1-3. Okuheereza Yehova ‘n’omutima gwaitu gwona’ nikimanyisa ki? Ha eky’okureeberaho.

TWENA tituhikiriire kandi nitukora enshobe. Ekirungi, Yehova atuhaire ekitambo, kandi ayeteekateekire kutusaasira. N’ahabw’ekyo, twaba abacureezi kandi tukeeteisa, nitubaasa kumushaba kutusaasira. Nitubaasa kugira obuhame ngu Yehova tarikwija kututwariza “nk’ebibi byaitu oku biri.” (Zaaburi 103:10) Nabwo, twine ‘kumuheereza n’omutima gwaitu gwona.’ (1 Obusingye 28:9) Nitubaasa kukikora tuta n’obu turaabe tutahikiriire?

² Kubaasa kutuhwera, ka tugyeragyeranise Omugabe Asa n’Omugabe Amazia. Bombi bakakora ebintu birungi, beitu nabo bakaba nibakora enshobe ahakuba bakaba batahikiriire. Kwonka Baibuli neegira ngu “omutima gwa Asa gukaba gutaine ky’okuhanwa ebiro bye byona.” (2 Obusingye 15:16, 17; 25:1, 2; Enfumu 17:3) Butoosha akaba naateeraho kushemeza Yehova, kandi akaba naamuheereza n’omutima gwe gwona.  (1 Obusingye 28:9) Kwonka Amazia, taraheereize Yehova ‘n’omutima guhikire.’ Bwanyima y’okusingura abazigu ba Ruhanga, akareeta ebishushani byabo yaatandika kubiramya.—2 Obusingye 25:11-16.

³ Omuntu orikuheereza Ruhanga ‘n’omutima gwe gwona’ naaba naakundira kimwe Yehova, kandi arikwenda kumuramya ebiro byona. Omu Baibuli, ekigambo “omutima” butoosha nikiba nikimanyisa eki turi omunda. Nikitwariramu oku turikuteekateeka, ebi turikukunda, ebi turikwenda ngu tukore, n’ahabw’enki turikubikora. N’obu turaabe tutahikiriire, nitubaasa kuheereza Yehova n’omutima gwaitu gwona. Nitumuheereza ahakuba buzima nikyo turikwenda, ti ahabw’okugira ngu nituhikiiriza omugyenzo.—2 Obusingye 19:9.

4. Nituza kushwijuma ki?

⁴ Nitubaasa kwetegyerereza kimwe eki okuheereza Ruhanga n’omutima gwaitu gwona kirikumanyisa, turikushwijuma eky’okureeberaho kya Asa n’eky’abagabe ba Yuda abandi bashatu, Yehoshafaati, Hezekia, na Yosia. N’obu abagabe aba bana baraabe baakozire enshobe, nabwo bakashemeza Yehova. Akaba naareeba ngu nibamuheereza n’omutima gwabo gwona. Ahabw’enki Yehova yaabaire naabareeba atyo, kandi nitubaasa kubatooreza tuta?

5. Asa akakora ki ku yaabaire omugabe?

⁵ Asa akaba ari omugabe wa kashatu owa Yuda bwanyima y’eihanga rya Israeli kubaganisibwamu obugabe bwa Israeli n’obwa Yuda. Asa ku yaabaire omugabe wa Yuda, akaba amaririire kumaraho okuramya kw’ebishuba n’okwiha obushambani oburengyesereize omu bukama bwe. Akashenyagura ebishushani ebi abantu baabaire nibaramya, kandi yaabinga baamaraaya abaabaire bari omu hekalu. Asa akabinga na nyinenkuru, yaamwiha omu mwanya gwe, “naamutura ekishushani.” (1 Abagabe 15:11-13) Asa akagaruka yaahiga abantu “kusherura” Yehova n’okworobera “ebiragiro n’ebyatairweho.” Asa akakora kyona ekirikubaasika kuhwera abantu kuramya Yehova.—2 Obusingye 14:4.

