Eego, okuraara hamwe bataine nshonga ehikire, n’obuhame oburikworeka ngu nibabaasa kuba bashambaine. N’ahabw’ekyo, hashemereire kuteebwaho akakiiko kugaaniira nabo, okwihaho baaba baine enshonga zihikire ezibareeteire kuraara hamwe.​—1 Abakorinso 6:18.

Akakiiko k’abareeberezi nikateekateeka aha buri mbeera okwayo n’obwegyendesereza kureeba yaaba baine kutaaho akakiiko ako. Nk’eky’okureeberaho: Babaire nibeeriima? Abareeberezi bakaba baabahanireho ahabw’omuringo ogu barikutwarizanamu? Ahabw’enki baraire hamwe? Kibaireho bubaho nari bakitebeekaniise? Haine ekindi eki babaire nibabaasa kukora, nari haine ekibaireho eki batarikubaasa kuzibira, kibaireho kitaraariire nari ahonaaho reero kyabareetera hamwe? (Omubuurizi 9:11) Baraire nkahi? Embeera nizitaana, n’ahabw’ekyo abareeberezi nibabaasa kuteekateeka aha nshonga zitari zimwe na zimwe baaba nibacwamu.

Abari aha kakiiko akareeberezi bwanyima y’okuteekateeka aha nshonga ezi zoona, nibaija kucwamu yaaba baine kutaho akakiiko kuhurira enshonga yaabo.