1, 2. Ni mbeera ki egumire ei abaheereza ba Ruhanga barikurabamu obunaku obu? (Reeba ekishushani aha kutandika.)

ABASHAHO baingi nibajanjaba abarwaire abaine endwara ezirikuturira. Nibajanjaba abarwaire ahakuba nibaba nibenda kubahwera. Kwonka baine kwerinda kutakwatwa endwara ezi barikujanjaba. Naitwe abaheereza ba Yehova turi omu mbeera nk’egyo. Baingi ahariitwe nitutuura nari nitukora n’abantu abaine emiteekateekyere nari emitwarize erikutaanira kimwe n’eya Ruhanga. Eki nikibaasa kutugumira.

² Omu biro ebi eby’emperu, abantu abatarikukunda Ruhanga nibeehuzya emitindo ye erikukwata aha kihikire n’ekitahikire. Entumwa Paulo akagamba aha mitwarize yaabo mibi omu baruha ei yaahandiikiire Timoseo. Paulo akagira ngu twaguma nitweyongyera kwirira haihi n’emperu y’obusingye obu, abantu nibaija kwongyera kugira emitwarize mibi egi. (Shoma 2 Timoseo 3:1-5, 13.) N’obu turikureeba emitwarize mibi egi nk’erikunugwa, nitubaasa kutooreza emiteekateekyere yaabo, emigambire n’ebikorwa by’abantu babi. (Enfumu 13:20) Omu kicweka eki, nituza kureeba oku emitwarize egi, erikutaanira  kimwe n’emitwarize y’abaheereza ba Ruhanga. Nituza n’okureeba eki turikubaasa kukora kwerinda emitwarize mibi twaba nituhwera abantu kumanya Yehova.

3. Ebiri omu 2 Timoseo 3:2-5 nibigamba aha bantu ba muringo ki?

³ Paulo akahandiika ngu omu biro by’emperu, hakaba nihaija kubaho “ebiro by’akabi kaingi.” Bwanyima akahandiika emitwarize mibi 19 ei abantu baabaire nibaija kugira. Emitwarize egi neeshushana n’ei yaagambireho omu Abarooma 1:29-31, kwonka omu baruha ei yaahandiikire Timoseo naakoresa ebigambo ebitarikushangwa ahandi hoona omu Ebyahandiikirwe eby’Orugriika. Paulo akatandika naakoresa ebigambo “abantu baryaba.” Aha, “abantu” nibajwekyera abashaija n’abakazi ahakuba boona nibabaasa kugira emitwarize mibi. Kwonka ti bantu boona ngu baine emitwarize mibi ei Paulo yaagambireho. Abakristaayo baine emitwarize erikutaanira kimwe n’egyo.​—Shoma Malaki 3:18.

4. Noobaasa kushoboorora ota abo abarikwekuza?

⁴ Paulo ku yaaherize kugira ngu abantu nibaija kuba abarikwekunda kandi abakunzi b’esente, akongyeraho ngu abantu nibaija kuba abanyamaryo, abarikwemanya, kandi abarikwekuza. Abantu abaine emitwarize egi nibateekateeka ngu nibakira abandi ahabw’endeebeka nungi, ebi abarikubaasa kukora, ebi baine, nari obushoboorozi obu baine. Abantu nk’abo nibaba nibenda ngu basiimwe kandi bahimbisibwe. Arikuhandiika aha muntu nk’ogu omuhangu omwe akagira ati: “Omu mutima gwe harimu eitambiro rikye ahu arikwinama akeeramya.” Abamwe nibagira ngu okwekuza ni kubi munonga ahakuba abantu abarikwekuza tibarikushemererwa baareeba abandi abarikwekuza.

5. Mbwenu shi abaheereza ba Ruhanga nabo nibabaasa kwetunguura? Shoboorora.

⁵ Yehova naayangira kimwe okwekuza, okurikushoboororwaho omu Baibuli ‘nk’amaisho g’amaryo.’ (Enfumu 6:16, 17) Kandi, Ruhanga tarikubaasa kunywana omuntu oine amaryo. (Zaaburi 10:4) Omuregi niwe aine omutwarize gw’okwekuza. (1 Timoseo 3:6) N’eky’obusaasi kureeba ngu na bamwe aha baheereza ba Ruhanga abeesigwa bakagira amaryo. Nk’eky’okureeberaho, Omugabe Uziya owa Yuda akaba ari omwesigwa kumara emyaka mingi. Kwonka Baibuli neeshoboorora eti: “Ku yaaherize kuhama, yaagira amaryo gaamwita, ahakuba akacumura ahari” Yehova Ruhanga we. Uziya akataaha omuri hekalu kwoterera obubaane, omurimo ogu yaabaire atashemereire kukora. Bwanyima, Omugabe Hezekia owaabaire ari omwesigwa nawe akagira amaryo, kumara akaanya kakye.​—2 Obusingye 26:16; 32:25, 26.

