki nibanga. Obundi baine emiteekateekyere etahikire ahari Baibuli nari aha Bakristaayo ahakuba nibareeba abarikweyeta Abakristaayo abarikukora ebihagaro. Abandi nibabaasa kuba bagambiirwe ebishuba aha bi turikwikiriza. Kandi abandi nibatiina ngu abanyabuzaare nari ab’omu kicweka kyabo nibaija kubashekyerera baagamba naitwe.
Abamwe abu turikubuurira nibabaasa kuba baahikirweho oburemeezi bw’amaani. Kim omumiisani naagira ngu abantu b’omu kicweka kye bakafeerwa byona ebi baabaire baine omu rutaro. Tibaine matsiko aha biro by’omumaisho. Bashobeirwe kandi tibarikwesiga muntu weena. Abantu b’omu kicweka eki nibakira kuzibira Abajurizi ba Yehova kubuurira. Eizooba rimwe Kim bakamutwariza kubi.
Kim naayoreka ata esaasi, n’obu abantu baakumutwariza kubi? Naateeraho kwijuka ebiri omu Enfumu 19:11, aharikworeka ngu: “Okwerinda kw’omuntu kumuzibira kurahuka kugira ekiniga.” Ku arikuteekateeka aha bi abantu b’omu kicweka kye barabiremu nikimuhwera kubagirira esaasi. Kandi ti boona ngu nibamutwariza kubi. Omu kicweka ekyo ainemu abantu barungi abu arikugarukira.
Nitubaasa kwebuuza tuti: ‘Kuri naabaire ntarikumanya amazima, Abajurizi ba Yehova nkaba ninyija kubatwariza nta baija kumbuurira?’ Nk’eky’okureeberaho, ku ogire ngu nkaba naahuriire nibabagambaho ebishuba? Obundi naiwe okaba noija kubatwariza kubi, kandi obwo orikwenda ngu bo bakugirire esaasi. Yesu akagira ngu twine kutwariza abandi nk’oku turikwenda batutwarize. N’ahabw’ekyo teeraho kwetegyereza oku abandi barikwehurira, kandi obagumisirize n’obu kyakuba kitoorobi.—Matayo 7:12.
GIRA ESAASI NK’EZI PAULO YAABAIRE AINE
Entumwa Paulo akagirira boona esaasi otwariiremu n’abo abaamutwariize kubi. Ahabw’enki? Ahakuba akaijuka oku yaabaire naatwaza. Akagira ati: “N’obu ndaabe obunyakare naamurogotsireho, nkamujuma, ndi omuntu enshaarizi; kwonka nkasaasirwa ahabw’okubikorera omu butamanya n’omu butaikiriza.” (1 Timoseo 1:13) Paulo akaba naamanya ngu Yehova na Yesu bakamugirira embabazi nyingi. Akaba naayetegyereza enyehurira z’abantu abaabaire nibenda kumuremesa kubuurira, ahakuba nawe nikwo yaabaire ari.
Obumwe, Paulo akaba ashanga abantu abaabaire nibaikiririza omu nyegyesa ezitahikire. Eki kikamureetera kwehurira ata? Omu Ebyakozirwe 17:16, nihooreka ngu obu yaabaire ari omuri Aseene “omutima gwe gukashaasha munonga ahabw’okureeba orurembo rwijwire ebishushani ebirikuramibwa.” Kwonka, Paulo akakoresa byenyine ebyamugwisize kubi kwegyesa abantu. (Ebyakozirwe 17:22, 23) Akaguma naahindahindura omu muringo ogu arikubuuriramu, n’ogu yaabaire naagaaniiramu n’abantu batarikushushana kugira “ngu omu miringo yoona abone kukiza bamwe.”—1 Abakorinso 9:20-23.
Nitubaasa kutooreza Paulo twaba nitubuurira abantu abarikwanga obutumwa bwaitu, nari abarikwikiriza ebitari mu Baibuli. Nitubaasa kukoresa ebi turikubamanyaho kubahwera kwega ebirikukwata aha ‘makuru marungi.’ (Isaaya 52:7) Munyaanyazi-itwe Dorothy naagira ati: “Omu kicweka kyaitu, baingi begyesiibwe ngu Ruhanga taine saasi, kandi ngu naafubira abantu. Nimbasiima ahabw’okwikiririza omuri Ruhanga, reero mbooreka eki Baibuli erikwegyesa aha mitwarize ye eya rukundo n’ebiraganiso bye eby’omu biro by’omumaisho.”
“EKIBI OKISINGUZE EKIRUNGI”
Obu turikwirira haihi n’emperu, abantu nibaija kweyongyera “kuba babi.” (2 Timoseo 3:1, 13) Kwonka n’obu baakututwariza kubi twine kugumizamu kubagirira esaasi kandi tushemereirwe. Yehova naija kutuhwera kusingura ekibi turikukora ekirungi. (Abarooma 12:21) Jessica ori payoniya naakira kushanga abantu abaine amaryo, abarikukunda kushekyerera Abajurizi ba Yehova n’obutumwa bwabwo. Naayongyera agira ati: “Eki nikingwisa kubi. Ku ndikutandika kugaaniira nabo ninshaba Yehova kumpwera kugira emiteekateekyere nk’eye.” Eki nikimuhwera kwetantara kuta omutima aha nyehurira zaabo beitu aha kubahwera.
Nitugumizamu kusherura abarikwenda kumanya amazima
Bwanyima, abantu abamwe nibaija kwakiira obuhwezi bwaitu kandi beegye amazima
Twine n’okuteeraho kuhiga ab’eishe-emwe bagyenzi baitu twaba nitubuurira nabo. Jessica naagira ngu yaaba ari omu kubuurira kandi ow’eishe-emwe baakamutwariza kubi naayetantara kuta omutima aha kyabaho. Omu mwanya gw’ekyo, naagamba aha birungi ebirikubaasa kuruga omu kubuurira n’obu abandi baakwanga obutumwa bwaitu.
Yehova naamanya gye ngu obumwe nikitugumira kubuurira. Kwonka naashemererwa ku turikumutooreza omu kworeka abandi embabazi! (Luka 6:36) Nitumanya ngu Yehova tarikwija kugumisiriza abantu babi ebiro byona. Nitubaasa kuhamya ngu Yehova naamanya obu araareete emperu. Ekiro ekyo kitakahikire, omurimo gw’okubuurira ni mukuru. (2 Timoseo 4:2) N’ahabw’ekyo ka tugumizemu kubuurira n’omujinya turikugirira “abantu boona” esaasi.