6. Asa akatwaza ata obu Abaesiopia baataahirira Yuda?

⁶ Emyaka ikumi ei Asa yaamazire naategyeka, obugabe bwa Yuda bukaba butarimu ntaro. Bwanyima Abaesiopia bakaija kurwanisa Yuda baine amahe akakaikuru kamwe n’ebigaari magana ashatu. (2 Obusingye 14:1, 6, 9, 10) Asa akakora ki? Akaba atarikubanganisa ngu Yehova naija kuhwera abaheereza be. N’ahabw’ekyo akashaba Yehova kubahwera kusingura orutaro. (Shoma 2 Obusingye 14:11.) Obumwe, Yehova akaba acwamu kuhwera abantu be kusingura abazigu baabo, nangwa n’obu abagabe abo baabaire batari beesigwa ahariwe. Akakora eki kworeka ngu ni Ruhanga ow’amazima. (1 Abagabe 20:13, 26-30) Kwonka aha murundi ogu, Yehova akahwera  abaheereza be ahabw’okugira ngu Asa akaba naamwesiga. Yehova akagarukamu okushaba kwa Asa, kandi bakasingura orutaro. (2 Obusingye 14:12, 13) Bwanyima Asa akakora enshobe y’amaani obu yaashaba omugabe wa Asiria obuhwezi, omu mwanya gw’okubushaba Yehova. (1 Abagabe 15:16-22) N’obu ekyo kiraabe kyabaireho, Yehova akaba naareeba ngu Asa naamukunda. Omutima gwe ‘gukaguma guri ogw’amazima ahari’ Yehova ebiro by’amagara ge byona. Nitubaasa kutooreza tuta eky’okureeberaho kirungi kya Asa?—1 Abagabe 15:14.

7, 8. Nitubaasa kutooreza tuta Asa?

⁷ Nitumanya tuta yaaba twehaireyo ahari Yehova n’omutima gwaitu gwona? Nitubaasa kwebuuza tuti: ‘Niinyija kworobera Yehova n’obu kyakuba kigumire kukikora? Buzima mmaririire kurinda ekibiina kye kuguma kiri ekirikwera?’ Teekateeka aha bumanzi obu Asa yaabaire aine kugira, kubaasa kwiha nyinenkuru omu mwanya gwe! Obumwe, nikibaasa kukwetengyesa kugira obumanzi nka Asa. Nk’eky’okureeberaho, ow’omu ka yaanyu nari shi munywani waawe ku yaakukora ekibi, kandi akanga kweteisa, reero akaba ow’okubingwa omu kibiina? Noobaasa kumariirira kutakwatanisa n’omuntu ogwo? Omutima gwawe nigwija kukuhiga kukora ki?

⁸ Nka Asa, obumwe nitubaasa kuteekateeka ngu buri omwe naaturwanisa. Obundi abeegi bagyenzi baawe aha ishomero nari abashomesa nibakushekyerera ahabw’okugira ngu ori omwe aha Bajurizi ba Yehova. Nari abu orikukora nabo nibateekateeka ngu ori omushema ahakuba nooshaba ebiro kuza omu nteerane empango nari ahabw’okugira ngu torikukora eshaaha ezirengire aha zi oshemereire kukora. Omu mbeera nk’ezo, yesigye Ruhanga, nk’oku Asa yaakozire. Shaba Yehova, gira obumanzi, kandi ogume okore ebihikire. Ijuka ngu Yehova akagumya Asa, kandi naiwe naija kukugumya.

9. Nitubaasa kushemeza tuta Yehova twaba nitubuurira?

⁹ Asa tarayeteekateekireho wenka, kureka akahiga n’abandi “kusherura” Yehova. Naitwe nituhwera abantu kuramya Yehova. Naatureeba twaba nitugambira abandi ebirikumukwataho. Ka naashemererwa yaareeba ngu nitukora ekyo ahabw’okugira ngu nitumukunda, kandi ngu nitufayo aha bantu n’ebiro byabo by’omumaisho!

10, 11. Nitubaasa kutooreza tuta Yehoshafaati?

