1, 2. Omu 2018, ni mukoro ki oguraatugaite omu muringo gw’omutaano, kandi ahabw’enki? (Reeba ekishushani aha kutandika.)

OMU Kwakashatu 31, 2018, obukaikuru bw’abantu omu nsi yoona nibaija kuza aha mukoro ogurikubaho omurundi gumwe buri mwaka. Bwanyima y’eizooba kurenga, Abajurizi ba Yehova n’abandi bantu baingi nibaija kuza aha mukoro gw’okwijuka ekitambo kya Yesu ekyahairweyo ahabwaitu. Buri mwaka omukoro gw’okwijuka okufa kwa Yesu nigugaita abantu omu muringo gurikutangaaza, kukira ogundi mukoro omu nsi yoona.

² Yehova na Yesu bashemereire kuba nibashemererwa kureeba obukaikuru bw’abantu buri shaaha nibaihaihana kuza aha mukoro gw’omutaano ogu, omu nsi yoona. Baibuli neeshoboorora ngu “omutwe muhango gw’abantu ogu omuntu atarikubaasa kubara, abaarugire omu mahanga goona n’enganda zoona n’abantu boona n’endimi zoona,” nibagira bati: “Okujuna n’okwa Ruhanga waitu, oshutami aha kitebe ky’obukama, kandi n’okw’Omwana gw’entaama.” (Okushuuruurwa 7:9, 10) Nikishemeza kureeba ngu buri mwaka aha Kiijutsyo, abantu baingi nibaha Yehova ekitiinisa na Yesu ahabw’eby’amaani ebi bakozire!

3. Ekicweka eki nikiza kugarukamu bibuuzo ki?

 ³ Omu kicweka eki, noobaasa kutunga eby’okugarukamu by’ebibuuzo ebi: (1) Nimbaasa kwetebeekanisiza nta Ekiijutsyo kugira ngu nkigasirwemu omu bwijwire? (2) Ekiijutsyo nikihwera kita abaheereza ba Ruhanga boona kugira obumwe? (3) Nimbaasa kukora ki kureetera abaheereza ba Ruhanga kugira obumwe? (4) Mbwenu shi obwire nibwija kuhika habeho Ekiijutsyo eky’aha muheru? Ku kiraabe nikwo kiri, ni ryari?

4. Ahabw’enki ni kikuru itwe kubaho aha Kiijutsyo?

⁴ Ahabw’enki ni kikuru itwe kubaho aha Kiijutsyo? Enshonga emwe n’okugira ngu okuza omu nteerane n’omuringo gumwe gw’okuramya Yehova. Nituhamya ngu Yehova na Yesu nibareeba buri omwe orikuteeraho kuza aha mukoro mukuru ogu omu mwaka. Nitwenda Yehova na Yesu bareebe ngu tumaririire kubaho aha Kiijutsyo okwihaho buzima kyaba kitarikubaasika kubaho. Ebikorwa byaitu byayoreka ngu nitutwara enteerane nka kikuru, nituha Yehova enshonga y’okureka amaziina gaitu omu ‘kitabo ky’okwijutsya.’ Kandi ekitabo eki nikyetwa ‘ekitabo ky’amagara.’ Kirimu amaziina g’abo boona abu Yehova arikwenda kuha amagara agatahwaho.​—Malaki 3:16; Okushuuruurwa 20:15.

