1. Yehova akukoreire ki?

OKAHINDUKA ota omwe aha Bajurizi ba Yehova? Okubanza, okahurira amakuru marungi obundi kuruga aha bazaire baawe, ou orikukora nawe nari ou orikushoma nawe, nari obundi kurabira omu kubuurira enju aha nju. (Mak. 13:10) Kandi omuntu akamara obwire bwingi n’amaani maingi arikukwegyesa Baibuli. Okwega okwo, kukakuhwera kukunda Yehova, kandi waamanya ngu nawe naakukunda. Yehova akakureeta omu mazima, kandi hati obu ori omwegi wa Yesu Kristo, oine amatsiko g’okutuuraho ebiro byona. (Yoh. 6:44) Hatariho kubangaanisa noosiima Yehova ahabw’okugira ngu akahiga omuntu kukwegyesa amazima kandi yaakwikiriza kuba omwe aha baheereza be.

2. Nituza kwega ki omu kicweka eki?

² Hati obu turikumanya amazima, twine obujunaanizibwa bw’okuhwera abandi kutwegaitaho omu ruguuto orurikuhitsya omu magara. Noobaasa kuba nooyoroberwa kubuurira enju aha nju, kwonka orikugumirwa kwegyesa abantu Baibuli. Nikwo orikwehurira otyo? Ku kiraabe nikwo kiri, obuhabuzi oburi omu kicweka eki nibubaasa kukubeera obw’omugasho. Nituza kureeba ebirikutuhiga kuhindura abantu abeegi. Nituza n’okureeba oku turikubaasa kusingura embeera zigumire ezirikuturemesa kwegyesa abantu Baibuli. Okubanza, ka tureebe ahabw’enki tutaine kuba ababuurizi kyonka beitu n’abeegyesa b’amakuru marungi.

3. Ahabw’enki nitubuurira?

³ Obu Yesu yaabaire ari omu nsi, akaha abeegi be omurimo gw’obujunaanizibwa bw’emiringo ebiri. Obujunaanizibwa  bw’okubanza, akabagambira kubuurira amakuru marungi g’Obukama, kandi yaabooreka n’oku baine kukikora. (Mat. 10:7; Luk. 8:1) Kandi akabatebeekanisa ahabw’embeera nungi nari mbi ezi baabaire nibaija kushanga omu murimo ogu. (Luk. 9:2-5) Akabagambira n’ahu omurimo gwabaire nigwija kuhika, arikubagira ngu bakaba nibaija kuha obujurizi omu “mahanga goona.” (Mat. 24:14; Byak. 1:8) Abeegi ba Yesu bakaba nibaija kubuurira abantu aha Bukama bwa Ruhanga n’ebi buraakore, batarikwihirira aha kutwaza kw’abantu.

4. Kurugiirira ahari Matayo 28:18-20, twine kukora ki ekindi oyihireyo okubuurira aha Bukama?

⁴ Obujunaanizibwa bwa kabiri oburikutwarirwa omu murimo ogu Yesu yaahaire abeegi be ni guuha? Akagambira abakuratsi be kwegyesa abarikubaasa kuba abeegi be kworobera ebintu byona ebi yaaragiire. Mbwenu shi ab’omu kyasha ky’okubanza nibo bonka abaabaire baine kubuurira nk’oku abamwe barikugira? Ngaaha, Yesu akagira ngu omurimo ogu gukaba nigwija kugumizamu n’omu biro ebi, ‘kuhitsya’ obu obunaku obu buraahweho. (Shoma Matayo 28:18-20.) Yesu naabaasa kuba yaahaire ekiragiro eki obu yaayeyoreka abeegi be abarikurenga 500. (1 Kor. 15:6) Kandi omu kworekwa oku Yesu yaahaire Yohaana, akooreka gye ngu naayenda abeegi be boona bahwere abandi kwega ebirikukwata ahari Yehova.​—Kush. 22:17.

5. Kurugiirira aha 1 Abakorinso 3:6-9, Paulo akakoresa ky’okureeberaho ki kworeka ngu okubuurira kwine akakwate n’okwegyesa?

⁵ Entumwa Paulo akagyeragyeranisa omurimo gw’okuhindura abantu abeegi n’okuhinga ekimera, arikworeka ngu twine kukora ekirikukira aha kukibyara. Akaijutsya Abakorinso ati: “Nyowe nkabyara, Apolo yaitirira amaizi . . . imwe muri omusiri gwa Ruhanga.” (Shoma 1 Abakorinso 3:6-9.) Itwe abarikukora omu ‘musiri gwa Ruhanga’ titurikubyara kyonka, beitu nitwitirira n’amaizi butoosha turikushwijuma oku ebimera byaitu birikukura. (Yohaana 4:35) Kwonka nabwo, nitumanya ngu Ruhanga niwe arikukuza embibo.