¹⁰ Mutabani wa Asa Yehoshafaati ‘akagyendera omu muhanda gwa Asa ishe.’ (2 Obusingye 20:31, 32) Mu muringo ki? Yehoshafaati, akahiga abantu kugumizamu nibaramya Yehova nka ishe. Akoohereza abashaija omu ndembo z’omuri Yuda kwegyesa abantu ebiri omu ‘kitabo kya Mukama eky’ebiragiro.’ (2 Obusingye 17:7-10) Nangwa akaza n’omu bicweka ebiri  omu bugabe bw’obukiizi-bwa-bumosho obwa Israeli, kuhika omu bantu abari omu nsi y’ebibungo eya Efuraimu, “yaabagarura ahari” Yehova. (2 Obusingye 19:4) Yehoshafaati akaba ari omugabe “owaabaire naasherura Mukama n’omutima gwe gwona.”—2 Obusingye 22:9.

¹¹ Obunaku obu, Yehova naayenda ngu abantu omu nsi yoona begyesibwe ebirikumukwataho, kandi twena nitubaasa kuhwera omu murimo ogu. Oine ekigyendererwa ky’okwejumba omu murimo ogu buri kwezi? Okaayenzire kwegyesa abandi Baibuli kugira ngu nabo batandikye kuramya Yehova? Mbwenu shi nooshaba aha bikwatiraine n’enshonga egi? Waateeraho munonga, Yehova naabaasa kukuhwera kutunga omuntu w’okwegyesa Baibuli. Mbwenu shi oyeteekateekire kwegyesa omuntu n’obu kyakuba nikikwetengyesa kuhayo bumwe aha bwire bwawe? Nk’oku Yehoshafaati yaateireho kuhwera abandi kugaruka kuheereza Yehova, nitubaasa kuhwera abatakibuurira. Kandi, abareeberezi nibatebeekanisa kutaayaayira n’okuhwera ababingirwe omu kibiina, abarikubaasa kuba baarekire ebibi byabo ebyenyima.

12, 13. (a) Yehoshafaati ku yaatiinire akakora ki? (b) Ahabw’enki twine kutooreza eky’okureeberaho kya Yehoshafaati?

¹² Yehoshafaati okushushana na ishe Asa, nawe akeesiga Yehova obu amahe maingi gaija kurwanisa Yuda. (Shoma 2 Obusingye 20:2-4.) Akaba atiinire kandi akashaba Yehova obuhwezi. Omu kushaba kwe, akaikiriza ngu bakaba batarikubaasa kusingura omuzigu waabo. Kandi nabwo akagira ngu we n’abantu be bakaba batarikumanya eki baine kukora. Yehoshafaati akaba ataine kubanganisa kwona ngu Yehova naija kubahwera. Akagira ati: “Niiwe tuhangire amaisho.”—2 Obusingye 20:12.

¹³ Nka Yehoshafaati, obumwe twaba twine oburemeezi nitubaasa kuba tutarikumanya eki twine kukora, nangwa nitubaasa n’okwerarikirira. (2 Abakorinso 4:8, 9) Kwonka ijuka eki Yehoshafaati yaakozire. Omu maisho g’abantu boona, akashaba Yehova yaamugambira oku baabaire bataine maani. (2 Obusingye 20:5) Emitwe y’amaka nibabaasa kutooreza eky’okureeberaho kya Yehoshafaati. Shaba Yehova akuhwere n’eka yaawe kwemera oburemeezi n’okumanya eki mwine kukora. Otahemuka kushaba ebintu ebyo ab’omu ka yaawe bakuhurikiize. Nibaza kwetegyereza oku orikwesiga Yehova. Akahwera Yehoshafaati, kandi naiwe naija kukuhwera.

14, 15. Hezekia akeesiga Yehova mu muringo ki?

