Yehova buzima naayenda ngu abantu babiri abaraaze hamwe omu bushwere bagire okushemererwa na rukundo eby’obutwire. (Mat. 19:4-6) Waaba nooyenda kutaaha omu bushwere, noobaasa kusherura ota omukundwa? Yehova Omuhangi waitu, naamanya oku turikubaasa kuba abasinguzi omu kuriima n’omu bushwere. N’ahabw’ekyo, waateeraho kugyendera aha misingye ei atuhaire, nootunga ebirungi. Yetegyereze emwe aha misingye egi.

Ogw’okubanza, twine kwetegyereza eki: “Omutima n’engobya okukira ebintu byona, gwine endwara etarikutambwa.” (Yer. 17:9) Omuntu yaasherura omukundwa kandi akamurigira, naabaasa kugira enyehurira z’amaani ahonaaho zimuremese kuteekateeka gye. Abantu baacwamu kutaaha omu bushwere barikwihirira aha nyehurira zaabo okukira munonga, nibabaasa kuhendera baine okurimbagirirwa. (Enf. 28:26) Egi niyo nshonga ahabw’enki kitari ky’obwengye omwojo n’omwishiki kugirirana enyehurira z’amaani baaba nibwo batandikire kweriima, nari kwemarira ahari mugyenzi we batakamanyiine gye.

Enfumu 22:3 nihagira hati: ‘Omwerinzi yaareeba akabi nikaija, naayeshereka, kwonka otaine bwengye naakeegyema’ areeba enaku. Okukoresa emikura y’okuriimiraho kirimu kabi ki? Eky’obusaasi, bamwe baabaasize kwega omu muringo gugumire ahabw’okugaaniira n’abantu abu batarikumanya aha mukura bakazaanira aha nyehurira zaabo. Kandi, abantu abatari beesigwa nibataho emikura y’ebigingirire kwibiraho abantu abarikwikiririza eryo. Obumwe, abantu abo abatari beesigwa nibeeyeta Abajurizi ba Yehova.

Teekateeka aha buremeezi obundi. Emikura emwe ey’okuriimiraho neekoresa emiringo ya kompyuta ey’okubara ebibaro by’okunywanisa abantu kubaasa kuhamya yaaba omuntu ashemereire mugyenzi we. Kwonka, tihariho buhame oburikworeka ngu omuringo ogu nigukora. Mbwenu shi n’eky’obwengye kwesiga emiringo etairweho abantu omu nshonga nkuru nk’obushwere? Buzima emiringo ya kompyuta ey’okubara ebibaro by’okunywanisa abantu torikubaasa kugigyeragyeranisa n’emisingye ya Baibuli na kakye.​—Enf. 1:7; 3:5-7.

Omusingye oguri omu Enfumu 14:15 ngu, ‘otaine bwengye naikiririza eryo, kwonka omwerinzi naayetegyereza ahu arikuraba.’ Otakacwiremu kureeba omuntu nk’ou orikubaasa kutaaha nawe omu bushwere, oine kubanza waamumanya gye.  Kwonka mwamanyana kurabira aha mukura nikibaasa kukugumira. Mbwenu shi mwayohererezana ebirikubakwataho n’obutumwa kumara obwire buraingwa, buzima noobaasa kugira ngu noomumanya gye? Bamwe abaabaire nibateekateeka ngu batungire abakundwa abaabuzima, bagwereirwe akagwe bwanyima y’okureebana butunu.

Omuhandiiki wa zaaburi akagira ati: ‘Tindikushutama n’abantu abataine mugasho, kandi tindikukwatanisa na ndyarya.’ (Zab. 26:4) Baingi nibateekateeka ngu n’ekya butoosha kuta ebitahikire aha mikura y’okuriimiraho kureetera abandi kubakunda. Nibabaasa kushereka emitwarize yaabo yenyini, nari beeyorekye nk’abarikutwaza gye baaba bari aha mukura. N’obu bamwe baraabe nibeeyeta Abajurizi ba Yehova, kwonka shi buzima n’Abakristaayo ababatiziibwe? Bakuzire omu by’omwoyo? Mbwenu shi baine omukago murungi na Yehova? Nibagambwaho gye omu kibiina kyabo? Nari n’eby’okureeberaho bibi nari “ekigombe kibi”? (1 Kor. 15:33; 2 Tim. 2:20, 21) Kandi shi kurugiirira aha Byahandiikirwe bahikire kutaaha omu bushwere? Oine kumanya ebintu ebi, kwonka ti kyorobi kubimanya waaba otaine obuhwezi bw’Abajurizi ba Yehova abarikumanya gye omuntu ogwo. (Enf. 15:22) Kandi nangwa, n’omuheereza wa Yehova taine ‘kukwatanisiza kimwe n’abatarikwikiriza’ abu ataine nabo kakwate.​—2 Kor. 6:14; 1 Kor. 7:39.

Ahabw’okugira ngu emikura y’okuriimiraho erimu oburemeezi, hariho emiringo mirungi ey’okusherura omukundwa, kandi mukagira enkoragana nungi mukataaha hamwe omu bushwere obushemeire. Noobaasa kukoresa miringo ki kutunga omukundwa okushemereire? Kyaba nikibaasika kuteeranira hamwe, Abajurizi ba Yehova nibabaasa kumanyanira omu nteerane z’ekibiina, enteerane enkye n’empango nari aha mukoro ogundi.

Kyaba kitarikubaasika nka hati obu hariho ekigwererezi kya COVID-19, noobaasa kukoresa ekyoma kuza omu nteerane ahu orikubaasa kushanga Abajurizi ba Yehova abatakagiire omu bushwere nkaiwe. Noobaasa kureeba oku barikwejumba omu nteerane n’oku barikugamba aha kwikiriza kwabo. (1 Tim. 6:11, 12) Noobaasa kushashaanuka nabo omu breakout room bwanyima y’enteerane. N’obu muraabe nimuba mutari hamwe butunu kandi hariho n’Abajurizi ba Yehova abandi, noobaasa kwetegyereza oku omuntu ou orikurigira arikukwatanisa n’abandi, kandi ekyo nikibaasa kworeka kyenyini eki ari. (1 Pet. 3:4) Bwanyima y’obwire, mwayongyera kumanyana noobaasa kureeba yaaba mwine emitindo n’ebigyendererwa birikushushana, kandi yaaba buri omwe ashemereire mugyenzi we.

Abatari mu bushwere baasherura abakundwa kuhikaana n’emisingye ya Baibuli, nibabaasa kureeba amazima g’ebigambo by’enfumu egi: ‘Orikubona mukazi [nari omushaija murungi], naaba aboine ekintu kirungi, kandi naaba atungire omugisha ogurikuruga ahari’ Yehova.​—Enf. 18:22.