6. Omurimo gwaitu gw’okwegyesa nigutwariramu ki?

⁶ Nituba nitusherura abaine ekihika ky’okukorerera amagara agatahwaho. (Byak. 13:48) Abantu kubaasa kuhinduka abeegi ba Yesu, twine kubahwera (1) kwetegyereza ebi barikwega omu Baibuli, (2) kubiikiriza, (3) n’okubigyenderaho. (Yoh. 17:3; Kol. 2:6, 7; 1 Tes. 2:13) Boona omu kibiina nibabaasa kuhwera abeegi ba Baibuli barikubateeraho eky’okureeberaho n’okubareetera kuhurira baikaikaine baaba baizire omu nteerane. (Yoh. 13:35) Orikwegyesa omwegi naabaasa kumara obwire n’amaani maingi arikumuhwera kusingura enyikiriza n’ebikorwa ebiri ‘nk’ebigo’ bigumire. (2 Kor. 10:4, 5) Nikibaasa kutwara obwire bwingi kuhabura omuntu kuraba omu madaara aga akahika aha kigyendererwa ky’okubatizibwa. Kwonka okwefeerereza nikurugamu ebirungi.

7. Niki ekirikutuhiga kwejumba omu murimo gw’okubuurira n’okuhindura abantu abeegi?

⁷ Ahabw’enki nitwejumba omu murimo gw’okubuurira n’okwegyesa? Enshonga y’okubanza, n’ahabw’okuba nitukunda Yehova. Waateeraho kworobera ekiragiro ky’okubuurira n’okuhindura abantu abeegi, nooba nooyoreka rukundo ei oyiniire Ruhanga. (1 Yoh. 5:3) Teekateeka ahari eki: Rukundo ei oyiniire Yehova niyo erikukuhiga kubuurira enju aha nju. Mbwenu shi ekiragiro eki kyorobi? Shana obundi ngaaha. Omurundi gw’okubanza ku waahikire aha rwigi rw’omuntu okaba otiinire? Eego buzima! Kwonka okamanya ngu  ogu nigwo murimo ogu Yesu arikwenda ngu okore, kandi okoorobera ekiragiro kye. Kandi ku haahingwireho obwire, obundi kikakworobera kwejumba omu murimo gw’okubuurira ogu. Kandi shi okwegyesa omuntu Baibuli? Ekyo nikikureetera kugira obwoba? Obundi eego. Kwonka, waashaba Yehova kukuhwera kusingura okutiina kwawe n’okugira obumanzi bw’okwegyesa omuntu Baibuli, naabaasa kukuhwera kugira ekyetengo ky’okuhindura abantu abeegi.

8. Kurugiirira ahari Mako 6:34, niki ekindi ekirikutuhiga kwegyesa abandi?

⁸ Enshonga ya kabiri, rukundo ei twiniire abataahi neetuhiga kubeegyesa amazima. Eizooba rimwe, Yesu n’abeegi be bakaba baruhire munonga bwanyima y’okubuurira munonga. Bakaba nibenda kuhuumuraho, kwonka abantu baingi baija ahu bari. Yesu ahabw’okubagirira esaasi, akatandika ‘kubeegyesa bingi.’ (Shoma Mako 6:34.) Nabwo akeehayo kubahwera n’obu araabe yaabaire aruhire. Ahabw’enki? Yesu akeeta omu bigyere by’abantu baingi abo. Akaba naayenda kubahwera, ahakuba akareeba oku baabaire nibabonabona, n’oku kyabaire nikibeetengyesa kutunga amatsiko. Obunaku obu abantu bari omu mbeera niyo emwe. Otakaahabisibwa endeebeka yaabo ey’aha ruguru. Bari nk’entaama ezihabire ezitaine omuriisa w’okuzihabura. Entumwa Paulo abantu abari nk’abo akagira ngu tibaine Ruhanga, kandi tibaine matsiko. (Efe. 2:12) Bari omu ruguuto nari “eirembo eririkutaasya omu kucwekyerera”! (Mat. 7:13) Twateekateeka aha mbeera y’eby’omwoyo ey’abantu b’omu kicweka kyaitu, rukundo n’okubasaasibwa nibituhiga kubahwera. Kandi omuringo murungi gw’okubahwera n’okwehayo kubeegyesa Baibuli.