5. Ekiijutsyo kitakahikire, noobaasa ‘kweshwijuma ota kureeba ku oraabe okiri omu kwikiriza’?

⁵ Saabiiti nkye Ekiijutsyo kitakahikire, nitubaasa kumara obwire bwingi turikushaba kandi tukateekateeka munonga aha mukago gwaitu na Yehova. (Shoma 2 Abakorinso 13:5.) Entumwa Paulo akagambira Abakristaayo ati: “Mweshwijume mureebe ku muraabe muri omu kwikiriza.” Ekyo nitubaasa kukikora tuta? Nitubaasa kwebuuza tuti: ‘Buzima niinyikiriza ngu eki nikyo kibiina kyonka eki Yehova atooraine kukora ebi arikukunda? Ninkora eki ndikubaasa kubuurira abantu amakuru marungi n’okubeegyesa? Ebikorwa byangye buzima nibyoreka ngu niinyikiriza ngu turi omu biro by’emperu, kandi ngu emperu y’obutegyeki bwa Sitaane eri haihi kuhika? Ninkyesiga Yehova na Yesu munonga nk’obu naatandika kuheereza Yehova?’ (Matayo 24:14; 2 Timoseo 3:1; Abaheburaayo 3:14) Okuteekateeka aha bibuuzo ebi nikiija kutuhwera kuguma nitweshwijuma kureeba yaaba turi omu kwikiriza.

6. (a) Omuhanda gumwe gwonka ogw’okutunga amagara agatahwaho ni guuha? (b) Omureeberezi omwe naayetebeekanisiza ata Ekiijutsyo buri mwaka, kandi noobaasa kukora ota nkawe?

⁶ Omuringo gumwe gw’okwetebeekanisiza Ekiijutsyo n’okushoma kandi okateekateeka aha bicweka ebirikworeka ahabw’enki omukoro ogu ni mukuru munonga. (Shoma Yohaana 3:16; 17:3.) Omuhanda gumwe gwonka ogw’okurabiramu kutunga amagara agatahwaho n’okumanya Yehova, kandi tukaikiririza omu Mwana we Yesu. Kubaasa kwetebeekanisiza Ekiijutsyo, nitubaasa  kushoma ebintu ebiraatuhwere kuhika haihi nabo. Eki nikyo ow’eishe-emwe omwe omazire obwire buraingwa ari omureeberezi arikukora. Kumara emyaka mingi, atwire naarundaana ebicweka ebirikwizira omu Omunaara gw’Omurinzi ebirikukwata aha Kiijutsyo na rukundo ei Yehova na Yesu baayorekire. Ekiijutsyo ku kirikuba nikiza kuhika, naagaruka ashoma ebicweka ebi kandi abiteekateekaho n’obwegyendesereza kureeba ahabw’enki omukoro ogu guri mukuru. Obumwe naaguma naayongyeraho ekicweka kimwe nari bibiri aha bi yaabiikire. Kandi naashoma Ebyahandiikirwe ebirikukwata aha Kiijutsyo kandi abiteekateekaho. Omureeberezi ogu naagira ngu ahabw’okukora eki, naayega ebintu bisya buri mwaka. Ekikuru munonga, okwega nikumuhwera kwongyera kukunda Yehova na Yesu. Waayega omu muringo ogu, naiwe noija kweyongyera kukunda Yehova na Yesu. Noija n’okusiima eki baakozire, kandi noija kugasirwa munonga omu Kiijutsyo.

7. (a) Yesu akashaba aha bikwatiraine na ki aha Kiihuro kya Mukama eky’okubanza? (b) Niki ekirikworeka ngu Yehova agarukiremu okushaba kwa Yesu?

⁷ Aha Kiihuro kya Mukama eky’okubanza, Yesu akashaba omu muringo gw’omutaano. Akashaba aha bikwatiraine n’obumwe bw’omutaano obu we n’ishe baine. Kandi Yesu akashabira n’abeegi be ngu nabo bagire obumwe nk’obu yaabaire aine n’ishe. (Shoma Yohaana 17:20, 21.) Buzima Yehova agarukiremu okushaba okwo okw’Omwana we omukundwa. Okukira enteerane ezindi zoona, Ekiijutsyo nikyoreka gye ngu Abajurizi ba Yehova baine obumwe. Aha izooba eryo, obukaikuru bw’abantu kuruga omu mahanga gatarikushushana n’erangi etarikushushana omu nsi yoona, nibeeteerana kworeka ngu nibaikiriza ngu Yehova akoohereza Omwana we. Omu myanya emwe, tikiri kya butoosha abantu kuruga omu nganda zitarikushushana kwegaita hamwe aha ruteerane rw’ediini, nari ku barikukikora abantu nibareeba ngu ekyo tikihikire. Kwonka Yehova na Yesu tikwo barikukireeba batyo. Bo nibareeba ngu obumwe bwaitu aha Kiijutsyo ni burungi munonga.

