1, 2. (a) Ahabw’enki kiri eky’obwengye kuguma aha rubaju rwa Yehova? (b) Nituza kwega ki omu kicweka eki?

N’EKY’OBWENGYE ahariitwe kuguma haihi na Yehova. Tihaine oine rukundo, obwengye n’amaani nkawe. Buzima nitwenda kuguma turi abeesigwa ahariwe kandi tukaza aha rubaju rwe. (Zaaburi 96:4-6) Kwonka bamwe abaabaire nibaramya Ruhanga bakaremwa kuguma bari abeesigwa.

² Omu kicweka eki, nituza kugamba ahari bamwe abaabaire nibeetwara nk’abari aha rubaju rwa Yehova kwonka nabwo barikukora ebi arikwanga. Ebi turayegyere aha by’okureeberaho byabo nibiija kutuhwera kuguma turi abeesigwa ahari Yehova.

3. Ahabw’enki Yehova yaabaire naayenda kuhwera Kaini, kandi akamugambira ki?

³ Teekateeka aha ky’okureeberaho kya Kaini. Akaba atarikuramya baaruhanga b’ebishuba kwonka nabwo Yehova  tarasiimire okuramya kwe. Ahabw’enki? Yehova akareeba ngu omu mutima gwa Kaini hakaba harimu emiteekateekyere mibi. (1 Yohaana 3:12) Yehova akarabura Kaini ati: “Ku oraakore gye torikwija kusiimwa? Kwonka ku oraabe otakozire gye, ekibi nikiija kuguma kibandami aha rwigi, kikugwereire; kwonka iwe oshemereire kukitegyeka?” (Okutandika 4:6, 7) Yehova akaba naarabura Kaini ngu yaayeteisa akaza aharubaju rwe, nawe naija kumuguma haihi.

4. Kaini akakora ki obu yaabaire aine omugisha gw’okushagika Yehova?

⁴ Kuri Kaini yaahindwire aha miteekateekyere ye, Yehova akaba naabaasa kugaruka kusiima okuramya kwe. Kwonka Kaini we akamugomera, arikucwamu kugyendera aha biteekateeko bye bibi n’ebyetengo bibi ekyamureeteire kukora ekibi. (Yakobo 1:14, 15) Obu Kaini yaabaire ari muto, naabaasa kuba yaabaire atarikuteekateeka ngu naija kugomera Yehova. Kwonka hati akeehuzya okurabura kwa Ruhanga, yaamugomera kandi yaita n’omurumuna!

5. Ni miteekateekyere ki erikubaasa kutureetera kutasiimwa Yehova?

⁵ Nka Kaini, Omukristaayo obunaku obu naabaasa kwetwara nk’orikuramya Yehova kwonka buzima arikukora ebi Yehova arikwanga. (Yuda 11) Naabaasa kuba naayejumba omu kubuurira, kandi arikuza omu nteerane butoosha. Kwonka naabaasa kuba naareeba n’ebishushani ebirikwitsa enshoni, aine biteekateeko by’omururu, nari aine rwango. (1 Yohaana 2:15-17; 3:15) Emiteekateekyere nk’egi neebaasa kumureetera kushiisha. Abandi nibabaasa kutamanya ebi turikuteekateeka nari ebi turikukora, kwonka Yehova naabimanya. Naamanya yaaba buzima tutari aha rubaju rwe.​—Shoma Yeremia 17:9, 10.

6. Yehova naatuhwera ata kusingura ebyetengo bibi?

⁶ N’obu twakukora enshobe, Yehova tarikurahuka kututsigaho. Twaba nituza kuteishuka omu muhanda oguhikire, Yehova naatweta ati: “Mungarukire, naanye niinyija kubagarukira.” (Malaki 3:7) Yehova naamanya ngu buri omwe aine obweremwa bwe. Kwonka naayenda ngu tugume tuhami kandi twetantare kukora ekibi. (Isaaya 55:7) Twakora tutyo, naaturaganisa ngu naija kutuhwera kandi atuhe amaani g’okusingura ebyetengo bibi.​—Okutandika 4:7.