9. Kurugiirira aha Abafilipi 2:13, Yehova naabaasa kukuhwera ata?

⁹ Shana obundi nootimwimwa kutandika kwegyesa omuntu Baibuli ahabw’okumanya obwire oburikwetengyesa kukikora. Ku kiraabe nikwo kiri, gambira Yehova enyehurira zaawe. Mushabe kukuhwera kugira ekyetengo ky’okusherura omuntu n’okumwegyesa. (Shoma Abafilipi 2:13.) Entumwa Yohaana akatuhamiza ngu Ruhanga naija kugarukamu okushaba okurikuhikaana n’ekigyendererwa kye. (1 Yoh. 5:14, 15) N’ahabw’ekyo noobaasa kuhamya ngu Yehova naija kukuhwera kugira ekihika ky’okwejumba omu kuhindura abantu abeegi.

10-11. Ahabw’enki turikubaasa kutumwimwa kwegyesa abantu Baibuli?

¹⁰ Ekiragiro ky’okwegyesa abantu nitukitwara nka kikuru n’obu twakuba nitugumirwa kukora bingi nk’oku turikwenda omu murimo gw’okuhindura abantu abeegi. Ka tureebe zimwe aha mbeera ezi n’oku turikubaasa kuzisingura.

¹¹ Nitubaasa kuremesibwa obweremwa bwaitu. Nk’eky’okureeberaho, ababuurizi abamwe nibaremesibwa bukuru nari amagara mabi. Egi niyo mbeera ei orimu? Ku kiraabe nikwo kiri, yetegyereze amashomo agu twegire ahabw’ekigwererezi kya COVID-19. Tukireebire ngu nikibaasika kwegyeseza abantu aha byoma tutari nabo butunu! N’ahabw’ekyo noobaasa kutandika kwegyesa omuntu Baibuli ori omu ka yaawe omu buteeka. Kandi hariho omugisha ogundi. Abamwe nibakunda kwega Baibuli, kwonka nibaba batari mu maka gaabo omu bwire obu ab’eishe-emwe barikuba bari omu kubuurira. Kwonka, nooshanga nibaba bariyo omu kasheeshe kare munonga nari nyekiro. Noobaasa kwehayo kubeegyesa omu bwire obwo? Yesu akeegyesa Nikodemu omu kiro, obwire obu Nikodemu yaabaire naakunda kwegyeramu.​—Yoh. 3:1, 2.

12. Ni nshonga ki ezirikubaasa kutuhwera kwegiramu obwesigye bw’okuba abeegyesa barungi?

 ¹² Nitubaasa kuba tuteyinemu bwesigye bw’okwegyesa omuntu Baibuli. Obundi nitubaasa kuba nituteekateeka ngu okwegyesa omuntu nikyetengyesa okumanya kw’omutaano nari okugira omwoga. Ku oraabe nooyehurira otyo, yetegyereze enshonga ishatu ezirikubaasa kukuhwera kwegiramu obwesigye. Ey’okubanza, Yehova naareeba ngu ohikire kwegyesa abandi. (2 Kor. 3:5) Eya kabiri, Yesu oine “obushoboorozi bwona omu iguru n’omu nsi,” niwe arikukuragiira kwegyesa abantu. (Mat. 28:18) Eya kashatu, noobaasa kugira obwesigye ngu abandi nibaija kukuhwera. Yesu akaba naayegamira aha bi Ishe yaamwegyeise, naiwe noobaasa kukora nikyo kimwe. (Yoh. 8:28; 12:49) Kandi, noobaasa kushaba orikwebembera guruupu yaawe y’okubuurira, payoniya orikumanya kwegyesa, nari omubuurizi murungi, kukuhwera kutandika kwegyesa omuntu Baibuli. Omuringo gumwe ogu orikubaasa kwegiramu obwesigye, n’okugyenda n’omwe aha babuurizi aba okareeba oku arikwegyesa omuntu Baibuli.

13. Ahabw’enki twine kuba tweteekateekire kuhinduramu?

¹³ Nitubaasa kugumirwa kukoresa emiringo misya n’ebikoreso bisya. Omuringo ogu turikwegyesamu abeegi ba Baibuli hati guhindukire. Ekitabo kikuru eki turikukoresa omu kwegyesa, Yesiimire Amagara Ebiro Byona!, nikyetengyesa ngu tutebeekanise kandi twegyese omu muringo ogurikutaana n’ogw’enyima. Nitushoma obucweka bukye kandi tuhikaanisa munonga ebiteekateeko n’omwegi. Twaba nitwegyesa, nitukoresa munonga vidiyo n’ebikoreso ebindi nka JW Library^®. Waaba otarikumanya gye kukoresa ebikoreso ebi, shaba ondiijo akuhwere oyegye kubikoresa. Abantu nitukira kuhamira aha bi tumanyiriire. Tikirikutworobera kwega emiringo misya ey’okukoramu ebintu. Kwonka ahabw’obuhwezi bwa Yehova n’obw’abandi, nikiija kukworobera kuhinduramu n’okutunga okushemererwa waaba nooyegyesa abantu. Nk’oku payoniya omwe yaagizire, omuringo gw’okwegyesa ogu “niguruhuura omwegi n’omwegyesa.”

