1. Ahabw’enki abantu abamwe baine kuheebwa ekitiinisa, kandi nituza kwega ki omu kicweka eki?

NITWOREKA tuta ngu nituha abantu ekitiinisa? Eki nitukikora turikubatwariza omu muringo ogurikworeka ngu nibatukira. Nitukira kuha ekitiinisa abarikuba bakozire eby’ekitiinisa nari abarikuba baine omwanya gw’ahaiguru. Omu kicweka eki, nituza kureeba abu twine kuha ekitiinisa n’enshonga ahabw’enki.

2, 3. (a) Ahabw’enki okukira munonga tushemereire kuha Yehova ekitiinisa? (Reeba ekishushani aha kutandika.) (b) Omwana gw’entaama orikugambwaho omu Okushuuruurwa 5:13 n’oha, kandi ahabw’enki twine kumuha ekitiinisa?

² Okushuuruurwa 5:13 nihagira ngu “Oshutami aha kitebe ky’obukama” hamwe “n’Omwana gw’entaama” bashemereire kuheebwa ekitiinisa. “Oshutami aha kitebe ky’obukama” ni Yehova. Omu Okushuuruurwa eshuura ya 4, ebihangirwe eby’omu iguru nibituhwera kumanya ahabw’enki Yehova, ogumaho “ebiro n’ebiro,” ashemereire kuheebwa ekitiinisa. Nibigira biti: “Mukama Ruhanga waitu, oshemereire kuhimbisibwa  n’okuheebwa ekitiinisa n’obushoboorozi, ahabw’okuba niiwe waahangire byona; ahabw’okukunda kwawe bikahangwa kandi byabaho.”—Okushuuruurwa 4:9-11.

³ ‘Omwana gw’entaama’ orikugambwaho omu Okushuuruurwa 5:13 ni Yesu Kristo. Nitukimanya tuta? Obu Yesu yaabaire ari omu nsi akaba naayetwa “Omwana gw’entaama wa Ruhanga, orikwihaho ekibi ky’ensi!” (Yohaana 1:29) Ni mugabe ki ondiijo orayehaireho kufa akaba ekitambo ahabw’abantu abu arikutegyeka? Buzima egi n’enshonga nungi eshemereire kutureetera kumuha ekitiinisa. Yesu ashemereire kuheebwa ekitiinisa ahakuba ‘n’omutegyeki, Omugabe w’abagabe, kandi Omukama w’abakama.’ (1 Timoseo 6:14-16) Obundi nooyehurira nk’oku ebihangirwe eby’omu iguru birikwehurira ebirikweshongora biti: “Omwana gw’entaama owaitsirwe ashemereire kuheebwa obushoboorozi n’obutungi n’obwengye n’amaani n’ekitiinisa n’okuhimbisibwa n’omugisha!”—Okushuuruurwa 5:12.

⁴ Yohaana 5:22, 23 nihagira ngu Yehova akahindura Kristo omucwi w’emanja ow’abantu boona. Egi niyo nshonga nkuru ahabw’enki twine kuha Yesu ekitiinisa. Kandi ku turikukora eki, nabwo nituba nituha Yehova ekitiinisa. Twacwamu kuha Yesu ekitiinisa na Ishe, nitwija kutunga amagara agatahwaho.—Shoma Zaaburi 2:11, 12.

⁵ Abantu bakahangwa “omu kushusha kwa Ruhanga.” (Okutandika 1:27) Eki nikimanyisa ngu abantu baine obushoboorozi bw’okworeka emitwarize nk’eya Ruhanga. Nk’eky’okureeberaho, abantu nibaba baine emitwarize nka rukundo, embabazi n’okusaasibwa abandi. Kandi abantu bakahangwa baine omuntu w’omunda, orikubamanyisa baakora ekirungi nari ekibi, eky’amazima nari ekitari ky’amazima, ekishemeire nari ekitashemeire. (Abarooma 2:14, 15) Abantu baingi nibakunda ebintu birungi, kandi nibaba nibenda kutuurana n’abandi omu busingye. Eki tikirikutangaaza, ahakuba Yehova ni Ruhanga w’obuteeka n’obusingye. Buzima, abantu boona bakahangwa baine obushoboorozi bw’okutooreza Yehova omu miringo etari emwe n’emwe. Ahabw’enshonga egi, tushemereire kubatiina n’okubaha ekitiinisa.—Zaaburi 8:5.

6, 7. Abajurizi ba Yehova nibataana bata n’abaingi omu kuha abandi ekitiinisa?