8. Ni butumwa ki obu Yehova yaahaire Ezekieli?

⁸ Itwe abaheereza ba Yehova, tikirikututangaaza kureeba ngu twine obumwe obu. Yehova akagamba kare aha bumwe obu omu butumwa obu yaahaire Ezekieli. Akagambira Ezekieli kukwata enkoni ibiri, enkoni emwe ‘eya Yuda’ n’endiijo ‘eya Yosefu,’ reero aziteerane zibe enkoni emwe. (Shoma Ezekieli 37:15-17.) Ekicweka ‘ky’Ebibuuzo Kuruga omu Bashomi’ omu Watchtower ey’Okwamushanju 2016 kikashoboorora kiti: “Yehova kurabira omuri nabi we Ezekieli, akagira ngu abantu be bakaba nibaija kugaruka omu Nsi Eyaaraganisiibwe, kandi beeteerane bagarukye babe eihanga rimwe. Kandi obunabi obwo bukooreka ngu abaraabe nibaramya Ruhanga omu biro by’emperu nibaija kweteerana nk’omuntu omwe.”

9. Buri mwaka aha Kiijutsyo nihaba hariho bumwe ki obwagambirweho omu bunabi bwa Ezekieli?

⁹ Kuruga omu mwaka gwa 1919, Yehova mporampora akatandika kutebeekanisa n’okurundaana hamwe abashukirweho amajuta. Bakaba bari nk’enkoni ‘ya Yuda.’ Bwanyima, abaine amatsiko g’okutuura omu nsi ebiro byona bakatandika kwegaita aha bashukirweho amajuta. Abaine amatsiko g’okutuura omu nsi nibashushanisibwa nk’enkoni  ‘ya Yosefu.’ Yehova akaraganisa kuteerana enkoni ezi ebiri zikaba “enkoni emwe” omu ngaro ze. (Ezekieli 37:19) Akateerana abashukirweho amajuta ‘n’ab’entaama ezindi’ baaba “obusyo bumwe.” (Yohaana 10:16; Zekaria 8:23) Obunaku obu, guruupu zombi beeteeraine hamwe nibaheereza Yehova. Kandi baine Omugabe omwe, Yesu Kristo, omu bunabi bwa Ezekieli orikwetwa Daudi omwiru wa Ruhanga. (Ezekieli 37:24, 25) Buri mwaka aha Kiijutsyo, ku turikweteerana hamwe kwijuka okufa kwa Yesu, nitureeba obumwe bwa guruupu ezi zombi nk’oku kyagambirwe kurabira omuri Ezekieli. Kwonka buri omwe aha baheereza ba Ruhanga naabaasa kukora ki kureetaho obumwe n’okuburinda?

10. Nitubaasa kureetera tuta abaheereza ba Ruhanga kugira obumwe?

¹⁰ Ni muringo ki ogw’okubanza ogu turikubaasa kureetera abaheereza ba Ruhanga kugira obumwe? N’okuteeraho kuba abacureezi. Obu Yesu yaabaire ari omu nsi, akagambira abeegi be ngu baine kuba abacureezi. (Matayo 23:12) Abantu omu nsi nibeetwara nk’ab’omuhendo kukira abandi. Kwonka twaba turi abacureezi, nitwija kuha ekitiinisa ab’eishe-emwe abarikureeberera ekibiina, tworobere n’obuhabuzi bwabo. Obwo nibwo ekibiina kiraagire obumwe. Ekikuru munonga, twaguma turi abacureezi, nitwija kushemeza  Ruhanga, “ahakuba Ruhanga arwanisa ab’amaryo, kwonka abacureezi abaha omugisha.”​—1 Petero 5:5.