6. Niki ekyabaire nikibaasa kureetera Daudi kwetunguura, kwonka ahabw’enki yaagumire ari omucureezi?

⁶ Abamwe nibeetunguura ahakuba nibareebeka gye, nibamanywa, baine etalanta y’okweshongora, baine amaani, nari nibakundwa abandi. Daudi akaba aine ebintu ebi byona kwonka akaguma ari omucureezi. Nk’eky’okureeberaho, Daudi ku yaitsire Goliasi, Omugabe Saulo akagambira Daudi kushwera muhara we. Daudi akamugarukamu ati: “Mbwenu nyowe niinye oha, n’abaitu nibo baahi, n’omuryango gwa tata omuri Israeli nigwo guuha, nyowe okuba mukwe  w’omugabe?” (1 Samueli 18:18) Niki ekyahwereire Daudi okuguma ari omucureezi? Akaba naamanya ngu emitwarize ei yaabaire aine, okubaasa kwe, n’obujunaanizibwa obu yaabaire aine n’ahabw’okugira ngu Ruhanga akaba ari omucureezi kandi arikumufaho. (Zaaburi 113:5-8) Daudi akaba naamanya ngu buri kirungi eki yaabaire aine nikiruga ahari Yehova.​—Gyeragyeranisa na 1 Abakorinso 4:7.

7. Niki ekiraatuhwere kuba abacureezi?

⁷ Nka Daudi, abaheereza ba Yehova obunaku obu nibateeraho kuba abacureezi. Nitukwatwaho munonga kumanya ngu Yehova, Rukira Boona n’omucureezi. (Zaaburi 18:35) Nitwenda kugyendera aha buhabuzi obu: “Mujware omutima gw’esaasi, embabazi, okutwaza gye, obucureezi n’okugumisiriza.” (Abakolosai 3:12) Nitumanya ngu okukunda “tikwehimbisa, tikwetunguura.” (1 Abakorinso 13:4) Abandi baareeba ngu turi abacureezi, nabo nibabaasa kwenda kumanya Yehova. Nk’oku omushaija otari mu mazima arikubaasa kwirira haihi Yehova ahabw’emitwarize mirungi y’omukazi we Omukristaayo, abantu nibabaasa kwirira haihi Ruhanga ahabw’obucureezi bw’abaheereza be.​—1 Petero 3:1.

8. (a) Abamwe nibareeba bata okugomera abazaire obunaku obu? (b) Baibuli neegambira abaana kukora ki?

⁸ Paulo akooreka oku abantu baabaire nibaija kutwariza abandi omu biro by’emperu. Akagira ngu abaana bakaba nibaija kugomera abazaire baabo. Obunaku obu, ebitabo bingi, vidiyo, n’ebirikworekwa aha TV nibyoreka ngu n’ekya butoosha abaana kugomera abazaire baabo. Kwonka twine kumanya ngu obugomi nibureetera eka kuhwa amaani, kandi eka nigwo musingi. Kandi abantu batwire nibamanya amazima aga. Nk’eky’okureeberaho, ira omuri Bugriika eya ira, omushaija owaabaire ateera abazaire be bakaba baamubinga aha kyaro. Omu biragiro by’Abarooma, owaabaire ateera ishe akaba afubirwa nk’omwitsi. Ebyahandiikirwe by’Oruheburaayo n’eby’Orugriika nibiragiira abaana kworobera abazaire baabo.​—Okuruga 20:12; Abaefeso 6:1-3.

9. Niki ekirikwija kuhwera abaana kworobera abazaire baabo?

⁹ Niki ekirikubaasa kuhwera abaana kworobera abazaire baabo n’obu banywani baabo baakuba nibagomera abazaire baabo? Abaana ku barikuteekateeka aha birungi ebi abazaire baabo babakoreire, eki kiine kubareetera kwenda kubasiima n’okuboorobera. Abato baine kwetegyereza ngu Ruhanga, Tataitwe, naayenda ngu abaana boorobere abazaire baabo. Abato baaguma nibagamba kurungi aha bazaire baabo, eki nikihwera abanywani baabo kuha abazaire baabo ekitiinisa. Kwonka abazaire baaba batarikukunda baana baabo, nikibaasa kugumira abaana kuboorobera. Kwonka omwana yaaba naamanya ngu abazaire be nibamukunda, nikimuhwera kuboorobera n’obu kyakuba  kigumire. Austin ow’eishe-emwe muto naagira ati: “N’obu naabaire mba niinyenda kukora ekitahikire, abazaire bangye bakanteeraho eby’okukuratira, baanshoboororera ahabw’enki baabiteireho, kandi bakareka orwigi rw’okugaaniira nabo rwigwire. Eki kikampwera kuboorobera. Nkareeba buzima ngu nibanfaho, kandi ekyo kikandeetera kwenda kubashemeza.”