⁶ Nitumanya ngu abantu abandi baine kuheebwa ekitiinisa, kwonka nikibaasa kuguma kumanya ni kitiinisa ki eki twine kubaha kandi ekirikwingana ki. Eki kiri kityo ahabw’okugira ngu abantu baingi abatahikiriire nibaba baine emiteekateekyere y’ensi ya Sitaane. Abantu baingi nibahindura abashaija nari abakazi ebirikuramibwa. Omu mwanya gw’okubaha ekitiinisa nk’oku Yehova arikwenda, nibabaha ekitiinisa ekirengire babatwara nka baaruhanga. Nibabaasa kutooreza emijwarire yaabo, emitwarize yaabo, n’emicwe y’abeebembezi b’ediini n’abategyeki, abazaani ba vidiyo, n’abandi abarikuranganwa.

⁷ Abakristaayo ab’amazima nibamanya ngu buzima nikiba kigwire kuha abantu ekitiinisa kuhika aha rurengo orwo. Omu bantu  boona abarabaireho, Yesu wenka niwe yaatuteeraireho eky’okureeberaho ekihikire eki twine kutooreza. (1 Petero 2:21) Twine kwijuka ngu abantu “boona bakashiisha, kandi tibarikuhika aha kitiinisa kya Ruhanga.” (Abarooma 3:23) Tihaine omuntu oshemereire kuramibwa. Twaha abantu ekitiinisa kingi kukira eki tushemereire kubaha, eki nikigwisa kubi Yehova.

8, 9. (a) Abajurizi ba Yehova nibareeba bata abeebembezi ba gavumenti? (b) Ni ryari obu turikubaasa kwanga kworobera abeebembezi?

⁸ Hariho abantu abu tushemereire kuha ekitiinisa ahabw’omwanya gwabo. Nk’eky’okureeberaho, teekateeka aha beebembezi ba gavumenti n’ebi barikutukorera. Nibahwera omu kureetaho oburinzi n’okuhwera abatuuzi kutunga ebirikwetengyesa. Ebi barikukora nibigasira munonga abantu. Entumwa Paulo akagira ngu tureebe abeebembezi ba gavumenti ‘nk’abakama abarikutegyeka.’ Kandi akagira ngu twine n’okworobera ebiragiro byabo arikugira ati: “Mwihure boona ebi barikubaihuza; abarikushoza mubahe omushoro,” n’abo “ab’ekitiinisa mubahe ekitiinisa.”—Abarooma 13:1, 7.

⁹ Abajurizi ba Yehova nitukora kyona ekirikubaasika kworeka ngu nituha ekitiinisa abakozi ba gavumenti. N’amazima buri ihanga riine entwaza yaaryo, n’ahabw’ekyo eki abeebembezi barikwenda omu ihanga erindi nikibaasa kuba nikitaana n’eky’ahandi. Kwonka nabwo, nitukwatanisa nabo kutagumisa omurimo gwabo. Kwonka baatushaba kukora ekintu ekirikutureetera kugomera Yehova, titurikubaasa kukikora. Kyaba kityo, nitworobera Yehova kandi tumuha ekitiinisa omu mwanya gw’abantu.—Shoma 1 Petero 2:13-17.

10. Abaheereza ba Yehova aba ira bakatuteeraho bata eky’okureeberaho kirungi?

¹⁰ Nitubaasa kwegyera aha baheereza ba Yehova aba ira, abaahaire abeebembezi ekitiinisa. Yosefu na Mariamu bakatuteeraho eky’okureeberaho kirungi. Obu Abarooma baabaire nibenda kumanya omuhendo gw’abantu abari omu kicweka kyabo, Yosefu na Mariamu bakaza Betelehemu kwehandiikisa n’obu Mariamu araabe yaabaire ari haihi kuzaara. (Luka 2:1-5) Entumwa Paulo nawe akaba naaha abeebembezi ekitiinisa. Obu baamutaho orubanja, omu muringo gw’ekitiinisa akatabaaza aha Mugabe Heroode Aguripa n’omutegyeki Festo ow’eishaza rya Yuda.—Ebyakozirwe 25:1-12; 26:1-3.

11, 12. (a) Ahabw’enki tutarikuha abeebembezi b’ediini ekitiinisa ky’omutaano? (b) Hakabaho ki Omujurizi wa Yehova ku yaahaire ekitiinisa omwebembezi?