7. Omugabe Sulemaani akafeerwa ata omukago ogu yaabaire aine na Yehova?

⁷ Obu Sulemaani yaabaire ari muto, akaba aine omukago murungi na Yehova. Ruhanga akabaasisa Sulemaani kugira obwengye bwingi, kandi yaamuha n’obujunaanizibwa bw’okwombeka hekalu omuri Yerusaalemu. Kwonka Sulemaani akafeerwa omukago gwe na Yehova. (1 Abagabe 3:12; 11:1, 2) Ekiragiro kya Ruhanga kikaba nikyoreka ngu omugabe taine “kushwera abakazi baingi” kugira ngu omutima gwe gutahinduka kukaruga ahari Yehova. (Eky’Ebiragiro 17:17) Sulemaani akagomera ekiragiro eki, yaagira abakazi 700 n’ebinyanshunju 300. (1 Abagabe 11:3) Baingi aha bakazi aba bakaba bari abanyamahanga, abaabaire nibaramya baaruhanga b’ebishuba. Kandi Sulemaani akagomera ekiragiro kya Ruhanga eky’okutashwera abakazi b’enduga-mahanga.​—Eky’Ebiragiro 7:3, 4.

8. Omugabe Sulemaani akagwisa kubi ata Yehova?

 ⁸ Mporampora, rukundo ei omugabe Sulemaani yaabaire ainiire ebiragiro bya Yehova ekatuuba. Ekyarugiremu, akakora ebintu bibi munonga. Akombekyera baaruhanga b’ebishuba nka Ashitaroosi na Kemoshi amatambiro, reero we n’abakazi be baaramya baaruhanga abo. Sulemaani akombeka amatambiro aga aha rushozi, haihi na Yerusaalemu ahu yaabaire yaayombekire hekalu ya Yehova! (1 Abagabe 11:5-8; 2 Abagabe 23:13) Obundi Sulemaani akeebeiha okuteekateeka ngu Yehova tarikwija kufayo aha bibi ebi arikukora, yaaguma naahayo ebitambo aha hekalu.

9. Sulemaani ku yaayangire kukuratira okurabura kwa Ruhanga niki ekyabaireho?

⁹ Kwonka Yehova tarikubaasa kwehuzya ekibi. Baibuli neegira ngu Yehova akagirira “Sulemaani ekiniga, ahabw’okuba omutima gwe gukaba gurugire ahari” Yehova. Ruhanga akateeraho kuhwera Sulemaani. Emirundi ebiri ‘akamwehanangiriza aha kintu eki, kutakuratira baaruhanga abandi; kwonka tiyaakora nk’oku’ Yehova yaamuragiire. Ekyarugiremu Ruhanga akaba atakimushagika kandi atakimusiima. Yehova taraikiriize baijukuru ba Sulemaani kutegyeka eihanga ryona ery’Abaisraeli, kandi bakaguma baine n’oburemeezi bw’amaani kumara emyaka mingi.​—1 Abagabe 11:9-13.

10. Niki ekirikubaasa kushiisha omukago gwaitu na Yehova?

¹⁰ Twakwatanisa n’abanywani abatarikumanya emitindo ya Yehova nari  abatarikugiha ekitiinisa, nibabaasa kushiisha emiteekateekyere yaitu mirungi n’omukago gwaitu ogu twine na Yehova. Abanywani aba nibabaasa kuba bari omu kibiina, kwonka bataine omukago guhami na Yehova. Nari nibabaasa kuba abanyabuzaare, abataahi, abu turikukora nabo, nari abu turikushoma nabo, abatarikuramya Yehova. Twamara obwire bwingi n’abantu abatarikugyendera aha mitindo ya Yehova, nibabaasa kutureetera kufeerwa omukago gwaitu nawe.

11. Niki ekiraatuhwere kutoorana abanywani barungi?

¹¹ Shoma 1 Abakorinso 15:33. Hariho abantu baingi abaine emitwarize mirungi. Kandi tikugira ngu buri omwe otarikuramya Yehova naakira kukora ebintu bibi. Obundi noobaasa kuba noomanya bamwe abari batyo. Mbwenu shi eki nikimanyisa ngu n’abanywani barungi? Waabanywana niki ekirikwija kuhika aha mukago gwawe na Yehova? Nibakuhwera kwirira haihi Ruhanga? Niki eki barikutwara nka kikuru? Nibagamba ahari ki? Nibakira kugamba aha mishono ehangire, esente, esimu ezihangire, eby’okweshemeza n’ebindi nk’ebyo? Nibakira kucwera abandi orubanja? Nibakira kuteera obuyaga barikukoresa ebigambo bibi? Yesu akarabura ati: “Ebiijwire omutima, akanwa nibyo kagamba.” (Matayo 12:34) Waamanya ngu abantu abu orikumara nabo obwire bwingi bariyo nibashiisha omukago gwawe na Yehova, teeraho kubeetantara! Tuubya aha bwire obu orikumara nabo, kandi kyaba nikyetengyesa orekyere aho kukwatanisa nabo.​—Enfumu 13:20.