10, 11. (a) Ni mitwarize ki mibi ei abantu baine erikworeka ngu tibarikukunda bataahi? (b) Abakristaayo ab’amazima nibakunda abandi kwingana ki?

¹⁰ Paulo akagamba aha mitwarize endiijo erikworeka ngu abantu tibarikukundana. Bwanyima y’okuhandiika aha ‘barikugomera abazaire baabo,’ akakuratsaho entasiima. Eki buzima nikyetegyerezibwa, ahakuba abantu entasiima tibarikureeba omugasho gw’ebi abandi barikubakorera. Kandi Paulo akagira ngu abantu nibaija kuba enshaarizi. Bakaba nibaija kuba abatarikwenda kugarukana n’abandi, ekirikumanyisa ngu bakaabaire batarikwenda kugaruraho obusingye n’abandi. Bakaba nibaija kuba abarikujumiirana, abarikureebyana, barikugamba ebirikusaasa abandi n’ebirikugwisa kubi Ruhanga. Bakaba nibaija kuba abarikubeihererana, abo abarikugamba ebishuba ebirikushiisha abandi. *​—Reeba obugambo obw’ahansi.

¹¹ Abaheereza ba Ruhanga nibataana aha bantu abandi ab’omu nsi, ahakuba bo nibooreka abandi rukundo eyaabuzima. Okuruga ira nikwo batwire nibatwaza. Nangwa na Yesu akagira ngu omu Biragiro bya Musa, ekiragiro ekikuru ekirikukira okukunda abataahi n’ekiragiro ky’okukunda Ruhanga. (Matayo 22:38, 39) Kandi Yesu akagira ngu Abakristaayo ab’amazima bakaba nibaija kumanywa ahabwa rukundo ei baine. (Shoma Yohaana 13:34, 35.) Abakristaayo ab’amazima bakaba nibaija kukunda n’abazigu baabo.​—Matayo 5:43, 44.

12. Yesu akooreka ata abandi rukundo?

¹² Yesu akooreka ngu buzima akaba naakunda abantu, arikubuurira amakuru marungi g’Obukama kuruga omu rurembo rumwe kuza omu rundi. Akatambira empumi, abarema, ababembe, n’abateta. Kandi akahimbuura n’abafu bagaruka baaba abahuriire. (Luka 7:22) Yesu akahayo n’amagara ge kucungura abantu, n’obu baingi baraabe baamwangire. Yesu akooreka gye rukundo nk’eya Ishe. Abajurizi ba Yehova omu nsi yoona, nibatooreza Yesu booreka abandi rukundo.

13. Rukundo ei turikworeka abandi neebahwera eta kwenda kumanya Yehova?

¹³ Ku turikworeka abantu ngu nitubakunda, nikibaasa kubareetera kumanya Tataitwe ow’omu iguru. Omushaija omuri Thailand akaza aha ruteerane oruhango, kandi akakwatwaho kureeba rukundo ei ab’eishe-emwe n’abanyaanyazi-itwe baabaire baine. Ku yaagarukire owe, yaashaba Abajurizi ba Yehova kumwegyesa Baibuli. Reero yaabuurira n’abanyabuzaare be boona. Bwanyima y’ameezi mukaaga, akaha orubazo rwe rw’okubanza orw’okushoma Baibuli omu Kyombeko ky’Obukama. Kubaasa kumanya yaaba nitworeka abandi rukundo, nitubaasa kwebuuza tuti: ‘Niinteeraho kuhwera ab’omu ka yangye, ab’omu kibiina n’abu ndikubuurira? Niinteeraho kureeba abandi nk’oku Yehova arikubareeba?’

14, 15. Abantu baine mitwarize ki emibi, kandi abamwe babaasize kuhindura bata omu mitwarize yaabo?