14. Twine kwijuka ki twaba nitubuurira omu kicweka kigumire, kandi 1 Abakorinso 3:6, 7 nihatugumya hata?

¹⁴ Nitubaasa kuba nitutuura omu kicweka ahu kigumire kutunga abeegi ba Baibuli. Abantu nibabaasa kuba batarikwefeerayo aha butumwa bwaitu nangwa nibabaasa n’okubuhakanisa. Niki ekirikubaasa kutuhwera kugira emiteekateekyere mirungi aha bicweka nk’ebyo? Ijuka ngu embeera z’abantu nizibaasa kuhinduka ahonaaho omu nsi egi embi, kandi abo abaabaire batarikukunda amazima nibabaasa kugira ekyetengo ky’eby’omwoyo. (Mat. 5:3) Bamwe abaabaire nibanga ebitabo byaitu bwanyima bakaikiriza kwega Baibuli. Kandi nitumanya ngu Yehova niwe Mukama w’eigyesha. (Mat. 9:38) Naayenda ngu tugume nitubyara kandi nitwitirira, kwonka niwe aine obujunaanizibwa bw’okukuza. (1 Kor. 3:6, 7) Kandi ka nikigaruramu amaani kwijuka ngu n’obu turaabe tutaine abu turikwegyesa Baibuli hati, Yehova naija kutushumbuusha arikwihirira aha kuteeraho kwaitu, beitu bitari ebirikuruga omu buheereza bwaitu! *

15. Yehova naayehurira ata omuntu yaikiriza kwega Baibuli kandi akagyendera aha bi arikwega?

¹⁵ Yehova naashemererwa omuntu yaikiriza amazima ga Baibuli kandi akagambiraho abandi. (Enf. 23:15, 16) Ka aine kuba ashemereirwe  munonga ku arikureeba ekiriyo nikibaho obunaku obu! Nk’eky’okureeberaho, n’obu omwaka gw’obuheereza ogwa 2020 gwabairemu ekigwererezi omu nsi yoona, abantu 7,705,765 nibo baayegyesiibwe Baibuli, ekyarugiiremu abeegi 241,994 kwehayo ahari Yehova bakabatizibwa. Abeegi ba Yesu basya aba, nabo nibeegyesa abeegi ba Baibuli kandi nibahindura abantu abeegi. (Luk. 6:40) Hatariho kubangaanisa, nitushemeza Yehova twaba nitwejumba omu murimo gw’okuhindura abantu abeegi.

16. Nitubaasa kutaho kigyendererwa ki?

¹⁶ Okuhindura abantu abeegi n’omurimo gugumire, kwonka turikuhwerwa Yehova nitubaasa kwegyesa abasya bamukunde. Mbwenu shi noobaasa kutaho ekigyendererwa ky’okutandika kwegyesa omwegi wa Baibuli nangwa omwe? Ekiraabeho nikibaasa kututangaaza twakoresa buri mugisha kubuuza buri muntu weena yaaba naayenda kwega Baibuli. Nitubaasa kuhamya ngu Yehova naija kuha omugisha okuteeraho kwaitu.

17. Nitwija kutunga ki twatunga omugisha gw’okwegyesa omuntu Baibuli?

¹⁷ Ka twine omugisha gw’okubuurira hamwe n’okwegyesa abandi amazima! Omurimo ogu nigutureetera okushemererwa okwabuzima. Entumwa Paulo, owaahweraire baingi omuri Tesalonika kuba abeegi, akooreka enyehurira ze omu muringo ogu: “Amatsiko gaitu niki, nari okushemererwa kwaitu nari ekirunga kyaitu eky’okwesiimiraho? Tiimwe omu maisho ga Mukama waitu Yesu ku ariija? Ahakuba niimwe kitiinisa kyaitu n’okushemererwa kwaitu.” (1 Tes. 2:19, 20; Byak. 17:1-4) Baingi obunaku obu nibeehurira batyo. Munyaanyazi-itwe orikwetwa Stéphanie we na iba ababaasize kuhwera abantu baingi kuhika aha kubatizibwa, naagira ati: “Tihariho ekirikureeta okushemererwa kwingi okukira okuhwera abantu kwehayo ahari Yehova.”