11. Twateekateeka aha mugaati na viinyo ebirikukoresibwa aha Kiijutsyo nikituhwera kita kureetaho obumwe?

¹¹ Omuringo gwa kabiri ogw’okureetaho obumwe ni guuha? N’okuteekateeka aha makuru g’omugaati na viinyo. Tushemereire kukora eki Ekiijutsyo kitakahikire na munonga omu mwabazyo ogwo ogw’Ekiijutsyo. (1 Abakorinso 11:23-25) Omugaati ogutarimu kitumbisa nigujwekyera omubiri gwa Yesu ogwabaire guhikiriire ogu yaahaireyo nk’ekitambo. Viinyo erikutukura neejwekyera eshagama ye. Kwonka twine kukora ekirikukira aha kumanya enshonga nkuru ezi. Twine kwijuka ngu ekitambo kya Yesu nikitwariramu ebikorwa bibiri ebya rukundo erikukirayo. Yehova akahayo Omwana we ahabwaitu, kandi na Yesu akahayo amagara ge ahabwaitu ayekundiire. Twateekateeka ahari rukundo yaabo, naitwe nikiija kutuhiga kubakunda. Kandi rukundo ei twena twiniire Yehova neija kuhamya obumwe bwaitu.

12. Omu kitebyo ky’omugabe n’abahuuku be, Yesu akooreka ata gye ngu Yehova naayenda ngu tusaasire abandi?

¹² Ni muringo ki ogwa kashatu ogu turikubaasa kureetaho obumwe? Twine kusaasira abandi tutateireho obushonshorekye. Twakora tutyo, nitworeka ngu nitusiima Yehova orikubaasa kutusaasira ebibi byaitu kurabira omu kitambo kya Yesu. Yesu kubaasa kworeka ahabw’enki ni kikuru okusaasira, akatebya ekitebyo ekirikukwata aha mugabe n’abahuuku be. Nyabura ‘we shoma Matayo 18:23-34 reero oyebuuze oti: ‘Nyine ekihika ky’okukora eki Yesu yaayegyeise? Ninyetegyereza ab’eishe-emwe n’abanyaanyazi kandi mbagumisiriza? Nyeteekateekire kusaasira abarikungwisa kubi?’ N’amazima ebibi ebimwe n’eby’amaani kukira ebindi. Kandi obu turi abatahikiriire, nitubaasa kugumirwa kusaasira abantu baakora ebibi ebimwe. Kwonka ekitebyo kya Yesu nikitwegyesa eki Yehova arikwenda ngu tukore. (Shoma Matayo 18:35.) Yesu naakyoreka butunu ngu Yehova tarikwija kutusaasira twaba tutasaasiire ab’eishe-emwe baaba bateisiize kimwe. Eki buzima n’ekintu eki twine kuteekateekaho n’obwegyendesereza. Kubaasa kurinda obumwe bwaitu kandi bukagumaho, twine kusaasira abandi nk’oku Yesu yaatwegyeise.

13. Nitureetaho tuta obumwe twaba twine obusingye n’abandi?

¹³ Twasaasira ab’eishe-emwe na banyaanyazi-itwe, nikituhwera kuguma twine obumwe nabo. Entumwa Paulo akagira ngu twine kukora n’amaani kugira obumwe n’abandi omu busingye. (Abaefeso 4:3) N’ahabw’ekyo omu bwire bw’Ekiijutsyo, na munonga aha izooba ry’Ekiijutsyo, teekateeka aha ku orikutwariza abandi. Yebuuze oti: ‘Abarikummanya nibakireeba butunu ngu tindikuguma nyiniire ekiniga abarikuba bankozire kubi? Abantu nibakireeba ngu niinteeraho kureetaho obusingye n’obumwe?’ Ebi n’ebibuuzo bikuru by’okuteekateekaho.