¹⁴ Omu biro by’emperu, abantu nibooreka endiijo mitwarize mibi ei tushemereire kwetantara. Nk’eky’okureeberaho, abantu abarikwanga ebirungi, nibabyangira kimwe kandi bahakanisa n’abarikubikora. Abantu nk’aba tibarikweyangisa, kandi n’enshaarizi. Abamwe n’engangaazi. Nibakora ebintu batabandize kubiteekateekaho kandi tibarikufayo kumanya oku emitwarize yaabo erikukwata aha bandi.

¹⁵ Baingi abaabaire nibatwaza nk’enyamaishwa babaasize kuhindura omu mitwarize yaabo. Empindahinduka ezi barikukora zikaba zaagambirweho omu Baibuli. (Shoma Isaaya 11:6, 7.) Nitushoma aha nyamaishwa nk’emishega n’entare, ebyakubaire nibituura kumwe omu busingye n’amatungo nk’omwana gw’entaama n’ogw’ente. Niki ekyakureetsireho obusingye obu? Obunabi bwa Baibuli nibugumizamu buti: “Ahabw’okuba okumanya” Yehova nikwija kubuga ensi yoona. (Isaaya 11:9) Enyamaishwa tizirikubaasa kwega ebirikukwata ahari Yehova, n’ahabw’ekyo omu muringo gw’akamanyiso, obunabi obu nibugamba aha mpindahinduka omu mitwarize y’abantu.

16. Baibuli ehwereire eta abantu kuhindura aha mitwarize yaabo?

¹⁶ Ab’eishe-emwe baingi abaabaire bari enshaarizi nk’emishega, hati n’ab’obusingye nk’entaama. Eby’okureeberaho nk’ebi nibiizira aha mukura jw.org ahansi y’omutwe, “The Bible Changes Lives.” Abo  ababaasize kumanya Yehova bakamuheereza tibari nk’abo abarikuhamya emigyenzo y’ediini, bakahakanisa obushoboorozi bwayo. Abantu abo nibeshushaniriza kuba nibaramya Ruhanga, beitu emitwarize yaabo neeyoreka ngu tibarikumuramya. Kwonka, omu baheereza ba Yehova haine baingi abaabaire bari enshaarizi kwonka hati bataireho “omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.” (Abaefeso 4:23, 24) Abantu ku barikwega ahari Ruhanga, nibeetegyereza ngu baine kukuratira emitindo ye. Eki nikibahwera kukora empindahinduka omu bi barikwikiriza, ebi barikuteekateeka n’ebi barikukora. Okukora empindahinduka ezi tikyorobi, kwonka omwoyo gwa Ruhanga niguhwera abarikwenda kumushemeza.

17. Niki ekiraatuhwere kwetantara abantu abaine emitwarize mibi?

¹⁷ Nitwongyera kworoberwa okureeba entaaniso eri ahagati y’abo abarikuheereza Ruhanga n’abatarikumuheereza. Twine kwegyendesereza kureeba ngu emitwarize mibi y’abantu abatarikuheereza Ruhanga tiyaatureetera kutwaza nk’abo. Nitwenda kugyendera aha buhabuzi bwa Yehova tukeetantara abantu abaine emitwarize eri omu 2 Timoseo 3:2-5. Buzima, titurikubaasa kwetantara buri omwe oine emitwarize mibi. Obundi nitukora nabo, nitutuura nabo, nari nitushoma nabo. Kwonka titwine kuteekateeka nari kutwaza nkabo. Niki ekiraatuhwere? Nitubaasa kuhamya omukago gwaitu na Yehova turikweshomesa Baibuli, kandi tukatoorana abanywani abarikumuheereza.

18. Ebi turikugamba n’ebi turikukora nibibaasa kuhwera bita abandi kwenda kumanya Yehova?

¹⁸ Nitwenda n’okuhwera abandi kumanya Yehova. Teeraho kubabuurira, kandi shaba Yehova kukuhwera kukora ekihikire omu bwire obuhikire. Twine kumanyisa abandi ngu turi Abajurizi ba Yehova. Reero, emitwarize yaitu mirungi ebone kuhaisa Yehova ekitiinisa omu mwanya gw’okwehimbisa. Yehova atwegyeise “okwanga okutatiina Ruhanga n’okwetenga eby’ensi, ngu tubone kugumaho omu busingye obu obwa hati, nitwerinda turi abahikiriire, abarikutiina Ruhanga.” (Tito 2:11-14) Twatooreza Yehova tukakora ebi arikukunda, abandi nibakireeba. Abamwe nibabaasa n’okugira bati: “Ka tugyende naimwe; ahabw’okuba tuhuriire ku Ruhanga ari naimwe.”​—Zekaria 8:23.