¹⁴ Hezekia akaba ari omugabe ondiijo owaahamiire ahari Yehova. Akatwaza atyo n’obu ishe yaamuteeraireho eky’okureeberaho kibi arikuramya ebishushani. Hezekia ‘akaihaho emyanya mikuru ey’okuramizamu, yaasheenya enyomyo z’amabaare, yaatema Ashera; kandi yaacwagacwagura enjoka y’omuringa ei Musa yaabaire akozire,’ ahakuba Abaisraeli bakaba nibagiramya. Hezekia akaba ayeheereireyo kimwe ahari Yehova. ‘Akaguma naayorobera ebiragiro ebi Mukama yaaragiire Musa.’—2 Abagabe 18:1-6.

¹⁵ Obu Hezekia yaabaire ari omugabe, amahe g’Abasiria gakataahirira Yuda gaatiinatiinisa kucwekyereza Yerusaalemu. Omugabe wa Siria, Senakeribu, akashungisa  Yehova, kandi yaateeraho kureetera Hezekia kwikiriza kwehayo omu mikono ye. Omu bwire obwo obw’akabi, Hezekia akeesigira kimwe Yehova yaamushaba kumuhwera. Akaba naamanya ngu Yehova aine amaani okukira Abasiria, kandi ngu naabaasa kujuna abantu be. (Shoma Isaaya 37:15-20.) Ruhanga akagarukamu okushaba kwe arikwohereza maraika we kwita amahe g’Abaasiria 185,000.—Isaaya 37:36, 37.

16, 17. Noobaasa kutooreza ota Hezekia?

¹⁶ Bwanyima, Hezekia akarwara munonga kandi akaba ari haihi kufa. Omu bwire obwo obugumire, akeeshengyereza Yehova kwijuka obwesigwa bwe, kandi yaamushaba n’okumuhwera. (Shoma 2 Abagabe 20:1-3.) Yehova akahurira okushaba kwa Hezekia kandi yaamukiza. Nitukimanya gye kuruga omu Baibuli ngu obunaku obu Ruhanga tarikutukiza endwara omu muringo gw’eky’okutangaaza nari kutwongyera aha buhangaazi bwaitu. Kwonka nka Hezekia, nitubaasa kwesiga Yehova kutuhwera. Nitubaasa kumugambira ngu, Ai Yehova “ninkweshengyereza, mbwenu ijuka oku ngyendeire omu maisho gaawe omu bwesigwa n’omutima oguhikire.” Noikiriza ngu Yehova naija kukuhwera butoosha, nangwa n’obu waakuba orwaire?—Zaaburi 41:3.

¹⁷ Ni mu muringo ki ogundi ogu turikubaasa kutoorezamu Hezekia? Obundi hariho ekirikwenda kutaahataaha omu mukago gwaitu na Yehova nari nikitwara obwire bw’okumuheereza. Nk’eky’okureeberaho, baingi obunaku obu nibatwara abantu nk’ebirikuramibwa. Nibegomba abarikurangaanwa n’abantu abandi abu batarikumanya. Baingi nibamara obwire bwingi barikushoma ebirikubakwataho n’okureeba ebishushani byabo. Nari nibakira kukoresa emikura eri aha Intaneeti n’ebindi kugaaniira n’abantu aha Intaneeti. Amazima gari ngu, nitushemererwa kugaaniira n’ab’omu maka gaitu n’abanywani baitu turikukoresa ebintu nk’ebyo. Kwonka nitubaasa kushiisha obwire bwingi turi aha mikura egyo. Nitubaasa n’okugira amaryo abantu abandi baayoreka ngu nibakunda ebishushani byaitu ebiri aha mukura nari ebigambo ebi tutaireho. Nari, twareeba ngu abamwe baarekiire aho kubireeba, nitubaasa kwehurira kubi. Nitubaasa kwegyera aha ntumwa Paulo, Priskila na Akula. Nooteekateeka ngu buri izooba bakaba nibamara obwire barikucoondoza aha bintu ebi abantu bakozire, okukirira na munonga abantu abatarikuheereza Yehova? Baibuli neegira ngu Paulo ‘akaagyemwa ekigambo kya Ruhanga.’ Priskila na Akula bakamara obwire bwabo barikubuurira n’okushoboororera gye abandi “omuhanda gwa Ruhanga.” (Ebyakozirwe 18:4, 5, 26) Nitubaasa kwebuuza tuti: ‘Ninyegyendesereza kutatwara abantu abandi nk’ebintu ebirikuramibwa? Ninyetantara kushiisha obwire bwingi ndikukora ebintu ebitari bikuru?’—Shoma Abaefeso 5:15, 16.