14. Nitubaasa kworeka tuta ngu nitugumisiririzana “omuri rukundo”?

¹⁴ Omuringo gwa kana ogw’okureetaho obumwe ni guuha? N’okutooreza Yehova omu kugirira abandi rukundo. (1 Yohaana 4:8) Nitwetantara okugira ngu, “nyine kurinda obumwe n’ab’eishe-emwe, kwonka tinyine kubakunda.” Twaba nituteekateeka tutyo, nituba tutarikukuratira okuhana kwa Paulo okw’okugumisiririzana “omuri  rukundo.” (Abaefeso 4:2) Yetegyereze ngu Paulo taragizire ngu twine ‘kugumisiririzana’ kyonka, kureka ngu twine kukikora “omuri rukundo.” Ebi nibitaana. Omu bibiina byaitu harimu abantu b’emiringo etarikushushana, kandi boona Yehova akabeeyiriza haihi. (Yohaana 6:44) N’ahabw’ekyo aine enshonga nyingi nungi ezirikumureetera kubakunda. Mbwenu shi ku haraabe hariho enshonga ezirikureetera Ruhanga kukunda ab’eishe-emwe, nitubaasa tuta kugira ngu tibahikire kukundwa? Tushemereire kubakunda nk’oku Yehova arikwenda ngu tubakunde.​—1 Yohaana 4:20, 21.

15. Nitumanya tuta ngu nihaija kubaho Ekiijutsyo eky’aha muheru?

¹⁵ Eizooba rimwe, nitwija kuza aha Kiijutsyo omurundi gw’aha muheru. Ekyo nitukimanya tuta? Paulo akagambira abashukirweho amajuta ngu baaba nibaijuka okufa kwa Yesu buri mwaka, nibaba nibaranga ‘okufa kwa Mukama waitu, okuhitsya obu ariija.’ (1 Abakorinso 11:26) Kandi na Yesu akagamba aha ‘kwija’ kwe omu bunabi bwe oburikukwata aha bwire bw’emperu. Arikugamba aha kubonabona kwingi okuri haihi kubaho, akagira ati: ‘Akamanyiso k’Omwana w’omuntu nikaija kureebeka omu iguru, amahanga goona ag’ensi nigaija kucura, kandi nibaija kureeba Omwana w’omuntu naizira omu bicu by’omu iguru, aine obushoboorozi n’ekitiinisa kingi. Naija kutuma baamaraika be n’eiraka rihango ry’enzamba, bateerane entoore ze nibazitaaruura omu mbaju ina okuruga aha muheru gw’eiguru okuhika ha gundi.’ (Matayo 24:29-31) Yesu naija kurundaana “entoore ze” nari abatoorainwe ku araatware omu iguru abashukirweho amajuta boona abaraabe bakiri omu nsi. Eki nikiija kubaho okubonabona kwingi kwaheza kutandika kwonka orutaro rwa Haramagedoni rutakabaireho. Omu rutaro orwo, Yesu n’abandi 144,000, nibaija kurwanisa abagabe b’ensi babasingure. (Okushuuruurwa 17:12-14) Ku turaaze aha Kiijutsyo reero Yesu akaija akarundaana abashukirweho amajuta, ekyo nikyo kiraabe eky’aha muheru.

16. Ahabw’enki omaririire kuba aha Kiijutsyo omwaka ogu?

¹⁶ Mariirira kubaho aha Kiijutsyo omu Kwakashatu ebiro 31, 2018. Kandi shaba Yehova kukuhwera kukora ekirikukubaasikira omu kureetera abantu ba Ruhanga kuguma baine obumwe. (Shoma Zaaburi 133:1.) Eizooba rimwe, nitwija kuza aha Kiijutsyo ogw’aha muheru. Eizooba eryo ritakahikire, ka tugume nitworeka ngu obumwe oburikushemeza obu turikugira aha buri Kiijutsyo n’obw’omuhendo munonga ahariitwe.