12. (a) Ahonaaho Abaisraeli barugire Misri Yehova akabagambira ki? (b) Yehova ku yaashabire Abaisraeli kuba abeesigwa baakamugarukamu ki?

¹² Nitubaasa kwegyera aha byabaireho bwanyima ya Yehova kwiha Abaisraeli Misri. Abantu ku baayeteeraniire haihi n’orushozi Sinai, Yehova akabeeyoreka omu muringo gw’eky’okutangaaza! Bakareeba ekicu kirikwiragura, omurabyo, omwika, kandi baahurira enkuba n’eiraka nk’ery’enzamba ririkugamba munonga. (Okuruga 19:16-19) Bwanyima bahurira Yehova arikugamba naagira ati: “Ndi Ruhanga ow’eihato.” Akabaraganisa ngu naija kuguma ari omwesigwa ahari abo abarikumukunda kandi bakamworobera. (Shoma Okuruga 20:1-6.) Yehova akaba naayoreka Abaisraeli ngu baaguma aha rubaju rwe, nawe naija kuguma aha rubaju rwabo. Ku ogire ngu okaba ori omwe aharibo, okaba noija kwehurira ota waahurira ebi Yehova yaagambire? Okaba noija kugarukamu nk’oku Abaisraeli abo abaagarukiremu ngu ebigambo byona ebi Yehova “yaagamba, nitwija kubikora.” (Okuruga 24:3) Omu kaire kakye obwesigwa bw’Abaisraeli ahari Yehova bukagyezibwa. Niki ekyabaireho?

13. Niki ekyareeteire Abaisraeli kutaba beesigwa?

¹³ Abaisraeli bakatiina ku bareebire amaani ga Ruhanga, n’ahabw’ekyo Musa akainamuka aha rushozi Sinai kubajwekyera ahari Yehova. (Okuruga 20:18-21) Ku haahingwireho obwire, Musa yaakyerererwayo. Eki kikareteera abantu kuburabura omu ihamba ahabw’okutagira omwebembezi. Bakaba baine kukora ki? Nibabaasa kuba baataire obwesigye bwingi omuri Musa. Bakatandika  kwerarikirira reero baagambira Arooni bati: ‘Tukorere ruhanga w’okutwebembera; ahabw’okuba omushaija ori Musa, owaatwihire omu nsi ya Misri, titurikumanya oku abaire.’​—Okuruga 32:1, 2.

14. Abaisraeli bakeebeiha bata kandi eki kikareetera Yehova kukora ki?

¹⁴ Abaisraeli bakaba nibamanya ngu okuramya ebishushani kigwire. (Okuruga 20:3-5) Kwonka ahonaaho bakaramya akanyena k’ezaabu! N’obu baraabe baagomeire ekiragiro kya Yehova, bakeebeiha barikuteekateeka ngu bakiri aha rubaju rwe. Arooni akataho omukoro gw’okuramya akanyena ogu yaayetsire “obugyenyi bw’ekiro kikuru kya” Yehova! Mbwenu shi Yehova akakora ki? Akagambira Musa ngu abantu “beesiisire” kandi baateishuka aha muhanda ogu yaabaire abaragiire. Yehova akaguubwa kubi munonga yaayenda n’okucwekyereza eihanga ryona.​—Okuruga 32:5-10.

15, 16. Musa na Arooni bakooreka bata ngu buzima bari aha rubaju rwa Yehova? (Reeba ekishushani aha kutandika.)

¹⁵ Kwonka Yehova ni Ruhanga oine embabazi. Akacwamu kutacwekyereza eihanga ryona. Akaha Abaisraeli omugisha gw’okworeka ngu nibenda kuza aha rubaju rwe. (Okuruga 32:14) Musa ku yaareebire abantu barikuteera orwari, barikweshongora, kandi barikuzina omu maisho g’ekishushani ky’enyena, akahondahonda ekishushani ky’ezaabu ekyo kandi yaakicwa eiju. Reero n’eiraka rihango yaagira ati: “Weena ori aha rubaju rwa Mukama, aije ahi ndi!” Kandi “Abaleevi boona bateeranira ah’ari.”​—Okuruga 32:17-20, 26.