18, 19. Nitubaasa kuba tuta nka Yosia?

¹⁸ Omugabe Yosia nawe akoorobera ebiragiro bya Yehova “n’omutima gwe gwona.” (2 Obusingye 34:31) Yosia akaba ari mwijukuru wa Hezekia. Obu yaabaire ari omushogoyo, “akatandika kusherura  Ruhanga wa Daudi.” Kandi obu yaabaire aine emyaka 20, akatandika kushemeza Yuda arikwihamu okuramya ebishushani. (Shoma 2 Obusingye 34:1-3.) Yosia akateeraho munonga kushemeza Yehova, okukira abagabe abandi aba Yuda. Reero eizooba rimwe, omunyamurwa omukuru akabona ekitabo ky’Ebiragiro bya Ruhanga omu hekalu. Eki nikibaasa kuba kiri ekitabo eki Musa yaabaire ayehandiikiire! Omuhandiiki ku yaashomiire Yosia ekitabo eki, Yosia akeetegyereza ngu akaba aine bingi by’okukora kuheereza Yehova n’omutima gwe gwona. Kandi akahiga n’abandi kukora nikyo kimwe. N’ekyarugiremu, abantu “tibararekire kukuratira” Yehova obwire bwona obu Yosia yaabaire ariho.—2 Obusingye 34:27, 33.

¹⁹ Ku oraabe ori muto, noobaasa kutooreza Yosia, kandi omanye gye Yehova. Yosia naabaasa kuba yaayeegiire ahari ishenkuru Omugabe Manaase owaabaire ayeteisize, ngu Yehova naaba ayeteekateekire kusaasira. Naiwe noobaasa kwegyera aha bakuru omu ka yaanyu n’omu kibiina. Nibabaasa kukugambira aha bintu birungi ebi Yehova abakoreire. Kandi nabwo, ijuka oku Yosia yaayehuriire bwanyima y’okwega eki Ebyahandiikirwe birikugamba. Akaba aine ekihika ky’okushemeza Yehova, kandi akakora empindahinduka ahonaaho. Waaba nooshoma Ebyahandiikirwe, naiwe noija kuhurira omaririire kworobera Yehova. N’ekirikurugamu, omukago gwawe nawe nigwija kuhama, kandi noija kushemererwa. Reero noija kuba nooyenda kugambira abandi ahari Yehova. (Shoma 2 Obusingye 34:18, 19.) Ku orikwega Baibuli, noobaasa kwetegyereza ngu hariho emiringo mingi ei orikubaasa kwongyera aha buheereza bwawe. Kyaba nikwo kiri, teeraho munonga kukora empindahinduka ezi, nk’oku Yosia yaazikozire.

20, 21. (a) Abagabe bana abu twagambaho nibashushanisa ki? (b) Nituza kugamba ahari ki omu kicweka ekirikukurataho?

²⁰ Nitubaasa kwegyera ki aha bagabe ba Yuda aba bana abaaheereize Yehova n’omutima gwabo gwona? Abashaija aba boona bakaba bamaririire kushemeza Yehova n’okumuramya ebiro byona. Baakesiga Yehova obu abazigu b’amaani baabataahirira. Ekikuru munonga, bakaheereza Yehova ahabw’okugira ngu nibamukunda.

²¹ N’obu abagabe aba bana baabaire batahikiriire kandi barikukora enshobe, bakashemeza Yehova. Akareeba ekyabaire kiri omu mitima yaabo ,kandi akaba naamanya eki barikukunda. Naitwe tituhikiriire kandi nitukora enshobi. Kwonka Yehova naija kutusiima yaareeba ngu nitumuheereza n’omutima gwaitu gwona. Omu kicweka ekirikukurataho, nituza kugaaniira aha ki turikubaasa kwegyera aha nshobe z’abagabe aba.