¹¹ Kandi shi abeebembezi b’ediini? Mbwenu shi twine kubaha ekitiinisa ky’omutaano? Nitubaha ekitiinisa nk’eki tushemereire kuha abandi bantu. Kwonka nikiba kigwire kubaha ekitiinisa ky’omutaano, n’obu baraabe nibateekateeka ngu twine kukibaha. Ahabw’enki? Ahakuba ediini ezitahikire tizirikwegyesa amazima agarikukwata ahari Ruhanga n’Ekigambo kye, Baibuli. Yesu akeetomboitera abeebembezi b’ediini z’ebishuba, reero yaabeeta endyarya kandi abeebembezi babi. (Matayo 23:23, 24) Kwonka, nikiba kitagwire kuha abategyeki ekitiinisa ky’omutaano. Kandi ahabw’okukora eki, obumwe babaasize kutuhwera.

¹² Omwe aha bategyeki nk’abo akaba ari Dr. Heinrich Gleissner, kuruga Austria. Omu Rutaro rw’Ensi Yoona orwa II, Abaanazi bakamukwata. Ku baamuteire omu gaari y’omwika kumutwara omu nkambi, akashangamu Leopold Engleitner, omwe  aha Bajurizi ba Yehova kuruga Austria. Ow’eishe-emwe Engleitner omu muringo gw’ekitiinisa akashoboororera Dr. Gleissner enyegyesa ze, reero yaazisiima munonga. Orutaro ku rwahwaire, Gleissner akaba akoresa obushoboorozi bwe kuhwera Abajurizi ba Yehova omuri Austria. Noobaasa kuba noomanya ebintu birungi ebibaireho ahabw’okugira ngu Abakristaayo nibaha abeebembezi ekitiinisa.

13. Ni baahi abu twine kuha ekitiinisa, kandi n’ahabw’enki?

¹³ Tushemereire kuha n’ab’eishe-emwe bagyenzi baitu ekitiinisa. Eki kihikire na munonga aha bareeberezi b’ebibiina, abarikutaayaayira ebibiina, ab’Obukiiko bw’Amataagi, n’ab’Akakiiko Akareeberezi. (Shoma 1 Timoseo 5:17.) Boona nibafayo aha baheereza ba Ruhanga, kandi Baibuli neebeeta ‘ebiconco omu bantu.’ (Abaefeso 4:8) N’ahabw’ekyo, nikiba kiri eky’oburyo kubaha ekitiinisa tutarikwihirira aha ihanga ryabo, obwegyese bwabo, oku abantu barikubatwara, nari entaasya yaabo. Abakristaayo aba ira bakatuteeraho eky’okureeberaho kirungi. Bakaba nibaha ekitiinisa abarikwebembera ekibiina, kandi naitwe nitukora nikyo kimwe obunaku obu. Twaba turi n’abashaija aba, titurikubatwara nka baamaraika, nari nk’ab’omutaano munonga. Kwonka nitubaha ekitiinisa ahabw’okukora n’amaani gaabo n’obucureezi bwabo.—Shoma 2 Abakorinso 1:24; Okushuuruurwa 19:10.

14, 15. Abareeberezi Abakristaayo nibataana bata aha beebembezi b’ediini ezindi?

¹⁴ Abareeberezi abo bari nk’abariisa b’entaama abacureezi. Tibarikwenda ngu tubatware nka baarurangaanwa. N’ahabw’ekyo  nibataanira kimwe aha beebembezi b’ediini ab’obunaku obu, n’abo abaabaire bariho obu Yesu yaabaire ari omu nsi. Akabagambaho ati: “Bakunda emyanya y’ekitiinisa omu magyenyi, n’ebitebe by’ekitiinisa omuri sinagogi, n’okutangirirwa omu katare.”—Matayo 23:6, 7.

¹⁵ Abareeberezi Abakristaayo niboorobera ebigambo bya Yesu ebi: “Mutaryetwa Rabi, ahabw’okuba Omwegyesa waanyu n’omwe, kandi naimwe mwena muri ab’eishe-emwe. Kandi mutaryeta omuntu weena ow’omu nsi Shoimwe; ahabw’okuba mwine Shoimwe omwe ori omu iguru. Kandi mutaryetwa abakama, ahabw’okuba mwine Omukama omwe, niwe Kristo. Orikukira obukuru omuriimwe aryaba omuheereza waanyu; orikwetunguura aryagarurwa ahansi; kandi orikwegarura ahansi, aryatunguurwa.” (Matayo 23:8-12) Abareeberezi omu nsi yoona baaba abacureezi bakoorobera ebigambo bya Yesu, ab’eishe-emwe nibaija kubaha ekitiinisa.