¹⁶ N’obu Arooni yaakozire ekishushani ky’enyena, akeeteisa kandi we n’Abaleevi abandi bakacwamu kuza aha rubaju rwa Yehova. Abeesigwa aba bakooreka butunu ngu tibari aha rubaju rw’abasiisi. Buri omwe akaba aine kwecweramu ahakuba aha izooba eryo, abantu baingi bakaitwa ahabw’okuramya ekishushani ky’enyena. Kwonka abo abaacwiremu kuza aha rubaju rwa Yehova bakahonokaho, kandi akabaraganisa emigisha.​—Okuruga 32:27-29.

17. Ebi entumwa Paulo yaahandiikire ebirikukwata aha kishushani ky’enyena nitubyegaho ki?

¹⁷ Eki nitukyegyeraho ki? Entumwa Paulo akagira ati: “Ebyo bikaba eby’okutuhabura,” kugira ngu turekye ‘kuramya ebishushani.’ Akashoboorora ngu ebi “bikahandiikwa kutuhuguura, itwe abariho omu biro by’aha muheru. N’ahabw’ekyo orikuteekateeka ngu ayemereire ayerinde atagwa.” (1 Abakorinso 10:6, 7, 11, 12) Nk’oku kirikworekwa entumwa Paulo, abo abarikuramya Yehova nabo nibabaasa kwejumba omu kukora ebintu bibi. Nibabaasa n’okuteekateeka ngu Yehova naabasiima. Kwonka, omuntu orikwenda kuba munywani wa Yehova nari orikwetwara kuba ori omwesigwa ahariwe, tikirikumanyisa ngu naamusiima.​—1 Abakorinso 10:1-5.

18. Niki ekirikubaasa kutureetera kuruga ahari Yehova, kandi nihabaasa kurugamu ki?

 ¹⁸ Musa ku yaakyerereirwe aha rushozi Sinai, Abaisraeli bakeemereza omutima. Naitwe emperu y’ensi egi neebaasa okutarahuka kwija nk’oku twabaire nituteekateeka, kitureetere okwemereza omutima. Nitubaasa kutandika kuteekateeka ngu ebiraganiso bya Yehova eby’ebiro by’omumaisho tibiraahikiirire juba, nari ngu tibiraahikiirire na kakye, reero tutandikye kuta omutima aha ki turikwenda omu mwanya gw’eki Yehova arikwenda. Twaba tutegyendesereize, mporampora nitubaasa kuruga ahari Yehova tutandikye kukora ebintu ebi twabaire tutarikuteekateeka ngu nitubaasa kukora.

19. Tushemereire kuguma nitwijuka ki, kandi ahabw’enki?

¹⁹ Yehova naayenda ngu tumworobere twihire aha mutima kandi tumuramye wenka. (Okuruga 20:5) Ahabw’enki? Ahakuba naatukunda. Twayanga kukora ebi Yehova arikukunda, nitwija kukora ebi Sitaane arikukunda kandi nikiturugiramu oburemeezi. Entumwa Paulo akagira ati: “Timurikubaasa kunywa ha kikopo kya Mukama, kandi n’aha kya baadaimoni. Timurikubaasa kuriira ha meeza ya Mukama waitu n’aha ya baadaimoni.”​—1 Abakorinso 10:21.

20. Yehova naabaasa kutuhwera ata n’obu twakukora enshobe?

²⁰ Kaini, Sulemaani, n’Abaisraeli boona bakaba baine omugisha gw’okweteisa bakakora empindahinduka. (Ebyakozirwe 3:19) Buzima, Yehova tarikurahuka kutsigaho abantu be ahabw’okugira ngu nibakora enshobe. Teekateeka oku yaasaasiire Arooni. N’omu bunaku obu, Yehova naatuha obuhabuzi bw’okuturinda kutagwa omu kibi. Naakoresa Baibuli, ebitabo by’ekibiina n’ab’eishe-emwe. Twata omutima aha kurabura oku Yehova arikutuha, nitubaasa kuhamya ngu Yehova naija kutugirira embabazi.

21. Tushemereire kukora ki twagyezibwa kutahamira ahari Yehova?

²¹ Embabazi za Ruhanga ziine ekigyendererwa. (2 Abakorinso 6:1) Nizituha omugisha gw’okwetantara ‘okutatiina Ruhanga n’okwetenga eby’ensi.’ (Shoma Tito 2:11-14.) Omu busingye obu, nitwija kuhikwaho embeera ezirikutureetera kugumirwa kuhamira ahari Yehova. Mariirira kuguma aha rubaju rwa Yehova, ijuka ‘kutiina Ruhanga waawe; obe niwe waaheereza, kandi omuhamireho.’​—Eky’Ebiragiro 10:20.