16. Ahabw’enki tushemereire kuguma nituteeraho kuha abandi ekitiinisa?

¹⁶ Nikibaasa kututwarira obwire kwega kuha abandi ekitiinisa. Kandi nikwo kyabaire n’aha Bakristaayo aba ira. (Ebyakozirwe 10:22-26; 3 Yohaana 9, 10) Kwonka okwefeerereza kwaitu ti kwa busha. Ku turikuha abandi ekitiinisa nk’oku Yehova arikwenda ngu tukore, nitwija kutunga emigisha mingi.

17. Ni birungi ki ebirikuruga omu kuha ekitiinisa abantu abaine obushoboorozi?

¹⁷ Twaha ab’obushoboorozi ekitiinisa omu kicweka kyaitu, nabo nibabaasa kumanya ngu twine obugabe bw’okubuurira. Nibabaasa n’okureeba gye omurimo gwaitu gw’okubuurira. Ekyo nikyo kyabaireho omuri Germany obu payoniya orikwetwa Birgit yaaza aha mukoro gw’eishomero, omuhara arikuza kuhendera emishomo ye. Abashomesa bakagambira Birgit ngu kikaba kiri ekintu ky’omuhendo kuba baine abaana Abajurizi ba Yehova kumara emyaka mingi. Bakaba nibareeba ngu abaana Abajurizi ba Yehova bakareetera eishomero kuba omwanya murungi. Birgit akabagira ati: “Abaana baitu nibeegyesibwa kukuratira emitindo ya Ruhanga ey’emicwe, kandi eki nikitwariramu okuha ekitiinisa abashomesa.” Omushomesa omwe akagira ngu ku ogire ngu abaana boona bari nk’Abajurizi ba Yehova, okushomesa ku kaabaire kworobi. Bakaba baine emiteekateekyere mirungi aha baana Abajurizi ba Yehova, kandi bwanyima ya saabiiti nyingi omwe aha bashomesa akaija aha ruteerane oruhango orw’ebiro bishatu.

18, 19. Tushemereire kwijuka ki twaba nituha abareeberezi ekitiinisa?

¹⁸ Emisingye eri omu Kigambo kya Ruhanga neebaasa kutuhwera kwetegyereza oku twine kuha abareeberezi ekitiinisa. (Shoma  Abaheburaayo 13:7, 17.) Twine kubeebaza kandi tukabasiima ahabw’okukora n’amaani. Twaikiriza obuhabuzi obu abareeberezi barikutuha, ekyo nikibahwera kuheereza baine okushemererwa. Kandi Baibuli neegira ngu tutooreze okwikiriza kwabo. Kwonka eki tikirikumanyisa ngu tuteereho kutooreza omureeberezi “orikumanywa” oku arikujwara, oku arikugamba, nari oku arikwegyesa. Twakora tutyo, nikibaasa kureebeka ngu nitukuratira abantu omu mwanya gwa Kristo. Titushemereire kwebwa ngu abareeberezi tibahikiriire nk’oku naitwe tutahikiriire.

¹⁹ Twaha abareeberezi ekitiinisa kandi tukanga kubatwariza nk’abarikurangaanwa, eki nikiija kubahwera. Mu muringo ki? Nikibaasa kubahwera kuguma bari abacureezi, kandi bakeetantara kuteekateeka ngu nibakira abandi nari ngu eki barikukora butoosha nikiba kihikire.

20. Nitugasirwa tuta twaha abandi ekitiinisa?

²⁰ Okuha abandi ekitiinisa nikituhwera kwetantara kuba abarikweyendeza, kandi nituba abacureezi abandi baatuha ekitiinisa. Kandi eki n’eky’obuhwezi bwaitu ahakuba nikituhwera kwetantara kuteerwa entsibo omuntu ou turikuha ekitiinisa yaatureebya. Omugasho ogundi n’okugira ngu nikituhwera kuguma tuhamiire aha kibiina kya Yehova. Ekibiina tikirikuha omuntu weena ekitiinisa ky’omutaano yaaba ari ow’eishe-emwe nari atari w’eishe-emwe.

21. Omugasho mukuru gw’okuha abandi ekitiinisa ni guuha?

²¹ Omugasho mukuru oguri omu kuha abandi ekitiinisa, n’okugira ngu twakikora nitushemeza Ruhanga. Obwo nituba twakora eki arikwenda ngu tukore, kandi nitwija kuguma turi abeesigwa ahariwe. Reero obwo Yehova naija kugarukamu Sitaane, orikugira ngu tihaine orikubaasa kuguma ari omwesigwa. (Enfumu 27:11) Abantu baingi omu nsi tibarikumanya oku baine kuha abandi ekitiinisa omu muringo murungi. Twine okushemererwa kwingi ahabw’okugira ngu nitumanya oku twine kuha abandi ekitiinisa omu muringo ogu Yehova arikusiima!